سواقة الحياة

أنت دلوقت قاعد جوه عربية .. ماسك الدركسيون وبتستعد علشان تسوق عربية لأول مرة في حياتك .. فرحان، منفعل، متحفز، زي طفل صغير بيكتشف لعبته الجديدة، وفي نفس الوقت متوتر، قلقان، خايف أحسن تفشل .. بتجمع كل اللي قريته واتعلمته عن السواقة، كل اللي حفظته من كتر ما لاحظته وأنت قاعد جنب السواقين بتراقبهم .. حاسس من جواك أنك هتبهر الكل بسواقتك، بتتخيل نفسك سايق بالناس اللي بتحبها وبتروحوا الأماكن الكتير جدا اللي اتمنيت تروحها بعربيتك .. تبتسم .. تبص حواليك فجأة، تنتبه، تعرق، تكتشف أنك سرحت، ترتبك. تحمد ربنا أنك لسه واقف مكانك ما اتحركتش، وإلا كان زمانك عملت حادثة لا قدر الله، واتشتمت واتلعنت أنت واللي ركبها لك .. تتكسف من نفسك، تتخنق، تيأس. 

أنت دلوقت ماشي بعربيتك .. الشارع فاضي، والجو جميل .. قدامك واحد شكله لسه بيتعلم السواقة، ماشي زجزاج بالعربية، كل شوية يوطي يبص ع الدواسات والفتيس وبعدين يفتكر يبص ع الطريق ويعدل الدركسيون .. هديت سرعتك خالص، واستنيته .. فكرك بنفسك لما كنت زيه بالظبط .. وقت ما كانت نظرات الناس بتربكك، والكلاكسات بتوترك، والتعليقات السخيفة بتضايقك وتحبطك .. "طيب، هي الدنيا طارت؟؟" .. "الصبر يا جدعان الصبر" .. وبعد ما اتعلمت بكام يوم، نسيت كل ده، وبقيت تتفذلك قدام أي حد يركب معاك لأول مرة، كأنك مولود سواق .. "ما تخافش أنت معاك سواق" .. "شوف الحمار ماشي إزاي؟؟ وتطلع راسك من الشباك: يلعن أبو اللي ركبها لك" .. سألت نفسك: هو أنا بقيت سواق إمتى؟؟ .. ما عرفتش .. ما افتكرتش غير أول مرة قررت تسوق فيها .. لما غلبت خوفك ويأسك وفوقت نفسك واتجرأت وركزت وسميت الله و اتحركت .. عديت جنب اللي لسه بيتعلم، ابتسم لك في ود، وضرب لك كلاكس تحية من سواق لسواق .. ابتسمت له، ورديت عليه بكلاكس أحلى .. شفته في المراية وهو فرحان، وماشي بثقة. 

أنت دلوقت قاعد في عربيتك، جنب ابنك اللي ماسك الدركسيون وبيستعد علشان يسوق عربية لأول مرة في حياته .. فرحان، منفعل، متحفز .. بيبص لك باستغراب ونفسه يعرف: أنت بتضحك على إيه؟؟