البوست المفتوح

- بعيداً عن آفة الكتابة وسمتها الجلية هذه الأيام "هانقول إيه إزاي لمين علشان إيه؟" .. افترض معايا عزيزي القاريء إنك قريت هنا بوست غير منشور وغير مرئي وليس له وجود من الأساس .. حضرتك مشكوراً هاتعلق وأنا هارد عليك .. مش علشان أي سبب منطقي غير لأننا عاوزين نهرب من سخافة "هانقول إيه إزاي لمين علشان إيه؟" .. ممكن يكون موضوع البوست الوهمي (اللي أنت المفروض قريته) هي مجرد فكرة / أسئلة في دماغك أنت ، بس ما كتبتهاش قبل كده أو مش عارف تتكلم فيها مع حد ، أي حد .. ممكن تكون حاجة أنا كتبتها قبل كده وكنت عاوز تعلق عليها .. أو حاجة ما كتبتهاش وكنت مستنيني أكتبها (سواء أنا اللي كنت مستنيني أو أنت مش هاتفرق) .

* ملحوظات:

1- التعليقات مفتوحة لغير معرف.

2- البوست اللي ما اتكتبش ده مش مكتوب لحد ، فمش عاوز حد يخنقني ويفكر وهو بيعلق هايقول إيه إزاي لمين علشان إيه ؟ .. واللي هايتحرج يعلق بغير معرف ، ويا ريت ما يعلقش أصلاً.

3- الله يكرمكم ، ممنوع أي كلام في حال البلد.

4- البوست ده هايتمسح لاحقاً.
GO


تعليقات

  1. ghada issa03‏/12‏/2013، 11:35:00 م

    اولا حضرتك جننت ابويه هههه...كل مره اقرا فيه بوست واريد التعليق اجد عباره (التعليقات معطله وسبق لى ان قرات وجهه نظرك فى هذا الموضوع فارجوك ان تغير سياستك رحمه بى ..
    انت الشئ الوحيد الذى يرفضه " آلعقل " و " آلمنطق " و " آلقدر "
    و لآ يريده سوى " آلقلب " ؛ فأي حيرة زرعتهآ بى ...لماذا ياترى معظم خيارات قلوبنا تقودنا الى الخذلان والهزيمه ؟؟

    ردحذف
  2. reemaas03‏/12‏/2013، 11:43:00 م

    اممممممممممم
    طيب انا هقول اللى فهمته واعذرنى لو فهمت غلط

    انت عاوزنى افترض ان فيه هنا كلام وانا هرد عليه صح؟


    هفترض انك كاتب .. بص لقلبك واسألهليه...؟!

    وانا مفروض اكمل النقط

    انا بقى هسأله ليه لما بتتعلق بحد بتيجى على نفسك اوى؟ طب ليه الحد ده مابيجيش على نفسه خالص؟ وليه لما بتزعل من حد وناوى تبينله العين الحمرا اول ما يبتسملك بس بتضحكله وبتضيع هيبتك ؟ليه ها ليه ؟!

    ردحذف
  3. ENG./ELSAYED,PMP03‏/12‏/2013، 11:57:00 م

    هانقول إيه إزاي لمين علشان إيه؟

    اوقات كتير فكرت ف مين من الشخصيات التاريخيه ( المتوفيه ) فى غفلة من الزمن ... كسبت فى تومبله ... او كسبت ف الشمعدان حتى انى اقابله ... مش عارف اذا كانت موبينيل موفره العرض ده ولا لااء ... بس كثيراً ما ... وبدون دروشه ... علشان بس محدش يقولى يا اخى المفروض يكون اول اختيار لقاء سيدنا محمد - وهنا هقوله ... يا اخى مش لما نستاهل نقابله ... نبقى نتمنى اساسا - المهم فغالبا ما كان بيقفز فى خيالى نجيب سرور ... كان نفسى اوى يا شريف يا اخويا احشش مع نجيب سرور ... ياااااه ... كان نفسى اوى اقعد معاه وهوه منجلى ومتسلطن وبينفس انفاس الحشيش ... وبيصمت ملياً ... ثم ينطلق فى أمياته الخالده ... يا ابنى انا جعت واتعريت وشفت الويل وطفحت ايامى كاس ورا كاس طرشت المر ... يا ابنى بحق التراب وبحق حق النيل لو جعت زيى ولو شنقوك ما تلعن مصر ... اكره واكره واكره بس حب النيل ... وحب مصر اللى فيها مبدأ الدنيا ... ده مصر يا ابو السيد ف الجغرافيا مالها مثيل وفى التاريخ عمرها ما كانت التانيه

    فيه كمان حد ما ... الحد ده كنت عايز اقوله ( تتجوزينى ) ... بس الحد ده أتدروش ... دروشه غريبه ... وعاش التجربه على الأعراف - لا دخل جنه ولا دخل نار - المهم

    فيه كمان حد كنت عايز اقوله يا ابن ال....طه ) والحد ده كان عمل معايا انترفيو من حوالى سنه وجاوبته اجابات مفيش خمس مهندسين ف مصر يقدروا يجوبوها ... واستحملته كتير خلال المقابله ... وعلى الرغم من كده مسافرتش

    دائماً ما اقول لنفسى ... زرعت فدان جوافه واربعه مشمش خسرت انا ف الجوافه وكسبت ف المشمش :)

    كفايه كده احسن انا هطلع اسرار وبلاوى :)

    ردحذف
  4. P A S H A04‏/12‏/2013، 12:23:00 ص

    مساء الفل على حضراتكم جميعاً
    :)
    تحية كبيرة للسهيرة اللي سهرانين معانا للصبح .. قولوا بس يا رب النت ولا النور ما يفصلوش :)
    لسه ما قريتش التعليقات .. بس شامم ريحة حب وهجر .. المهم (والكلام ده للزميلتين الكريمتين اللي شرفوني) لو عاوزينني أعلق لكم علشان انتوا انتوا يبقى يا ريت فضلا ومن غير زعل تشيلوا تعليقاتكم :)
    أما لو عاوزينني أعلق كأنكم مش انتوا انتوا ولا أنا أنا يبقى قشطة :)
    بس برضة من غير زعل D:

    أبو السيد منور الدنيا كلها والله العظيم هانزل ربع ساعة كده وراجع لك يا روح قلبي :)

    يا للا سخنوا عقبال ما آجي

    ردحذف
  5. ghada issa04‏/12‏/2013، 12:43:00 ص

    هههههه جاوب على سوالى كانى لست انا وسوالى الثانى يعنى لماذا يكون وراء اسئلتنا ريحه حب وهجر قد تكون اسئله تخص تجربه صديقه او جيران؟؟؟ومساءك فل

    ردحذف
  6. P A S H A04‏/12‏/2013، 2:08:00 ص

    ghada issa
    :)

    "أنت الشئ الوحيد الذى يرفضه " العقل " و " المنطق " و " القدر " و لا يريده سوى " القلب " ؛ فأي حيرة زرعتها بى"

    بصي طالما التلاتة دول رافضين يبقى خلاص آدي الله وآدي حكمته .. هاتتعب شوية كتير وبعدين شوية أقل فأقل وبعدين هاتنسى ، وإن شاء الله لما ربنا يرزق قلبها بالفرحة اللي من نصيبها واللي مكتوبة لها هاتلاقي نفسها بتضحك ساعتها أوي على نفسها وتقول : ده إيه الخيبة اللي أنا كنت فيها دي ؟؟ أنا إزاي كنت عبيطة وعامية للدرجة دي ؟؟ أنا إزاي كنت محيرة نفسي وكل اللي حواليا معايا في حاجة مش بتاعتي أصلاً ولا كنت ينفع أفكر فيها ؟؟

    وبعدين ممكن نعتبر أن الخذلان والهزيمة شوية تمارين من الحياة بس قاسيين شوية علشان يقوونا وما ننكسرش بسهولة .

    السؤال التاني مش فاهمة أوي بصراحة
    :)
    مساء النور

    ردحذف
  7. P A S H A04‏/12‏/2013، 2:21:00 ص

    reemaas
    :)
    طب ليه الحد ده مابيجيش على نفسه خالص؟
    - طب وإيه اللي يعرفك إن الحد ده ما جاش على نفسه ؟؟ إيه اللي يعرفك إنه ما عملش كل اللي في وسعه وبذل أقصى طاقته بالنسبة له هو مش بالنسبة لك انتي ؟؟ العملية أصلها نسبية !! يعني ممكن التضحية اللي حد يعملها لحد تكون كبيرة جداً بس الحد ده مش شايف أنه ضحى أصلاً !! والعكس برضة ممكن حد يبقى ما ضحاش ولا تعب نفسه والتاني علشان بيحبه شايف أن كل حاجة بيعملها له تعتبر تضحية كبيرة ومهولة .
    الموضوع ثقة في الأساس والثقة دي ما بتجيش بين يوم وليلة طبعاً .. الموضوع كمان صراحة ومكاشفة وإدراك كل طرف لطبيعة الطرف التاني ومقوماته وشخصيته وظروفه وطباعه وووو

    طب اتضح فعلاً أنه ماجاش على نفسه خالص ؟؟ يبقى ما يستاهلشي دمعة واحدة من عيوننا لا يا قلبي بيعه زي ما هو باعنا بين قوسين محمد فؤاد :)

    - ليه لما بتزعل من حد وناوى تبينله العين الحمرا أول ما يبتسملك بس بتضحكله وبتضيع هيبتك ؟ يمكن علشان أنا قلبي أبيض وبانسى القسية ويمكن علشان أنا عبيط وسهل إن أي حد يضحك عليا وما باتعلمش من أخطائي ويمكن لأني شخص حساس وقماص وعيل وبازعل من أقل هفوة وباخد على خاطري .

    :)

    ردحذف
  8. P A S H A04‏/12‏/2013، 2:32:00 ص

    ENG./ELSAYED,PMP
    :)
    نجيب سرور حتة واحدة !! يا مزاجك العالي يا كبير !!

    الراجل ده اتنفخ في حياته يا عيني !!

    "زرعت فدان جوافة وأربعة مشمش خسرت أنا ف الجوافة وكسبت ف المشمش "

    يخرب بيت ده كلام حلو يا جدع !!!!

    أنت أستاذ أستاذ أستاذ والله يا باشمهندس :)

    وبعدين يا جدع اتكلم براحتك ، وهو احنا نطول نقرا كلام متكلف زي ده آهندزة ؟؟


    طب بص بعد ما تقعد أنت مع نجيب سرور اسمح لي آجي أتشرف وأقعد معاك :)

    ردحذف
  9. P A S H A04‏/12‏/2013، 5:52:00 ص

    التعليق اللي فات ده
    أيوه اللي فات ده على طول
    لمن لم يفهم أنا كتبته ليه
    علشان ما يجيش حد يقول لي :
    طب قول لنا نتكلم في إيه ؟
    أو إدينا مثال !!
    اتفقنا ؟؟


    تاني حاجة

    إقرا التعليق ده كويس

    ردحذف
  10. غير معرف04‏/12‏/2013، 7:19:00 ص

    حاولت ابقى كويس معرفتش وحاولت ابقا فاشل معرفتش ومنين اجيبك ومنين أوديك لا المسيح قبلك ولا النبى راضى بيك فقررت انى أدون مبسوط يا عم شريف ... وسهينى :)

    ردحذف
  11. P A S H A04‏/12‏/2013، 7:56:00 ص

    الغير معرف

    تعرف تعمل الحركة دي ببقك من غير ما بقك ياخد باله ؟؟

    صباحك سكر

    ردحذف
  12. بـت خـيـخـة وأي كـلام04‏/12‏/2013، 8:31:00 ص

    صباح الخير يا شريف

    أنا جاية علشان أقولك
    إني مبسوطة إن بوست " الجدار " نال إعجابك
    و إني إتبسطت جدا إنك تركت تعليق عليه

    لانك من الناس القلائل جدااا اللي لما بيعلقوا عندى بعرف انى كتبت حاجة كويسة
    لانك مبتعلقش كتير و مبتعلقش مجاملة

    و ده فى حد ذاته شيء كويس

    لان تعليقاتك عندى
    بالنسبالى هى مقياس للي انا بكتبه

    و أرجو انك ابدا متغيرش سياستك دى

    و تفضل كدة دايما متعلقش الا لما حاجة تعجبك
    علشان تفضل مقياس دقيق لكتاباتي


    الف شكر ليك

    و .. صباحك معجون بالخيرات إن شاء الله

    :)



    سلام

    أختك خيخة

    ردحذف
  13. reemaas04‏/12‏/2013، 10:36:00 ص

    ههههههههههه صباحك سكر يا باشا
    اجابات مقنعه جدا يافندم ومفحمة الى حد كبير :)

    ردحذف
  14. rona ali04‏/12‏/2013، 11:10:00 ص

    مبدئيا انا اتجننت من يومين لما لاقيت اخر كام بوست اتشطبه نوهائي مكنش العشم ولا باع جزر يا معلم

    تحت جلدى انسان ميت بمعنى الكلمه
    لو اقدر انى اخرج دة في الشارع لكل شخصيه فاشخه نفسها واعرفها حقيقتها وحقيقه اللي بيحصل
    ...........
    يعنى ينفع اصرخ بهدوء او الطم من غير لطم
    ............
    عايزة ادهن الحياه ازرق

    ...............
    الاطفال مش ملايكه على فكرة هما بس مجرد عيال غريبه الملامح ونظرتها زى عيون القطر وهو ماشي يلتهم اللى قدامه بيعلقك اه لكن منتش عارف اخر الخط هتنزل فين وهيحصل فيك ايه
    ...............
    في يوم هقدر اطير برة التقاليد وممكن كمان القيود دى اكتشف انها مكنتش محتاجه غير استكيه علشان تتمسح وهشخبط في السما واخلي السحاب شكله اغرب مما بنشوفه وهمسك في جناح المطر واتشقلب معاه وهزغزغ الرياح وانكشها ومش مضطرة انى ابص على البشر اللى تحت ما كده كده زى النمل من فوق وحتى من تحت
    هغير ضوء الشمس لبنفسج ودرجاته
    هسلم على اجدادى وهكبر نجومهم علشان لما انزل افضل شيفاهم كل ليله حارسنى كده وهقول لقمر يبطل ينقص ويكبر علشان بيبقي وحش وهو صغير وبيبقي وحش لما بيكبر فجأة وهو هيقتنع علشان يكون شكله حلو قدام نجمته

    السؤال اللي بيطرح نفسه دايما
    العكس المعكوس لكل شئ مظبوطو متظبط هو العكس المنعكس على كل شئ وحش في حياتك برضه ؟ مع ام ضد

    ردحذف
  15. جيلان حمزة04‏/12‏/2013، 4:05:00 م

    أنا فهمت ان البوست ده دعوة للفضفضة بس بشكل جديد ..
    أنا هتخيل انك كتبت البوست عن القدر و محاولاتنا الفاشلة دايما اننا نغيره
    مش هسأل ليه كل مرة بحاول أغير قدري باخد على دماغي ... يمكن يكون ده الطبيعي ... لكن سؤالي .. هو ليه الدنيا بتفضل مطلعانا و بعدين تنزلنا على جدور رقبتنا ؟؟؟ طيب ما هي ممكن تختار وضع و تثبت عليه يعني يا تخسف بينا الأرض ونخلص يا تتعدل وتخليها ماشية في خط مستقيم ... دي كمان اتجننت معايا اوي في الكام سنة اللي فاتوا وبقت بتطلع و تنزل بسرعات رهيبة زي المرجيحة البايظة .

    بحب اوي اسمع اغنية انا موجود - لفرقة مسار اجباري

    رغم الحدود رغم السدود
    رغم اللي راح واللي عدى من عهود
    رغم الجراح رغم الآلام
    رغم ان جوا القلب في زحمة كلام
    رغم اللي قال واللي فاكر
    انه ممكن يخنق العقل بقيود
    رغم السؤال اللي ملهوش حلول
    أنا موجود
    أنا موجود
    لسه قادر ع الصمود
    انا غيرت اللي كان واللي جاي رح اغيره
    طعم الكرامة لسه ع اللسان
    والظلم لو نساي هفكّره

    الحقيقة أني وانا بسمعها دلوقتي فجأة حسيت أنها فقدت سحرها و أني ولا موجوده ولا نيلة .

    كل اللي فات رغي ونكد مش كده ؟؟ السؤال لحضرتك دلوقتي ..ايه رأيك في الخنث بالوعد و العهد لمجرد إن المزاج أتغير ؟؟؟

    تحياتي الكبيرة جداااااا للبوست الجبار ده.

    ردحذف
  16. SHARKawi04‏/12‏/2013، 4:52:00 م

    يا باشا ياباشا ياباشا يا باشا كمان مرة . البوست المفتوح دي فرصة ليا بقى اقول وما اخبيش ولا افكرش . لية وازاي ولمين والى اخرة من كل تلك التساؤلات والتخوفات من كيف لي ان اكتب تلك الكلمات او ان اسأل أو ان أطلب . بعيدا عن كل تلك المجاملات . بعيدا عن كل شيء يربطنا ويضعنا في هذا النطاق المحدود الخنيق واللي منه أنا مخنوق .
    الفكرة رائعة لا شك في ذلك . وخليني استغل بقى الفرصة واقول ليك وللجميع . ايوة ما هو انت اللي ما خلتش فية اي شروط ولا اي قواعد ولا اي موضوع .
    1 - لية مش عملي فولو ع المدونة وتشرفني في لستة متابعيني - ولية الناس الكتير الموجودة هنا وهناك ما يشجعونيش زي ما انت بتشجعني ؟
    2- موضوع زفة اللي انت كتبتة وكنت قافل التعليق عليه شيء رائع جدا وما اقدرش اني افوته من غير ما اقول ولو كلمة حق فيه . وصف فوق الخيال . وحقيقي وواقعي وطبيعي . القصة مش قادر اني انساها لاني عشتها وحست اني شايف كل حاجة انتي حكتها . الزفة في الطريق العام والزغاريط والتصقيف والبنت الجدعة بنت البلد اللي الكل دعلها عشان قلبها وحبها . عشان رضاها . الاخ المضغوط . والبنت المسكينة ووصفك للفستان الي على رجليها . كنت بدأت أعيط وفجأة خليتني أضحك بقوة لدرجة اني كنت عايز اشارك في التصقيف واصقف . ربي يسعد أيامك .
    3 - مش ناوي تكتب كتاب وتتحفنا بيه يا برنس . والله انت تستاهل وقوي في كتاباتك . لو كدة توكل على الله واي دار نشر تتمنى . اسعى يعني في الموضوع وفكر فيه .

    ردحذف
  17. P A S H A04‏/12‏/2013، 5:01:00 م

    بـت خـيـخـة وأي كـلام
    :)
    مساء النور يا خيخة .. ما تتخيليش فرحتيني قد إيه بتعليقك ده ، ربنا يسعد قلبك ويبارك فيكي ويسترك ويحفظك من كل شر وسوء ويحفظ لك شريف ابنك ويبارك لك فيه ويفرحك بيه قادر يا كريم اللهم آمين

    انتي من الناس المبدعة بجد والله العظيم ومش مجاملة ، ومن القلائل اللي باستنى بوستاتهم علشان أتشرف بقرايتها أول ما تنزل ، لأنك لما بتكتبي بتكتبي ، معايا ؟؟ لما بتكتبي بتكتبي ، وبتخللينا كلنا قاعدين نقرا واحنا عاملين كدهوه .
    :)
    بالنسبة للتعليقات .. ما ينفعش أجاملك أو أجامل أي حد بيكتب كويس لأن منظري بجد هايبقى وحش قوي .. لأنك عارفة وأنا عارف كويس إنك عارفة انتي إمتى بتكتبي وبتبدعي ، وعارف كمان ومتأكد إنك انتي ترمومتر نفسك ، وغالباً ما بيعجبكيش العجب ولا بترضي عن أي حاجة من اللي بتكتبيها ، حتى لو حلوة فعلاً .. لأن اللي بيكتب بالعبقرية والجمال ده بيبقى أكيد عنده ذائقة في القراية وبيبقى هو أقسى ناقد لنفسه قبل أي حد .. وعن نفسي ، باشكرك بجد على الثقة الغالية دي ، وباقول لك ألف شكر لأنك من وقت للتاني بتمتعينا بالروائع اللي زي دي وبتشحنينا كلنا إننا نكتب ونتعلم منك .. اكتبي يا خيخة من فضلك .. انتي حد صنايعي كتابة .. عارف والله إن الروائع اللي زي دي ما بتطلعش بالساهل .. يا ستي اتمرني فينا ، زي ما أنا وغيري ومعظمنا بنتمرن في بعض .. ما كلنا عاملين مدوناتنا دي مسودات وبنشخبط فيها .. والله العظيم لو كل عشرين بوست طلعتي بوست عبقري زي بتاع الجدار ده أو زي يوميات من سوريا ، ما تخافيش ، هانستحمل وهانتابعك ، مش هانحدفك بالطوب ، في الآخر انتي واحنا اللي كسبانين .
    :)
    * حاجة كده على جنب علشان ما حدش ياخد باله .. الصورة اللي في البروفايل دي صورتك ؟؟ أصل شكلك اتغير خااااالص عن آخر مرة شفتك فيها من تلات أربع سنين !! ولا ما كنتيش انتي وقتها ؟؟
    :D
    يومك فل بإذن الرحمن ، وسلامنا الكبير جداً جداً لسمو البرنس / شريف ابنك
    شرفتيني جداً

    ردحذف
  18. P A S H A04‏/12‏/2013، 5:11:00 م

    reemaas
    :)
    مساء النور يا دكتورة .. أنا آسف جداً إذا كان ردي ضايق حضرتك بجد .. بس صدقيني والله العظيم تلاتة ومش فذلكة ، العمر أقصر بكتير من إننا نقضيه في الزعل من أي حاجة أو حد .. الزعل ع الدين ، أما الدنيا دي ...... ولا تستاهل .
    نورتينا

    ردحذف
  19. P A S H A04‏/12‏/2013، 5:24:00 م

    rona ali
    :)
    يا مساء الفل يا أستاذة ، يا رب تكوني بخير إن شاء الله
    بصي سموك بالنسبة للبوستات القديمة ، اسمحيلي آخد تعليق ليا كوبي وبيست من عند مدونة الزميلة الفاضلة / جيلان حمزة
    بصراحة وزي ما تقولي حضرتك كده باعمل فرز للبوستات اليومين دول بمناسبة مرور خمس سنين (اليوبيل الخشبي) على التدوين فلقيت إني نشرت 158 بوست في الفترة دي -- غير اللي كانوا في المدونة القديمة وغير حوالي 300 بوست مسودات ما اتنشروش خالص -- بس اللي حسيت أنهم يعني ينفعوا يتنشروا من كل ده 31 بوست بس !! (ده أنا كده مجاملني بزيادة) .. أه هي المدونة اسمها "هجايص" ومعظمها هلس ؛ بس تبقى هلس ومبتذلة ؟؟ ده شيء أنا مش بالعة .. أو هلس وفذلكة واستعباط واستعراض ؟؟ .. أو هلس ولعب بالكلام وابتزاز عاطفي علشان الناس تقرا وتنبهر وتتشحتف وتتنهد وتسقف من غير أي مضمون ؟؟ .. ده شيء صعب مش قادر أغفره لنفسي بجد .

    البوستات الباقية مش عارف أصنفها وفيه كتير منها مستغرب أصلاً أنا إزاي كتبتها !! .. مش وحشين ، بس برضه مش عاجبني !! .. زي ما تقولي حضرتك كده باعمل تقييم لنفسي .. وقفلت التعليقات علشان اللي حابب يقراهم ما يتشتتش ولا يتأثر بأي رأي ممكن يكون مختلف عن اللي منشور في البوست .. عن نفسي باعيد قرايتهم تاني .. أصل بعد فترة في الكتابة .. ما ينفعش دلوقت أكدب وأقول إني باكتب لنفسي -- رغم إني في الأساس عملت المدونة علشان أكتب لنفسي !! -- طالما بقت فيه ناس بتراقب وبتقرا وبتعلق وبتشير !! طالما إن أي حد من أي بلد في العالم ممكن بالصدفة يدخل ويقرا الكلام ده في أي وقت .. عن نفسي باعتقد إن فيه إلتزام أدبي يحتم عليا إني أفكر ألف مرة قبل ما أكتب أي حرف أو لفظ ومليون مرة قبل ما أنشر أي حاجة .. سألت نفسي : هل أحب إن ياسين و آدم (أولادي) يقرولي حاجة من اللي باكتبه ؟؟ .. وطبعاً لله المثل الأعلى اللي المفروض اتقيه وأراعيه فيما أكتب .
    البوستات المنشورة دي ممكن أدعي إني كنت باكتب فيها لنفسي -- بغض النظر عن قيمتها ومستواها بس لا أخجل من نسبها ليا -- .. ممكن البوستات دي تكون سبب يحفزني علشان اتكسف على دمي وأرجع أكتب حلو تاني .. أو على الأقل لو ما عرفتش ؛ أرجع أتابع وأقرا للزملاء المبدعين واتعلم منهم .. كنت قيمت أدائي من فترة وخدت تقييم بنسبة تتراوح ما بين 58% و62% ، ما أقدرش أقول إن النسبة دي انخفضت دلوقت ، بس ثباتها في حد ذاته شيء يخلليني أقلق !!

    عامة .. أرجو إن كلامي ما يتاخدش بحساسية من أي حد سبق وشرفني في المدونة وعلق على أي موضوع .. لأني بجد باعتز جداً وباتشرف بكل اللي بيزورني حتى لو ما علقش .

    ده كان تعليقي من أسبوع .. النهاردة لما قريت التعليق ده تاني ، أحب أضيف أني اكتشفت إن الـ 31 بوست المذكورين دول رقم مبالغ فيه :)

    عامة البوستات كلها موجودة في الحفظ والصون وإن شاء الله هانشرها تاني ، وبغض النظر عن تقييمي ليها ، فيكفيني شرفاً وفخراً أن عليها تعليقات حضراتكم اللي أجمل من أي بوست بجد والله العظيم :)


    ........... يتبع

    ردحذف
  20. P A S H A04‏/12‏/2013، 6:15:00 م

    rona ali
    :)
    إيــــه الدمـــاغ العالية دي !!

    - بمناسبة الدماغ صح ، سؤال كده ع الماشي للأخوات الزميلات الكريمات : هي البنات لما بتحب تعمل دماغ بتعمل دماغ بإيه ؟؟

    - "تحت جلدى إنسان ميت" .. "ينفع أصرخ بهدوء أو ألطم من غير لطم ؟"
    يا نهار أسود ع الوجع !!

    - عايزة أدهن الحياة أزرق .. بقالي ساعة باتخيل في الجملة دي !!

    - " ونظرتها زى عيون القطر وهو ماشي يلتهم اللى قدامه" .. بصي أنا فهمتها أن قصدك على عيون القطر اللي ماشية بتلتهم كل حاجة قدامها .. يخرب بيت ده تصوير !! .. إيه العبقرية دي بجد !! .. ربنا يحفظك يا رب ويبارك لك في موهبتك

    - "هزغزغ الرياح وأنكشها" :)) يا ديني ع الجمال

    - "هسلم على أجدادى وهاكبر نجومهم علشان لما أنزل أفضل شايفاهم كل ليلة حارسينى كده وهاقول للقمر يبطل ينقص ويكبر علشان بيبقي وحش وهو صغير وبيبقي وحش لما بيكبر فجأة وهو هيقتنع علشان يكون شكله حلو قدام نجمته"
    :))
    الله الله الله
    إيه حكاية نجوم أجدادك دي ؟؟ جبتيها منين ؟؟ .. يخرب بيت التصوير !! لأ بجد عاوز أفهمها بعد إذنك لو سمحت .. ده تشبيه كان في قصة ؟؟ ولا من اختراعك ؟؟

    - إجابة آخر سؤال : ما أشربشي الشاي أشرب آزوزة أنا :))

    نورتنيا

    ردحذف
  21. P A S H A04‏/12‏/2013، 6:45:00 م

    جيلان حمزة
    :))
    أولاً : بوست حضرتك بتاع آلة الزمن ده أنا كتبت له أكتر من تعليق ومسحتهم !! .. زي ما تقولي كده نفسنه بعيد عنك ههههههههههههههههه !! .. أنا لو منك أأجر عيلين بعشرة جنية يبخروا المدونة لتنفجر !!
    لأ بجد ، مبدعة والله !! .. إن شاء الله ليكي عندي تعليق محترم على البوست الرائع ده :)

    ثانياً : ردي على أول سطرين من تعليق حضرتك :
    http://hagayss.blogspot.com/2010/05/blog-post_16.html

    ثالثاً : بالنسبة للسؤالين دول :
    - ليه الدنيا بتفضل مطلعانا و بعدين تنزلنا على جدور رقبتنا ؟؟؟

    - إيه رأيك في الحنث بالوعد و العهد لمجرد إن المزاج اتغير ؟؟؟

    مش لاقي رد
    على الأقل حالياً مش لاقي رد بجد !!
    :)

    نورتينا

    ردحذف
  22. P A S H A04‏/12‏/2013، 7:47:00 م

    SHARKawi
    :)
    يا جدع خضتني وربنا !! أنا قلت ده هايشتم ههههههههههههههههههه
    1- أنا مش عامل فولو لأي مدونة يا شرقاوي قسماً بالله العلي العظيم .. على رأي زميلة الله يمسيها بكل خير "بروفايلي نااااصع البياض" .. وبمناسبة الفولوورز أما أضحكك على خيبتي ، أيام المدونة القديمة كنت أفتح لوحة التحكم ألاقيلك يا اخويا الفولوورز دول قاعدين !! .. فأنا أفتكر إنهم بيتجسسوا عليا أقوم ماسحهم هههههههههههههههه .. وأبقى هاتجنن يا أخي إزاي دخلوا جوه لوحة التحكم عندي وما حدش يعرف كلمة السر غيري ؟؟ .. كنت ساعات باغير الباسوورد مرتين تلاتة في اليوم بسببهم !! .. كنت متخيل أنهم كده يقدروا يشوفوا كل اللي على الجهاز !! .. المهم مسحت المدونة القديمة وعملت دي ، وقعدت لهم بالمرصاد .. شهرين تلاتة كده ولقيت لك مدونة زميلة قاعدة جوه !! .. فبقيت مش عارف بصراحة اتصرف إزاي ؟؟ أكلمها بالذوق والحساسة ولا أحرجها ؟؟ .. فقلت أسيبها يمكن تتكسف من نفسها وتمشي !! .. أسبوعين تلاتة ، لقيت لك زميلة تانية قاعدة جنب أختها !! .. قلت لأ بقى كده بقى كوافير !! .. قلت أما أمسحهم بدل ما يكتروا وألاقيهم في يوم داخلين عليا الشقة أنا ومراتي والعيال وأنت عارف يعني لا موأخذة إن الواحد بيحب يقعد براحته في بيته !! .. وفضلت ع الحال ده فترة ، أمسحهم وييجوا غيرهم .. لحد ما عرفت بالفطنة كده والحداقة أنهم أكيد يعني مش هايقدروا يشوفوا غير الأوضة اللي أنا قاعد فيها بس !! .. بس وربنا المعبود لآجي في يوم وأقعد لهم باللباس :D
    بالنسبة للتشجيع .. عن نفسي أنا مقصر مع الناس كلها والله العظيم يا شرقاوي ، ياريتك بجد ما تزعلش مني على تقصيري معاك ، ومش عاوزك تحرمنا من كتاباتك يا عم .. أنا عرفت إنك في السعودية .. طب ما تكتب يا عم ؟؟ .. اكتب عن البلد الناس / اللهجة / المواقف / الغربة ... إن ما كنتش هاتكتب عن الحاجات دي وأنت هناك هاتكتبها إمتى ؟؟ .. أراهن بإنك هاتكون متميز جداً - كعادتك - في البوستات دي .. انقلنا يا أخي هناك معاك وعرفنا أنت بتشوف إيه :)
    2- موضوع زفة ده جميل ، باعتبره حاجة كده مبهجة ولايت ، ألف شكر ليك لتشجيعك ولعينيك الحلوة :)
    3- بالنسبة للكتاب .. مش لما اتعلم الأول يا شرقاوي !!

    :)

    نورتنا

    ردحذف
  23. norahaty04‏/12‏/2013، 8:23:00 م

    السلام عليكم ورحمة
    الله تعالى وبركاته
    ومساء الخير
    الحق أحط
    السلام قبل ما تمسح
    او تغلق التعليقات
    فقط اردت ان اسلم عليك
    سلااااااااااااااااااااام

    ردحذف
  24. P A S H A04‏/12‏/2013، 8:52:00 م

    norahaty
    :)
    وعليكم السلام ورحمة الله وبركاته ، يا ألف أهلاً وسهلاً يا دكتورة ده إيه النور ده :)
    الله يسلمك من كل شر يا رب
    ربنا يطمننا عليكي ويحفظك ويسعدك ويبارك في حضرتك ويفرح قلبك زي ما فرحتينا بزيارتك الجميلة دي آمين

    :)

    نورتينا

    ردحذف
  25. norahaty04‏/12‏/2013، 9:18:00 م

    انا باجى كتير
    بس انت اللى قافل التعليقات
    وعملتلك (نداء على الفيس بوك)
    لاجل ما تفتح التعليقات
    الحمد لله اديك سمعت
    النداءءءءءءءء

    ردحذف
  26. P A S H A04‏/12‏/2013، 11:27:00 م

    norahaty
    :))
    يا فندم حضرتك تنورينا وتشرفينا في أي وقت هو احنا نطول ؟

    دي مدونتك يا دكتورة

    :)

    جزاكي الله كل خير على سؤالك الطيب وزيارتك الكريمة

    نورتينا

    ردحذف

لا يسمح بالتعليقات الجديدة.