هجايص

- احنا بقالنا فترة مراقبينك، في البيت في الشغل ع القهوة، ولاحظنا أنك بتحب تشخبط كتير في الورق وبتقعد تكتب أرقام.  - عادي يعني باحسب اللي صرفته، الفلوس اللي عليا، الفلوس اللي محتاجها، كده يعني. - كده يعني؟؟ ممم .. أنت هتستعبط ياد؟؟ فاكرنا مش عارفين أنك بتلعب في الزمن؟؟ - ألعب في الزمن؟؟ - أه يا أخويا، اعمل نفسك بقى مش واخد بالك. - يا فندم هو الزمن ده لعبة أي حد يلعب فيه؟؟ وبعدين هالعب فيه إزاي؟؟ وليه؟؟ - ألعب باليه. إشمعنى ياد سنة 49 اللي بتحب تروحها؟؟ - إيه تسعة وأربعين دي؟؟ .. ((يناوله ورقة مكتوب فيها: 1949)). - أاااه، ده المرتب اللي قبضته الشهر اللي فات، سيادتك تقدر تتأكد بنفسك. - عارفين ومتأكدين أنك قبضت المبلغ ده علشان غبت 5 أيام الشهر اللي فات، واتخصموا منك. - طب الحمد لله أنكم عارفين. - بس مش شايف أن لما الموضوع يتكرر سنة بحالها تبقى حاجة غريبة شوية؟؟ - لأ مش غريبة، لأني باسافر البلد كل يوم أربع آخر النهار، وباقعد خميس وجمعة وأرجع السبت

دايما نفس القعدة ما بتتغيرش .. هي؛ قاعدة مربعة ع الحصيرة، قدامها حلة المحشي .. هو؛ قاعد بعيد عنها شوية على الكرسي الخشب القديم المتنجد بالسعف، بيهوي ع القوالح الخابية فوق حجر المعسل بحتة كرتونة .. بعد ما يشد الكام نفس القصيرين في الأول علشان يطقطق الحجر؛ ترفع وركها الضخم سِنة صغيرة من ع الشلتة وتسحب علبة السجاير السوبر من تحتها وتزقها ناحيته وتقول له: ولع لي .. هو أنتي ما تسيبنيش أتهنى ع الحجر أبدا؟؟ لازم تقلي مزاجي كده كل مرة؟؟ .. يعني أنت تعدل مزاجك وأنا لأ؟؟ مش كفاية باعمل لك السم اللي هتتسممه؟؟ .. يعني أنا هتسممه لوحدي؟؟ ما أنتي رخرة هتطفحي منه؟؟ .. يا راجل يا ني اخلص كان زمانك ولعتها!! .. وما تولعيهاش ليه م الباجور؟؟ .. تضحك وتتهز وتترج: أصلي ما باتكيفش منها غير لما تحطها في حنكك الأول .. يتكسف، يبتسم، يهرش في الطاقية الصوف اللي على راسه، يركن ليّ الجوزة على حجره، يوطي يجيب علبة السجاير، يطلع واحدة يحطها في بقه، ويصطاد قُلاحة صغيرة بالماشة يولعها بيها، يكح كحتين، يقوم، يحط ليّ الجوزة ع الكرسي، يقرب إيده من بقها بالسيجارة، تمد بوزها علشان تلقفها، لكنه يقعد يحنسها وما يحطهاش .. تت