افتحو لاديك


- انا بحب ادخل مدونتك عشان عندك مدونات كتير حلوا ومنوعه

- :D .. احم .. شكراً لذوقك ربنا يكرمك ؛ هما كلهم أساتذة بصراحة وأنا باتعلم منهم

- باشا دا اسم باباك ولا شوهره؟

- شوهره ؟؟؟ .. للأسف الناس فاهمه الاسم غلط !! عارفة لما تسيبي ورقة في شوية ميه ؟؟ مش بتلاقيها باشـِت ؟؟ فأنا بقى أقصد أن شريف باشا يعني ذاب أقصد ذابا :D

- اااااااااه انت اصدك بللغه الفصحا

- أه بالظبط آسف أقصد بالزبت !!

- انتا بتتريء عليا؟

- إطلاقاً يا فندم أنا أقدر ؟؟

- انا بكتب فرنكو عادتا بس بكتب عربي عشان انتا تفهم

- ده جميل عمري ما هنساه لحضرتك !! صدقيني أنا كمان دلوقت نسيت العربي كان شكله إيه !!

- انتا ليه بطلت تعرض الافلام الي كنت بتحكها لنا فمدونتك؟

- خلصت للأسف من كتر ما باحكها لكم !!

- ؟؟؟

- لا لا ما تاخديش في بالك !!

- على فكرا انا بكتب شعر

- بجد ؟؟؟؟

- احم على ادي ياعني

- طب ما تقولي لنا حاجة ؟؟

افتحو لاديك

- افندم ؟؟

افتحو لاديك

 بكرا مستنيك

متبوصش على انو بيتاخر

افتحو لاديك

انتا انبارح طفل صغير

هدومو فالنطره بتشحور

انهارضه انتا عالموضا وشيك

افتحو لاديك

بكرا مستنيك
:)

- أنا دمعت !!

- سوري مش اصدت ادايقك،عجبتك بيجد؟

- باقول لك دمعت !! أنا معايا واحد صاحبي انهار من كتر العياط !! دلوقت بيتشقلب وعضلة الفك عنده قفشت على مناخيره !!

 - هاتحسسوني بلزمب ليه بئا؟؟ واللهي انا توقعتك هاتقولي ايه الأرف دا !!

- هي فعلاً خرا فية !! ليه ما تكمليهاش ؟؟

- هيا مشاء الله كانت طويله بس انا اختسرتها فالشويه دولم،قولت كيدا زالفل برده

- ممكن بعد إذن حضرتك أنشرها عندي في المدونة ؟؟

- انتا فجأتني !! بس لسا فحاجات فيها عوزا تتزبط ولا اسبها كيدا؟ موش عارفه!!

- لا دي حاجة فل قوي !!

- هيا فورصه قمبلة طبعا،هاتنشرها امتا انشاء الله؟

- حالاً لو تحبي !!

- اشطه بس انا مليش دعوا!!طاب هاتسميها ايه؟

- " افتحو لاديك" .. تحسيه عنوان ملغز ومبهم ؛ القاريء هيببقى عنده فضول وهو بيقرا القصيدة أنه يعرف هو إيه ده اللي يفتحه ؟؟ ويفتحه لمين بالظبط ؟؟ ولو ما فتحوش يعني التاني هيدي له إيه ؟؟ والسؤال الأهم بقى هيدي له فين ؟؟ أراهنك أن ما حدش هياخد باله خالص أنك تقصدي "افتح له إيديك" !!

- بس انا مش اصدت المعنا دا خالص !!

- ?? Really 

- أنا اصدت اديك

- اللي هي بمعنى أعطيك ؟؟

- لأه اديك الي هو اديك يا اخي بتاع كوكو كوكو !!ولا كان مفرود ياعني اكتبها افتحو ليديك؟

- كوكو كوكو ؟؟ يكونش قصدك: افتحوا للديك ؟؟

- اه بالزبط،هو صحبك فهم كيدا برده؟؟

- هه ؟؟ ما لحقتش اسأله بصراحة لأنه انتحر.

تعليقات

  1. زهــــراء25‏/02‏/2015، 10:45:00 ص

    شريف...

    إيه العربي الفظيع ده احيه يا ابو سوسو احيه خد بالك الجمله دي عاديه جدا في اسكندريه ☺
    المهم انت ناوي تقضي على الناس اللي بتزورك هنا في المدونه زي صاحبك عن جد قصيده تحفه اعتقد ان أمير الشعراء لو كان قرأ الكلام ده كان جت لك سكته دماغيه من روعه الألفاظ والكلمات
    باقولك انا محتاجه حد يراجع لي كلماتي لما اكتب حاجه في المدونه لأن أصدقائي بيقولوا ان العربي بتاعي ضعيف ومش باعرف اكتب عربي كويس معلش بقى هاعمل لهم دعوه عشان يعرفوا قيمتي واللغه بتاعتي فله شمعه منوره....
    الغريب والعجيب أن في ناس ممكن تكون مقتنعه انهم بيعرفوا يكتبوا عربي صح
    فكرتني بموقف وانا في الكليه كان بيدرس لنا دكتور ماده اسمها قانون دولي وانا لسه في سنه أولى وهو بقى كان حاجه كده كبيره في الأمم المتحدة وكان يعشق اللغه العربيه انا بقى في الامتحان ومع شطارتي وسرعة الكتابه كتبت له عشان بدل ما اكتب لأجل عادي يعني لما ظهرت النتيجه طلعت بالماده لسنه تانيه قولت بقى احضر له وأول محاضره انا قاعده كده مش اعرف حد هما في سنه اولى وانا تانيه لاقيت عمو الدكتور بيتكلم بالعربي الفصيح كالعاده لاقيته بيقول ان في طالب كتب في ورقه الاجابه عشان فرحت اوي ولسه هاقف اقوله انا وفرحانه بنفسي لاقيته بيكمل ده طالب فاشل وعمره ما هيبقى محامي ناجح وقعد يغني على اللغه العربيه شويه وانا بقى قررت اني مش احضر له ونتيجة لهذا كنت في سنه تالته ومعايا الماده دي من سنه أولى بسبب العربي ☺☺☺☺
    عن جد موقف مؤثر احنا ممكن نعمل ندوة شعريه على شرف هذا الشعر الفصيح

    تحياتي وصباحك زي الفل

    ردحذف
  2. βent Pasha25‏/02‏/2015، 11:19:00 ص

    :)))))))
    أنت مسحت تعليقك ؟؟
    :)
    المفروض كنت كتبت: مقدار السخرية في هذا البوست يتناسب طردياً مع مقدار معرفتك للغة العربية :):)
    مبدع ورائع كالعادة :)

    ردحذف
  3. Tarkieb25‏/02‏/2015، 12:08:00 م

    وده كان واحدة بقي ولا واحد لامؤاخذة من عينة سمير صبري ياحبوب هههههه

    ردحذف
  4. reemaas25‏/02‏/2015، 1:05:00 م

    ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    يانهار ابيض ههههههههههههههههههههههههههههههههههههههه

    سؤال صغنن بس هو يعنى ايه افتحو لاديك بردو مافهمتش هى بتقول اى هى نفت التفسيرين بتوعك

    ردحذف
  5. مدونة الفرسان25‏/02‏/2015، 2:31:00 م

    لغة عربية دى يا باشا ؟
    أم عنجليزى
    هههههههههه
    أنا توهت فى البوست
    حسيت إنى دخلت شارع غلط
    خالث الإعتزاز

    ردحذف
  6. Gamal Abu El-ezz25‏/02‏/2015، 11:55:00 م

    فيه لفظ شوارعى شوية لما حد يفضل يقول كلام مش حقيقى فغالبا الى بيكلمه بيقوله فشخت المنطق

    أهى البنت دى فشخت المنطق
    أنا افتح للديك ليه اساسا مسيبه فى عشته ههههههههههههه
    وبعدين دى فكرتنى بالعرب زمان كان فيه اللغة الفصحى ولغة الشعراء الخاصه وكان من ضمن لغة الشعراء الخاصه لما واحد يقول لواحد "إن تكئكئتم على كتكئكئكم على زى جنة إفرنقعوا" ولو حبيت تعرف معناها ابقى أقولهولك ههههههههه
    بس تعرف أجمل حاجه إنى كنت محتاج ألاقى حاجه اضحك عليها هههههههه

    ردحذف
  7. Mona el Dawakhly26‏/02‏/2015، 1:22:00 ص

    و الله العظيم جنابي وجعتني ضحك :)
    أضحك الله سنك و الله يكون في العون يا باشا.
    و أول مرة افهم معنى الاسم عندك

    ردحذف
  8. wegdan eldawakhly26‏/02‏/2015، 9:29:00 ص

    يا نهااااااااااااااااار ده ايه الشعر العظيم جدا ده مش ممكن دي حاجه خطيره جدا جدا و اللله
    حرام عليك تتريق يا اخي انا حكيكي حكيكي تراني تأسرت من كوتر الشكن الي في الشعررم الي بتكوله

    ردحذف
  9. Aya Saad Eldeen Sayed26‏/02‏/2015، 10:15:00 ص

    لا بجد كده حرام
    كده كتير 😭

    ردحذف
  10. جيلان حمزة26‏/02‏/2015، 11:29:00 ص

    بصراحة يا أستاظ شيريف انا اخدت جورعتي من الشيعر لمدة شهر قدام كيده.. فعلا حاجة داسيمة وتملى الديماغ...
    ارجوك الحقنا ببوست من بتوعك .. اهو ع الاقل تصالحنا :)

    بالمناسبا شوكرا على البوسط بجد ... خلتنا ابتسمنا ع السوبح .

    ردحذف
  11. رحاب صالح26‏/02‏/2015، 3:49:00 م

    صباح الخيرات
    جاية لسة من الشغل وبعمل شغل حتي من قبل ما نتغدي وكدة يعني
    لفت نظري قبل العنوان الصورة
    أصل الصورة دي من صور الاحتفال باليوم العالمي للغة العربية والي انا كنت عاملة مجلة ومطوية واسبوع اذاعي عنه في المدرسة
    نيجي بقي للعنوان ...انا معرفتش اقرا العنوان اه معرفتش اقراه
    المصيبة بقي انك تيجي تصحح لحد كلمة في العربي يتنطط عليك ويقولك اعملي فيها ابو العريف انت خريج عربي اساسا عشان تفهم في العربي
    زي خناقة طويلة عريضة بيني وبين زميلة في تفسير الحديث " انما يخشي الله من عباده العلماء " تفسير زميلتي ان ربنا بيخاف من العلماء عشان بيعرفوا علم مقارب لعلمه او مساوي له ....!!!!
    وانا تفسيري اني جالي شلل وانا بشرحلها العكس
    شوف بطول ما احنا مستهترين باللغة بتاعتنا ومستعريين منها ايوة مستعرين منها وبنتكلم انجليزي وفرنساوي وايطالي وحتي السوري الي فاهمين انه تركي عمرنا ما هنرقي بكلامنا ولا بلغتنا العربية
    الله المستعان يعني
    كفاية كدة عليك
    مساء البنفسجات

    ردحذف
  12. P A S H A27‏/02‏/2015، 5:25:00 ص

    زهــــراء
    :)
    بالنسبة للمراجعة .. أنا عاوز اللي يراجع لي كلماتي يا أستاذة !!
    وبالمناسبة ؛ مرة من كذا سنة اتجننت وصوبت لزميلة ما كلمة في مدونتها .. بهدلتني !! .. لدرجة أنها مدت إيديها بره الشاشة وشدتني جامد من ياقة القميص وهاتك يا تلطيش !! طيخ طاخ طوخ !!
    يا فندم ؛ فيه ناس مقتنعة أنها بتعرف تكتب أصلاً !!
    حضرتك محامية ؟؟ ليا زمايل كتير محاميين :)
    صباحك ورد بإذن الله

    ردحذف
  13. P A S H A27‏/02‏/2015، 5:28:00 ص

    βent Pasha
    :))
    الحمد لله أني مسحته
    :)
    سيبك أنتِ ؛ المدونة منورة بزيادة النهارده يا حرمنا المصون
    :)

    ردحذف
  14. P A S H A27‏/02‏/2015، 5:36:00 ص

    Tarkieb
    :))
    أه منك يا فاقسني أنت ؛ طب أستر عليا قدام المدام
    D:
    وبعدين يا كبير ترضى برضه أتكلم مع كائن زي ده ؟؟
    ده أنا عقبال ما كتبت البوست كنت اتشليت !!
    بس حلوة حبوب دي !!
    باشا يا حبوب .. فتشت الجيوب .. ما لقيت اللضا .. وجريت ع الفضا
    أه يا فضا أه يا فضا أه يا فضا

    ردحذف
  15. P A S H A27‏/02‏/2015، 5:42:00 ص

    Reemaas
    :)
    والله يا فندم ؛ في واقع الأمر .. أصابتني حيرة شديدة عند تأليف هذا البوست !!
    عارفة حضرتك لما تبقي قاصدة تكتبي غلط وما تعرفيش ؟؟
    لدرجة أني استعنت بكتابات ناس كتير علشان أعرف بيكتبوا إزاي !!
    فتقدروا تقولوا أن الكلام اللي في البوست ده أنا غاشش معظمه ؛ يا دوب بس حطيتها في سياق الحوار !!
    ويبقى حوار اللي يقول غير كده
    :)
    بالنسبة للمقصود ؛ فما كانش في بالي حاجة معينة ؛ مجرد تريقة مش أكتر على الناس اللي بتكتب الكلام زي ما بينطقوه.

    ردحذف
  16. P A S H A27‏/02‏/2015، 5:47:00 ص

    مدونة الفرسان
    :)
    - ما هي دي الكلمة اللي احنا مش عارفين نكتبها من الصبح !!
    - أنا في عرض المجمع اللغوي !!
    - لغة إيه دي يا أخويا ؟؟
    - لغة حماري يا معلم حنفي !!
    - أما أنا في حتة موقف !!
    * ملحوظة : حضرتك كتبت كلمة خالث صح ؛ ليه ما كتبتش الاعتزاز بالظاء ؟؟

    ردحذف
  17. P A S H A27‏/02‏/2015، 5:50:00 ص

    Gamal Abu El-ezz
    :)
    الله ينور عليك يا كبير !!
    الموضوع ده عامل زي اللي يقولوا لك :
    والنبي لأهشه يا العصفور
    وأنكش له عشه يا العصفور
    ما تعرفش يا أخي ليه الأذى بتاع الناس ده !!
    بس تعرف ؟؟ أجمل حاجه أن البوست ضحكك

    ردحذف
  18. P A S H A27‏/02‏/2015، 5:54:00 ص

    Mona el Dawakhly
    :))
    يا فندم ؛ ده شرف لينا والله
    زورونا تجدوا ما يسركم
    :)
    وبعدين أنا اسمي مش معناه كده خالص بالمناسبة !!
    باشا دي من البشبشة !!
    مش بتسمعيهم بيقولوا : الله يرحمه ويبشبش الطوبة اللي تحت راسه ؟؟
    أهو أنا الطوبة آآقصد أنا اللي بابشبش

    ردحذف
  19. P A S H A27‏/02‏/2015، 5:57:00 ص

    wegdan eldawakhly
    :)
    حقيقي والله يا جماعة أنا في غاية الإنشكاح !!
    معقول اتعلمتوا اللغة بالسرعة دي من بوست واحد بس ؟؟
    ده أنا ما حصلتش على كده !!
    أنا يا لهوي !!
    وبعدين إيه الشعرررم دي ؟؟
    جبتوها منين ؟؟
    أنتوا بتذاكروا من كتب خارجية ولا إيه ؟؟

    ردحذف
  20. P A S H A27‏/02‏/2015، 6:00:00 ص

    Aya Saad Eldeen Sayed
    :)
    كده كفايه بلاش تجريح كده كفاية .. أنا اللي هكون معاكي صريح وأقول لك :
    نورتنيا
    :)

    ردحذف
  21. P A S H A27‏/02‏/2015، 6:04:00 ص

    جيلان حمزة
    :)
    أصل أنا باجيب علبة زيت أخضر من واحد نقاش وأعمل فورشة كيده وفورشة كيده
    يا مصيبتي !! واحد نقاش في التعليق !! يا لهوي !!

    ردحذف
  22. P A S H A27‏/02‏/2015، 6:10:00 ص

    رحاب صالح
    :)
    أهم حاجة الغدا خلص ولا لسه ؟؟
    أنا أخرت الرد كل ده ؛ قلت يمكن تندهوا عليا ولا حاجة وتقولوا لي : تعالى كل وأنا أقول : الـ لأ لأ
    D:
    والله يا رحاب أن جيتي للحق ؛ أنا كمان ما عرفتش أقراه !!
    كنت كاتب تعليق طويل عريض عن اللغة وكلام من نوعية : صونوا لغتكم أكرمكم الله ولغتكم هويتكم .. بس بعد كده قلت أنا باكتب الكلام ده لمين أساساً ؟؟ خلي الناس تضحك :)
    وبعدين إيه كفاية كده عليك دي ؟؟
    أنتوا بتبيعوا التعليقات اليومين دول من ورايا ولا إيه ؟؟

    ردحذف

لا يسمح بالتعليقات الجديدة.