محلك في أي وقت


المشتري: ما عندكش موز غير الوحش ده؟؟

الفكهاني: قصدك بايظ؟؟ عندي ..

المشتري: لأ أنا أقصد يعني .. 

الفكهاني: معفن؟؟ .. عندي ..

المشتري: ما عندكش موز حلو الواحد يشتريه؟؟

الفكهاني: علشان تاكله يعني؟؟

المشتري: أمال علشان أتزحلق عليه؟؟

الفكهاني: وده ماله؟؟

المشتري: مالوش،، هو بس معفن وبايظ. 

الفكهاني: وده ليه؟؟ علشان أنا راجل أمين وعندي ذمة ما باغشش زبايني.

المشتري: طب وأنا أعمل إيه بالذمة؟؟ أنا عايز موز!!

الفكهاني: معلش ما هو أصل حضرتك مش فاهم!!

المشتري: فاهم إيه؟؟

الفكهاني: لما أبيع لك موز بايظ ومعفن ..

المشتري مقاطعا: وغالي جدا كمان.

الفكهاني: وغالي جدا زي ما حضرتك بتقول،، مش أحسن ما أغشك وأحط لك موزتين حلوين من فوق الوش وأديك الباقي كله معفن وبايظ؟؟

المشتري: ها؟؟

الفكهاني: افرض رايح زيارة لناس؟؟ ولا واخده لعيالك تفرحهم بيه؟؟ يبقى منظرك إيه ساعتها قدامهم؟؟ ده غير بقى بستفة المدام وتقطيمها!!

المشتري: عندك حق.

الفكهاني: بلاش،، افرض مثلا كلت موزة حلوة وبعدين رحت رافع واحدة تانية بايظة على بقك من غير ما تاخد بالك،، هتبقى قرفان وعاوز ترجع ولا لأ؟؟

المشتري: صحيح.

الفكهاني: هتنفعك بقى الموزة الحلوة ساعتها؟؟ 

المشتري: طب ما هو كده كده اللي هاخده من عندك بايظ برضه؟؟

الفكهاني: أيوه بس أنت عارف أنه بايظ أنا ما ضحكتش عليك.

المشتري: وأنا هاعمل بيه إيه وهو بايظ كده؟؟

الفكهاني: تعمل بيه إيه؟؟ ترميه طبعا.

المشتري: أرميه؟؟

الفكهاني: أكنك نسيته بره التلاجة وباظ!! ولا أنت ماشي ع المثل اللي بيقول وجع البطن ولا رمي الطبيخ؟؟ فداك يا راجل،، ده حتى شكلك راجل أكيل وبتستطعم.

المشتري: ربنا يكرمك.

الفكهاني: أهي الدعوة الحلوة دي هي اللي أنا عايز أسمعها منك.

المشتري: لأ بجد،، أنت حرامي بس عندك ذمة.

الفكهاني: تعيش يا أستاذ .. أوزن لك خمسة كيلو؟؟

المشتري: لا لا خمسة كتير قوي.

الفكهاني: هو أنت هتاكله؟؟ ده أنت هترميه!!

المشتري: أه صحيح!! .. بس برضه هتبقى شيلة تقيلة لحد البيت.

الفكهاني: لا إله إلا الله،، وليه تشيله على قلبك لحد البيت وبعد كده ترميه؟؟

المشتري: يعني أرميه في الشارع؟؟

الفكهاني: وده كلام؟؟

المشتري: أعمل إيه طيب؟؟

الفكهاني: هات الفلوس وأنا هاتصرف.

المشتري: لا برضه ما يصحش أتعب حضرتك.

الفكهاني: يا سيدي لا تعب ولا حاجة،، أنا هاسيبهم مكانهم،، وبعدين ده أكل عيشي.

المشتري: ربنا يقويك ويديك الصحة.

الفكهاني: آمين يا رب،، كده الحساب سبعة وأربعين ونص.

المشتري يبحث في جيبه عن فكة.

الفكهاني: لو ما فيش فكة هات خمسين.

المشتري: معلش أنا عمال أدور لك على فكة وناسي خالص أنك حرامي.

الفكهاني: وده يصح برضه؟؟ سُمعتنا دي هي راس مالنا.

المشتري: أكيد طبعا .. احم

الفكهاني: فيه حاجة؟؟

المشتري: فيه خمسين جنيه باقي المية.

الفكهاني: رميت لك بيهم اتنين كيلو ونص تفاح.

المشتري: روح يا شيخ ربنا يبارك لك.

الفكهاني: عيب عليك ده أنت زبوني،، تحب أرمي لك شوية برتقان ضاربين؟؟

المشتري: مرة تانية إن شاء الله.

الفكهاني: محلك في أي وقت.

تعليقات

‏قال رحاب صالح
ههههعه ده حال البلد المايل
صباحك سعادة
كله بيضحك علي كله
الله المستعان بجد
علي فكرة هقولك تعقيب بسيط علي كوريتاج
الكلمة مش عربية وانا مش عارفة هي مشتقة من الانجليزية او اللاتينية بس هي لفظة معروفة لأطباء النسا
ثانيا احب اصدمك القصة مكتوبة من 2013 😑
التكملة اتخذفت مليون مرة وبقي الجزء باللون الاسود كما هو
التكملة باللون الاحمر اتكتبت 2017
الجزء ده مش عاجبني
النهاية مش كدة
بس النهاية كانت مش عجباني ف كل الحالات
هبعتلك النهاية الاساسية لما افتح م اللاب
عشان انا فاتحة م الموبايل دلوقت عشان ف الشغل
بس فعلا محتاجةةاعيد كتابتها من جديد بشكل افضل ونهاية افضل
الوصف كان مستفز ومكرر ويمكن كتير عن اللازم بس كان له دليل لشيء ما
النهاية الأصلية للقصة يمكن هي اللي خلتني مكملهاش طول الوقت ده
بجد شكرا جدا لاهتمامك ونصيحتك 😊
‏قال Tarkieb
انا لو م المشتري البس الفكهاني الموز وبقشره كمان ههههه....اسلوبك متميز
‏قال P A S H A
رحاب صالح
:))
الشكر لله يا أستاذة،، كلنا بنتعلم من بعض،، ربنا يكرمك ويوفقك إن شاء الله
:))
تحياتي وتقديري
‏قال P A S H A
Tarkieb
:))
هل هلالك يا معلم،، ليك وحشة كبيرة والله
:))
طب والموز ذنبه إيه؟؟ D:
:))
نورتني بزيادة