تطعيم
من حوالي سبعتاشر تمنتاشر سنة .. واحدة قريبتي شغالة في وزارة الصحة ، قالت لي أن فيه حملة تطعيم تبع الوزارة وعاوزين شباب ، وهايدوهم في اليوم عشرة جنيه (مش فاكر المبلغ بالظبط) .. المهم رُحت الوزارة ومنها وزعوني على مكتب صحة تاني في منطقة ما .. أنا افتكرت إني هاقعد على مكتب زي الدكتور أو حتى يا سيدي زي الممرضة والناس تجيب عيالها تطعمها في المكتب .. لكن ، اتضح إني هانزل ألف ع البيوت مع موظف ودادة كبيرة في السن وكولمان فيه التطعيمات محفوظة في تلج وكراسة بنكتب فيها اسم العيل اللي طعمناه وسنه وعنوانه !! .. بصراحة أنا ساعتها اتكسفت !! بس قلت آهو أي حاجة أحسن من القعدة .. أول ما خرجنا من الشارع اللي فيه المكتب بتاع الصحة ، لقيت لك الموظف اللي معايا إداني البالطو الأبيض وخلع !!
طب وبعدين يا دادة ؟؟ إيه العمل ؟؟ .. يا أخويا ما تقلقش !! امشي معايا بس وأنا هاخلصك في نـُص ساعة !! .. آمين !! سيري يا دادة على بركة الله .. يا دوب يا معلم جينا على ناصية أول شارع وقالت لي : يا للا انده .. أنده على مين ؟؟ .. يا أخويا انده ع الناس عرفهم إن فيه تطعيم !! .. لأ طبعاً !! إستحالة انده !! أنا ما أعرفش أنده !! .. ساعتها كنت عامل زي أحمد مظهر في الأيدي الناعمة ، لما قال له : واد فـِتك يوقع الستات أنا ؟؟ .. قالت لي : هو أنت هاتتكسف ولا إيه ؟؟ ابدأ بس من آخر الشارع وتعالى ، عقبال ما أكون ندهت ع الكام بيت اللي في الأول !! وراحت قالعة الجلابية السودا وشمرت كمام الجلابية المشجرة اللي تحتها !! أنا اتخضيت ورحت راجع لورا وقلت لها : إيه ؟؟ فيه إيه ؟؟ .. لقيتها راحت مزعقه بعلو حسها : ياللا التطعيم !! اصحوا يا نسوان يا موخمين !! وبعدين قالت لي : أصل اللون الأسود بيقبـُض العيل !! وبعدين أنا عارفاهم كلهم دي حتتشي !!
متهيألي إنك سمعت مرة بتاع السكسونيا وهو بينده ؟؟ .. بتلاقيه ماطط بوزه ولاوي شلاضيمه خِلف خلاف (زي اللي بالع شبـّة) ويزعق بعد ما يضرب ع الدربـُكة : إيييـ ساااك سونياااااااااا (بعد كده بيكرر : أوونيا كصدى صوت) .. آهو أنا كنت بانده زيه كده في يوم من الأيام !! بس الفرق إني كنت باقول : تـَ طـ عـ ي ي م !! .. في الأول كنت مكسوف جداً وأنا بانده !! كنت حاسس إن الناس كلها بتبص عليا !! .. بس بعد مرتين تلاتة بالظبط ، اكتشفت إني منادي أوبرالي بالفطرة ، بس منه لله التنسيق !! .. لدرجة إن الموضوع عجبني وبقيت بآلف نداءات !! خاصة بعد ما الدادة استلفت لي ميكروفون من واحد قريبها عدينا على بيته !! يااااااه إحساس تاني خالص وأنت بتجعر كده ع الملأ !!
عقبال ما ندهت ع الشارع من ورا ورجعت ، كانت الناس ابتدت تهل وتتزاحم !! .. لدرجة إني ما كنتش ملاحق أكتب أي بيانات !! .. ساعتها الدادة قالت لي : سيبك من الكتابة دلوقت وطـّعم معايا خللينا نخلص !! .. بس دي مسئولية يا دادة وفيه تفتيش ؟؟ .. قالت لي : وهو يا ابني فيه حد عارف إن فيه ناس هنا علشان ييجي يفتش ؟؟ .. قلت ما بدهاش !! .. شمرت كمامي ومسكت القطـّارة وقلت يا مُسهل ، وأفتح لك بق أول متسول علشان أطعمه ، ألاقيلك دبانه جوه بـُق الواد !! أ..ــــــــا !! يا واد تـِف القرف اللي في بقـُك ده !! .. نأه !! .. لأه ؟؟ ده كـِخ يا حبيبي ، تـِف يا بابا !! بتمـُص إيه جتك القرف !! هو ملبس ؟؟ فين أمك ياد ؟؟ .. يوطي ع الأرض يجيب طوبة يحدفني بيها وهو بيقول : ** أمك !! .. تفاديت الطوبة بأعجوبة وأنا أرد عليه صائحاً : أنت بتشتم ياد ؟؟ .. شوية وجت واحدة مجرجرة شحط !! .. فين يا ستي العيل اللي هاتطعميه ؟؟ .. ما هو قدامك أهه يا أخويا اسم الله على نظرك !! .. ده ؟؟ ده أطول مني ؟؟ .. ما تطعم وأنت ساكت أنت هاتحسده ؟؟ .. أحسد مين ؟؟ ده طفل ؟؟ فيه طفل بلحية ؟؟ هنا أبدأ ألاحظ إن الشحط اللي معاها متخلف عقلياً !! فاعمل نفسي باترجم الكلام الإنجليزي المكتوب على القطـّارة : تحذير !! لا يستخدم للأطفال فوق خمس سنوات وإلا سبب ضمور وتلاشي للأعضاء التناسلية !! .. طب ما هو مكتوب ماشي أهه يعني ينفع !! .. ماشي إيه ؟؟ أنا جبت سيرة ماشي ولا قاعد ؟؟ .. هنا تنقذني الدادة وتقول لها بالبلدي : يا ولية يعني التطعيم غلط ع المسائل !! .. تشهق الولية وتسحب الشحط وهي بتقول : لا يا أختي بعد الشر !! هايبقى لطف من فوق ومن تحت !! .. ناهيك بقى عن اللي تقول لك : انتوا ما بتطاهروش يا أخويا بالمرة ؟؟ .. واللي تتخانق معاك علشان عاوزاك تنقط لابنها كذا نقطة ، على أساس أنها رضعة !!
بعد ما بدأنا نخش في مصارين المنطقة وحواريها ، اكتشفت عالم تاني خااااالص !! .. ناس عايشة تحت الأرض بجد !! .. يعني تبقى ماشي ف الحارة من دول وتلاقي فتحة صغيرة بارتفاع عشرين سنتي فوق الأرض ، تكتشف بعد كده إنها شباك أوضة !! يعني لو شبيت شوية برجلك تشوف الشقة اللي ف أول دور بكل سهولة !! بقيت حاسس إننا ماشيين جوه بيوت الناس دي وبنتنقل من أوضة للتانية !! يعني تسمع صوت طشة البتنجان في الطاسة اللي في الأوضة اللي في البدروم ، بس تشم الريحة في أول بلكونة !! تبدأ تجوع ع الريحة ، وبعد خطوتين بالظبط ، تلاقي واحدة ست كبيرة قاعدة على حصيرة وحواليها شوية فراخ وبط بتعزم عليك وبتحلف ميت يمين وهي ماسكة رغيف عيش وعليه حتتين بتنجان وقرن فلفل مقلي !! فما تملكش غير إنك تقعد جنبها ع الأرض تاكل وتدعيلها ، ، وتكتشف أن طعمه أحلى ميت مرة من الكباب !! تروح تغسل إيدك من الحنفية العمومية وترجع ، تلاقي راجل على باب الله قاعد على دكة بيقدم لك الشاي !!
بعد ما بدأنا نخش في مصارين المنطقة وحواريها ، اكتشفت عالم تاني خااااالص !! .. ناس عايشة تحت الأرض بجد !! .. يعني تبقى ماشي ف الحارة من دول وتلاقي فتحة صغيرة بارتفاع عشرين سنتي فوق الأرض ، تكتشف بعد كده إنها شباك أوضة !! يعني لو شبيت شوية برجلك تشوف الشقة اللي ف أول دور بكل سهولة !! بقيت حاسس إننا ماشيين جوه بيوت الناس دي وبنتنقل من أوضة للتانية !! يعني تسمع صوت طشة البتنجان في الطاسة اللي في الأوضة اللي في البدروم ، بس تشم الريحة في أول بلكونة !! تبدأ تجوع ع الريحة ، وبعد خطوتين بالظبط ، تلاقي واحدة ست كبيرة قاعدة على حصيرة وحواليها شوية فراخ وبط بتعزم عليك وبتحلف ميت يمين وهي ماسكة رغيف عيش وعليه حتتين بتنجان وقرن فلفل مقلي !! فما تملكش غير إنك تقعد جنبها ع الأرض تاكل وتدعيلها ، ، وتكتشف أن طعمه أحلى ميت مرة من الكباب !! تروح تغسل إيدك من الحنفية العمومية وترجع ، تلاقي راجل على باب الله قاعد على دكة بيقدم لك الشاي !!
كانت المشكلة اللي بتواجهني في نهاية كل يوم هي بيانات العيال !! .. يعني كنا بنخلص التطعيم في ساعة زمن ، لكن كنت باضطر أقعد تلات أربع ساعات ع القهوة علشان أألف أسامي !! .. كتبت كل أسامي صحابي وأهاليهم وجيرانهم وأسامي المطربين والمشاهير وبرضه ما كنتش بالاقي أسامي أكتبها !! .. يعني مثلاً : محمد سيد علي / محمد علي سيد / سيد محمد علي / سيد علي محمد / علي محمد سيد / علي سيد محمد / علي علي محمد / محمد محمد علي .... إلخ .. لدرجة إني كنت باخللي كل واحد من صحابي يكتب لي صفحة فيها أسامي وأقعد أكررها !!
تحرجني حضرتك وتسألني : طب الأسامي وكنت بتكررها ، العناوين كنت بتتصرف فيها إزاي ؟؟ .. أقول لك : في أول سطر في خانة العنوان كنت باكتب : " لا يوجد " .. وتحتها في كل سطر خط أزرق صغير !!
يا أهلا بمغامراتك يا باشا
ردحذفولله يا باشا انا وصلت السعوديه امبارح وبدخل النت بصعوبه- بس قلت انشر حاجه واعدي اشوفك كده وقلت الحمد لله طالما نزلت موضوع وفتحت التعليق يبقى كده الحمد لله النفسيه بقت في الطالع
راجعلك تاني اوعى تقفل التعليقات تاني
moataz farouk
ردحذف:))
إيه ده يا دكترة هو أنت عندك محمد بتاع النت بيرخم عليك برضه وبيفصل النت ؟؟
D:
منور الدنيا كلها يا كبير والله العظيم .. وألف ألف مليون حمداً لله على سلامتك
:))
مستنيك يا غالي
ايه دا!!
ردحذفاهــ ياربى!! اهـــ ياقلبى!!
التعليقات مفتوحة أمششش ممكن ابدا!!
اهـ والله مفتوحة
ردحذفمش كدا وكدا طيب الحق
احط تعليق كمان قبل ما يصحى
فكرتنى بالذى مضى!
ردحذفبس مكنش تطعيم لكن حاجة أسمها
الزيارات المنزلية !!حاجة كده
تجيب الوجع عفوا الشحط من دول
بيشتغل فى الحكومة ولا حتى القطاع
الخاص ومش عاوز يروح الشغل وكمان
عاوز يصرف له الدوا!!يبلغ زيارة منزلية ويكتبلك العنوان:سبعتاشر
طمنطاشر شارع سوسو الصغير المتفرع من شارع سوسو الكبير!!المهم انت ملامض وفى اول حياتك الوظيفية وعاوز تثبت كفاءة بقى تروح وتلف وتووووصل للعنوان وتسال عن الافندى محدش يعرف
الاسم دا ليييه؟اصل دا الاسم الموجود فى شهادة الميلاد لكن الكل عارف الاسم بتاع الدلع وبس!!
وكله كوم والستات لما يبلغوا زيارة منزلية:محدش يعرف سعاد ولا غيرها الكل يعرف ام فلان وبنت فلان!!
ردحذفياخى والله حاجات ما يعلم بيها الأ ربنا الحمد لله الذى عافانا مما ابتلانا به قبل هذا الف حمد وشكر لله
ردحذفكفاية كدا بقى
ردحذفاهـ كلمة أخيرة ماتقفلش
التعليقات فااااااااااهم :)
احلى ما فى تدويناتك انها ليست من وحى الخيال هى تجارب مررت بها حضرتك ونقلتنا معك لعالم يجعلنا نتخيل حتى الوجوه التى تتكلم عنها وانا اعتبره قمه الذكاء .. ..تنقلنا الى عالم رغم البؤس والفقر الا انه جميل لانه يصور لنا القلوب الطيبه اللى عايشه على البساطه وراضيه بما قسمه الله حتى لو لوانت مجبره انها ترضى ..اتمنى ان تبقى فقره التعليقات مفتوحه بمناسبه العام الجديد وكل سنه وحضرتك والمدام بالف الف خير
ردحذفعاوزة اقول
ردحذفWelcome back :)
البوست قتلني من الضحك
تسلم اﻷيادي :)
تحياتي
norahaty
ردحذف:))
هههههههههههههههههههههههههههه
ربنا يسعد قلبك يا دكتورة ويفرحك زي ما فرحتيني بتعليقاتك الجميلة وزيارتك الكريمة :)
- الزيارات المنزلية دي ياما عانيت منها ولسه باعاني والله في الشغل .. الواحد من دول يغيب وييجي في التحقيق يتحجج بأنه بلغ زيارة منزلية وما حدش راح له .. بصراحة حضرتك إن جيتي للحق عمري ما شفت دكتور راح لموظف ، كل اللي بيعملوه عندنا أنهم بيستنوا لما الموظف يرجع للشغل ويعملوا له جواب تحويل على التأمين الصحي .. لدرجة أن في وقت من الأوقات كان عندنا موظف متعهد أنه يخلص للموظفين الاجازات المرضية من التأمين من غير ما يروحوا أصلاً ، كان بيقاولهم ع اليوم بخمسة جنيه تقريباً !! .. بعد كده لما بقى ييجي لي موظف في التحقيق ويقول لي أنه كان مبلغ زيارة منزلية ، باجيب من الآخر وأحسب له أيام الغياب أجازة اعتيادية (لأنه غالباً بيكون مخلص أجازاته العارضة) بدل ما أخصمها له من المرتب .
كل سنة وحضرتك طيبة وبألف خير إن شاء الله ويا رب تكون سنة جديدة سعيدة على حضرتك وعلى مصر وعلى الناس كلها بإذن الله
:))
نورتينا
ghada issa
ردحذف:))
ربنا يحفظك يا أستاذتنا ويبارك في حضرتك ويسعدك ويفرح قلبك زي ما بتفرحينا بتشريفك الكريم وتشجيعك الدائم :)
" القلوب الطيبة اللى عايشة على البساطة وراضية بما قسمه الله "
أه والله فعلاً .. حضرتك جبتي الخلاصة في الكلمتين دول :)
كل سنة وحضرتك طيبة وبألف ألف خير وصحة وسعادة وإن شاء الله يكون عام جديد سعيد عليكي وعلى أسرتك ، تحققي فيه كل ما تتمنين
:))
نورتينا
جيلان حمزة
ردحذف:))
يا ألف أهلاً وسهلاً يا أستاذتنا ، منورانا والله
تسلمي يا أستاذتنا من كل شر ، ربنا يبارك في حضرتك ويكرمك ويحفظك ويفرح قلبك زي ما بتفرحينا بتعليقاتك الجميلة ومرورك الرائع الكريم
بافرح جداً لما باكتب حاجة وبتعجب حضراتكم ، ربنا يجعلنا عند حسن ظنكم دايماً
كل سنة وحضرتك طيبة وبألف خير وصحة وسعادة وإن شاء الله يكون عام جديد سعيد عليكي وعلى أسرتك وتحققي فيه كل ما تتمنين
:))
نورتينا
ردحذف* التعليقات
.
.
.
إن شاء الله التعليقات هاتكون مفتوحة اعتباراً من البوست الجاي :)
الفكرة كلها والله العظيم ، إني ما باحبش أرد على الناس وأنا مش في الموود أو بعد البوست بفترة طويلة أكون نسيته فيها !! بيبقى دمي تقيل وباحس إني في منتهى السخافة وقلة الذوق !! .. والناس مالهاش أي ذنب !!
وبصفة عامة والله العظيم تلاتة أنا باعتز جداً وبافرح جداً بكل حد بييجي ويشرفني ويعبرني حتى لو بمجرد القراية من غير تعليق .. وباعتبر أن تعليقات حضراتكم أرقى وأجمل ما في المدونة .. أنا ما ليش في الفيسبوك ، والمدونة هي المكان الوحيد اللي باقدر أتواصل فيه مع حضراتكم ونتطمن على بعض ، ما تتخيلوش فرحتي بتبقى قد إيه لما بيشرفني زميل / زميلة غايب بقاله زمن عن التدوين ويدخل مخصوص علشان يسلم ويتطمن عليا وبالذات الناس اللي أنا عارف أنها ما بتعلقش عند حد ، والله بابقى زي العيل الصغير اللي بيتنطط من الفرحة :)
إن كان فيه فضل لحد -- بعد ربنا سبحانة وتعالى -- لاستمرار المدونة دي فهو لحضراتكم جميعاً دون إستثناء .. الناس الحلوة الجميلة ، رفقاء الطريق .. سواء اللي اتشرفت بلقاءهم على الطبيعة وأكلنا عيش وملح مع بعض ، أو حتى الناس اللي ما أسعدنيش الحظ بأني أشوفها واتعرفت عليها هنا وشاركتني كل كلمة باكتبها وعلمتني وانتقدتني وشجعتني علشان أستمر وأحسن من مستوايا وأكون عند حسن ظنهم .
تعليقاتكم بتفكرني من وقت للتاني بأني متراقب -- ولله المثل الأعلى طبعاً -- وأن زي ما زوجتي بتقرالي وبتشجعني وبتنتقدني ، فيه برضه أخوات ليا وأمهات وبنات صغيرة بيقروا لي وبيتابعوني ولازم أراعي ربنا وأخللي بالي من كل لفظ باكتبه ، سواء هنا أو لما أعلق عند حد في مدونته .
آخر حاجة علشان أبقى قلت اللي في نفسي ونردم على الموضوع ده !! .. الفقرة الأخيرة (اللي أولها تعليقاتكم بتفكرني .... إلخ) يا ريت يا ريت يا ريت وبدون زعل أو حساسية ، الناس اللي بتقرالي وما كانتش بتعلق قبل كده وناوية تعلق بعد كده ، ياخدوها على نفسهم ويفتكروها (ويفكروني بيها لو نسيت) لما ييجوا يشرفوني ويعلقوا هنا !! .. أنا باحسن الظن في الله دايماً وبافترض دايماً حسن النية في الجميع (حتى اللي ما أعرفهمش) ولما زماااان كنت بالاقي واحد شطح أو واحدة اتسهوكت في تعليق كنت بالتمس لهم العذر وباقول ما يقصدوش .. ولما كان الموقف بيتكرر كنت باضطر أحذف التعليق .. أنا باحاول دايماً على قد ما أقدر أكون مجامل ومهذب (على غير الحقيقة :D) في ردودي ، علشان الناس المحترمة مالهاش ذنب تقرا وتشوف أي ألفاظ خارجة وغير لائقة .
طب افرض مثلاً : إن حد لا موأخذة يعني الشيطان Fuck Him في أفكارة وحب يستظرف في تعليق ؟؟ .. هاطلع تلاتة ..... إحم إحم احنا قلنا إيه ؟؟ D:
كل سنة وحضراتكم جميعاً طيبين وبألف خير وصحة وسعادة ورضا وسلام وراحة بال ، ويا رب تكون سنة جديدة سعيدة علينا كلنا إن شاء الله