المشاركات

عرض المشاركات من 2013

تطعيم

صورة
من حوالي سبعتاشر تمنتاشر سنة .. واحدة قريبتي شغالة في وزارة الصحة ، قالت لي أن فيه حملة تطعيم تبع الوزارة وعاوزين شباب ، وهايدوهم في اليوم عشرة جنيه (مش فاكر المبلغ بالظبط) .. المهم رُحت الوزارة ومنها وزعوني على مكتب صحة تاني في منطقة ما .. أنا افتكرت إني هاقعد على مكتب زي الدكتور أو حتى يا سيدي زي الممرضة والناس تجيب عيالها تطعمها في المكتب .. لكن ، اتضح إني هانزل ألف ع البيوت مع موظف ودادة كبيرة في السن وكولمان فيه التطعيمات محفوظة في تلج وكراسة بنكتب فيها اسم العيل اللي طعمناه وسنه وعنوانه !! .. بصراحة أنا ساعتها اتكسفت !! بس قلت آهو أي حاجة أحسن من القعدة .. أول ما خرجنا من الشارع اللي فيه المكتب بتاع الصحة ، لقيت لك الموظف اللي معايا إداني البالطو الأبيض وخلع !! طب وبعدين يا دادة ؟؟ إيه العمل ؟؟ .. يا أخويا ما تقلقش !! امشي معايا بس وأنا هاخلصك في نـُص ساعة !! .. آمين !! سيري يا دادة على بركة الله .. يا دوب يا معلم جينا على ناصية أول شارع وقالت لي : يا للا انده .. أنده على مين ؟؟ .. يا أخويا انده ع الناس عرفهم إن فيه تطعيم !! .. لأ طبعاً !! إستحالة انده !! أنا ما أعرفش أنده !! ..

ناس و ناس

صورة
فيه ناس تألفها بالعـِشرة وناس تكرهها م السيرة وناس فيك غصب منحشرة وناس ليك تابعة وأسيرة وناس تراضيك تحيرها وناس تحتار تراضيها وناس تسعى لها ف الوحدة وناس تلسعها وحديها وناس تطلبلك الأحسن وناس من عينها تتحصن وناس تتمنى تؤمرها وناس تخدمها تتفرعن وناس بتموت عشان كلمة وناس توعد ولا توفيش وناس بتفصص الكلمة وناس ع الفطرة ما تخبيش

عن الشتا - كلاكيت تاني مرة

صورة
من الحاجات اللي باحس بقيمتها أكتر في الشتا وباشتاق لها دايماً هي ريحة الشمس فِ البطاطين .. يا سلام لما تيجي تتغطى بيها بالليل كده فِ عز التلج وتلاقيها وثيرة وحنينة وبتدفي .. تشم فيها ريحة الشمس ، وكأنها كانت نايمة ع السرير ومتغطية بالبطانية دي وأنت رحت متسحب واتدفست معاها تحتها .. بتحس بزغب الذرات الصغيرة أوي أوي اللي زي ذرات الغبار الناعمة واللي كانت كام شعاع واتفتفتوا على البطانية .. بتحس كأنك عيل صغير نام فجأة في حضن باباه اللي لابس بيجامة كستور مقلمة ، لحد ما خدوده ورّدِت ونملت على شكل دواير معرجة :)) .. (فاصل) المدام دخلت عليا من شوية وأنا باكتب وسألتني تجيب حمص الشام ولا تعمل سحلب ؟؟ .. فقلتلها تجيب حمص الشام عقبال ما تعمل السحلب   :D  طعمه جامد بصراحة اتفضلوا وبلاش أنا !! .. كنا بنقول إيه ؟؟ .. أه الشتا !! .. وبمناسبة حمص الشام والسحلب .. الشتا يعني الكاكاو والقرفة باللبن اللي عليها رشة جنزبيل والهوت شوكليت والحلبة المغات والبليلة والكركدية السخن والشاي بالليمون (اللي باكرهه) .. الشتا يعني المفتقة وسد الحنك والبطاطا وفطيرة سخنة بالسكر .. الشتا يعني الحواوشي وشوربة العدس با

البوست المفتوح

- بعيداً عن آفة الكتابة وسمتها الجلية هذه الأيام "هانقول إيه إزاي لمين علشان إيه؟" .. افترض معايا عزيزي القاريء إنك قريت هنا بوست غير منشور وغير مرئي وليس له وجود من الأساس .. حضرتك مشكوراً هاتعلق وأنا هارد عليك .. مش علشان أي سبب منطقي غير لأننا عاوزين نهرب من سخافة "هانقول إيه إزاي لمين علشان إيه؟" .. ممكن يكون موضوع البوست الوهمي (اللي أنت المفروض قريته) هي مجرد فكرة / أسئلة في دماغك أنت ، بس ما كتبتهاش قبل كده أو مش عارف تتكلم فيها مع حد ، أي حد .. ممكن تكون حاجة أنا كتبتها قبل كده وكنت عاوز تعلق عليها .. أو حاجة ما كتبتهاش وكنت مستنيني أكتبها (سواء أنا اللي كنت مستنيني أو أنت مش هاتفرق) . * ملحوظات: 1- التعليقات مفتوحة لغير معرف. 2- البوست اللي ما اتكتبش ده مش مكتوب لحد ، فمش عاوز حد يخنقني ويفكر وهو بيعلق هايقول إيه إزاي لمين علشان إيه ؟ .. واللي هايتحرج يعلق بغير معرف ، ويا ريت ما يعلقش أصلاً. 3- الله يكرمكم ،  ممنوع  أي كلام في حال البلد. 4- البوست ده هايتمسح لاحقاً. GO

زيادة المرتبات

- الناس قايمة نايمة تحلم بزيادة المرتبات !! .. فاكرين أن المرتب هايزيد بتاع مليون جنية !! .. امبارح كنت قاعد مع واحد بيحلم أن مرتبه زاد خمسميت جنية !! .. ودخل بيهم جمعية .. وقبض العشرتلاف جنية واشترى له حتة عربية صغيرة وراح رايح مش عارف عند مين الميكانيكي ظبطهاله وراح عند السروجي عمل لها فرش جديد وبعد كده ركب لها جنوط وبقى كل اللي يشوفها يتوحم عليها ، لدرجة أن فلان اللي راكب مرسيدس قال له : تبدلها بعربيتي ؟؟ بس هو ما رضيش !! لأن : "يا عم ده مش تعبان في فلوسه وتلاقيه جايبها من فلوس حرام ، بس هي الكحكة في إيد اليتيم عجبه !! وعلشان كده أنا هاعلق فيها دلاية زرقا علشان الحسد والعين !! .. أحلى حاجة بقى يوم الجمعة بعد الصلاة كده ، آخد المدام والعيال وأفسحهم بالعربية !! .. الدنيا بتبقى رايقة والبلد فاضية .. أه يا عم خلليهم يعيشوا شوية زي بقية البني آدمين !! .. آهو يغيروا جو ويتفرجوا على البلد !! .. العيال كمكمت من القعدة في البيت ، ونازلين تكسير في الحاجة علشان ما بيخرجوش !! .. عارف حتى لو هانطلع نقف على الدائري ، ومعانا الساندوتشات وترمس الشاي !! كفاية بس أن الواحد يبص على منظر النيل من

التاج

صورة
- فاكرين زمان من تلات أربع خمس سنين كده ، كانت انتشرت في المدونات لعبة التاجات دي ، كانت موضة وقتها إنك تدخل أي مدونة وتلاقي صاحب/ة المدونة مفتكس شوية أسئلة ويمررها لكام واحد علشان يجاوبوا عليها .. ولأني شايف إن المناخ العام للمدونات يفتقر إلى البهجة ، فحبيت إننا نلعب اللعبة دي تاني :)) في التاج ده ، كلنا هانفتكس الأسئلة مع بعض .. اللي عاوز يشترك في التاج يحط الأسئلة اللي تعجبه .. بشرط أنه هايجاوب على أسئلته وباقي الأسئلة في مدونته .. أه مش عاوزين خَم !! .. يعني ما يجيش واحد يسأل ويجري !! .. يعني مثلاً أنا هاحط خمس أسئلة وفلان تلاتة وفلانة سبعة يبقوا خمستاشر سؤال كل واحد فينا احنا التلاتة ملزم يجاوب عليهم في مدونته بصراحة طبعاً .. ياللا يا جماعة عاوزين الكل يشترك ، وبالذات الناس اللي غايببن بقالهم فترة !! .. ويا ريت الأسئلة -- بعد إذنكوا طبعاً -- تكون حلوة كده ومرحة ويا حبذا لو فيه أسئلة مفتكسة ومطرقعة !! .. والهدايا دي كلها للي هايشتركوا في التاج .. كل واحد ياخد الهدية اللي تعجبه ، إن شالله ياخدهم كلهم .

عشر قصص قصيرة

(1)   يفتح الدرج (2)   يخرج القلم (3)   يغلق الدرج (4)   يفتح الدرج (5)   يخرج ورقة (6)   يغلق الدرج (7)   يفتح الدرج (8)   يضع الورقة والقلم (9)  يغلق الدرج (10)   تمت. ـــــــــــــــــــــــــــــــــــــــــــــــــــــــــ باعتذر لو كانت القصص طويلة شوية، أو حصل تشتيت عند القاريء .. بس أنا أصريت إني أسهب في السرد والتفاصيل علشان كل شخصية من الشخصيات تاخد حقها خاصة مع الأحداث الكتيرة اللي في كل قصة .. وبالمناسبة؛ الشخصيات والأماكن الواردة في القصص كلها مقتبسة من شخصيات وأماكن حقيقية بس طبعاً أنا غيرت الأسماء .. نيجي بقى للنهاية، أنا كنت ممكن أخلي النهاية مفتوحة!! يعني مثلاً: "يفتح الدرج" .. بس كان هاييجي واحد من حضراتكم ويقول لي أنها نمطية وتقليدية واتهرست في عشرويمت عمل قبل كده!! .. لكن لو لاحظتوا تسلسل الأحداث هاتلاقوها جت بشكل مفاجيء وغير متوقع وده اللي خللاها تبان كأنها جديدة!! .. ياللا بقى عاوز رأيكوا بصراحة من غير مجاملات!! .. ويا ريت لو فيه أي ألفاظ مش مفهومة في القصص تقولوا لي عليها .. وعاوز أعرف منكوا إيه أكتر قصة فيهم عجبتكم؟؟ .. وأنهي شخصية اتأثرتوا بيها وحسيتو

ترجمة فيلم The Danish Poet

صورة
ترجمة فيلم الأنيميشن القصير الرائع  The Danish Poet  الفائز بأوسكار 2007 

الحاج ماهر

صورة
كنا ساعتها في تانية جامعة .. لما واحد صاحبي كلمني وقال لي أنه عاوز يتقدم لواحدة زميلته معجب بيها في سنة أولى معاه في نفس الكلية وعاوزني أروح معاه نقابل باباها .. أنا ساعتها بصراحة اتكسفت .. وحاولت أهرب منه منعاً للإحراج ، لكنه صمم .. قلت له بس احنا لازم ناخد معانا حد كبير ، يعرف يتكلم مع أهلها .. وبعد تفكير عميق ، ما لقيناش أحسن من عم ماهر القهوجي .. آهو الراجل عارفنا ومربينا معاه ع القهوة .. وفعلاً ، روحنا لعم ماهر وكلمناه وقعدنا نفخم ونعظم فيه ونتحايل عليه لحد ما وافق أنه يروح معانا المشوار ده بتلاتين جنيه بس !! عم ماهر ده بقى كان راجل مسخرة السنين .. كنا مسميينه ماهر ألووووو .. لأنه كان على طول يرمي بلاه على الخلق علشان أي مصلحة وهو بيقول : ألووووو .. يعني يشوف حد فينا مولع سيجارة يروح جاي واقف جنبه ويقول له : ألووووو ، فبكل أدب واحترام يروح اللي مولع سيجارة يدي له واحدة .. اتقاءً لشر غلاسته .. فياخدها منه عم ماهر ويقول له وكأنه بيغيظه : ربنا يعوض عليك !! .. لو شاف بتاع تين شوكي واقف قدام القهوة يسيبه واقف ما يكلموش ، بس كل شوية تلاقي بقه بيلعب من أكل التين ويقول للبياع  : ربنا يعوض

ولاد حلال

صورة
- والله العظيم انتوا ولاد حلال وفيكوا الخير وربنا بيحبكوا عشان نيتكوا صافية .. وعشان احنا صحاب وبيننا عيش وملح وتعليقات ؛ أنا مش هاستخسر فيكوا المرمة دي (المصلحة يعني) .. شوفوا !! .. فيه شركة ألمانية بتشتغل في مجال الدعاية والإعلان والنشر وتسويق الكتب الإلكترونية .. عاوزين ناس تشتغل مدخلين بيانات من منازلهم ؛ شرط بس أنهم يكونوا بيعرفوا يكتبوا على الوورد .. طبعاً كلكوا ما شاء الله أساتذة في الكتابة وزي البرابنط !! .. يعني مثلاً كتابة رسايل علمية وأبحاث / إدخال بيانات عن سلع / ملء وتصنيف كتالوجات ... إلخ . الشغل هايكون لمدة ساعتين في اليوم (طبعاً ده بيعتمد على سرعتك في الكتابة) .. المهم يعني إنك تسلم الشغل اللي هاتستلمه في خلال 24 ساعة !! .. الشغل لمدة خمس أيام في الأسبوع (السبت والأحد أجازة) .. والعقد في البداية هايكون لمدة ست شهور .. بأجر أسبوعي 350 يورو .. أيون 350 يورو مكتوبة صح !! .. وهاوفر عليك أنك تدور على سعر اليوور ، وهاقول لك أن اليورو النهاردة بتسعة جنيه ونص !! .. يعني هاتقبض في الأسبوع 3325 بلبل آآقصد جنيه .. يعني في الشهر بـ 13300 .. يعني في خلال الست شهور الأولانيين هاتكون