عشر قصص قصيرة


(1) يفتح الدرج

(2) يخرج القلم

(3) يغلق الدرج

(4) يفتح الدرج

(5) يخرج ورقة

(6) يغلق الدرج

(7) يفتح الدرج

(8) يضع الورقة والقلم

(9) يغلق الدرج

(10) تمت.

ـــــــــــــــــــــــــــــــــــــــــــــــــــــــــ

باعتذر لو كانت القصص طويلة شوية، أو حصل تشتيت عند القاريء .. بس أنا أصريت إني أسهب في السرد والتفاصيل علشان كل شخصية من الشخصيات تاخد حقها خاصة مع الأحداث الكتيرة اللي في كل قصة .. وبالمناسبة؛ الشخصيات والأماكن الواردة في القصص كلها مقتبسة من شخصيات وأماكن حقيقية بس طبعاً أنا غيرت الأسماء .. نيجي بقى للنهاية، أنا كنت ممكن أخلي النهاية مفتوحة!! يعني مثلاً: "يفتح الدرج" .. بس كان هاييجي واحد من حضراتكم ويقول لي أنها نمطية وتقليدية واتهرست في عشرويمت عمل قبل كده!! .. لكن لو لاحظتوا تسلسل الأحداث هاتلاقوها جت بشكل مفاجيء وغير متوقع وده اللي خللاها تبان كأنها جديدة!! ..
ياللا بقى عاوز رأيكوا بصراحة من غير مجاملات!! .. ويا ريت لو فيه أي ألفاظ مش مفهومة في القصص تقولوا لي عليها .. وعاوز أعرف منكوا إيه أكتر قصة فيهم عجبتكم؟؟ .. وأنهي شخصية اتأثرتوا بيها وحسيتوا أنها بتعبر عنكم؟؟ .. يا ريت كمان لو فيه حد عنده قصص مشابهة يكتبها لنا، ده لو كان لسه عايش سليم لحد السطر ده :D
* تنويه: اللي هايشتم في سره ربنا شايفه وهايعاقبه!!

تعليقات

  1. ENG./ELSAYED,PMP26‏/10‏/2013، 3:05:00 م

    القصة طويلة شوية يا شريف كان ممكن يسيب القلم والورقه بره ... مكنش لازم يفتح الدرج ... يغلق الدرج ... يضع القلم والورقه ... كل ده حشو ... وبعدين كل ده بردوا ف الواقع سعرات حراريه بتتحرق ع الفاضى ... يعنى فتحت الدرج ... وقفلته دى فيها حسبة نص قطعة شيكولاته جالاكسى ... أو 15 جرام عسل نحل ... انا على ما خلصت التعليق ده سيجارة بحالها قربت تخلص ... ده غير انى هقوم اعمل حاجه اشربها ... يا له من وقت مهدر ... !

    ردحذف
  2. موناليزا26‏/10‏/2013، 4:40:00 م

    (5) رقم خمسة كانت مفاجأة ليا
    ليه بقى لأني توقعت الورقة بره أصلاً :)

    انطباعي بقى أن البطل كان مستعجل ومش مركز ومضايق ومتوتر
    شوفته وهو بيفتح الدرج تاني كان متنرفز ازاي
    ولما رجع يقفله
    أهو في المشهد ده كنت عايزة أقوله
    خلاص ياعم هدي نفسك مكنتش ورقة بتطلعها يعني علشان ترزع في الأدراج كده

    يااااه ..حقيقي قصة مؤثرة وواقعية جداً ^_^

    ردحذف
  3. reemaas27‏/10‏/2013، 1:25:00 ص

    هى المشكلة اصلا اصلا فى الدرج !

    ردحذف
  4. P A S H A27‏/10‏/2013، 7:38:00 ص

    ENG./ELSAYED,PMP
    :))
    ههههههههههههههههههههههههههههههه
    أهو هو ده النقد الموضوعي اللي الواحد لازم يكبره ويبروزه ويعلقه على باب المدونة :))
    على رأيك ده أنا حسيت إن إيدي وجعتني من كتر فتح الدرج وقفلة في بوست النجارين ده :))

    منور الدنيا كلها يا كبير

    ردحذف
  5. P A S H A27‏/10‏/2013، 7:50:00 ص

    موناليزا
    :))
    ههههههههههههههههههههههههههههههههه

    يا نهار أبيض على تعليقك يا أستاذة قنبلة بجد موتني من الضحك والله العظيم .. ربنا يسعدك يا رب ويفرح قلبك :))

    بالنسبة للقصة رقم خمسة هي فعلاً خدت مني مجهود جبار وبجد حضرتك أسعدتيني إني قدرت أنقل إحساسي في القصة دي للقاريء :))

    خالص تحياتي لتشريفك الكريم ومرورك الجميل

    نورتينا

    ردحذف
  6. P A S H A27‏/10‏/2013، 7:52:00 ص

    reemaas
    :))
    D:
    ليه بس كده يا دكتورة تحرقي الرواية لييييييييييه ؟؟؟؟

    هاطبعها إزاي أنا دلوقتي ؟؟

    ياللا مش مشكلة نبقى نغير الدرج في الجزء التاني !

    نورتينا بزيارتك الكريمة وتعليقك الجميل

    ردحذف

لا يسمح بالتعليقات الجديدة.