هجايص

طفلي الصغير، ذو الخمسة أشهر كان درسه الأول بالأمس عندما لوحت له "باي باي". ولأنه لا يستطيع الضحك بعد؛ ابتسم كثيرا بعينيه خالها لعبة، وظنني أداعبه "هيا اقترب واحملني" هكذا أخبرني جسده المتأهب عندما رفرف بذراعيه الصغيرين في سعادة "هيا هيا" هكذا صاحت الدُمى على ملابسه وبينما هو كذلك خرجت من الغرفة وأغلقت الباب على صوت بكائه ---- اليوم بكى قبل أن أضعه في مهده قبل أن ألوح "باي باي"  أشاحت الدُمى بوجهها عني قبل حتى أن أخرج من الغرفة

* باعتذر جدا لأي حد كان قراها (قبل التنويه) واتضايق من الألفاظ البذيئة اللي كانت مكتوبة وشيلتها .. حقكوا عليا يا جماعة والله، أنا آسف .. شكرا لحضراتكم. على المسافر ألا يبص وراه  شمال يمين حنينه هيشده  وألف حاجة وحاجة تترجاه  وكل حاجة بقوة هتهده  ***  PAUSE  ع الشوارع والحواري كمان  على نفس آااه الست في القهوة  على حاج غفل حبة ف الدكان  يصحى يسب الخلق على سهوة  ***   PAUSE  على ست م الشباك تدلدل حبل  وبتاع بطاطس عبى طلسقها  على قطة رخمة جنب عربية أكل  واقفة بتزغر للي طرّقها  ***   ما تخافش سافر بس ما تحفـِش  عمرك غموس للغربة ع الفاضي  ما تسيبش عمرك الحنين يقفش  ده الهم ذكرى تفصد الماضي  ***   على البنات الحلوة تستنى  أصل اللي سافر لجلهم راجع  وبكره كعب الحلوة يتحنى  والزفة تجري فاتحة ع الرابع  ***   على المسافر ألا يبص وراه 

يقوم من النوم ينام تاني لحد العصر عشان يصحى ويتغدا ويقعد بره ع القهوة لوش الفجر .. أقوم م النوم يكون راجع - صباح الخير - ما فيش مصروف .. يخش ينام لحد العصر !! *** ماما ضربتني بالشبشب عشان حافي وهاخد برد وقبل ما أرد كانت عطست ونطرت حبة في الشوربة اللي غطتها ونسيتها عشان تلحق زينات ومديحة في الكوربة ووصتني ما أفتنشي عليها لبابا (كذا مرة) وحبستنا ف الشقة وسكتها من برة .. فاضل لي جنيه كمان رشوة وأطلع نسخة ع المفتاح وأجيب لأختي حاجات حلوة وأسك عليها من برة وأنزل حافي في الشارع !! *** حبيبتي ف تانية إعدادي وأنا ف ستة يا دوب سنتين يا رب يا رب تسقطهم وأحصلها وتسقط تالتة بالمرة وأكون عديت وأروح ثانوي وتيجي تقوللي ذاكر لي -- هنا في البيت -- وتقعد جنبي ع المكتب وأوريها ..  حروف أسامينا ع المكتب :) *** * الصورة من النت

فيه ناس تألفها بالعـِشرة وناس تكرهها م السيرة وناس فيك غصب منحشرة وناس ليك تابعة وأسيرة وناس تراضيك تحيرها وناس تحتار تراضيها وناس تسعى لها ف الوحدة وناس تلسعها وحديها وناس تطلبلك الأحسن وناس من عينها تتحصن وناس تتمنى تؤمرها وناس تخدمها تتفرعن وناس بتموت عشان كلمة وناس توعد ولا توفيش وناس بتفصص الكلمة وناس ع الفطرة ما تخبيش

ف الروح تباريح وشوية ريح شرقانة لريحتك لو مهتم ف الروح كراكيب ومقابر جماعية لدباديب كلها دلوقتي بتنزف دم ف الروح فتارين لهدوم أطفالنا الـ مـُش جايين وارتاح يا جنين الحب عدم ف الروح تعاليق عشمانة تليق بفرح كان لينا وعمره ما تم بفرح مكتوب له يكون ميتم ***

يا ديكي يا صديقي اوعى تخرج بالفانلة النيللا نيللا نيللا أحسن تستهوى يا روحي وتفضل تعطس تِعدي الشلة الشلة شلة شلة والشلة حداجة بداجة آآجة متسلطنة مش محتاجة آآجة غير ربع وقية مزاجا على دستة ونص ستيللا يا ديكي يا صديقي اوعى تخرج بالفانلة أحسن تستهوى يا روحي وتفضل تعطس تِعدي الشلة يرضيك ييجي بكره يا ديك يا ديك أسخم م الليلة يا ديك يا ديك والفرح بسب الديك يجيك والهم مكلبش فينا تقولش ماسك علينا ذِلة يا ديكي يا صديقي اوعى تخرج بالفانلة أحسن تستهوى يا روحي وتفضل تعطس تِعدي الشلة يا دجاجة جاجة جاجة البسي شفاتيشي آتيشي تيشي تيشي يا ولية دي ما فيهاش حاجة تحطي كولونيا تحت الريش ِ ريشي ريشي ريشي واعملي كدهوه ف حواجبك كدهوه لاعبيه بالبيضة يحبك أيون الحب ده أصله مِلعبك أوي وما لوش ولا دين ولا ملة يا ديكي يا صديقي اوعي تخرج بالفانلة أحسن تستهوى يا روحي وتفضل تعطس تِعدي الشلة آآهوي آآهوي آآهويا هويا هوءة آآهوي آآهوي آآهويا هويا هوءة ليلتك بيضة ومعاها دُقة وأنا وحداني وقلبي رغيف خالي (وفاضي) بشكل نضيف لو سبتها .. البيضة هاتفقس كتكوت صايع زيي مفلس يكبر يكبر أوي ويغلس ويقول لك : أنا ديك يا حدوءة آآهوي آآه...

مسير الشمس تطلع فوق مسير الشمل يتلملم ويتضفر ضفاير شوق مسيرها تروق   مسير الحب يجمعنا ونرمي كل أوجاعنا ونلقى الضحك بيسعنا - كأنه - ف بحر أمانينا سفينة وطوق مسيرها تروق   مسير كتفك يوشوش مرة لكتافي وأنا حافي فِ عز البرد أصير دافي تمطر روحي مية ورد وأسقيكي فِ نن الخد ألاقي الدنيا مجدافي مسيرها تروق   مسيري أخدك فِ يوم بدري نلف الدنيا وحدينا وتجري وتـِمري فِ حجري فراشة انتي وأنا جنينة وبكفوفك تلاعبيني تناغشيني تحيي الراحة فِ جبيني وبالفرحة تغطينا مسيرها تروق   *** 19/3/2011

وأنا اتخذلت كتير ... لحد ما اتعودت أخذلني في غيابك ! وكأني باتحرر منك قوام فيا لكـــــن ! بيخذلني - بالعند - نسيانك ! *** باشا و بنت باشا

صبحي الكبابجي مالوش ف الكباب .. ولا عنده لحمه ! يا دوب حيلته هـِدمة وحيدة ويتيمة ! ساترها برقعة فانلة قديمة ! و ع الهدمة بقعة بلون الهموم .. محافظ عليها ليها علاقة بجنس اللحوم .. وبرضه ما ليها ! فِ قلب الخرابه .. يعمل كمين لأيتُها كلب "دكر" كان سمين وتسأل يقول لك : اسكت يا جاهل ! ده كلب ابن كلب .. فاكر نفسه راجل ! واسمع يا فاضل حكايته العجيبة : صبحي زمان .. كان واد فلاتي يسكر .. يحشش .. يقامر يوماتي يبعتر ف ثروة أبوه الكبابجي ولا حد همه ولا مين يهاتي ويطلع صاحبنا مطالب بـ تار ! لـ شهدي ابن عمه .. لأعوام كتار وييجي نهار .. ويعتر عليه وهـُب الغضنفر .. يقبض عليه وياخده بلدهم لجل القصاص وما فيش فرار ولا فيه مناص وصبحي حلنجي .. رضيع الرذيلة يفكر فِ إنه يهرب بحيله ما تيجي يا شهدي نلعب دورين مع كاس براندي ؟ غلبتك ؟ آمين .. ننسى اللي فات وتعتق رقبتي غلبت يا شهدي ؟ .. تاخد فلوسي وبيتي وأرضي ويغلب سي شهدي .. وتيجي العقود يشوفها صاحبنا يصيبه الجمود ويبصم ويختم .. فِ دهشة وذهول ويبدأ يثور .. ويصبح كـ غول ويكسر إزازة ! - حاااااسب يا شهدي !! - (ده أنا اللي باقول) ويسمعني شهدي يفادي الجبان ...