زيادة المرتبات
- الناس قايمة نايمة تحلم بزيادة المرتبات !! .. فاكرين أن المرتب هايزيد بتاع مليون جنية !! .. امبارح كنت قاعد مع واحد بيحلم أن مرتبه زاد خمسميت جنية !! .. ودخل بيهم جمعية .. وقبض العشرتلاف جنية واشترى له حتة عربية صغيرة وراح رايح مش عارف عند مين الميكانيكي ظبطهاله وراح عند السروجي عمل لها فرش جديد وبعد كده ركب لها جنوط وبقى كل اللي يشوفها يتوحم عليها ، لدرجة أن فلان اللي راكب مرسيدس قال له : تبدلها بعربيتي ؟؟ بس هو ما رضيش !! لأن : "يا عم ده مش تعبان في فلوسه وتلاقيه جايبها من فلوس حرام ، بس هي الكحكة في إيد اليتيم عجبه !! وعلشان كده أنا هاعلق فيها دلاية زرقا علشان الحسد والعين !! .. أحلى حاجة بقى يوم الجمعة بعد الصلاة كده ، آخد المدام والعيال وأفسحهم بالعربية !! .. الدنيا بتبقى رايقة والبلد فاضية .. أه يا عم خلليهم يعيشوا شوية زي بقية البني آدمين !! .. آهو يغيروا جو ويتفرجوا على البلد !! .. العيال كمكمت من القعدة في البيت ، ونازلين تكسير في الحاجة علشان ما بيخرجوش !! .. عارف حتى لو هانطلع نقف على الدائري ، ومعانا الساندوتشات وترمس الشاي !! كفاية بس أن الواحد يبص على منظر النيل من فوق !! .. وبعدين المفروض سمير ما يزعلش مني لو ما رضيتش أركبه معايا العربية ، صح ولا لأ ؟؟ !! مش هو كل يوم بينفض لي وما بيرضاش ياخدني معاه في سكته وهو مروح ع الفسبا بتاعته ؟؟ .. بس لأ !! .. أنا برضة هاطلع أجدع منه وأوصله ، وآهي الناس لبعضيها .. وبعدين حرام يركب الفسبا في الشتا والهوا بيبقى ساقع ويخبط في صدره !! .. ده الواحد لما بيبقى قاعد جنب الشباك في الميكروباص والإزاز مش مقفول للآخر بيبقى حاسس إن ودانه هاتتقطع من كتر السقعة ، كأن فيه منشار بياكل فيها !! ما بالك باللي جسمه كله في الهوا ؟؟ .. بس كده المفروض سمير يعمل حسابي معاه في الفطار الصبح !! .. أه .. هي العربية دي مش هايتحط فيها بنزين ولا إيه ؟؟ .. وممكن كمان آخد معايا مدام زينب والأستاذ علي بتاع المخازن في سكتي .. بس كل واحد فيهم يدفع لي حاجة أول كل شهر ، متهيألي ما فيهاش حاجة !! مش أرحم من التنطيط في الميكروباصات والتكاتك ؟؟ .. يعني لو كل واحد فيهم دفع خمسين جنية مصلحة برضة !! .. تصدق أنا ممكن أعمل العربية دي دورة موظفين ؟؟ .. يعني أوصل الفوج الأولاني وأرد بسرعة على الشغل آخد الفوج التاني !! .. بس لأ !! .. كده العربية هاتتبهدل ، وكل واحد دفع لي جنية هايبقى عاوزني أنزله قدام بيته وأطلعه على سريره كمان !! .. كفاية زينب وعلي وسمير !! .. وزينب تقعد جنبي قدام .. ههههههههههه .. ده سمير ممكن يتنقط ساعتها !! .. هي أرملة صح ولا مطلقة ؟؟ .. مش هاتفرق كتير !! بس عليها نص تحتاني ابن كلب !! .. قليل أوي لما تلاقي ست متجوزة ومحافظة على الشاسية بتاعها سليم !! .. المشكلة بقى لو مراتي شافت زينب وهي راكبة جنبي قدام !! .. يا نهار أسود !! .. لأ ومراتي بترجع من شغلها دائري !! والعربية كمان مميزة !! يعني هاتشوفني هاتشوفني !! .. أحسن حل أعمل الإزاز فاميه !! .. علشان اللي بره ما يشوفنيش !! .. وآخد زينب ونطلع على الدائري !! .. بس لا يا عم !! .. ده الواحد بيشوف هناك كمية حوادث اللهم احفظنا !! السواقين بيجروا عليه زي المجانين !! .. طب قدّر في مرة طلعت مع زينب وراحت جت مقطورة شالتنا من ورا ؟؟ .. أقابل ربنا إزاي ؟؟ .. اللهم احسن ختامنا جميعاً .. لعلمك أنا بق ع الفاضي !! .. والله يا عم الحريم اللي معانا ما هاتتعوض تاني ولا هانلاقي ضفرها !! بس هو الشيطان اللي ابن كلب !! .. آدي يا عم اللي خدناه من العربيات !! ما خدناش منها غير المصايب !! .. لأ ده غير بقى الجري كل شوية على الميكانيكي والكهربائي والعفشجي !! .. بيت تاني يا عم !! .. ولا علشان تركنها تحت البيت ، هاتعمل لك ميت خناقة مع الشارع كله !! .. وكل يوم تنزل تلاقي عيل كسر لك مراية ولا طبق لك الكبوت !! .. وبعدين البلد أصلاً بقت تخنق ، والعربيات بقت فوق بعض !! والسواقين كمان بقت أخلاقها زي الزفت وبلطجية !! .. يعني ممكن عيل معفن بتوك توك يخبطها لي وينزل يرفع عليا سنجة !! .. مالها رجلينا يا عم ؟؟ .. ما احنا كده الحمد لله زي الفل !! .. وبعدين ده أنا بيتي في الشارع اللي ورا الشغل على طول !! .. يعني يوم ما باتدلع في المشي ما باخدش سبع دقايق لحد هنا !! .. عربيات إيه يا راجل وزفت إيه !! .. أقول لك ؟؟ أنا آخد العشرتلاف جنية وأعمل بيهم مشروع أحسن ، أنا ممكن ............".
باشا
ردحذفواحشنى كتير
بس دماغى سوست يعنى زيادة المرتب تسبب فى الكوارث دى كلها وفى الأخر يطلع الشغل جمبه
وإذا كان ده التسلسل للأحداث علشان عربية طيب مككملتش ليه قصة المشروع ؟! :) :)
تحياتى يا باشا وإوعى تجيب عربية
وحشتني جدا مواضيعك يا كبير .
ردحذفبرنس صحيح في كتاباتك . ومجنون في تصوراتك وخيالاتك . ودا شيء رائع منك .
خصوصا انك بتحكي عن مشاكل جوا بعضها . بداية من الراتب ومتمعقا بطريقة فلسفية بين التطور الحاصل والحادث في المجتمع والصراع الدائم بين الخير والشر . والبداية والنهاية . والخيال المريض الساكن والمعشش في دماغ كل منا .
وكانت الكلمات صريحة بكل معانيها . وحتى السباب والشتائم الموجودة اضافت نكهة مصريه اصيلة واصليه . فمن منا يستطيع ان ينكر ذلك .
اعجبني الخيال المبني على حلم حقيقي صعب تحقيقة . نتنازل عن أحلامنا لأننا لا نستطيع تحقيقها أحيانا . ونبحث عن أخر ونتنازل عنه أيضا . وهذا ان كان فإنه لعدم ايماننا بحلمنا .
واما عن المشروع فلا شك انه سيكون كسابقه .
كلها أحلام شخص واحد . العربية زي المشروع بالظبط زي اي حاجة تانية . هتطلع من حفرة هتقع في دحديرة .
اعجبني جدا تصويراتك المصرية الواقعية الحقيقية . هي ليست مصرية هي انسانية .
تشكراتي كامل احترامي وتقديري . دعواتي وتحياتي
اللي باعت بلاص اللبن قبل ما توصل للسوق و عملت و سوت و بعدين البلاص اتدشدش.
ردحذفبص بقى يا عم أنا مش عايزة لسه المرتبات تزيد..أنا عايزة 10 مليون دولار و لا يورو على طول..لسه هنشتغل و نتقرف..لا نغتني على طول أحسن بقى ههههههههههههههههههههههههههه.
ربنا يسعد حالك و يفرحك يا باشا.
ياااااااااااااااااااااا فرج الله
ردحذفالتعليقات لاحقتها قبل ما تغلق
يعنى مش عارفه اعلق على اخر بوستين
مبدئيا شكرا لسؤالك وانا بخير الحمد الله ورجعت اهو
والبوست اللى فات ضحكنى موووت وفظيع في كل حاجه السرد والافيهات
وياريت توصل سلامى بقي لمدام بنت باشا :)
ويارب تكون بخير
شوقتنا لمدام زينب ... صحيح بالمناسبه هيه أرمله ولاا مطلقه :)
ردحذفبس على رأى الراجل الطاهر ده ... مترفقش :)
بجد عندك قدرة غريبة تاخدنا من ايدينا زي الأطفال و تخلينا نسرح في كلامك و نتخيل كل تفصيلة صغيرة ...
ردحذفالصورة على أد ماهي مرحة و كوميدية إلا إنها معبرة جدا عن قسوة كل حاجة حوالينا و اللي ممكن توَصل للجنون ...
و بخصوص مدام زينب هي صعبت عليا أوي الحقيقة لأن ممكن ميكونش لها ذنب في حالتها الإجتماعية و اللي خلت كل الرجالة يبصولها على إنها سلعة معروضة للفرجة أو لعبة في الملاهي ..و تكون هي أول حاجة تيجي في خيال أي حد من زمايلها لما يحب يغلط .
أنت عملت توليفة غريبة و دخّلت في سطور قليلة حكايات ناس كتير ... كل شخصية منهم ممكن يتكتب عنها قصة لوحدها ..
على فكرة كمان البوست اللي فات موتني من الضحك و قريته ييجي ست سبع مرات و كل مرة اضحك أكتر من اللي قبلها .
ربنا يبارك في كتاباتك و يزودها لأننا فعلا بنستناها .
هههههههههههههههههههههههههههههههههههههههه
ردحذفتحفة
بس بينى وبينك انا كمان بنيت احلام هبقى اقولهالكم بعدين :)
Gamal Abu El-ezz
ردحذف:)
يا ألف أهلاً وسهلاً بأستاذي الغالي ، منور الدنيا كلها يا كبير والله .. تسلم من كل شر يا أستاذنا ووالله أنت كمان واحشني وواحشاني تدويناتك الجميلة المميزة الفريدة
:)
سلامة دماغك يا باشا .. شوف فخامتك هو بالنسبة لبطل القصة ، واحد حارس أمن غلبان وبيفضفض ، بيحلم ، وأقصى حلمه أن مرتبه يزيد خمسميت جنيه !! .. المبلغ ده بالنسبة له ثروة لأن مرتبه كله قايم نايم بالعيش والسلطة والحبشتكانات ممكن يوصل ألف جنيه !! .. وبعدين ما أنت عارف "عصام" يا عم فنجري بق :))
وبالنسبة للعربية ، فالحمد لله أنا ما باحبش السواقة .. بس نفسي بجد أجيب عجلة .. ما تعرفش العجلة المحترمة تعمل لها كام دلوقت ؟؟
نورتنا
SHARKawi
ردحذفيا ألف أهلاً وسهلاً بالناس الحلوة المختفية :))
منور الدنيا كلها يا كبير وبجد واحشني وواحشاني تعليقاتك ، ونفسي ترجع تكتب وتبدع تاني يا أستاذنا .. ربنا يطمننا عليك يا رب وتكون في أحسن حال إن شاء الله
"نتنازل عن أحلامنا لأننا لا نستطيع تحقيقها أحيانا . ونبحث عن أخر ونتنازل عنه أيضا . وهذا ان كان فإنه لعدم ايماننا بحلمنا . وأما عن المشروع فلا شك أنه سيكون كسابقه . كلها أحلام شخص واحد . العربية زي المشروع بالظبط زي اي حاجة تانية . هتطلع من حفرة هتقع في دحديرة ".
طب بذمتك يا شيخ أنا أقول إيه بعد الكلام الكبير الجميل ده كله ؟؟ .. أنت جبت الخلاصة :))
* على فكرة قبل ما أنسى نفسي وأصدق أنا كمان بجد ، البوست ده مجرد قصة !! .. أسامي الشخصيات حقيقية فعلاً وموجودة حية ترزق ، بس القصة كلها خيال .. الناس غلابة وأحلامها بسيطة زيها .. لو تتخيل زيي شكل وش صاحب البوست ده وهو بيحلم ، تقول ده جاب العربية بجد ووضبها وركب معاه سمير وخد المدام والعيال وفسحهم على الدائري ..... الابتسامة اللي شفتها على وشه تقول أنه شبع واتمرى بالشوية اللي سرح فيهم بخياله !! .. جايز أكون كتبتها هنا كأنها حصلت فعلاً على لسان "عصام" علشان أكافئة على حلم هو يستاهل أنه يتحقق له :))
ربنا يكرمك يا رب ويعزك ويفرح قلبك زي ما فرحتني بكلامك وتشجيعك وزيارتك الكريمة ، انتوا الأحسن يا عم ، ووالله العظيم اتعلمنا وبنتعلم كتير من حضراتكم
نورتنا
سنكوح شنن لملوم سامي
ردحذف:))
يا ألف أهلاً وسهلاً يا باشمهندسة منورانا والله .. أيوووووه كده بالظبط !! .. على رأي المثل : الجعان يحلم بسوق العيش :))
يا رب بحق جاه النبي ارزقها بالـ عشرة مليون يورو من حيث لا تدري ولا تحتسب علشان تديني منهم مليون يورو آمين يااااااااااااااا رب
D:
أيوه يا فندم مش الدعوة دي ليها أتعاب ولا إيه ؟؟ .. جبت لك عشرة مليون يورو في تعليق أهه ، كتير عليا مليون يورو ؟؟
ربنا يسعد حضرتك ويفرح قلبك
نورتينا
rona ali
ردحذف:))
يا ألف نهار أبيض ، ألف حمداً لله على السلامة يا أستاذة نورتي الدنيا كلها والله .. وبعدين لا شكر على واجب سموك احنا هنا كلنا اخوات :))
وشرف لينا بجد إن اللي بنكتبه يعجب حضراتكم ويبسطكم ده شيء بيسعدنا بشكل لا تتخيلوه :))
بنت باشا تهديكي أطيب تحية وأعطر سلام ، واحنا لله الحمد بخير وفي نعمة بفضل المولى عز وجل
شكراً جزيلاً لمرورك الكريم وسؤالك الطيب
ربنا يسعدك يا رب ويفرح قلبك ، ومش عاوزين غياب تاني :))
نورتينا
ENG./ELSAYED,PMP
ردحذف:))
هههههههههههههههههههههههههههههههه
منور الدنيا كلها يا كبير والله العظيم .. ربنا يكرمك يا رب ويفرح قلبك ويسعدك زي ما بتفرحني دايماً كده وبتشرفني بتعليقاتك اللي زي العسل :))
وبعدين ما أنت عارف اللي فيها يا هندسة !! .. ما كانت على إيدك -- مش زينب طبعاً D: -- الحكاية أقصد !! .. وأنت اللي شجعتني أنشرها يا أستاذي :))
علقوا انتوا واحنا نتضرب :(
تحية كبيرة يا جماعة للباشمهندس / سيد لأن هو اللي شجعني بصراحة على نشر البوست ده واللي فات :))
ربنا يحفظك ويعزك يا رب .. باتعلم منك كتير وربنا
نورتنا
جيلان حمزة
ردحذف:))
ربنا يكرمك يا أستاذتنا يا رب ويسعدك ويفرح قلبك ويجازيكي كل خير على مرورك الرائع وتشجيعك الكريم .. حضرتك مبدعة كبيرة والله واحنا بنتعلم منك :))
بالنسبة لزينب .. أنا متفق مع رأي حضرتك بنسبة كبيرة ، وفعلاً الواحد في حياته قابل قصص كتيرة شبه قصص زينب .. كنت لسه باحاول أكتب في قصة منهم من يومين والله بس ما عرفتش أبدأها منين وكسلت أكملها :)
بالنسبة للبوست اللي فات ، فبجد بنفرح لما نلاقي اللي بنكتبه أسعد حضراتكم ، وبجد ألف شكر على ثقتكم ومتابعتكم وتشجيعكم :)
نورتينا
reemaas
ردحذف:))
ربنا يكرمك يا دكتورة يا رب ويسعدك ويحقق لك كل أحلامك بإذن الله
شكراً جزيلاً على مرورك الكريم وتشجيعك
نورتينا