زي ما تكون بتحلم

وبعدين لقيت حد مسكني من إيديا الاتنين جامد قوي وقعد يلف بيا يلف بيا يلف بيا وأنا عمالة أضحك بصوت عالي وفي نفس الوقت باصرخ وخايفة أطير وأطلع بره الحلم؛ صاحب الإيدين اللي ماسكاني كان عمال يضحك ويقول لي: ما تخافيش فتحي عينك وأنا أقول له: لأااااااااه، فيقول لي: فتحي عينك يا إما هسيبك!! فتحت عيني لقيتني واقفة في مكان تاني حلو قوي قوي قوي، كان فيه نخل وزرع لونه أخضر جميل وعصافير وحيوانات صغننة جميلة ونهر وجبل صغنون كده حاضن الحاجات دي كلها ومحاوطها؛ وبعدين سمعت صوت قطر؛ بصيت لفوق؛ لقيت جسر عليه قطر ماشي بسرعة كبيرة وفيه بنت مطلعة إيديها المفتوحين من الشباك ومغمضة عينيها زي ما تكون بتحلم.