عيد المشهد تاني



من شوية لقيت لك كلب كبير جاي بيجري من أول الشارع ووراه شوية كلاب بيجروا وراه .. زي ما يكون زعيم عصابة ووراه صبيانه .. وبعدين راح الكلب الكبير ده هجم على كلب متوسط الحجم كان ماشي في حاله وعضه من ورا .. الكلب اللي اتعض اتخض م المفاجأة وعمل شقلباظ بنصه الوراني في الهوا ولف وهو بيزوم ومكشر، بس لما شاف حجم الكلب اللي عضه والكلاب الكتير اللي معاه سكت وبعدين قعد يئن بصوت كسير وهو باصص في الأرض ومشي وهو بيزك .. الكلب الكبير بص حواليه يمين وشمال كده علشان يشوف إذا كان فيه أي كلب له رأي في المسألة، ما لقاش (والكلاب اللي معاه قلدوه برضه بالظبط) قام مكمل مشي بكل زهو وثقة وصبيانه مشيوا وراه.



بعد ما الزيطة دي خلصت والعصابة وصلت لنص الشارع، كلب صغنن خالص حجمه أكبر م الشراب بحاجة بسيطة، وقف جنب عربية راكنة تحت البيت وقام مهوهو بصوت مسرسع قوي ناحية العصابة (اللي هو يعني أي منظر) في اللحظة دي باب العربية فتح فجأة وخبط فيه، الكلب الصغير اتخض وجري بسرعة وهو خايف فخبط في الكلب اللي اتعض من شوية .. الكلب اللي اتعض زي ما يكون قال: أ ـــا هو أنا بقيت مهزأ للدرجة دي؟؟ وقام مزمجر بشراسة وهوهو على الكلب الصغير وقعد يجري وراه، لحد ما الكلب الصغير استخبى منه تحت عربية .. ما سألتنيش يعني الكلب اللي اتعض ده جري ورا الكلب الصغير فين؟؟ .. برافو عليك، ناحية العصابة!!

عيد المشهد تاني


:D