حبيبي سامي
* من صفحة حسام علوان على الفيس بوك
القاهرة في 2-6-79
حبيبي سامي
كل سنة وأنت طيب يا حبيبي وعقبال مئة ألف سنة كلها مليئة بالخير والسعادة والهناء. كنت أحب أكون معاك في اليوم ده لكن أنت سافرت. صدقني يا سامي في يوم 8 يونيه ده ربنا اداني أحسن هدية. وكنت أتمنى أعرفك من ساعتها (بس اوعى تطلع فيها) بالمناسبة دي أحب أهديك أغنية وردة في يوم وليلة خصوصا الجزء ده (حبيب أمالي يا غالي يا غالي عمري كله ليك وكل عمري مش خسارة فيك) سامي وحياتك ابقى قوللي وقع الكلام الحلو ده عليك ايه – أصلي مش موخداك على كده.
تتصور يا سامي روحت من المطار لقيت حرارتي 39.5 (عالية خالص أهه علشان تنبسط ...) وفضلت نايمة في السرير على طول لمدة 3 أيام يا دوب أصحى آخد الدوا وأنام تاني – كان دور جامد قوي – بس الحمد لله دلوقتي خفيت وبقيت زي الحصان. وابتديت أروح الكلية وأذاكر كمان.
ما تتصورش يا سامي وحشتني قد إيه في اليومين دول. صدقني يا مي مي لما بتسافر بأحس أنك بتاخد كل حاجة حلوة في الدنيا معاك (يخرب بيتك) ويفضل لي المذاكرة والكلية والأرف. ربنا يفوت الأيام دي على خير وتيجي تاني في أقرب وقت.
سامي وحياتك عايزاك تكتب لي كتير وبسرعة علشان أحس بوجودك جنبي في كل وقت ولي رجاء عندك هو أنك تبتدي تذاكر كويس علشان خاطري
صباح الفل على باشا التدوين
ردحذفمن امبارح عمالة احاول اقرا فى الجواب مش عارفة لغاية ما الكلام بقى تحت منه
ايه الرقة دى والنقاء ده... لازلت احن لزمن الخطابات الورقية حتى اننى احتفظ بكل مراسلتي مع أصدقائى
بجد يسلم ذوقك واختيارك
بداية مبهجة ليوم جديد أدعو الله أن يحمل الخير فيه
دعواتى أن يهب الله لك كل السعادة لك ولجميع أحبابك
ههههههههههههه
ردحذفخطاب جميل جدا تشعر وانت تقرئه بالبراءة والكلام التلقائى النابع من القلب
كلمات لا عليها رقيب ولا تجمل خالصه صادقه بسيطه وتحمل معانى جميله غابت وهى البـــــــــــــــــــراءه
تحياتى الى شخصك الكريم
يا مساء الرومانسية والجوابات المبهجة
ردحذفطب والله وحشني الكلام بخط الايد والجوابات دي
تعرف ان لسة محتفظةبكيات كبية ماوراق وجوابات مراسلة بيني انا وصاحبتي
بس جوابات الغراماللي كانت بتبعتلي طول حيتي كنت برجعها للعاشق الولهان تني يوم او اديهاله ف ايده واحنا واقفين كنت بنت مغرورة كدة ومحدش عاجبني عشان ال اية كنت حلوة شوية هههه
ومساء البنفسجات علي باشا التدوين كلالالاته
انا عندي فضول أعرف باقي قصتهم حصل فيها ايه ؟
ردحذفيا ترى اتجوزوا و خلفوا و زهقوا من العيشة و المصاريف بس فضلوا متمسكين ببعض وبحبهم ؟
ولا كل واحد راح في طريق و نسيوا بعض و فضلت الورقة دي بس هي اللي أخلصت للذكرى و بقت عليها ؟
طيب هل ممكن سامي يكون ذاكر فعلاً و نجح في حياته بس هي مصبرتش و اتجوزت اول عريس مريّش قابلها و فضل سامي ينجح و ينجح و عاش بدون زواج ؟؟
او مثلاً اتجوزوا و هو اتجوز عليها ؟؟ ممكن برضو
يا ترى حصل إيه ؟؟
ربنا يجمع الأحبة على خير :)
ردحذفكلام جميل جدا