وآهو كله ثواب يا ابن عمي


..................

- أنا بقى كل يوم ع العصر كده أجيب شوال الدرة وكسر الخشب والمنقد وأقعد هنا .. وآهو الرزق ده بتاع ربنا .. والحمد لله ما حدش بينام من غير عشا.

..................

- باني أوضتين صغيرين بعفشة مية الناحية التانية .. ع النيل عدل .. والعيلين خلصوا امتحانات ونزلوا اشتغلوا .. هيقعدوا في البيت يعملوا إيه؟؟ غير أنهم يرازوا في أمهم؟؟ يا إما يصيعوا في الشارع ويتعلموا البوظان م العيال وكل شوية خناقة .. كده أحسن .. العيل من دول بيصحى من النجمة يسعى على أكل عيشه .. خليهم يعرفوا قيمة القرش.

..................

- شهادات إيه؟؟ .. هو التعليم كان بالشهادات؟؟ ولا الشهادات كانت تعليم؟؟ .. والله اللي ينفع في العلام آهو لنفسه وللناس، ما نفعش يبقى أتعلم له صنعة ينفع بيها نفسه والناس .. الأهم عندي أنه يتعلم الدنيا ويعرف إزاي يعامل الناس .. مش أحسن ما يتخرج ويبقى معاه شهادة لكن زي الحمار؟؟ يبقى لا منه أتعلم علم ينفع بيه نفسه والناس ولا منه أتعلم صنعة؟؟ وساعتها يدعي عليا ويقول لي أنت ظلمتني!!

..................

- ما باتابعش ولا باتفرج .. أنا أصلاً ما عنديش تليفزيون الحمد لله .. ولا كهربا.

..................

- طب ما احنا عايشين أهه .. مرتي بتخلص شغل البيت كله قبل العصر .. وع المغربية كده بتجيب الغدا وتقعد جنبي ع الفرشة نتفرج سوا ع الدنيا والخلق .. والله يا عم أحسن من ميت سيما.

..................

- العيال بترجع من الشغل مهدودة .. يا دوب ياكلوا ويناموا ويوم الجمعة بيلعبوا كورة الصبح والعصر بيحفظوا قرآن في المسجد .. ولو حد فيهم حب يشوف ماتش ولا يتفرج على فيلم بييجي جنبي ع الرصيف يتفرج عليه في تليفزيون القهوة، بس هما مش غاويينه زي حالاتي .. واحد فيهم بيحب شغل الزخرفة والتاني بيحب تشكيل المعادن.

..................

- وهنشيل هم بكرة ليه؟؟ هو حد عارف بكرة فيه إيه؟؟ .. احنا عايشين اليوم بيومه والحمد لله ما فيش علينا جنيه لحد .. بنحط راسنا ع المخدة ننام .. والله ساعات بانام هنا في مكاني .. راسمالي شوية الدرة دول .. والحمد لله ما فيش يوم روحت إلا أما ربنا كان جابر بخاطري .. لا تقول لي وظيفة وحد يتحكم فيك ويذلك ولا غربة وشحططة يا ابن عمي .. وفي الآخر ما حدش بياخد أكتر من نصيبه .. بس الناس تعرف.

..................

- ما فيش حاجة تعكر دمي قد بيع الحريم!! بس هنعمل إيه؟؟ أكل العيش .. الولية من دول تقول لها الكوز باتنين جنيه، تقول لك لأ الاتنين بجنيه!! يا ستي الله يكرمك مش محتاجة فصال وحديت!! تقول لك هاخد التلاتة باتنين جنيه!! وترمي لك الفلوس في عبك وتجري!! بالك اللي زي دول؟؟ أحلى صنف يتنصب عليه بس هما ما بيتشطروش إلا ع الغلبان!!

..................

- مش كلهم طبعاً .. ديك النهار قعدت جنبي ولية غلبانة معاها قفة عيال فوق روس بعض .. تحسها كده مستحية وعندها عزة نفس .. لكن العين بصاصة ودولا مهما كانوا صغار ما يفهموش .. شوية ولقيت لك البكرية بتسألني بكام كوز الدرة، قلت لها التلاتة بخمسة .. حسيت أن الولية مش في مقدرتها تدفع .. ناديت ع البت قلت لها طب تعالي خدي الأربعة بخمسة .. طب الكوز بجنيه .. جت البت وعطتني نص جنيه .. خدته منها وقمت شاوي لهم خمس كيزان .. بالك؟؟ ما فيش ساعة زمن إلا وكنت بعت كل اللي معايا .. بس مرتي جت ولقتني باتحدت مع الولية وعينك ما تشوف إلا النور!! .. حكم أصلها بتغير عليا قوي.

..................

- يا عم لا شقاوة ولا حاجة .. الحمد لله الست اللي معايا زي الفل ولو لفيت الدنيا ما ألاقي ضفرها، غيرش بس ساعات كده ربنا يبعت لك حد ما تعرفوش يفضفض معاك، وتسمع له، يا تتعلم منه، يا يتعلم منك، وآهو كله ثواب يا ابن عمي.