التاج

- فاكرين زمان من تلات أربع خمس سنين كده ، كانت انتشرت في المدونات لعبة التاجات دي ، كانت موضة وقتها إنك تدخل أي مدونة وتلاقي صاحب/ة المدونة مفتكس شوية أسئلة ويمررها لكام واحد علشان يجاوبوا عليها .. ولأني شايف إن المناخ العام للمدونات يفتقر إلى البهجة ، فحبيت إننا نلعب اللعبة دي تاني :))

في التاج ده ، كلنا هانفتكس الأسئلة مع بعض .. اللي عاوز يشترك في التاج يحط الأسئلة اللي تعجبه .. بشرط أنه هايجاوب على أسئلته وباقي الأسئلة في مدونته .. أه مش عاوزين خَم !! .. يعني ما يجيش واحد يسأل ويجري !! .. يعني مثلاً أنا هاحط خمس أسئلة وفلان تلاتة وفلانة سبعة يبقوا خمستاشر سؤال كل واحد فينا احنا التلاتة ملزم يجاوب عليهم في مدونته بصراحة طبعاً .. ياللا يا جماعة عاوزين الكل يشترك ، وبالذات الناس اللي غايببن بقالهم فترة !! .. ويا ريت الأسئلة -- بعد إذنكوا طبعاً -- تكون حلوة كده ومرحة ويا حبذا لو فيه أسئلة مفتكسة ومطرقعة !! .. والهدايا دي كلها للي هايشتركوا في التاج .. كل واحد ياخد الهدية اللي تعجبه ، إن شالله ياخدهم كلهم .





















تعليقات

  1. جيلان حمزة12‏/11‏/2013، 1:48:00 ص

    أنا مش فاهمة اللعبة أوي لأني جديده على عالم التدوين لكن مشتركة معاك ( هههه خدوني معاكم لأموت نفسي ) بس هستنا شوية لما أشوف اللعبة ماشة إزاي .

    ردحذف
  2. P A S H A12‏/11‏/2013، 2:53:00 ص

    جيلان حمزة
    :))

    مساء الفل .. بصي هو أنا فاشل في موضوع التاج ده لأني بصراحة أول مرة أعمله ، ودايماً كنت باهرب من الإجابة على الأسئلة اللي فيه D:
    بس هو باختصار كان شوية أسئلة المقصود بيهم التعرف على شخصية المدون بعيد عن التدوين ، لأن ساعتها كان معظمنا ما يعرفش بعضه ولا حضروا لقاءات وشافوا بعض ، فكانت الأسئلة من نوعية :
    نحب نعرف وبصراحة !! أسامي دلع صوابع رجل المدون فلان ؟؟ ويا ترى بتحب رجلك اليمين أكتر ولا الشمال وليه ؟؟ وأنهي صباع بيفكرك بذكرى مؤلمة ؟؟ وأنهي صباع ما بتحبش تبص له ؟؟ وهل في مرة حصل لك موقف طريف مع صوابع رجلك ؟؟ ولو هاتلون صوابع رجلك هاتختار ألوان إيه ؟؟ لو في يوم قررت ترتبط ، إيه هي مواصفات صوابع رجل فتاة أحلامك ؟؟ وهل ممكن ترتبط بواحدة بتحبك بس خنصر رجلها اليمين مدوحس ؟؟ وفي النهاية تحب تهدي التاج ده لمين من المدونين عشان يجاوب عليه ؟؟
    D:D:
    طبعاً أنا باهرج ، هي الأسئلة كانت بتبقى مختلفة عن كده بس تحسي إن فيها ريحة صوابع رجلين برضة :))

    كانت فيه تاجات بتتعمل عن موضوع معين زي القراءة مثلاً ، وتاجات عن العاتشفة ، وتاجات فيها إختبارات نفسية وكده يعني ، عموماً أنا قلت نغير ونخللي التاج مفتوح من باب التجديد ، علشان اللي عاوز يسأل عن أي حاجة ، وليكن عن المناخير مثلاً D:

    ردحذف
  3. P A S H A13‏/11‏/2013، 9:10:00 ص

    :))
    أنا متهيألي نقفل التاج على كده يا جماعة ، كفاية قوي الأسئلة دي كلها D:
    يومكم فل بإذن الرحمن

    ردحذف

لا يسمح بالتعليقات الجديدة.