ليس الأمر عن سلحفاة

- قرأت خبراً منذ قليل عن وفاة سلحفاة الملك فاروق؛ ثاني أقدم حيوان على سطح الأرض بعد السلحفاة "أداوينا" بحديقة حيوان كلكتا بالهند (حسب ما جاء بالخبر) بالأمس عن عمر يناهز 270 عاماً؛ في حديقة الحيوان بالجيزة.
وبحسبة بسيطة فإن تلك السلحفاة قد ولدت عام 1745.
يعني إذا افترضنا أن الطفل الموجود في الصورة القادمة هو الملك فاروق (رحمه الله) - ولد عام 1920 - وكان عمره وقتها تقريباً عامين فإن السلحفاة وقتها كانت تبلغ من العمر 177 عاماً.

* إلا حتى ما كلفوا نفسهم وقالوا لنا السلحفاة كانت اسمها إيه!! مصيبة ليكونوا أصلاً مش مسميينها!!

تخيلوا معايا 270 سنة حصل فيهم إيه في الدنيا والسلحفاة دي كل علاقتها بالعالم لا تتجاوز الكام متر مربع اللي عايشة فيهم!!
كام حرب وكام اختراع وكام أمة اندثرت وبشر فنوا وهي في نفس مكانها!!
كام مرة الجنينة نفسها اتغيرت؟؟ وأتغيروا رفاقها ورفيقاتها اللي كانوا عايشين معاها؟؟ وكام وكام وكام ؟؟
تخيلوا كده .....
ــــــــــــــــــــــــــــ

بقلم أ/ زهـــراء:

عندى سلحفاه فى شهر رمضان القادم تكمل 26 سنه واسمها فله وهى صغننه جدا جدا مش بتكبر تقريبا عشان بعيد عن البيئه الاصليه لها .. المهم الست فله مش عارفه ليه اخترنا الاسم ده بس اللى افتكره اننا كنا قبل العيد الصغير وفى شهر رمضان انا وماما واخويا هو طلب من ماما تشترى له نظارة شمس وقتها كان فى اولى اعدادى راحت ماما قالت له خد عشره جنيه هات بيهم النظاره واحنا فى محطة الرمل والراجل واقف على الرصيف احنا وقفنا انا وماما لاقينا اسلام بيه جاى وماسك فى ايده سلحفاه وورقة خس وقال لماما انا مش عاوز نظاره دى بدل منها ولانى طول عمرى لسانى زالف وهو اخويا الصغنن قولت له ودى هتلبسها ازاى بدل النظاره قالى هاربيها ولما اكبر اشترى نظاره محترمه ..... المهم جت معانا السلحفاه البيت ومش فاكره بقى امتى قررنا نطلق عليها فله المهم بعد حوالى عشر سنوات اكتشفنا ان الست فله دكر اه والله بلاش تضحك بصوت عالى كده يا شريف ههههههههه المهم وقتها قولت لاسلام ايه رايك نغير اسمها قال لا خلاص فله.

برغم فارق السن بين فله وسلحفاة الملك فاروق وكمان فرق الحجم هى عاشت معانا الفتره اللى فاتت من عمرنا وشهدت على كتير من امور حياتنا واحنا طلبه فى المدرسه ولما نجحنا ودخلنا الكليه ولما اتخرجنا ولما اسلام اتجوز وشافت بناته كمان شهدت لحظات فرح ولحظات الم وحزن ولما نكون مسافرين لازم نفكر فله هتقعد فين ..وهاحكى لك عن موقف هتحس منه انها سلحفاه ذكيه طبعا مش عايشه معانا لازم تبقى ذكيه:
كان جاى لنا ضيوف ومعاهم اطفال اشقياء جدا جدا وكانوا معزومين عندنا ولازم بقى يمضوا اليوم كله المهم قبل زيارتهم لنا بيوم اسلام مسك فله وقالها بكره طنط سلوى جايه ومعاها ولادها وعماد ابنها شقى اوى انا خايف عليكى منه وكمان علاء ابنها الصغير ممكن يدمرك فى ثانيه اعمل فيكى ايه والله العظيم يا شريف الحوار ده حصل بالنص زى ما هاكمله وحط فله فى البلكونه زى ما احنا متعودين المهم جت طنط سلوى والشياطين ابنائها واحنا ندور على فله مش باينه والعيال عاوزين يلعبوا بها وماحدش عارف يوصل لمكانها قلبنا الدنيا وبهدوء كده سالت اسلام هى فله فينا قالى والله العظيم مش عارف المهم مر اليوم وفله تايهه واحنا زعلانين فله تاهت او اتخطفت من البيت تانى يوم الصبح بعد صلاة الفجر بشوية نسمع صوت حاجه تحت السرير فى اوضة النوم الكبيره وطبعا قولنا فار دخل عندنا واحنا مرعوبين بهدوء حاولنا نعرف فى ايه وفجاه بنرفع المرتبه نلاقى فله قاعده تحت السرير الفرق بين البلكونه مكان اقامة فله وبين اوضة النوم هو طول الشقه يعنى كان لازم تعدى على اوضتنا والسفره والصالون وتاخد فى طريقها الممر اللى امام المطبخ والحمام عشان توصل للمكان اللى اختفت فيه متخيل ان حيوان صغنن كده ممكن يكون بيفهم وفى من بنى البشر عقلهم واقف.
:)