نزلت أجيب عيش
نزلت أجيب عيش .. بعد ما قعدت أتحايل على ماما قد كده وحلفتلها أني هخلي بالي من نفسي ومش هاوقع الربع جنيه من إيدي وهامشي ع الرصيف ومش هالعب في الشارع وأني هاعد العشر أرغفة كويس قبل ما أحطهم في الشنطة الشبك .. خدت الربع جنيه ونزلت جري ؛ ما رديتش حتى على عم صلاح اللي كان بينده عليا .. ولما وصلت الفرن ما لقيتش الربع جنيه في إيدي اليمين اللي كنت متبت عليه جامد ولا الشنطة الشبك اللي كانت في إيدي الشمال ؛ واكتشفت أن مش هي دي فرن أبو سمير ولا ده الشارع اللي ورانا ولا هي حتى نفس المنطقة .. اديت الولد اللي واقف خمسة جنيه اداني عشر أرغفة في شنطة بلاستيك خفيفة ؛ سألته بهزار : عشرة دول ؟؟ قال لي : عدهم !! قلت له : بطلت أعد من زمان .
شريف باشا...
ردحذفصباح الفل.....
ياااااااااااه كان من أمتي الكلام ده وبعدين الجيل الجديد ماحدش يعرف الربع جنيه بقى عمله منقرضه واحنا كمان بقينا بنفكر بطريقه منقرضه المكان بقى مش هو ولا حتى الزمان هاقولك على حاجه المنطقه اللي عايشه فيها انا اصلا مولوده فيها واتربيت وبقيت شابه كله فيها حتى لما اضطرت ابعد عن بيتنا فتره كان برضه البيت التاني مش بعيد المهم الناس مش بقيت هي حتى جيران البيت اللي عايشه فيه كل حاجه اتغيرت وبركتها بقيت أقل
ربنا يجعل الجاي أفضل
بس انت نسيت تقول العيش كنت هتفطر به ولازم طبعا هتفطر فول وفلافل اقصد طعميه معلش بقى اللهجه السكندريه بتحكم....
القفزة بين الحقبات الزمنية رائع حتى الالم!
ردحذفلا تجعل ذاك الطفل الذي يعيد احياء الماضي الجميل بداخلك يفلت منك.
نهارك سعيد :)
ياه انت من ايام العيش الطباقي ولا يمكن المحسن وبعدين المميز ابو شلم بقي...ده انت اقطاعي ياريس بقي.. انا بقي من ايام العيش البلدي بتاع فرن حفني...كان بتعريفة ....تقريبا القمص كله كان بعشرة صاغ...فاكر والله واد صوته كان مسرسع وبنضارة كعب كوباية ولسه بيرن صوت امه في ودني كان يحاول يخش في الزحمة وابن العفريتة كل ما اروح اجيب عيش الاقيههناك اكنه عامل ابونيه ويفضل يقول قفص ياعم جمال قفص ياعم جمال يجي ساعة بدون بريك لما يطلع ديك ام عم جمال ويمشيه بش عشان الصداع ...كنت ساعتها بقول يا اولاد الاكيلة كل يوم تاكلو قفص عيش ياه ده ابوه اكيد راجل اقطاعي اللي بيصرف عشرة صاغ ع العيش بس وكان الله في عونه.....ياه يخربيته لسه سامع صوته قفص ياعم جمال ..الله يرحمه تلاقيه جاله صدمة اول ما عرف ان العيش بقي بنص جنيه دلوقتي تلاقيهم داخلوه القفص ههههههههه
ردحذفيا باشا
ردحذفالربع جنيه كان بيجب عشر ارغفه أيام الجنيه الجبس
دلوقتى احنا فى عصر الجنيه العايم كله عايم وربنا يكفينا ويكفى بلدنا شر العوم
ولو كانت العمله قيمتها نزلت لان الناس الى بتبيع بتغلى فى حاجتها كأنها ممنوعه ولما الكل يغلى بضاعته بنرجع لنقطة الصفر تانى بس الفرق ان بيبقى بدل الجنيه خمسه جنيه
ياه بتفكرنى بأيام زمان
ردحذفكان جدى عنده مخبز بلدى
مكناش بنلاقى حد يشترى العيش
بحكم أننا أرياف ، كان عيب إن حد يشترى
عيش من الفرنه
كان الرغيف الملدن المفرود
كان بتعريفة
بس النقلة الإحترافية بتاعتك
فى التنقل عبر الأزمنة المختلفة روعة
خالص اعتزازى
زهــــراء
ردحذفمساء الفل والورد على حضرتك يا أستاذتنا
:)
والله ما فاكر يا أستاذة ؛ صدقيني والله ما فاكر !! كل اللي فاكرة أني كنت نازل أجيب عيش .. كنت عاوز ماما تصدق أني كبرت وأقدر أروح الفرن لوحدي وأعرف كمان أشيل العشر أرغفة .. كنت لابس فانلة نص كم وشورت وصندل جلد بأبزيم كانت صوابع رجلي على طول بتخرج بره منه .. فاكر سلم بيتنا القديم اللي كان زي سلالم الفنارة اكمنه ضيق قوي وعامودي .. فاكر عم صلاح البقال اللي تحت البيت واللي لما كنت أشتري منه حاجة وآجي أمشي يقول لي استنى خد الباقي ليك قرشين ويقوم مطلع علبة صفيح قديمة فيها عملات معدنية ويقعد يتلكع وهو بيدور ع القرشين وفي الآخر يقول لي خد لك بيهم لبان (كان غالباً سمارة أو الفواكة) أو مشط كبريت .
كل اللي حصل بعد كده حصل إمتى وإزاي ؟؟ ما أعرفش !!
معقولة كل ده حصل مسافة ما نزلت أجيب عيش ؟؟
:)
ربنا يبارك في عمرك ويسعدك ويفرح قلبك
عُلا وتد | Ola
ردحذف:)
هي فعلاً قفزة بس قفزة كبيرة شويتين تلاتين حاجة وتلاتين سنة
:)
والله يا أستاذة - والحمد لله - عمرها ما كانت مشكلة الطفل اللي جوانا ؛ واللي باستمرار بيلعب وبيتشاقى جوانا وبيحاول ينط بره مننا من وقت للتاني .. وما نقدرش نقول برضه أنها مشكلتنا ؛ لأننا ما نقدرش نعيش من غير حتة الطفولة البريئة اللي جوانا واللي بتخلينا نبتسم ونلعب ونبكي ونسامح وننسى ونتعلم ونخطيء باستمرار .. المشكلة في الزمن اللي ماسك لنا كرباج وبيجرينا كلنا قصاده .. علشان نكتشف في النهاية أن الحياة مش أكتر من مشوار صغير قوي قوي بيخلص قبل ما ناخد بالنا منه.
:)
وبمناسبة الطفل ؛ لسه كنت بالعب مكعبات مع العيال بس خدوها مني ؛ هاضطر استنى لحد ما يناموا بالليل وأقعد ألعب بيها كلها لوحدي هههههههههههه
:)
ربنا يسعد أيامك كلها ويفرح قلبك
Tarkieb
ردحذف:)
لا يا عم أنا لسه صغير أنت اللي كبير
:D
مش قادر أقول لك تعليقك عمل فيا إيه !!
والله العظيم حسيت أني واقف معاك في الطابور وسامع صوت الواد اللزج ده اللي يصدع بلد !! .. إيه ده يعني أنت على كده كنت بتجيب العشر أرغفة بشلن ؟؟ .. أنا أوعى ع القرشين وفاكر كويس أن رغيف العيش كان بقرشين تقريباً لحد ما بقى عندي عشرة حداشر سنة وكنت لما باشتري حاجة ساعات كنت باخد الباقي قروش وغالباً كنت باخد بيهم لبان أو كبريت لأنهم كانوا خلاص قربوا ينقرضوا زي الربع جنيه دلوقت .. وشفت المليم والتعريفة في البيت بس ما أتعاملتش بيهم الصراحة .. وفاكر كويس أني أتصدمت لما عرفت أن القروش أتلغت لأني كنت محوش منهم كتير في الحصالة .. وبعد فترة لغوا الشلنات والبرايز الورق .......... إلخ
بس أنت عارف الجميل في كل ده ؟؟ ورغم كل الزمن والحقب التاريخية اللي عدت علينا دي (على اعتبار أن الجيل الجديد هيعتبرونا ديناصورات دلوقت) أننا فاكرين كل التفاصيل الجميلة دي .. يمكن ما أكونش فاكر حاجة حصلت من سنتين تلاتة لحد عشر سنين ؛ لكن حاجة حصلت وأنا صغير تلاقيني فاكرها كويس قوي قوي ؛ بنفس إحساسي اللي كنت حاسة وقتها ؛ بنفس شكلها وريحتها وطعمها وصوتها وملمسها ؛ واللي بيتنقل لي تلقائياً أول ما بافتكر أي ذكرى فيهم .
يااااااه عيش طباقي ؟؟ أنت عارف أنا ما سمعتش الكلمة دي من إمتى ؟؟ تقريباً من آخر مرة شربت فيها إسباتس اللي كانت مرسوم عليها دبانة ههههههههههه
مش عاوز أصدمك وأقول لك أن فيه مناطق الرغيف فيها بجنيه .. وعلى فكرة ومش مبالغة رغيف العيش أبو نص جنيه حالياً بالظبط قد أبو شلن اللي بيتباع في الفرن (ويمكن أصغر منه كمان) ودقيق زيرو يعني مش الدقيق الأسمر بتاعنا ؛ حاجة كده مالهاش طعم !! لا محصل عيش شامي ولا محصل عيش بلدي !!
:)
أنت جميل قوي يا تركيب .. ربنا يبارك في عمرك ويكرمك ويسعدك ويفرح قلبك دايماً يا رب
Gamal Abu El-ezz
ردحذف:)
تصدق يا أستاذنا أن حضرتك أوحت لي بفكرة قصة جامدة (اتعملت قبل كده في كذا فيلم ؛ منهم مشهد في فيلم كوميدي أمريكي والفيلم العربي سمير وشهير وبهير) .. نتفق نتقابل مع الأفاضل اللي نورونا هنا بتعليقاتهم في مكان ما في القاهرة وبعدين نتنقل عبر الزمن ونرجع للعشرينات أو التلاتينات ؛ بس تكون شكل الفلوس اللي معانا زي ما هي ما أتغيرتش .. تخيل بقى الجنيه ده ممكن تشتري بيه إيه ساعتها ؟؟ .. يعني مثلاً دخلنا في أغلى مطعم فيكي يا مصر وأكلنا أفخر الأصناف وفي الآخر دفعنا 24 قرش ولما سيبنا قرش بقشيش للجرسون استقال .
وبعدين نقرر أننا نشتري أراضي وبيوت في مناطق مميزة ودهب وحاجات هتبقى آثار بعد كده وقيمتها هتتضاعف لألوف الأضعاف و.......... إلخ
بس واحنا ماشيين في القاهرة وقتها وبنتفرج على الشياكة والذوق والجمال والنضافة والهدوء ؛ شوية مننا يبدأوا يفكروا أنهم ما يرجعوش تاني للزمن الحالي لأن مش هايلاقوا فيه الجمال ده حتى وهما أغنياء ومعاهم فلوس كتير .. وشوية يقولوا أنهم هيرجعوا ويحاولوا يحققوا أحلامهم اللي كانوا محتاجين فيها فلوس ويحاولوا يسعدوا كل الناس اللي حواليهم بالفلوس الكتيرة اللي هتبقى معاهم و ......
- يا ترى ساعتها حضرتك هتختار تقعد هناك ولا هترجع تاني هنا ؟؟
:)
ربنا يبارك في عمرك ويسعدك ويفرح قلبك وتحقق كل أحلامك بإذن الله
مدونة الفرسان
ردحذف:)
والله العظيم يا أستاذي بقالي زمن بادور على أي حتة أرياف أقعد فيها ومش لاقي لو حضرتك عندك مكان زي ده قول لي .. دلوقت الأماكن اللي كنا بنقول عليها أرياف بقت متمدنة عن هنا بمراحل .. نزلت بنها من حوالي شهر تقريباً (ما رحتهاش من سنة 99 من ساعة ما اتخرجت) ولك أن تتخيل الباقي !! .. راجع باعيط والله .. ما باقولش أن البلاد اللي خارج العاصمة تفضل زي ما هي ما تتطورش ؛ بس اللي بيحصل ده مش تتطور ؛ دي حاجة عاملة زي مفرمة كبيرة ماسكها مسخ بتبلع كل حاجة حلوة جواها .. بتبلع الخضرة والوسع والبراح والنفوس الصافية والهدوء والحياء والأخلاق والدين والشهامة وبتطلعهم عماير أسمنت بنت كلب أربعتاشر دور زي علب الكبريت المرصوصين فوق بعض كلها رطوبة علشان ما بتدخلهاش الشمس ؛ بتطلعهم غلا وسعار ومجرمين وبنات مسترجلة وولاد متبنته والكل بقى راكبة ميت عفريت !!
مرة أيام الكلية كنت ماشي مع واحد زميلي جنب غيط وسألته : الزرعة دي إيه ؟؟ قال لي بنرفزة وكأني شتمته : وأنا ايش عرفني ؟؟ حد قال لك عليا فلاح ؟؟ .. رديت عليه في سري : للأسف أنت ما تطولش تبقى فلاح !!
الأرياف في نظري مش مجرد شوية خضرة وبيوت دورين فيها ناس بيلبسوا جلاليب وحريم لسه بتخبز ؛ الأرياف قبل ده كله ناس بسيطة زي حياتها والاتنين فيها شبه بعض ومستمتعين ببعض .. بس أرجع وأقول لك برضه أني عاذرهم وعاذرنا معاهم لأن كلنا في نفس ذات المفرمة.
يا كبير بالله عليك تكتب عن ذكرياتك الجميلة دي .. كلمتين زي "فرن جدي" و"العيش الملدن" دول لوحدهم يتعمل عليهم عشر أفلام وميت قصة ع الأقل .. احكي لنا وانقلنا معاك للزمن الجميل ده اللي كان فيه أرياف بجد وعيش بجد .. اكتب أنت كمان يا تركيب ؛ اكتبوا كلكوا يا جماعة ؛ علشان نونس بعض وما حدش فينا يحس أنه لوحده .
:)
ربنا يبارك في عمرك ويكرمك ويسعدك ويفرح قلبك يا رب
شريف باشا....
ردحذفكنت متخيله أنك صغنن وتحاول تبين انك كبير في السن طلعت تقريبا من سني لاني برضه خريجه 1999 قرأت كل التعليقات وعن جد تمتعت بكل حرف وتمتعت كمان بحروفك وأنت بتعلق على الردود
عجبتني فكره اننا نرجع لزمان وعلى فكره بقى انا منتظره منك بوست بتتكلم فيه عن نفسك في سنك الآن وبكل ما تملكه الان بس تعيش في الثمانينات مثلا وقت احترام الكبير للصغير ووقت حاجات كتير حلوه....
بمناسبة الحديث عن الماضي وقت ما كنت في الجامعه كنت مهتمه أوي بحضور المزادات بس بيني وبينك عمري ما اشتريت حاجه كنت باتفرج وبس وفي نفس ذات الوقت والي الآن مغرمه بالقراءة حتى أن البعض يطلق عليا دوده قراءه ههههههههههه المهم كنت في زياره وباحكي عن آخر مزاد حضرته فوجئت بواحدة كانت وقتها أصغر مني بحوالي خمس سنوات لاقيتها بتقولي انتي عندك هوايات غريبه هو في ي حد لسه بيقرا الكلام ده مثلا سنه 1997 تخيل بقى لما تقعد مع شاب من الأيام اللي احنا فيها وتقول انك كنت بتقرا وتقعد تحكي عن مجله سمير والعربي الصغير ومجلات كانت بتعلمنا اعتقد هيقول وقتها علينا اننا ديناصورات ههههههه
تفتكر بعد عشره أو خمسه عشره سنه الجيل ده هتكون ايه ذكرياته
من فتره كنت باشتغل في أحد الأكاديميات الكبيره وفوجئت أن أحد الطلبه عندي انه عاوز يعرف ازاي يهكر على ايميل صاحبته على فكره انا ما كنتش فاهمه ايه يهكر دي وبعد شويه فهمت وبدأ يحكي انه شاكك في سلوكها وبدأ يستخدم ألفاظ انا كنت محرجه منها وهو بيتكلم عادي والطلبة عندي متفاعلين معاه واضطرت اني اقاطعه قولت له مش اعرف طبعا يومها استغرب وقال هو مش انتي اللي بتدرسي لنا icdl قولت له اه قالي إزاي مش تعرفي تهكري قولت له للأسف انا مش هاكرز لاني لما قدمت مشروع الماستر بتاعي نسيت أقدمه عن الهاكرز..... انت متخيل الفكر اللي وصل له الجيل الجديد
معلش رغيت كتير ووجعت لك دماغك بس عن جد الموضوع شيق وخلاني افتكرت حاجات من زمن فات
ربنا يجعل ايامك كلها خير وسعاده
ملحوظه لو حسيت اني رغايه قولي كفايه رغي وانا مش هازعل
الباشا الكبير
ردحذفالأرياف دلوقتى مبقاتش أرياف زى ما حضرتك قلت دى حقيقة
المخبز بناعما موجود إلى الآن وفى نفس المكان متغيرش
تلاقى طوابيرمن الساعة واحدة صباحاً منظرين العيش ويا سلام بقى لو واحد شبه قريبنا يقابلنى عندما أذذهب للبلد
ويفهمنى إن إحنا قرايب عشان أتوسط له عشان ياخد عيشه بدرى وما يوقفشى فى الصف
كما أن هناك عادات منها الطيبة والسماحة والأمان كانت جميلة فى الريف إنقرضت وأصبحنا أكثر تمدناً من بتوع المدينة نفسهم ،
أنا بتهياقلى إن المدينة دلوقتى هى اللى بتقلد الريف
خالص احترامى
هذا هو العائد
ردحذفمن فقدان الذاكرة
بعد سنيـــــــــــــن!!
زهــــراء
ردحذف:))
أبداً والله العظيم يا أستاذة ؛ بجد أنا مستمتع جداً بكل تعليقات حضراتكم وإلا ما كنتش أسهبت ورغيت كده وحالياً في موود رايق والحمد لله باسمع الأغنية دي مش عارف للمرة الكام :
https://www.youtube.com/watch?v=7QKG-pdl4Bs&index=8&list=PLCE7079FF1F207887
وباشرب عصير فراولة :))
لو متضايق أو ماليش مزاج للرغي والرد بتلاقوني قفلت التعليقات D:
- تصدقي عمري ما حضرت مزاد ؟؟ خلاص لما نيجي إسكندرية إن شاء الله هنحضر مع حضرتك مزاد :))
بس فاكر أني في مرة لفيت منطقة في إسكندرية كانت كلها محلات بتبيع تحف وأنتيكات (مش متذكر بالظبط كانت العصافرة ولا إيه ؟؟) علشان أجيب ساعة رملية هدية للمدام
:))
بالنسبة للقراية ؛ تقريباً اعتزلتها بقالي سنتين أو زي ما تقولي كده واخد هدنة بعد ما كنت دودة قراية برضه ؛ لقيتني محتاج أهضم كل اللي قريته طول عمري ؛ وفي نفس الوقت عاوز أستمتع بالحياة بطرق مختلفة غير القراية ؛ بس لسه باشتري كتب !! .. من فترة وقع تحت إيدي بالصدفة كنز جميل ؛ تلات مجلات ميكي جيب بحالتهم إصدار سنة 1977 كانوا عند بياع جرايد هربان من آلة الزمن ؛ لأني فعلاً ما شفتوش تاني !! دول لوحدهم ليهم بوست إن شاء الله .
موضوع الجيل الجديد ده عاوز له بوست لوحده .. بس عارفة ؟؟ ساعات باضحك بيني وبين نفسي لما باقفشني باعلق عليهم وبانتقدهم باحس من جوايا قد إيه أنا كبرت وبقيت عامل زي أبويا وأمي زمان لما كانوا بينتقدوني :))
كل جيل وله ظروفه ؛ بس هما فعلاً جيل مظلوم .. احنا يمكن اتظلمنا في الطفرة التكنولوجية اللي حصلت واللي حسست معظمنا أننا بقينا جيل قديم ومتخلف عنهم ؛ يمكن قدرنا أننا نطلع في وسط طور التحول ده ؛ مش عارف !! بس عشنا أيام حلوة والله يا أستاذة لسه عايشين عليها لحد دلوقت وبنحكي عنها .. هما جيل طلع لقى التكنولوجيا هي كل حاجة فبقت أسلوب ورتم حياة بالنسبة لهم ؛ بقوا زي الروبوتات !! بس للأسف المناخ العام والظروف زي ما حضرتك شايفة ؛ خليت معظمهم ييأسوا أو يكبروا دماغهم ع الآخر !!
- بالنسبة للبوست اللي أتكلم فيه عن نفسي ؛ ربنا يسهل :))
حالياً أنا باكتب بتاع تلات أربع قصص احتمال اضربهم في بعض يطلعوا قصيدة وفي الآخر احذفها :)
وباكرر مرة تانية .. اتكلموا براحتكم يا جماعة دي مدونتكم
ربنا يسعدك ويفرح قلبك ويحلي كل أيامك
مدونة الفرسان
ردحذف:))
يا كبيرنا والله العظيم بنها سنة 99 كانت أنضف من مناطق كتيرة في القاهرة ؛ ودلوقت برضه أنضف من مناطق كتيرة في القاهرة ؛ بس ما بقتش بنها اللي أنا أعرفها زي القاهرة بالظبط .. شوارع ما أعرفش طلعت إمتى وزرعت أبراج ومحلات .. حسستني أن البلد صغرت .. مش عارف هل المشكلة علشان لقيت الأماكن اللي كان ليا فيها ذكريات وكنت متعود أشوفها وأنا هناك اتغيرت أو اختفت زي السندوتشات اللف ولا علشان التتة اللي هي العربية السوزوكي الصغيرة بقت بجنيه بعد ما كانت ببريزة ؟؟ ولا علشان ما بقاش ليا فيها حد أعرفه ؟؟ .. ما أعرفش !! بس اللي حسيته لما رحتها أن ما بقالهاش نفس الطعم والريحة والدفا اللي كنت باحسهم أول ما بانزلها .
" كما أن هناك عادات منها الطيبة والسماحة والأمان كانت جميلة فى الريف إنقرضت وأصبحنا أكثر تمدناً من بتوع المدينة نفسهم ، أنا بيتهيألى إن المدينة دلوقتى هى اللى بتقلد الريف"
:))
أوجزت فأوفيت يا أستاذنا والله .. كتبت كلام كتير بس مسحته لما لقيت عبد الحليم ببيقول :
شوف بقينا فين يا قلبي .. وهي راحت فين
شوف خدتنا لفين يا قلبي .. وشوف سابتنا فين
في سكة زمان راجعين في سكة زمان .. في نفس المكان ضايعين في نفس المكان
لا جراحنا بتهدي يا قلبي .. ولا ننسى اللي كان يا قلبي
:))
شرفت مدونتك يا كبير ، ربنا يبارك فيك ويسعدك ويفرح قلبك يا رب
norahaty mo
ردحذف:))
هذا هو العائد بعد فقدان الذاكرة لسنيـــــــــــــن !!
هو ده بالظبط يا دكتورتنا اللي حصل.
:)
الله يفتح على حضرتك ويبارك لك وينور بصيرتك ويسعدك ويفرح قلبك
مبدع يا شريف
ردحذفتقبل تحياتى
محمد سلامة
ردحذف:))
ربنا يخليك يا محمد أنتوا الأحسن والله
ربنا يكرمك ويبارك لك ويسعدك ويفرح قلبك زي ما فرحتني بتعليقك الجميل
:)
نورتني
باشا
ردحذفالفكره جامده جدا بس صدقنى مش هتقدر تقعد هناك لأننا بالنسبه للناس بتوع زمان هنبقى نصابين لانهم كانوا طيبين جدا ومش مادين والأفلام الى حضرتك قوت عليها مظهرتش الطبيعه دى فى الناس بتوع زمان . دا غير فرق التكنولوجيا كمان يعنى بصراحة مش مستعد أقعد قدام تليفزيون ابيض واسود زمفهوش غير الاولى والتانيه والإرسال يفصل الساعه 9 ههه
تحياتى على فكرتك الجميله وأكيد هرجع تانى
فين التدوينة؟
ردحذفابو دراع!!
دا انا جاية أجررررى !!!
ماشى يا بـــــــــــاشا
Gamal Abu El-ezz
ردحذف:))
مش عارف والله يا أستاذنا الأحسن إيه ؟؟ .. أننا نقعد هناك ولا نرجع هنا ؟؟ .. يمكن نظرياً الكلام سهل بس لما باتخيل وبافترض أن ده ممكن يحصل فعلاً بالاقيني مش عارف .
سعيد جداً بتعقيبك ؛ تشرفني في أي وقت يا كبير دي مدونتك طبعاً
:)
norahaty mo
ردحذف:))
عذراً شديداً والله يا دكتورة ؛ بجد باعتذر لحضرتك ولكل السادة الزملاء الأفاضل اللي التدوينة ظهرت عندهم في الريدر . أنا آسف حقكوا عليا يا جماعة
:)
بس أصلي كنت باحاول أرجع التعليقات القديمة (مش فاكر للمرة الكام الحقيقة) وسبت الجهاز 14 ساعة يرفع في الملف وبعد ما لقيت كل البوستات رجعت وفرحت قلت أبدأ أنشرهم بقى .. ونشرت التدوينة بتاعة "أبو دراع" -- اللي هي بالمناسبة قديمة وبقالها بتاع شهر وشوية -- لقيتها اتنشرت بتاريخ النهاردة ومن غير أي تعليقات
:(
وكذلك باقي البوستات !!
2716 تعليق من شهر أغسطس 2011 (من ساعة ما اتغابيت وعملت القالب الجديد وكنت فاكر أن التعليقات القديمة هتبقى محفوظة فيه) لحد شهر يناير 2015 Gone With The Wind مع أنهم موجودين في الملف الـ XML
مش عارف هل أعيد نشر البوستات القديمة وفي آخر كل منها التعليقات ؟؟
ولا أنشرهم من غير تعليقات ؟؟ ولا أقفل المدونة دي خالص وأروح ع المدونة التانية ؟؟
شاركونا بمقترحاتكم
أنا حزين جداً والله
الحمد لله على كل شيء
:)
شريف باشا
ردحذفيعني جيت أشوف ابو دراع يمكن حدوته تنفع للأطفال الاقي البوست راح وذهب مع الريح
نصيحه اوعي تغير قالب المدونه غير لما تاخد حذرك وبعدين اللي راح راح تقريبا من وقت ما فتحنا المدونه صديقتي لولا وأنا خايفه افكر اني اغير القالب....
اكيد طبعا وقت ما كتبت البوستات القديمه والتعليقات كنت مبسوط بالحوار خلاص حاجه وفرحت في وقتها انسى بقى يا عمرو يوووووووه اقصد يا شريف
😁😁😁😁
المهم اكتب بوستات جديدة وتلاقي في تفاعل جديد وحوار جديد كمان لو حابب انك تعيد نشر بوست قديم اكتبه ونتفاعل معاه ونقرأ ونضحك ونتكلم ونعلم ونتعلم من بعض
رأيي المتواضع كمل كتابه وسيبك من اللي راح وبذلك 14 ساعه مشغل الجهاز سواء بي سي عادي او لاب أو تاب أو أي وسيله تانيه يا عم مين هينفع فاتورة الكهربا 😉😉😉
ده رأيي والله الموفق
محدثتك فاطمه الزهراء من الاسكندرية
اسمع كلام فطوووم
ردحذفأنسى اللى فات مات
وابدأ من جديد وبعدين
يا مفترس سايب الجهاز
كام؟14ساعة!!!حرام حرام
هى فاتورة الكهربا على
حساب مين؟ :)
ههههههه عندها حق دكتوره نورا ده الافترا اللي بتعمله على النت لازم يخلي البوستات تروح ولا ترجع
ردحذفزهــــراء
ردحذف:)
مش مشكلة قالب .. مشكلة القالب دي وقعت فيها من أربع سنين لما استنصحت وافتكرت أني لما هاعمل حفظ للقالب هيحتفظ بالتدوينات القديمة والتعليقات واكتشفت لما فتحت المدونة دي بعد ما حذفت المدونة القديمة أنه بيحتفظ بالقالب بس ..الكلام ده حصل آخر 2010 .. أنا باتكلم على تصدير المدونة .. جوجل بيسمح أنك تحتفظي بالمدونة كلها على قالب بصيغة XML بحد أقصى حجم 15 ميجا .. صادفت مشاكل كتيرة في المدونة الفترة اللي فاتت ما كنتش عارفها بالظبط فقلت احتياطياً أصدر المدونة وبالفعل صدرتها على ملف بالصيغة سالفة الذكر بحجم 10 ميجا .. وقعدت أظبط شمال ويمين شوية مشاكل أتحلت وشوية لأ .. المهم حفظت المدونة تاني بملف جديد بصيغة 4 ميجا (اللي هي البوستات بس من غير تعليقات) وبدأت أظبط وأنقح فيها وأعيد نشرها لحد ما قدرت أظبط 55 بوست من أصل 217 .
السؤال هو : ليه جوجل مش عاوز يرفع الملف بالكامل ؟؟ أنا بعت لهم شكوى ما حدش سأل فيا .
الأسهل بالنسبة لي أني أكمل نشر أو أفتح المدونة الجديدة واللي فات مات .. بس ده تاريخ يا جدعان وتعب وشقا وذكريات وناس حلوة شاركتني وشجعتني واتواصلت معايا على مدى سنين وفيه منهم اللي بعد خالص واختفى .. أنا أصلي باعتبر المدونة زي ألبوم الصور كده اللي مهما الواحد غاب عنه أو أنشغل وحب يرجع له تاني ؛ يبص فيه يلاقي كل حاجة متسجلة ومحفوظة زي ما هي .. مش بس علشاني أنا ؛ علشان حضراتكم كمان .
الحمد لله على كل شيء
شكراً جزيلاً لتشريفك الكريم وتعليقك ؛ ربنا ييسر اللي فيه الخير والله المستعان
norahaty mo
ردحذف:)
الله المستعان يا دكتورة .. ربنا ييسر اللي فيه الخير والحمد لله أولاً وأخيراً على كل شيء
شكراً جزيلاً لاهتمامك بالتعقيب ونصيحتك الغالية
:)
زهــــراء
ردحذف:)