طلب

حبيب قلبي وربنا .. أنت عارفني ما اتأخرش عنك في أي طلب .. أنا ليا غيرك يعني ؟؟ .. أأمرني يا كبير .. يا راجل عيب عليك تقول الكلام ده ؟؟ .. ده احنا أخوات .. ربنا يعلم غلاوتك عندي قد إيه .. بس علشان أكون صريح معاك قبل ما تطلب فيه حاجة صغيرة لازم تاخد بالك منها .. أي فلوس لأ .. أي تدبيسة في مشوار لأ وخاصة بقى لو معرض / لقاء / حفلة توقيع / نجاح / تخرج / خطوبة / كتب كتاب / فرح / طلاق / عقيقة / طهور .. أي طلب بخصوص أي حاجة أنت ممكن تعرفها لوحدك لأ .. أي طلب نصيحة أو مشورة في مشكلة تخصك أو تخص حد من طرفك لأ .. أي رغي !! معايا ؟؟ أي رغي يهدد سلامي النفسي ويوجع لي دماغي ويقلب مزاجي ويعكنن عليا وعلى اللي خلفوني لأ .. فاهم ؟؟ .. إيه ده ؟؟ هو أنت كمان كنت عاوز تعكنن عليا ؟؟ يا نهارك مش فايت ؟؟ وأنا اللي عامل لك خدي مداس من الصبح ؟؟ .. الله يسامحك يا عم .. طب والله أنا كنت حاسس !! .. يا للا معلش .. اللي عند ربنا ما بيضيعش.

أنا قلت هتطلب مني مثلاً تديني فلوس أشبرق بيها نفسي .. تأشيرة سفر لأوروبا مع تذكرتين فيرست كلاس وشيك بخمسة ستة مليون دولار تطبقهم في إيدي كده وتقول لي روح يا باشا أنت والفاموليا الكريمة هيص وانبسط زي ما بتبسطنا .. بلاش يا سيدي لو الحالة معاك مش متيسرة .. طلعنا عمرة !! أهه !! شوف أنا باحلهالك إزاي ؟؟ .. رمضان داخل يجري علينا كل سنة وأنت طيب وما فيش أحلى من عمرة رمضان .. وليك عليا أعمل لك عمرة يا سيدي !! ولو عاوز تقعدني للحج مش هاقول لك لأ بس تشوف لي عقد عمل محترم .. طب أنا راضي ذمتك ، هاتلاقي فين تاني عرض أحسن من كده ؟؟ .. أوووف .. خلاص هات عشرين ألف أجيب بيهم ياميش .. لأ مش كتير .. هاتهم بس وأنا هاجيب بيهم ياميش .. يا عم أنت مالك ؟؟ احنا ناس بنحب نمشمش نفسنا في رمضان .. أه يا عم بنرش الأرض زبيب وجوز هند .. وليك عليا يا عم أعمل لك حبلين زينة رمضان قراصيا ومشمشية وبندق وعين جمل في المطبخ .. وبعدين هو أنت فكرك يعني العشرين ألف دول كتير ؟؟ طب ده كيلو البندق .. البندق اللي كنا بنلعب بيه بدل البلي زمان .. عدى المية وسبعين جنيه !! .. صدقني ما أقدرش أخليك تطلب مني حاجة أقل من كده !! .. صعب بجد .. راعي برستيجي يا أخي قدام الناس !! .. طب بص .. أنت صعبت عليا والله .. وأنا ما يخلصنيش تمشي وأنت زعلان .. هات عشرتلاف أجيب بيهم فانوسين للعيال بدل اللي كسروهم .. العيال ما شيين بلابيص في الشقة وكل شوية يتشعبطوا في اللباس (لا ما تخافش أنا عامل له حمالات) ويقولوا لي: نوس نوس !! .. الواد كسر الفانوس علشان يمسك اللمبة بإيده ابن الكلب !! .. لو كان قال لي كنت علقته في النجفة هو وأخوه ووفرت تمن الفانوسين !!

بص م الآخر كده .. شكلك مفلس زي حالاتي .. لا لا عادي ما تتكسفش .. احنا كلنا مفلسين .. أمال يعني أنا قاعد باللباس ليه ؟؟ مأجر بنطلوني مثلاً ؟؟ .. المهم ، عاوزك تتعب شوية اليومين اللي جايين دول معلش وتعرف لنا أماكن موائد الرحمن النضيفة .. سمعتني ؟؟ النضيفة !! .. وتعمل لي كشف محترم كده بأماكنهم وبالوجبات اللي بيقدموها لو أمكن .. أصلي كنت وعدت جماعة أصحابي أفطرهم في مكان حلو .. عيب عليك !! فلوس إيه اللي أخدها منهم ؟؟ .. باقول لك صحابي يا جدع .. هما اللي أصروا أن كل واحد فيهم وبمنتهى الشياكة والاحترام يديني خمسين جنيه في إيدي .. أزعلهم يعني واحنا في أيام مفترجة ؟؟ .. لا لا يا أخي دي مش زكاة .. أنا في ميعاد الزكاة باعدي عليهم بنفسي نفر نفر .. بص لو عاوز تدفع الخمسين جنيه اللي عليك دلوقت براحتك ، عاوز تستنى للآخر وتدفعها مع الزكاة بالفوائد ما فيش مانع .. أنا ليا أعز منك يعني ؟؟ .. أنت حبيب قلبي وربنا .. أنت عارفني ما اتأخرش عنك في أي طلب .. أنا ليا غيرك يعني ؟؟