?Where Is Wally





(قم بتحميل الصور لتشاهدها بالحجم الطبيعي)


من مدة كنت باتفرج على فيلم Sidewalls وعجبني الكتاب ده Donde esta Wally أو (Waldo) اللي كانت ماسكاه البطلة في إيدها .. دعبست شوية ع النت ولقيت كذا موقع الكتاب متاح فيهم للتحميل بصيغة PDF وكمان صور كتيرة جداً (من الأفضل أن تبحث في جوجل عن الصور ذات الجودة العالية أكثر من 2 ميجا بيكسل؛ ممكن تختارها من أدوات البحث في الصور)

ده شخص برنس عامل ألبوم لـ "والدو"

http://imgur.com/gallery/b8btr

وده كتاب بصيغة pdf

http://www.fiuxy.com/ebooks-gratis/3686019-donde-esta-wally-pdf-mega.html

(للتحميل اضغط السطر اللي تحت كلمة DESCARGAR وانتظر قليلاً ثم اضغط Skip Adv)

لقيت كمان كتاب ..

http://rahuldotgarg.appspot.com/data/cvpr2011.pdf

فيه دراسات ونظريات بتناقش وبتعالج مشكلة أنك إزاي تلاقي ناس وسط حشد .. مش مجرد لعبة (فيه كلام كبير وضخم).


سيبك من كل الكلام اللي فوق ده .. عارف؟؟ .. لما نزلت الصور دي وقعدت أتفرج عليها وأدقق فيها .. لقيت فيها تفاصيل كتيرة قوي مرسومة بحرفية عالية جداً .. حيوات كاملة مختزلة في مساحة صغيرة .. نسيت "والي" ومتعلقاته وقعدت أتفسح جوه الصور وعلى القصص الكتيرة اللي فيها .. حسيت أني اتنقلت دنيا تانية جديدة وجميلة .. وافتكرت أيام زمان؛ لما الواحد كان بيقعد يسرح مع مغامرات ميكي جيب .. لقيت أن اللعبة دي (بكمية التفاصيل الرهيبة اللي فيها) ممكن تكون أكبر تسلية لناس كتير؛ بشرط أنهم ما يدوروش على "والدو" .. واللي يلاقيه؛ يعمل نفسه مش شايفه ويكمل فسحة عادي جداً.

اللي عمل اللعبة دي؛ أكاد أجزم أنه شخص فنان جداً .. ذكي جداً .. و وحيد جداً جداً جداً .. عايز يجمعنا كلنا معاه في العالم بتاعه من غير ما نحس .. مش علشان ندور عليه هو ونشوفه؛ لأ. إنما علشان نلاقي نفسنا.

الموضوع يتقال فيه كلام كتير (هاسيبه لحضراتكم) علشان هاسبقكم على هناك.

تعليقات

‏قال Gamal Abu El-ezz
انا معاك إن الشخص ده وحيد وبيحاول يجمع الناس فى العالم الخاص بيه
قد تكون فكرة الصور قريبه الى حد ما من فكرة المدونات لان غالبية الى بيدخل المدونة لاول مره بيكون حاسس بالوحده لدرجة إنه بيكتب لنفسه الأول قبل ميكون ليه متابعين وممكن فجأه يبقى مدون مشهور والى بيحدد ده مدى حرفيته وتوصيله لإحساسه الداخلى . اعتقد إن هو ده الى بيحصل مع كل متابع للصور إنه بيتعمق فى العالم ده لدرجة إنه ينسى هو دخل فيه ليه من الأساس.
وزى محضرتك قولت شريف باشا إنه شخصيتمتع بقدر عالى جدا من الذكاء والمهارة رغم إن البعض ممكن يعتبرها فكرة بسيطة قريبه من طلع الإختلاف بين الصورتين إلا إنها فكره عظيمة جدا وإن لم أكن مخطئ ممكن يستعمولها فى الطب النفسى يوما ما ....
تحياتى وتقديرى لقلمك الغالى والنفيس شريف باشا
وشكرا جزيلا على المعلومات الجديدة الى عرفتها من البوست الجميل
تحياتى
‏قال P A S H A
Gamal Abu El-ezz
:))
عارف؟؟ فيه تعليقات كده أول ما تقراها تبتسم وما تبقاش عارف ترد .. بتحس بسعادة أن فيه حد زيك/شبهك فهم اللي أنت حسيت بيه كأن عينك التانية هي اللي شافت المشهد معاك وبتوصف الجزء اللي شافته وأن الكلام اللي ما أسعفكش وما عرفتش تقوله جه هو وقام مكمله .. الحالة دي باحبها قوي لأنها بتحسسني بالتواصل الحقيقي اللي ما بيننا بجد.

حقيقي شكراً ليك يا جمال :))

نورت مدونتك
:))