مزيكا حزينة

وأنا قاعد في أوضتي باسمع مزيكا حزينة من شوية .. سرحت بعيد .. العازفين اللي كانوا بيعزفوا المزيكا دي؛ شاوروا لي بعينيهم علشان أنزل لهم .. أنا بطبعي خجول وما وقفتش على مسرح قبل كده .. بس لما ما لقيتش جمهور؛ اتشجعت وطلعت معاهم على خشبة المسرح .. كانوا اتنين بس اللي بيعزفوا .. واحد على الكمان والتاني على البيانو .. المزيكا هناك كانت أوضح وأوجع .. حسيت أنها طالعة مني مش من الآلات .. بصيت على صورة الخلفية اللي على المسرح .. شفت طريق طويل كله أشجار من غير ورق وفي آخره قصر كبير رمادي .. القصر؛ كان فيه شباك طالع منه ضوء خافت .. في الشباك؛ بنت جميلة قاعدة لوحدها .. دخلت القصر وفضلت أطلع .. أطلع .. أطلع .. لحد ما وصلت الأوضة اللي كانت كبيرة قوي .. مشيت لحد ما وصلت للبنت .. لقيتها سرحانة في صورة .. الصورة فيها طريق طويل كله أشجار من غير ورق .. في آخره مسرح .. عليه اتنين عازفين .. واحد على الكمان والتاني على البيانو .. بيعزفوا مزيكا حزينة .. وهنااااك .. في الخلفية .. واحد قاعد في أوضته بيسمعهم وسرحان بعيد.

تعليقات

  1. حلم ناعم قوي.مالوش تفسير و مش محتاج تحليل و فذلكة أدبية. هو حاجة كدة للمتعة و خلاص. :)
    تسلم يا باشا.

    و معلش ابقى الغي برنامج التحقق عشان التعليق ده.

    ردحذف
  2. حلوه وحزينه بهدوء ..

    ردحذف
  3. حبيبى شريف باشا
    تصدق إنى شايف فيلم أجنبى امبارح كان تقريبا قريب من الفكرة دى
    ووقتها قولت لو الواحد الزمن ماشى بيه فى خطوط طولية يعنى اللحظة الى بتعدى بتتكرر تانى مع نسخهمنك يبقى فين الاصل ... فطبعا منعا للتفكير تابعت الفيلم وانا ساكت :)

    تحياتى شريف باشا

    ردحذف
  4. Mona el Dawakhly
    :))
    تسلمي يا باشمهندسة .. شكراً جزيلاً لذوقك وتشريفك
    :))
    نورتينا

    ردحذف
  5. Romancia
    :))
    شكراً جزيلاً يا فندم لذوقك ومرورك الكريم
    :))
    شرفتينا

    ردحذف
  6. Gamal Abu El-ezz
    :))
    أستاذي الغالي وأخويا الجميل .. فيه كذا فيلم بيتكلم عن الفكرة دي مثلاً: Groundhog Day بتاع بيل موراي .. (هو اللي في ذهني حالياً) .. بس هما بيعالجوا الفكرة بكذا طريقة مختلفة.
    أنا برضه لو مكانك؛ كنت هاتابع الفيلم برضه وأنا ساكت (ده إذا عرفت أتفرج عليه أصلاً)
    D:
    نورتني جداً يا جمال وفي انتظار جديدك يا كبير
    :))
    شرفتنا

    ردحذف
  7. والله زمان يا استاذ شريف .. كعهدي بك دائماً مبدع وخيالك خصب ,, تحياتي لك

    ردحذف
  8. ديدي
    :))
    ياااااااااه
    :)))))
    ألف مليون حمداً لله ع السلامة يا أستاذة .. والله فرحنا جداً أول ما شفنا تعليق حضرتك
    :))
    يا رب تكوني بخير وفي أتم صحة وسعادة إن شاء الله أنتي وكل أسرتك الكريمة .. نتمنى ترجعي تاني تنوري بلوجر بتدويناتك الجميلة المميزة عن قريب إن شاء الله .. شكراً جزيلاً لزيارتك الكريمة وتشجيعك الجميل؛ أنتوا الأحسن والله واحنا بنتعلم من حضراتكم
    :))
    شرفتينا

    ردحذف
  9. Tarkieb
    :))
    حلمي حلمك يا معلمي :D

    عاوزين نقرا لك حاجة جديدة بقى يا كبيرنا .. اكتب وبطل كسل
    :))
    ربنا يطمننا عليك وتكون في أتم صحة وأحسن حال بإذن الله
    :))
    نورتنا يا أستاذنا

    ردحذف