الجواز
- كان فيه أكتر من حد اقترح أني أتكلم في موضوع الجواز (بجملة الهري يعني) حد كان عاوزني أعمل البوستات بتاعة صابر دي زي حلقات ساخرة أسبوعية ؛ وحد تاني قال لي اعرض الموضوع علشان كلنا نرغي فيه (تقريباً عنده رأي عاوز يوصله لحد أو عاوز يسمع رأي حد فيه الله أعلم) ؛ وحد تالت كان بيسخنني أتكلم في الموضوع ده وأقول تجربتي بحجة أنه عاوزني أنصحه وأفتيه فاكرني شاي بلبن عاوز يسقي فيه ههههههههههه (معلش بس القلشة عجبتني) .
ما علينا .. المدونة مفتوحة لأي حد عاوز يرغي ويفضفض في الموضوع ده ؛ إشمعنى احنا يعني اللي مش هانفتي ؟؟
وأنا كل شوية كده هابقى أكتب لكم اللي ييجي في بالي .. مش عاوز حد يعتبرها نصايح أو يعتبرني باتكلم بلسان حال كل الرجالة أو كل المتجوزين !! لأن كل حد وله دماغة وظروفة .. اللي هايتقال هنا مجرد رأي شخصي قد يصادف الصواب و هواك وقد يخالفه (لأن طبعاً رأي الشرع معروف) .. حاجة كمان : الكلام اللي هايتقال هنا مش شرط يكون نتاج تجربتي الشخصية إلا إذا نوهت لكده !!
احنا زي ما بيقولوا هانحاول نفكر بصوت عالي ونرغي ونتناقش كأننا قاعدين على قهوة بالظبط !! .. جايز حد لسه ما ارتبطش أو ارتبط أو انفصل ؛ يكون عنده سؤال أو تخوف ما أو استفسار ويلاقي إجابته في كلام حد فينا .. وجايز حد تاني يكون واخد إنطباع غلط أو عنده معتقدات خاطئة (خاصة إننا في مجتمع ما شاء الله يعني) أو بيواجه صعوبات معينة ومشاكل في الموضوع ده ونقدر نناقشه فيها .. وجايز حد تالت يكون مر بتجربة معينة ويقدر يفيدنا بخبرته فيها .. جايز حد رابع عاوز يعرف الطرف التاني بيفكر إزاي أو هو مش عارف يوصل تفكيرة للطرف التاني ........ إلخ
اللي أتمناه أن الكل يشارك ويثري الموضوع .. وباتمنى بصفة خاصة أن أهالينا واخواتنا الكبار اللي سبقونا في الموضوع ده بخبراتهم الكبيرة يشاركونا ويناقشونا كنوع من التواصل بين الأجيال :)
التعليقات مفتوحة لـ غير معرف ..
GO.......
في سؤال شاغلنى وعاوزه اعرف اجابته ليه الرجاله بنت وسخه؟او ليه احنا مش بنقابل الا ولاد الوسخه؟
ردحذفده الى فبالي حاليا
بساهل كده؟؟؟؟؟؟؟؟؟؟؟؟
ردحذفولا كئن في حاجه؟؟؟؟؟؟؟؟؟؟
ولا كئن في جرح ونزيف وموت؟؟؟؟؟؟؟؟؟
طب ازاي؟؟؟؟؟؟؟؟؟؟؟؟؟؟؟
انا بكلم عن الحب مش الجواز ولا ده مبقاش موجود الا في القصص والافلام؟؟؟؟؟؟؟؟؟
وبعدين كلهم شبه بعض افرقهم ازاي؟؟؟؟؟؟؟؟؟
والوحده تجيب نفس تاني منين بعد ما اكسرت واختزلت؟؟؟؟؟؟؟؟
مع هول ما رأيت في أول تعليق والرد عليه
ردحذفلكن هقولك آخر تجربه شفتها
واحد قريبي حضرت فرحه شهر 10، العروسه غضبت وراحت بيت ابوها منتصف شهر 12- وتم الطلاق من يومين !
غير معرف
ردحذفأولاً: أنا باعتذر جداً عن الألفاظ اللي في تعليقي اللي فات .. بجد أنا آسف جداً
اتكسفت جداً من نفسي واتخنقت لما قريت التعليق تاني وحسيت بجد أني اتسرعت وغلطت في الرد ، يمكن علشان الكلمة اللي في تعليقك ضايقتني بصراحة ويمكن لأني حسيت أن تعليقي فيه تعالي شوية ما أعرفش بصراحة !! علشان كده مسحته ونقلت مضمونه في التعليق ده ، وباعتذر جداً لأخويا الكبير معتز وكل زميل أو زميلة صدمتهم في التعليق اللي فات .
ثالثاً : جايز علشان أنتي بنت كذا ، لأن ولاد الـ كذا بيلاقوا بعض .. حاجة كده زي أتلم تنتون على تنتن والأتنين أنتن وأنتن !!
الطيبون للطيبات :)
ثانياً : قد يكون نصيب وإبتلاء ، والله يدخر لك الأحسن سواء في الدنيا أو الآخرة.
أولاً : ما فيش رجالة ولاد كذا !! .. لكن فيه رجالة و فيه ولاد كذا !! .. أنتي مديتي إيدك في الجردل طلع لك ابن كذا ؛ خلاص ارميه ودوسي عليه و فتحي عينك كويس المرة الجاية وأنتي بتدوري بإيدك لحد ما تلاقي راجل .. وأديكي عرفتي ولاد الـ كذا شكلهم إيه ؛ فمتهيألي يعني المفروض أنك تعرفي شكل الرجالة لما تقابليهم !! .. إلا لو الصنف ده عجبك علشان بتحسي معاه إنك ضحية وكسيرة وعاوزة الناس تقعد تطبطب عليكي وتاخد بخاطرك وتواسيكي ووووو الكلام اللي ما يجيبش همه ده .
غير معرف تاني
ردحذف- بصي بصراحة ربنا أنا ما كانش في دماغي إن البوست يروح في الإتجاه ده .. لأن فيه كلام كده الواحد ما بيعرفش يرد عليه أو بمعنى تاني لو رديت هايبقى كلام بايخ ومتعاد لا يخلو من فذلكة ونصايح أكيد أنتي قريتيها في مليون حتة وسمعتيها من مليون واحد غيري وأكيد بأسلوب أحسن مليون مرة من اللي باكلمك بيه .. وفي النهاية أنا عارف أنك مش هاتقتنعي غير باللي في دماغك !!
مش باقول إن اللي في دماغك غلط أو باتفه من مشاعرك وباسفه منها ، أبداً والله العظيم بس وبعدين ؟؟ .. طبقاً لكلامك : أنتي اتخذلتي واتجرحتي ونزفتي ووو.....
وغالباً اللي عمل كده حي يرزق وكمل حياته - مجرد فرض برضه – وممكن يكون اتجوز وخلف و.......
طب وأنتي هاتفضلي قاعدة تندبي جنب سبت البيض اللي أتكسر ده كتير ؟؟ وأخرتها يعني ؟؟ ما حدش بينفع حد / عيشي حياتك / لأن العمر أقصر من كده / بكره ربنا هايعوضك ويووووه !!! أديني رجعت لنفس الأسطوانة تاني !!
بصي أعملي اللي ريحك
:)
وبعدين بعد إذنك إلهي ربنا يسترك وينجح مقاصدك بلاش التعميم !!
- آخر حاجة بقى دي اللي كلت دماغي !! يعني إيه بتتكلمي عن الحب مش بتتكلمي عن الجواز ؟؟؟؟؟؟؟؟؟؟
مش عاوز أتسرع في الرد على الجزئية دي ، غير لما توضحي تقصدي إيه بكلامك ده لأني تقريباً كده فهمت غلط !!
moataz farouk
ردحذف:))
أنا آسف جداً جداً يا كبير ، حقك على راسي من فوق يا عمنا أنت وكل اللي قرا التعليق قبل ما أمسحه .
- بالنسبة لقريبك .. بُص البيوت أسرار .. جايز تكون ما عاشرتش قريبك بالدرجة اللي تخلليك تحكم كويس على طباعة ويكون إنسان لا تحتمل عشرته وقد يكون العكس وقد تكون زوجته أو اللي كانت زوجته هي السبب وجايز الأتنين يكونوا كويسين فعلاً لكن مش مناسبين لبعض مش متوافقين مع بعض أو أي سبب تاني قد لا نعلمه .. هو النصيب يا صاحبي :))
أنت فكرتني بكذا حاجة وحمستني علشان أكتب تاني في الموضوع ده بعد ما أنحرفت شوية .. ويا ريت تخلليك معانا برضه وتحكي لنا على خبراتك والمواقف اللي شفتها لأننا بنتعلم من بعض :)
يا صديقي قدر الجنسين في الحياة الزواج وإن لم يكن عن حب
ردحذفأما الحب فله اهله الين يضحون من اجله
أسعدك الله
أتجوز ليه ؟؟
ردحذف- لما بارجع بالذاكرة كام سنة لورا قبل ما أتجوز .. بالاقي أن أول رد كان بييجي في بالي لما حد يسألني : إيه يا عم أنت مش هاتتجوز ؟؟ كنت باقول له :
.
.
.
أتجوز ليه ؟؟ .. ما أنا باشا أهه .. معايا جنيه عايش معايا ألف عايش ما عييش فلوس خالص برضه عايش ولا فيه أي مشكلة !! .. وبعدين إيه اللي يغصبني يا عم أربط نفسي بواحدة تفضل قاعدة في قرابيزي ليل نهار ؟؟ .. ما هي برضه بني آدمه وليها حقوق وأنا بصراحة مش مستعد أتنازل عن حريتي دلوقت !! .. أنا لسه ما شبعتش من الدنيا يا عم !! .. وبعدين الجواز ده مسئولية وإلتزامات ، ده فيه شقة وتشطيب وعفش وشبكة وفرح وبعد كده مصاريف وعيال ووووو هم يا عم ما يتلم ووجع قلب !! .. هو بصراحة أنا لو أتجوزت دلوقت هايبقى علشان الجنس فقط لا غير !! لأني مش عاوز أزني !! .. وبعدين ما أنت شايف البنات عاملين إزاي ؟؟ .. الواحد يا عم من كتر اللي بيسمعه وبيشوفه بقى يحسبها مليون مرة قبل ما يفكر ياخد خطوة زي دي !! .. وبعدين افترضنا لقيت واحدة كويسة وبنت حلال ، بس دماغنا مش راكبة على بعض !! أعمل إيه أنا ساعتها ؟؟ أتجوزها علشان هي كويسة وخلاص ؟؟ طب وبعد كده يا عم ؟؟ هاتفاهم معاها إزاي ؟؟ هاتكلم معاها في مواضيع إزاي ؟؟ ولا عاوزني أبقى عامل زي حنفي في مسرحية المتزوجون ؟؟ .. المشكلة أنك تلاقي الجسم ما تلاقيش الدماغ !! تلاقي الدماغ ما تلاقيش الجسم !! تلاقي الدماغ والجسم تلاقيها مش بتاعة جواز وتقول لك حريتي وشخصيتي وكينونتي وطموحي وصحابي وبرستيجي و.....إلخ وهي أصلاً ما بتعرفش تغسل (لاموأخذة) بعد ما بتخلص حمام !! تلاقيها زي ما أنت عاوزها يطلعوا أهلها ولاد كذا ويفشخوك طلبات ويقولوا لك : احنا بنشتري راجل !!
لا يا عم أنا كده حلو قوي !! وإذا كان يعني ع الحنية والدلع فألف واحدة يا عم تدلعك وتحسسك أنك عنتر زمانك ، خش بس أنت ع الفيس ولا الشات وأنت تلاقيهم مزروطين !!
ولله فرق السن كان كبير يا باشا- يعني هو دفعتي يعني عده 35 سنه، وهي كان عندها 21 سنه، 14 سنه كتير جدا جدا جدا بصراحه، التوافق في السن ده شيء مستحيل، بس على العكس انا لقيت رجاله كبار يعني عندهم مثلا 65 سنه وتزوجوا بنات عندهم 30 سنه
ردحذففهل فيه فرق في السن واحنا صغار عن واحنا كبار؟
يعني مثلا هل ممكن الزواج يفشل لو كان فرق السن 12 سنه واحنا في الثلاثينيات عنه لو حد كان عنده فوق ال 60؟
أحمد الصعيدي
ردحذف:))
الله يفتح عليك يا أستاذنا :))
أهو أنا كنت ممكن أقعد سنة علشان أقول كلمتين زي دول ومش هاعرف برضه :))
ربنا يسعد حضرتك يا رب ويكرمك ويبارك فيك ويسعدك زي ما أسعدتني بمرورك الراقي الكريم
:))
شرفتنا
موضوع جميل
ردحذفانا بقا فرحى بعد شهر وخابفه اوووووووووووى حد يدلنى اعمل ايه الله يكرمكم
انا بحب عريسى اوى اوى ومرتبطين جامد ببعض بس بعد اللى بشوفه والطلاق اللى بيحصل فى مجتمعنا كل يوم بقيت بخاف
ردحذفأتجوز ليه ؟؟
ردحذف<< تابع >>
................ كانت مشكلتي الرئيسية "الخوف" متدلدل منها كذا مشكلة صغيرة : الخوف من الفشل / الخوف على حريتي / الخوف على مساحتي من الخصوصية / الخوف من أني ما ألاقيش اللي تحبني زي ما أحبها وما تقدرش تفهمني وتحتويني وتقدر اهتماماتي واتجرح واتعذب واتعقد (وأنا متعقد خلقة أصلاً) / الخوف من المسئولية / الخوف من شبح كل العلاقات الفاشلة اللي عاصرتها وما كنتش أتخيل أنها تفشل و أني أكون السبب في فشل العلاقة وأنا معتقد بيني وبين نفسي أني واد دماغه كبيرة وعنده خبرة في الحياة وهاقدر أواجه وأحل أي مشكلة / الخوف من أني ما أقدرش أحقق أحلامي أو أضطر أتنازل عن بعضها لأن الجواز هايعطلني وأدخل الطاحونة والمسئولية هاتخلليني عامل زي التور المربوط في ساقية وكل يوم أرجع بلبن وجبنة وفينو / الخوف من أني أتعرى قصاد نفسي وأطلع واحد فاشل أتجوز بس علشان كبر في السن وما حققش أي حاجة من اللي كان عاوزها وبيتمناها لأنه أصلاً ما جريش وسعى وراها / الخوف من أني أضطر أرضخ لمساعدات من أهلي مما قد يحملني عبء مشاركتهم ليا في اختياراتي والتدخل في قراراتي وحياتي مستقبلاً (وأنا طول عمري ماشي بدماغي) / الخوف من المجهول وأن كل حاجة تمشي كويسة ومتيسرة وأنا (لأني موسوس) أبقى قاعد مركز على أعصابي وبانكش على الخازوق اللي أكيد ولزماً وحتماً يكون موجود ولازم أكتشفه وأعالجه قبل ما الموضوع يبوظ ولا أقول لك ؟؟ الموضوع ده مريب وأنا مش مرتاح له ومش لاعب !! / الخوف من الالتزامات المادية / الخوف من العلاقة الجنسية / الخوف من نظرات الآخرين المتربصين وتقييمهم لعلاقتي / الخوف من التغيير وأني أبطل أقاوم التغيير ده وأحاربه (سراً وعلانية) على طول الخط باعتبار أني أنا الصح وأني أنا سيد العلاقة وأني ما أضغطش على الشريك و أبتزه نفسياً علشان يتغير لي (على أساس أنه الطرف الأضعف المحتاج لي) وأبطل النظرة المتعالية والمحتقرة لأي رأي مخالف لرأيي حتى لو غلط / الخوف من النقد / الخوف من أني لازم أتواضع وأبقى مرن وما أعتبرش نفسي باتنازل وبانسحق تحت وطأة الشريك ، وأني أتقبل الشريك بكل ما هو عليه / من نظرة الشريك ليا وعدم تقبله ليا وأني أخذله فيا / الخوف من أني آجي على نفسي وأضغط عليا علشان أحافظ على صورتي الحلوة المرسومة قدام الشريك وده هايخلليني أفشل في أني أكون معاه على حريتي وعلى طبيعتي وهاييجي وقت وهانفجر وهافشل برضه / الخوف من الترويض / الخوف من أني ما أقدرش أحقق اللي كنت أحلم بيه في الجواز بالظبط زي ما كنت باتخيله وباخطط له وباحلم بيه قبل الجواز وده هايخلليني أحبط واكتئب وأتقوقع وأزهد وأجنح وأشرد / الخوف من أني بعد فترة ييجي علي وقت وأكتشف أن مش هو ده اللي أنا كنت عاوزة وأضطر أكمل وخلاص .
أتجوز ليه ؟؟
ردحذف<< تابع >>
احذر من أن ((تعتمد)) على اختياراتك وأنت جائع !!
.
.
.
بيقولوا عند غياب الحاجة ، يفتقد المنطق .. يعني لو أنت جعان وميت من الجوع ولقيت قدامك لقمة ناشفة متربة هترفعها على بقك وتاكلها علشان تسد جوعك .. إنما مش هاتكملها !! .. ليه ؟؟ .. لأنك بعد كده هاتبدأ تتذوق وتستطعم وحواسك هاترجع لك وهتبقى عندك طاقة وقدرة أنك تمشي وتروح تختار الأكل اللي بيعجبك .. بالقياس ؛ يبقى ما تندفعش في أي علاقة أو تنزلق في أية وعود تحت تأثير أنك محروم عاطفياً وسمعت لك كلمتين حلوين أو لقيت حد شكله شبهك وافتكرته مناسب ليك أو كنت خارج من علاقة دمرتك وهب لقيت اللي يطبطب عليك وقلت ترتبط بيه وأنت يا دوب لسه شايفه وما عرفتوش !!
لأن أسخف وأصعب حاجة بتقابلك بعد كده أنك تفلفص من العلاقة دي وتنهيها !! .. وبتتصدم في نفسك قبل اللي قدامك ما بيتصدم فيك !! لأنك بتحس أنك مذبذب ومش عارف تختار وأنك غلطت وأتسرعت وغالباً بتكون جرحت اللي قدامك وأتجرحت !! .. طبعاً الكارثة والمصيبة الكبيرة أنك تعمل فيها شهم وتكمل !! لأنك كده تبقى بتنتحر بالبطيء وبتموت كمان اللي قدامك ، اللي كل ذنبه أنه ساعدك واتعلق بيك وخليته يحبك !!
أتجوز ليه ؟؟
ردحذف<< تابع >>
بالنسبة للاختيار فـ الموضوع في كلمتين اتنين قالهم سيد الخلق صلى الله عليه وسلم :
"ذات الدين"
بعد كده .. حط اللي أنت شايفه مناسب ليك : جمال/مال/نسب .... إلخ
وزي ما قلت في التعليق اليل فات الأهم من الأختيار توقيت الأختيار !!
- هنا بقى بتيجي مشكلة كبيرة يا معلم !!
ما تبقاش دنيء !!
بمعنى .. أنت عارف نفسك أكتر من أي حد تاني ف الدنيا دي كلها ، فما تجيش تختار واحدة فعلاً ذات دين ومن حفظة القرآن وبنت ناس وجميلة وأنت بني آدم وضيع !!
أنا عارف أن البني آدم ما يملاش عينه إلا التراب وكل واحد عاوز أحسن واحدة في الدنيا .. بس كل حاجة ولها ضريبة ولها تمن ، وبنات الناس مش مستباحة !! .. يعني الملاك اللي أنت عاوز تتجوزها دي ، بالله عليك هاتأدي حقها عليك إزاي وأنت أصلاً ما بتأديش حق ربنا عليك ؟؟ .. حتة أنك تاخد واحدة ذات دين وبنت ناس دي وأنت أصلاً لا بتصلي ولا بتعمل بكتاب ربنا هاتبقى مشكلة كبيرة جداً بالنسبة لك وذنب عليك هاتتحاسب عليه يوم القيامة ، ولو فضلت عايشة معاك - ده لو الجواز استمر ما بينكم – هاتعيش معاك بس علشان أنت جوزها !! بس لا طاعة لمخلوق في معصية الخالق .. نقطة كمان ؛ ديل الكلب عمره ما يتعدل !! - طبعاً نسأل الله الهداية كلنا ولا نزكي أنفسنا - بس يعني ما تقنعنيش أنك هاتتحول شيخ وتنضف بين يوم وليلة !! وإلا هاتفضل حابسها في البيت وانت داير مقضيها بره !! ومش هاتطلعها إلا في المناسبات !! أعرف كذا واحد ديلهم نجس ولما اتجوزوا اختاروا منتقبات !! ومعظمهم انفصلوا للأسف !! الطبع يغلب التطبع يا صاحبي !! .. وإذا أردت فاطمة فكن علياً .. ما باقوللكش اتجوز رقاصة !! .. خد واحدة ذات دين تعينك على طاعة ربنا ؛ بس تكون أنت من جواك إنسان كويس ومتقي وناوي فعلاً تعينها وتقومها لو هي تكاسلت عن طاعته ؛ علشان ربنا يبارك لكم في حياتكم وفي ذريتكم إن شاء الله
الماديات
ردحذف- الجزئية دي غصب عني هاكون عنصري فيها ومتحيز للرجالة فيا ريت الزميلات ما يزعلوش مني أو يزعلوا في سرهم :)
النهاردة الشاب بيتخرج قول عنده 23 سنة وسنة جيش يعني 24 سنة .. لو افترضنا أن متوسط سعر الشقة التمليك 100 متر في منطقة متوسطة/تحت المتوسطة هو 200 ألف جنيه ، وتقريباً عاوزة لها تشطيب بحوالي 50 ألف جنيه وقول شبكة وشوية مصاريف لزوم الفرح وشوية الكراكيب اللي عليه بحوالي 50 ألف تانيين ؛ يبقى المجموع 300 الف جنيه بالصلاتو على النبي !! .. هانفترض أن ما حدش هايساعده من أهله ولا سافر واتغرب مثلاً خمس سنين الإمارات .. وهانفترض مثلاً مثلاً أن متوسط اللي هايقبضه من ساعة ما يتخرج 2000 جنيه شهرياً (خلليك معايا بس ما تبقاش زمزوق) ، قول يا عم مش هياكل ولا هايشرب ولا هايلبس ولا هايتفسح ولا هايصرف مواصلات وهايحوشهم كلهم .. يعني تقريباً عاوز له حسبة تلتاشر سنة علشان يكون نفسه ويقدر يتجوز (ده على فرض مستحيل تاني وهو ثبات الأسعار خلال الفترة دي كلها) يعني يوم ما هايفكر بس يخطب مش قبل سن الـ 36 ، قول ممكن يتجوز على سن الأربعين !!
سؤال خبيث جانبي : شاب (مشيها شاب) عنده 40 سنة ، واتفشخ على ما كون نفسه ، هل يوم ما هيفكر يتجوز هايتجوز واحدة عندها 40 سنة زيه ؟؟ :D
* افتراض تاني !!
لو قلنا هايتجوز في شقة إيجار قديم .. يعني بنتكلم في حسبة 50 ألف وقول 70 ألف تشطيب ومصاريف جواز وعفش (بس خد بالك أنه بيتفشخ شهرياً في إيجار أو نص إيجار لحد ما المقدم يخلص تقريباً 500 جنيه شهرياً) يعني قول ممكن يتجوز على سن 30/32 سنة ، بس العملية هاتبقى مزنقة شوية عليهم بعد ما يتجوز وهاتخنقهم أكتر بعد ما يخلفوا !!
* افتراض تالت وأخير !!
أن الشاب يتجوز في إيجار جديد !! وبكده تبقى العملية كلها حسبة تلاتين أربعين ألف يعني ممكن في سنتين تلاتة يتجوز ، بس يشوفوا حد يتبناهم بعد الجواز ويدفع لهم الإيجار !!
تابع الماديات
ردحذف* اللي أقصده من كل الهري ده .. أن الشاب من دول بيتفشخ وبيطلع تلاتة ميتينه هو وأهله وجيران أهله وبلدهم كلها علشان يعف نفسه ويتجوز .. وفي الآخر - غالباً - لما بيروح يتقدم لواحدة أهلها بيكملوا على السليم اللي باقي فيه بطلباتهم !!
الحياة مشاركة يا جماعة .. يعني النهاردة اللي بتقول لك مساواة وأنا زيي زي الراجل طب ما تتشمللي يا حلوة منك ليها وتقسموا كل حاجة بالنص ؟؟ يعني الشاب ليه يدفع 300 ألف جنيه لوحده علشان يتجوز ؟؟ هايجيبهم إمتى وإزاي ومنين ؟؟ وبعدين هو هايتجوز لوحده ؟؟ ده أنتي أهلك لو هايجهزوكي من إيطاليا ولا فرنسا مش هايجيبوا حاجات بخمسين ألف جنيه !! قولي 100 ألف جنيه يا ستي ، يعني مجموع اللي عليكي أنتي والعريس 400 ألف ، حلو ؟؟ يبقى خلاص كل واحد فيكوا يدفع 200 ألف وتتجوزوا !! .. بلاش 200 ألف ، قضوها إيجار قديم وادفعي خمستاشر ولا عشرين ألف بس !! بدل ما أنتي قاعدة جنب أمك ترازي فيها !!
إنما تيجي تتكلم كده يقولوا لك : القوامة للراجل و "بما انفقوا" وهو احنا يعني هانخدمكم ببلاش ؟؟ إلى آخرة .. تقول لهم : طب خلاص ما تكتبوش قايمة ولا مؤخر !! .. يقولوا لك : افرض طلع خسيس وافرض بهدلها وافرض عذبها وافرض وافرض وافرض .... إلى آخرة.. قال يعني الحاجات دي هي اللي هاتخللي الجوازة تستمر أو هي اللي هاتمنع الراجل أنه يطلق !!
يا راجل يا طيب ده فيه ناس بتطلب شبكة غالية جداً ، قال يعني علشان لو العريس خلع في الخطوبة ياخدوها زي تعويض !! ويقولوا لك : مش فضل داخل خارج آكل شارب نايم قافش وبوظ سمعة البت ؟؟ .. وفي نفس ذات الوقت تلاقي أبوها ساعة الاتفاق يقولوا لك : خيرهن أقلهن مهوراً !! احنا بنشتري راجل !! أنا باديك حتة مني !! أنا باقدر الراجل اللي يصون بنتي ويحافظ عليها !! أنا اتقدم لها طيار من يومين عنده آجنس طيارات في أرض اللوا ورفضته علشان بيدخن !! .. إلى آخر الكلاشيهات الحمضانة !!
لأ وأحلى حاجة هنا .. بجد بجد .. أنك تلاقي البنت من دول اختفت !! .. ولا تسمع لها صوت !! .. ولو اتكلمت وفتحت بقها ساعتها يبقى علشان تهديك وهي أصلاً بتشوفك بتفكر وبتخطط إزاي (ما أنت العدو ساعتها) بزق من أمها اللي بتكون بتتصنت على كلامك معاها وبتمليها تقول لك إيه في التليفون : يا حبيبي طب ما باباك يساعدك ؟؟ .. أنت فرحة عمري ، بس يا عمري أصل كل بنات أعمامي عملوا أفراحهم في دار الدفاع الجوي وأنا مش عاوزة بابا يبان أقل من أخواته !! .. إن كان عليا أنت شبكة حياتي يا روح قلبي بس بصراحة أنا كان نفسي في الخاتم الألماظ ده ، وما كنتش متخيلة أنك هاتكسفني في أول طلب أطلبه منك !! .. أنا والله ما عاوزة نيش ولا سفرة بس أنا باقول نجيبهم وإن شالله حتى نرميهم أو نبيعهم بعد الجواز !! .. لعلمك أنا بابا كاتب لأخواتي البنات كل واحدة قايمة بمليون جنيه بس هو علشان شاريك كتبها بنص مليون جنيه بس وقال لي أقول لك ما تقولش لحد !!
وغيرها من الحوارات الفكسانة :))
moataz farouk
ردحذفبالنسبة لموضوع فرق السن ده فمش عارف والله يا معتز .. المتداول مجتمعياً أن الراجل يكون أكبر في السن من مراته ((((وده حسب ما هو متداول برضه علشان الست بتكبر الأول ، فيتجوزها صغيرة علشان تمتعه أكتر قبل فترة الضمان ما تنتهي وممكن الفرق ده يكون من سنتين تلاتة لحد عشر سنين))))
بس هنا -- لو الفرق بينهم كبير -- فيه كذا مشكلة : احنا بنكبر يا معتز وبنتقل دي حاجة ما فيهاش مقاوحة ومش هانكدب على نفسنا فيها .. النهاردة أنا داخل على الـ 36 سنة أكيد طبعاً غير لما كنت من عشرة خمستاشر سنة !! يمكن لو كنا بره كنت هاقول لك أوك !! بس أديك شايف الحال والإحباط والمرمطة اللي الواحد مننا فيها ليل نهار !! أنت تبص للشاب من دول اللي عنده 25 سنة تحس أن عنده 40 سنة !! من شيل الهم وطفحان الكوتة والسجاير والسهر وعدم ممارسة الرياضة !! النهاردة معظم البنات تحت سن التلاتين مفخدين ومجنبين وبكروش والشباب صُلع ومقتبين وعندهم تقوس !! ففرق السن الكبير ده صعب جداً تعوضه بدنياً في الطاقة والمجهود والحيوية والنشاط والجنس (إلا بالمنشطات بقى) .
نيجي نفسياً .. هاتلاقي أن اهتماماتها ما بقتش تشدك أو تثير فضولك وهاتشوفها صبيانية أو تصرفات عيلة ، ماهي عاوزة تخرج وتشوف الدنيا بعينيك وتتفسح وتأسس وتأثث بيتكم وحياتكم وتروحوا نادي علشان الأولاد يلعبوا فيه وأنت هايبقى غصب عنك مش قادر تلاحق .. أنت كفاية عليك قوي الشغل والهدة بره البيت طول النهار .. البنت الصغيرة زي الوردة اللي لسه بتفتح عاوزة رعاية خاصة واحتواء واهتمام ومشاركة وحد يكون خبير ومعلم يعرف يتعامل معاها علشان ما تحسش أنها متجوزة باباها .. أنت ممكن تديها من حكمتك وخبرتك (لو هي عندها استعداد) بس النضج ده صعب أنه يكتسب بين يوم وليلة ، حتى لو هي إنسانة بيتوتية هاتحس بفرق سرعات في النشاط .. مش هاقول أن متطلباتها كتير بس هو ده سنها زي ما احنا في سننا كنا بنجري يمين وسمال وواخدين الدنيا طول وعرض .. ده كفاية تربية العيال يا عم !!! .. باعتقد أن توافق السن مهم ، بس في النهاية أقول لك ده برضه بيعتمد على الطرفين من حيث شخصياتهم وتفكيرهم ومدى تقاربهم من بعض .
* بالنسبة للكبار فوق الستين اللي بيتجوزوا صغيرين ، أعتقد إن العلاقات الناجحة والمستمرة في الحالات دي مجرد إستثناءات !!
♥نبع الغرام♥♪≈
ردحذفألف ألف مليون مبروك يا أستاذة :))
بارك الله لكما وبارك عليكما وجمع بينكما في خير ورزقكما بالذرية الصالحة إن شاء الله
ألف ألف مليون مبروك يا عريس ربنا يتمم بخير يا معلم :))
ربنا يا رب يحفظكم ويحميكم ويؤدم ما بينكم ويبعد عنكم كل عين وشر ويحنن قلوبكم على بعض ولا يحرمكم أبداً من بعض اللهم آمين
* هو أنا للأسف طبعاً ما أتشرفتش بحضرتك قبل كده ؛ بس هاقول كام نصيحة كده عامة ع السريع لحضرتك ولأاي أخت فاضلة تكون بتشرفني هنا بتقرا تعليقي :)
* أول حاجة لو عريسك بيشرفني هنا ما تخلليهوش يقرا التعليقات بتاعة الماديات :D
* تاني حاجة : مش عارف هي مقولة ولا حديث شريف "التمس لأخيك سبعين عذراً" .. فأنا بانصح أي واحدة أنها تلتمس لعريسها سبعين ألف عذر في آخر فترة قبل الجواز !! يا ريت أصلاً تختفي من قدامه :D
لأن بجد بجد اللود بيبقى فوق الرهيب ، خاصة لو الشقة في آخر مراحل التشطيب وفيه حاجات لسه ما جتش ده غير تفاصيل الفرح والنثريات والمصاريف اللي بتطلع من تحت الأرض !! فالواحد مننا بيبقى زي الوتر المشدود على آخرة !! .. يعني ما تطوليش في الكلام والاتصال كل شوية لأنه بيبقى في خمسين موال الله يعينه .. بتبقى كل شغلته في الفترة دي أنه يدلدق فلوس ما يعرفش بتيجي منين ولا بتروح فين !! حاولي بقدر الإمكان تخففي عنه ما تبقيش حمل زيادة عليه ، لأن أي تصرف هايصدر منه في الفترة دي هايكون غصب عنه حقيقي .. ولو عاوزة تاخدي رأيه في حاجة اختاري الوقت المناسب .. ولو ربنا قدرك وفي إمكانك تساعديه أو تشيلي حاجة من عليه وهو برضه لو قادر يشيل حاجة من عليكي ما فيش مشكلة خاااالص وما تسمعيش لكلام حد وأن ده ع العريس أو أن ده ع العروسة !! ده بيتكم أنتم ودي حياتكم أنتم ، خلليكوا تخلصوا !!
* تالت حاجة : اطردوا الشيطان واضربوه بالجزمة القديمة !! .. أي أفكار تجيلكم أو أي كلام تسمعوه ينرفزكم ويحرق دمكم نفضوا له تماماً !! الفترة دي أصعب فترة في العلاقة كلها وهي دي مقياس ارتباطكم ببعض !! ما تخللوش أي حاجة هايفة تزعلكم من بعض وتخللي نفوسكم تشيل من بعض !! كفاية شدة الأعصاب اللي أنتوا فيها !! .. ابعدوا عن أي حد هادم اللذات يقعد يوسوس لكم أو يكركب الدنيا فوق دماغكم .. نفضوا لأي كلام سخيف يتقال بقصد أو بدون قصد خاصة من الأهل والأخوات الأكبر سناً لأنهم بيكونوا مشحونين أكتر منكم وعلى آخرهم وصعبان عليهم فراقكم وطفحوا دم قلبهم علشان يستروكم ، وما تفتكروش أن فيه أب ولا أم في الدنيا يتمنى يشوف ابنه ولا بنته زعلان أو زعلانة ولو ثانية واحدة !! بيبقى غصب عنهم والله !! حتى لو هما ما بينوش ده !! ده انتوا ضناهم يعني حتة منهم !! وإذا كانت فيه أي حساسيات أو خلافات حاولوا تكونوا انتوا الكبار وتعالجوها بعقل وبحكمة وبدلال عليهم واشتروا خاطرهم على قد ما تقدروا لأنكم مش هاتتجوزوا إلا ببركتهم !!
* رابع حاجة : ما فيش حد بيخش كامل !! .. حتى لو أنتوا جبتوا كل حاجة من الإبرة للصاروخ ، هاتكتشفوا بعد الجواز أنكم برضه نسيتوا حاجة !! فما تزنقوش نفسكم وتداينوا وتستلفوا علشان حاجات ممكن تتجاب بعد كده !! أنتوا في عرض كل ربع جنيه !! أهم حاجة أهم حاجة قلبكم يبقى على قلب بعض !! ولو حاجة جت مش عاجبة حد فيكم ما تدقوش !! هاتنسوها بعد كده في شقتكم لما تتجوزوا ومش هاتفتكروها !! ولو افتكرتوها هاتقعدوا تضحكوا عليها :))
شوية نصايح ما حدش يقراهم
ردحذف* أهلك ثم أهلك ثم أهلك !! .. مهما حصل منهم أو بسببهم هما سندكم في الدنيا دي بعد ربنا وما لكوش بركة غيرهم .. الفكرة مش أنكوا تتجوزوا وخلاص !! ما كان كل واحد اتجوز من زمان !! الفكرة إن بجد هما ضهركم وسندكم !! .. ما تجيش أبداً على أهلك مهما حصل منهم أو حسيت أنهم ظالمينك وجايين عليك !! في النهاية هاترجع لهم !! .. لو حصل خلاف معين حاول تحتوية وتمتصه وتناقشه وتعالجه معاهم بقدر الإمكان !! هما أكتر ناس في الدنيا دي عاوزين مصلحتك !! .. حتى وإن كانت تصرفاتهم غير منطقية أو غير مدروسة أو قاسية بالنسبة لك !! .. واللي يبيع أهله اللي هو منهم علشان حد سهل جداً عليه بعد كده أنه يبيع أي حد !! .. ما تاخدش موقف شخصي من أهل شريكك أيا كان !! بعد ما تتجوز هايبقوا أبوك وأمك صدقني !! .. البيوت أسرار وأنت ما تعرفش بيت شريكك عامل إزاي من جوه وظروفهم إيه ؛ حتى وإن كان باين لك العكس !! .. خلليك رحيم وكبير في تصرفاتك !! لأن المواقف ما بتتنسيش ولو بعد ميت سنة !! لا الحلوة ولا الوحشة بتتنسي !! .. وعامل تعامل !!
* ما تخوفوش بعض !! .. يعني ما حبكش في آخر فترة -- ويا ريت طول الخطوبة -- تقعد تسمع من هنا وتسمعي من هنا والكلام يلعب بدماغكم وتروح أو تروحي تنقليه لشريكك !! .. حتى إن كان بهزار !! .. يعني مثلاً : واحد صاحبك يقول لك حاجة مراته بتعملها له أو حاجة هو قايل لمراته ما تعملهاش ، ما تجيش أنت في الوقت الحرج ده وتروح لشريكتك وتقول لها : هو انتي بتعرفي تعملي كذا ؟؟ أو إيه ده أنتي ما بتعمليش كذا ليه ؟؟ .. لأنك هاتقلقها وتخوفها منك وهاتستغربك ولو هي عندها شوية فراسة هاتستشف أنك مزقوق يا معلم وحد ملا دماغك وهايبقى شكلك وحش !! .. وبعدين يا عم افرض أنها بتعرف تعمل كذا أو ما بتعرفش تعمل كذا ، اسأل نفسك : إيه فايدته يعني ؟؟ ما تبقى تعلمها أو تديها فرصة تتعلمه بعد الجواز .. ما حبكش في آخر وقت تربكها !! .. وأنتي برضه ، بلاش الأسئلة التافهة بنت الكلب اللي بتقعدوا تملوها لبعض على الفيس وكأن هي دي اللي هاتحدد شخصية اللي قدامك !! .. الجواز فيلم تااااااااااااااااااني خالص !!!!! واللي أنتي شايفاه قدامك ده وفاكرة أنك تعرفيه ، فأنتي لسه لا عاشرتيه ولا شفتيه في البيت !! .. يعني مثلاً : تعمل إيه يا حبيبي لو رجعت يوم من الشغل ولقتيني مش عاملة أكل ؟؟ / هاتفسحني كل يوم زي ما وعدتني وتوريني كل الأماكن اللي كنت بتروحها قبل ما نتجوز ؟؟ / لو مامتك زعلتني وأنا جيت حكيت لك هاتقف في صف مين ؟؟ / أنت ممكن في يوم تنام زعلان مني ؟؟ / ........... إلخ
كل دي أسئلة ملهاش أي لزمة دلوقت ومش هاينفع يتجاوب عليها بقيقي كده (شفوي يعني) !! .. دي مش هاتتعرف إجابتها إلا بعد عشرة طويلة ومعاملة كبيرة ما بين الطرفين ومواقف كتيرة تعدي عليهم سوا يعرفوا فيها بعض وتزود الثقة ما بينهم ، فما تسبقوش الأحداث واستمتعوا بكل فترة على قد ما تقدروا :))
تابع شوية نصايح ما حدش يقراهم
ردحذف* احذري جوزك وهو نايم / وهو لسه راجع من الشغل / وهو جعان / وهو مخنوق ومتضايق وقاعد لوحده / وهو بيلعب ع البلاي استيشن :D / بلاش تستفزيه في الشارع وسط الناس !! .. اختاري التوقيت المناسب للكلام !! حتى الدلع بيبقى له وقته برضه !! علشان ما تتصرفيش بحسن نية وتتصدمي من ردة فعله !!
* اللي يتقال ع السرير ما يخرجش بره السرير واللي يتقال في الصالة ما يخرجش بره الصالة .. ومهما كنتوا زعلانين من بعض لا قدر الله ، ما تناموش أبداً متخاصمين أو كل واحد في حتة !! .. ما تستكبرش على أنك تصالح مراتك أو جوزك !! الشيطان هنا بيبقى شغال الله ينور !! .. حياتكم مش مشاع فما تحكوش لأي حد !! سواء كانت أم / خت / أنتيمة / جارة / زميلة / في مدونة أو على الفيس !! .. اللي يسألكم ، ردوا بكلمتين : الحمد لله .. ولو زود في الرخامة وقفوه عند حده بجد !! .. لا تحكوا ولا تتنادروا ولا تشتكوا ولا تدخلوا أي حد ما بينكم أبداً أبداً أبداً مهما حصل !!
* جوزك / مراتك مش أحلى واحدة في الدنيا ولا أوحش واحدة في الدنيا دي حقيقة !! ولو هو / هي أحلى واحدة في الدنيا مع التعود هاتشوفها عادية !! إنما اللي يخلليها أحلى واحدة في الدنيا أن أنت اللي تشوفها أحلى واحدة في الدنيا وما تشوفش غيرها ، يكفي أنها بتحبك وأنها سترك وسندك وسكنك وملاذك بعد ربنا سبحانة وتعالى ، فما تستكرش عليها أبداً الكلام الحلو والمعاملة الحنينة الطيبة !! ما تبقاش زي القرع تمد لبره واللي جوه دي خدامة !! .. بعد الجواز ومع العشرة هاتعرف قيمة أبوك وأمك ومدى حبك لمراتك وهاتلاقي أنك مهما عاملتها كويس ، فأنت برضه مقصر في حقها ومش قادر توفيها حقها في الحب ، لأن بجد بجد بجد والله العظيم والله العظيم والله العظيم احنا (الرجالة) من غيرهم (الستات) ولا حاجة :)
* ما تسمعوش كلام حد عن الجواز (حتى كلامي ده) !! .. ودي للي لسه مرتبطين جداد أو بيفكروا يرتبطوا !! .. ما فيش حد سعيد في جوازة هاييجي يقول لك أنه سعيد ومبسوط !! .. أي حد ييجي يشكيلك ويشيلك همه ويحبطك ويخوفك من الجواز ، طرقع لأمه !! .. أصل بالعقل كده !! معقول يعني هو عايش في قهر ونكد وخنقة من ساعة ما اتجوز ؟؟ ما شافش يوم عدل ولا يوم حلو في جوازة ؟؟ طب مكمل ليه ؟؟ إيه اللي غصبه يا عم ؟؟ .. ما تسمعش لأي حد / واحدة وما تحكيش لأي حد مهما كان قريب منك (ونفس وما سواها) أنت ما تعرفش هو من جوه شايل لك إيه !! واستعينوا على قضاء حوائجكم بالكتمان .. دي تجربتك أنت لازم أنت اللي تجربها بنفسك !! .. وما تاخدش تجارب الآخرين مقياس ولا تحاول تقلد تجربة حد !!
عجبني قوي التعليقات كلها
ردحذفالمجروحة والمنطقية والمتسائلة والوافية الشافية بتاعة سيادتك
وعجبني خصوصي التعليق بتاع ان كل تجربة حب وزواج هي تجربة فريدة..نونو صغير مش شبه حد ولا حتى توأمه..والنونو ده خاضع للصبر والحكمة والحنكة وقبل دول كلهم توفيق المولى
لو الناس عاملت الحب أو الزواج بالشويش وأوغلت في كل الأمور برفق .. وكانوا مبدأيا بيحبوا بعض بمعنى
توافق + لهفة لا تفتر = السعادة
اه والله اه والله اه والله
ربنا يوفق الجميع للسعادة دنيا وآخرة وما يحرم معتز من أهم أسمدة الروح..ألا وهو حب الوليف :)
ردحذفد/ستيتة
الله أكبر عليكي يا دكتورة
:))
أنا قاعد قدام تعليق حضرتك باتأمله ، البوستات اللي زي دي المفروض إننا نقعد بس نقرا ونتعلم من خبرات حضراتكم :))
"لو الناس عاملت الحب أو الزواج بالشويش وأوغلت في كل الأمور برفق .. وكانوا مبدأيا بيحبوا بعض بمعنى : توافق + لهفة لا تفتر = السعادة"
اه والله اه والله اه والله
حقيقي مش لاقي رد غير أني أدعي لحضرتك بكل الخير والفرحة والسعادة وربنا يكرمك في أولادك ويبارك لك فيهم ويحفظهم لك من كل سوء
ربنا يا رب يكرم معتز ويوفقه وييسر له حاله ويرزقه بالزوجة الصالحة عاجلاً إن شاء الله .. وربنا يكرم الجميع ويوفقهم ويرزقهم بالأزواج والزوجات الصالحين الطيبين
نورتي مدونتك يا دكتورة ويا ريت حضرتك ما تحرمناش من نصايحك الغالية
ردحذفالتفاهات
* إيه لزوم : النيش / السفرة / أوضة الأطفال (من قبل ما ييجوا) / أطقم الصيني والأركوبال واللي اسمه إيه جلاس ده وأطقم الشاي وطقم خشاف وطقم جيلي (قال يعني بتعرفي تعملي جيلي) / الستائر البراقع / النجف الكريستال / الـ 12000 لباس (الأندر وير) والـ 9000 قميص نوم و4000 جلابية و700 طقم خروج و300 جزمة وترسانة المكياج اللي تزوق بنات المحروسة كلهم عشر سنين قدام ؟؟ وبعدين بالنسبة للأندرات والقمصان وبدل الرقص وكل ما هو من مكنونات غرفة النوم ، هل أنتي كنتي عارفة مسبقاً ذوق الحمار اللي هايشوفك بيهم ولا اشتريتيهم اعتباطاً بفلوس الجمعية اللي أمك كانت زانقاكي فيها ؟؟ وبعدين يا ماما أنتي مش داخلة حرب الكواكب !! ولا هاتتجوزي هرقليز !! .. عجبني قوي موقف شفته حصل من واحدة ألمانية مع خطيبها الألماني (زميل ليا) كانوا في زيارة لمصر ، لما دخل قسم الملابس الداخلية الرجالي علشان يشتري أندرات وهي جت وراه وقعدت تنقي له قطعة قطعة بعد ما تحطها عليه وتتخيل شكلها ، وبالمثل هو راح معاها قسم الملابس الداخلية الحريمي ونقى لها شوية حاجات برضه ، بس أنا كنت طلعت بره بصراحة :D
القصد .. فيه مصاريف كتيرة جداً وفلوس بالعبيط بتترمي ف الهوا في نثريات وتفاهات نتيجة موروثات غبية ، ممكن تتصرف في حاجات أفيد وأهم للشقة وللعروسين لو هما بيفكروا ودماغهم نضيفة !!
.
.
.
بالنسبة للـ : الشبكة والفرح والقايمة والمؤخر .. فكل دي مواضيع نسبية بتختلف من مكان لمكان وحسب عادات وتقاليد كل ناس .. وكلمة الأصــــول دي أحلى كلمة تتقال عند أي خلاف :))
كافكا طلق مراته بعد 24ساعة
ردحذفقال : ان التواجد مع كائن اخر امل مستحيل وجحيمي
وانا معاه :)
كالعادة كل ما اغيب وارجع الاقي حاجة تبهرني وترسم ع وشي ابتسامة المرة دي الى جانب الابتسامة الموضوع استفزني بالمعنى الايجابي للاستفزاز اللي يخليك تقعد كده وتفكر وتشوف انت شايف الجواز ازاي وتطلع اللي جواك :)
ردحذفمبدائيا انا مش متجوزة فبص للموضوع من بره بنظرة بنت ف العشرينات
الجواز ده مر عليا بخمسميت مرحلة تقريبا زمان كان مجرد فستان وطرحة وبيت صغنون وفرحة لا اول لها ولا اخر والحياة بقا لونها بمبي والكلام ده
وبعدين مع مرور السنين وتقدم العمر بقا يارب نفرح بيكي هنفرح بيكي امتى عقبال شبراتك وبقا ضغط نفسي بشع وكأني ف سباق محتاجة انجز فيه قبل تاريخ صلاحيتي ما تبوظ..مجتمع فاشل بصراحة
دلوقتي بقا بعد السن ده وبعد ما بصيت حواليا لقيت تجارب كتير فاشلة واتربى جوايا عقد السنين من الجواز والفشل ومسئوليات الاطفال و التربية والبيت واللي هيتبني وووو
لقيت ان الجواز مش مجرد فستان ابيض بيتلبس ولا دبلة بتتحط ف الايد عشان الناس تتكتم وتسكت لان عمرها ما بتسكت
الجواز مشروع شاااائك للغاية خطوة بتقرر تاخدها وحياة بتقرر بمحض ارادتك انك تشاركها مع بني ادم وتختار انك تسلمه بايديك مفتاح كل حاجة تخصك وتتنازل اراديا عن حريتك وقراراتك وصوتك اللي من دماغك وتكتشف ان في صوت تاني هيتدخل لا وايه في اطفال كمان هتربيهم وتكبرهم وتدخلهم ف المجتمع ده والمفروض يكونوا اسوياء في حين ان لا كل المجتمع سوي ولا انت وشريكك اسوياء بنسبة 100 %
معرفش نظرتي دي سوداوية شوية ولا معقدة ولا خوافة زيادة عن اللزوم بس الجواز not that easyyyy خاالص
عجبتني نصايحك جدا وخاصة فيما يخص الماديات ومؤمنة جدا بالحاجات دي بس المجتمع اللي احنا فيه لامؤاخذه ابن كلب ومحتاج قوة مقاومة ثلاثية الابعاد عشان تقنع اللي قدامك ان النيش ملوش تلاتين لازمة من غير نظرة OMG مش هتجيبوا نيش :)))
ناهيك طبعا عن اني هنحاز لجنس الستات واقول ان مش كل الرجالة يستحقوا لقب رجالة ولا كلهم بيعرفوا يعني ايه يتعاملوا مع زوجة بما يرضي الله ويعطوها حقها قبل ماي يدوروا على حقوقهم لان معظم الرجالة انانيين..ومش عاوز ةاقول كل عشان التعميم :))
وفي الختام احب اضرب كل اللي فات في خلاط واقول ان ممكن يكون نظرتي من بره غير اما ادخل ف الموضوع بس ساعات بفكر ان مالها الخطوبة ومش لازم جواز ..والله اعلم قدام رايي ده هيتغير ولا لا :)))
دمت بكل الخير
ولك كل الاحترام :)
تحياتي
العزوبية
ردحذف* حلوة حياة العزوبية والصعلكة والصياعة ؛ حرية / تمرد / جموح / جنون ... إلخ ، بس في النهاية بتلاقي نفسك وحيد !! .. وأسوأ ما في الوحدة أنك بتضطر تقعد مع نفسك !! .. فتتخنق منك وتحاول تهرب منك وتتوه في الزحمة وتقضيها حرية وتمرد وجموح وجنون !! .. مثلاً : النهاردة فلان اتجوز وعاوزك تشوف له عربية تزفه ، شوية وعلان بيشطب شقته وعاوزك معاه ما أنت قاعد فاضي ، بعديه ترتان قرب يخلف وعاوز يستلف منك قرشين !! .. أبوك راح يحج وأنت راجل البيت ؛ هُب رجع من الحج !! .. جدك مات !! .. عقبال بس ما تدور وشك كده !! أه والله العظيم زي ما باقول لك بالظبط : "كده" !! تلاقي أن فلان اللي لسه متجوز امبارح ابنه دخل المدرسة وبقى يقابلك في الشارع ويسلم عليك !! وأن البت فلانة المفعوصة بنت عمتك اللي كنت بتقعدها على رجلك اتخطبت !! .. تبص ع اللي فات تلاقيه كتير وتبقى هاتتجنن إزاي السنين دي كلها عدت بالسرعة دي من غير ما تاخد بالك !! .. وتكتشف أن العمر جري بيك وأنت ما حستش ؛ لأن كان فيه زحمة حواليك !! .. لحد ما تلاقي نفسك بقيت وحيد و لوحدك !! .. صاحبك الأنتيم اللي ما كانش بيسيبك لحظة ؛ أنشغل عنك بحياته وبيته وولاده وما شفتوش من كام شهر !! ولما تتصل بيه يلطعك ع القهوة تلات ساعات وما يجيش !! .. تروح البيت تقفل على نفسك الأوضة وتفضل قاعد قدام الجهاز بالساعات ؛ تكلم ناس ما تعرفهمش وتسمع في قصص مش بتاعتك وتشيل هم غيرك و..... كل ده علشان تحس بالونس وبرضه ما بتحسوش !! .. تفرح وتتنطط لما تلاقي واحد صاحبك أتصل بيك وبيقول لك أنه هايعدي عليك بالعربية ، تنزل تقابله وتقعد ترغي معاه زي ما كنتوا متعودين ترغوا ، فتكتشف أنه مش مركز معاك أصلاً لأنه بيلف على الصيدليات علشان عاوز علبة لبن لبنته !! تقول له وأنت عارف أنه ما هايصدق أنك رايح معرض الكتاب علشان يروح معاك زي كل سنة ، يقول لك : معرض مين يا عم ؟؟ هو فيه فلوس الواحد يشتري كتب ؟؟ ولا أنا بقى فيا دماغ أقرا ؟؟ الفلوس اللي هادفعهم في الكتب عيالي أولى بيهم !! .. تقول له بلاش المعرض !! فيه حفلة لمطربكم المفضل في الأوبرا يوم الخميس وأن معاك تذكرتين وعازمه .. يقول لك وكأنك برضه ما فهمتش : يا ابني أنت واحد صايع ما وراكش بيت ولا عيال ، مش هاينفع آجي معاك وأسيب مراتي مع العيال لوحدها ، البت الصغيرة تعبانة ومراتي مش هاتعرف تتصرف لو حصل حاجة لا قدر الله ، وبعدين الساعتين تلاتة اللي هاروح فيهم الحفلة ، أقعد فيهم مع عيالي أحسن !! بكره لما تتجوز هاتتعرف !!
* بتبقى مش فاهم بالظبط إيه هو اللي هاتعرفه بعد ما تتجوز ؟؟ .. إيه اللي بيخللي الواحد يتغير 360 درجة كده ؟؟ .. هو لازم الواحد علشان يتجوز يزهد في كل حاجة بيحبها ؟؟ .. أمال الواحد هايعيش حياته إزاي ؟؟ .. ده كده يبقى السجن أرحم !! على الأقل ممكن تقرا وتقعد مع نفسك من غير زن وعيال ومصاريف وقرف !! .. وتقعد تحاول تفسر وتحلل وتمنطق التغيير الغريب اللي بيحصل للواحد بعد الجواز وفي الآخر تخاف أكتر من الجواز وتتعقد وتقول : يلعن أبو الجواز يا شيخ !! ده أنا كده سلطان زماني !!
* المجداف والدفة *
ردحذف- مرة كنت قاعد عند المقياس في المنيل وبابص كده ع النيل لقيت قارب صغير عليه راجل صياد ومراته ، الصياد كان عمال يقدف ومراته كانت قاعدة عند الدفة بتظبطها ومن وقت للتاني بتمسح له عرقه بطرف كم الجلابية المشجرة .. الصياد علشان يقدف ؛ بيرجع بجزعة لورا وبيتني دراعاته على صدرة بالمجدافين وبعدين يفردهم في حركة دائرية وهو بيميل بجزعة لقدام .. كل مرة الصياد كان بيميل فيها لقدام كنت باحس كأنه بيبوس مراته بكل حتة في وشه وهو بيبتسم لها .. حسيت كأن الترجمة اللي نازلة على الشاشة للمشهد ده كالتالي :
الصياد بيرجع بجزعه لورا وبيشد حيلة : يا رب
مراته : يا كريم
الصياد بيفرد دراعاته لقدام وبيقرب من مراته وبيبتسم لها : بحبك
مراته وهي بتمسح له عرقه وبتبتسم له : شالله يخلليك ليا ويبارك لي في صحتك وعافيتك
الصياد يسمع الكلمتين الحلوين دول وكأن كل قوة وطاقة الدنيا نزلت عليه فيقول بعلو صوته : يا رب
مراته : ارزقنا يا رزاق
___________________________
* المشهد اللي فات ده لخص حاجات كتيرة قوي وجاوب على أسئلة كتيرة جداً كانت شاغلاني بالنسبة لموضوع الجواز .. وكأن ربنا بعتهولي وصورهولي علشان يقول لي : اتعلم .
* الحياة حلوة وجميلة وبسيطة والله العظيم .. الجواز إيه غير الراجل الصياد ده ومراته ؟؟ .. مودة ورحمة .. مجداف ودفة .. وربك هو الرزاق الكريم .
لما تشوف مراتك هاتعرفها
ردحذف* صدقني والله العظيم يا عم .. لما تشوف مراتك هاتعرفها .. هاتحسها من جواك .. اخلص أنت بس نيتك لله وقول من قلبك : يا رب .. ارمي كل خوفك وعقدك وكلاكيعك ورا ضهرك ، وما تصعبش الأمور عليك !! .. أنت من حقك تفرح .. ترتاح .. تلاقي "سكن" .. حد يسكنك وتسكنه ويملا الفراغ الوحش اللي فيك اللي كل يوم بياكل منك حتة وبيخفيك جواه / حد تفضفض معاه ويونسك / حد ينكش على الحلو اللي فيك اللي قرب يختفي ؛ ويطلعه ويقاسمك فيه وتدوقوه سوا وتعرف قد إيه أنت جميل قوي من جواك وأن أجمل حاجة في الدنيا أنك تكون مصدر للفرحة / حد يكون منك ؛ تتعب له وتخدمه وتسهر على راحته بدل ما أنت بتخدم القريب والغريب / حد يدلعك ويلاعبك ويطلع الطفل البريء اللي جواك وتكون معاه على طبيعتك / حد تحكي له كــــــل اللي شفته وكـــــل اللي عشته وتشاركه كــــــل حاجة بتفكر فيها وتوري له كـــــل حاجة بتكتبها وتشوف ردود الفعل حية بتنبض وبترقص في عينيه مش تقراها في تعليقات / حد يودك ويرحمك من الدنيا بنت الكلب اللي بتنهش فيك كل دقيقة / حد تسعى بكــــل جوارحك أنك توسع له مكان فيك يقعد فيه براحته ؛ يتنفس فيه وتشم ريحتك في نـَفـَسه / حد يبص لك ويشوفك ويتملى فيك ويوصفك ويخلليك تشوف نفسك من غير ما تقف قدام مراية / حد تستودعه كــــل أسرارك وهمومك علشان يقفل عليها ويقول لك وهو بيحضنك قوي وبيطمنك : انساها خلاص وارتاح / حد تتمري لما تشوفه بياكل وترتوي لما تشوفه بيشرب وترتاح لما تشوفه نايم في حضنك / حد تقعد تتفنن في أنك تحفظ كل تفاصيله ؛ ومع كل يوم تكتشف أن فيه لسه تفاصيل كتيرة قوي أنت ما عرفتهاش وتكتشف أنك بدأت تتعرف على نفسك من أول وجديد وتتفاجيء بتفاصيل جديدة مذهلة فيك ما كنتش واخد بالك منها خالص / حد لما يزعل تضايق قوي من نفسك وتزعل منك لأن فيه حتة منك زعلانة وتبقى عاوز تعمل المستحيل علشان تفرحه / حد تقعد تتأمل وتتفكر فيه وهو قدامك وتفكر فيه وهو جنبك وتفتكرة لما يغيب عنك وتقلق عليه / حد أنت مش هاتعرف تحبه لأن كل يوم بيعدي عليكوا سوا بتكتشف أن كــــــــــــــل الحب اللي حبتهوله قبل كده ده ولا حاجة / حد تتخانق معاك عليه وتتخانق عليه فيه / حد لما تحب تحكي له عن حياتك قبله تلاقي نفسك مش فاكر أي حاجة خالص قبل ما تعرفه وكأنك اتولدت من جديد / حد تتفق معاه على رأي أنت مختلف معاك فيه / حد ينبهك للعيب اللي فيك من غير ما تحس ومن غير ما يجرحك أو يأذيك وكأنه عيب فيه / حد يصالحك على نفسك وعلى الدنيا ويفرح معاك بيك .
الفــاصـــل
ردحذف* التعليقات اللي فاتت ؛ كنت باحاول فيها بقدر الامكان افتكر واتقمّص نماذج للتفكير في موضوع الجواز وبعض أسباب الخوف منه - - قد أكون أسهبت وأنحرفت قليلاً فعذراً لذلك لأني كل ما بافتكر حاجة باكتبها ويمكن ده السبب اللي بأجل علشانه الرد على التعليقات فمش عاوزكوا تزعلوا وما تعلقوش - - المهم ،، فيه حاجة دلوقت عاوز أقولها : من الأسئلة المهمة (في إعتقادي الشخصي) اللي لازم تسألها لنفسك قبل ما تيجي تاخد خطوة في موضوع الجواز : أنت إيه ؟؟
- خد وقتك في الإجابة على السؤال ده ، لأنه مش بسيط زي ما أنت شايفه ومش صعب برضه لو أنت واضح وصريح مع نفسك وعارف قيمة نفسك كويس !!
- أنت إيه ؟؟ وعاوز إيه ؟؟ وعاوزه إمتى ؟؟ وعاوزه ليه ؟؟ وعاوزة (لا موأخذة) فين ؟؟ ومعاك كام ؟؟
* كان لينا واحد صاحبنا شغال فرد أمن في نادي رياضي كبير ومشهور .. كان معاه بكالوريوس تجارة وماجستير في إدارة الأعمال .. ابن ناس ومحترم ومكافح .. شاف بنت في النادي اللي شغال فيه ؛ سأل عليها وعرف بياناتها .. وراح كلم والدته عليها (لأن والده متوفي) واتفقوا أنهم يروحوا يتقدموا لها في البيت بعد ما خد ميعاد من والدها .. أجر عربية حديثة (لزوم الفشخرة ولأن البيت في منطقة بعيدة) وخد معاه زيارة محترمة كلفته شهر من مرتبه وراحوا الفيللا اللي ساكنه فيها البنت هو ووالدته وواحد صاحبه .. والد البنت كان فاكر أن الشاب ده طلب زيارته في البيت علشان عاوز واسطة في شغلانة مثلاً أو عاوز يشتغل في شركة من شركاته .. الموقف كله في الفيللا يتلخص في مشهدين اتنين : 1- البنت لما كانت واقفة في الشباك ساعة ما صاحبنا كان بيركن العربية (اللي مأجرها) قدام الفيللا -2- باباها لما قابل صاحبنا وعرف منه أنه جاي يتقدم لبنته ما ردش عليه ؛ قام نده لبنته علشان تيجي تقابل صاحبنا وتتعرف عليه ؛ الكلمة الوحيدة اللي البنت قالتها لصاحبنا : ما اتكسفتش وأنت بتركن حتة الخردة بتاعتك دي قدام الفيللا جنب عربياتنا ؟؟
تـــابــع الفــاصـــل
ردحذف* مرة - قبل ما اتجوز - كنت قاعد باشرب فنجان قهوة في محل بن .. قعدت أدردش مع صاحب المحل عن البن وأصنافه والبلاد اللي بييجي منها .. الكلام خدنا فطلب لنا كرسيين وطلعنا قعدنا قدام المحل في الهوا وطلب لي فنجان قهوة تاني على حسابه .. وأنا باتكلم معاه عدت من قدامنا بنت باسم الله ما شاء الله ولا قوة إلا بالله تبارك الله أحسن الخالقين ؛ ماشية عينيها في الأرض وعدت زي الطيف دخلت البيت اللي جنب المحل !! .. فقلت : باسم الله ما شاء الله الله أكبر ؛ هو فيه كده يا عم ؟؟ .. صاحب المحل كان متابعني بعينه فبص لي وابتسم وقال : حاسب !! دي ما تقدرش على مهرها !! .. فأنا بصراحة اتزربنت بس حاولت آخد كلامه بهزار فقلت له : ليه يعني يا عم ؟؟ .. قال لي : أنا مش باقلل منك لا سمح الله ؛ بس أنا باجيب لك الناهية (من الآخر يعني) دي معيدة في كلية (هي من كليات القمة بصراحة مش فاكر) وليها اتنين اخوات واحد دكتور في انجلترا والتاني معيد في كلية هندسة والدها مستشار ووالدتها دكتورة في الجامعة .. قلت له : هي شكلها فعلاً بنت ناس ، بس إيه المشكلة ؟؟ .. قال لي : أنا على يدي كل يوم والتاني يتقدم لها وكلاء نيابة ودكاترة وناس شغالة في السلك الدبلوماسي ورجال أعمال ويترفضوا كلهم !! .. قلت له : ليه يا عم هما طلباتهم إيه ؟؟ .. قال لي : هي وأبوها طالبين مهر غالي مش أي حد يقدر عليه ؛ عاوزين اللي يتقدم يكون زيهم حافظ القرآن الكريم !!
تـــابــع الفــاصـــل
ردحذف* من فترة كبيرة كانت زميلة بتحكي على عريس متقدم لها ، هو على حسب كلامها: مهندس / شكله مقبول ، ملامحه رجولية ، طويل ، قوامه رياضي / سنه مناسب ليها / من عيلة محترمة وباباها يعرف باباه من زمن / دماغه كبيرة ولبق في حديثه وشخصية متفهمة مش عنصري في أراءه / غير مدخن / بيصلي بس مش متزمت / بيحب الأفلام الأجنبي زيها لدرجة الهوس ومهتم بالأدب / فيه ارتياح ما بينهم / متفقين على تفاصيل كتيرة من ضمنها عدم الخلفة أول سنتين تلاتة .. طلبت تقعد معاه مرتين تلاتة وفي الآخر رفضته !!
- أنا : ورفضتيه ليه ؟؟
- هي : يا عم ده ما بيعرفش يلبس !!
- أنا : إزاي ؟؟
- هي : مش عارفة !! بس تحس كده أنه مبهدل في نفسه ومش بيهتم بمظهره !! يا عم ده بيلبس بناطيل قماش !! -- ملحوظة : أنا بالبس بنطلونات قماش :D -- وفيه مرتين قابلني فيهم بنفس الطقم !!
- أنا : يعني هي كل مشكلته بالنسبة لك أنه بيلبس بناطيل قماش ؟؟
- هي : يا ابني ده أنا اتكسف أوريه لصحابي بالمنظر ده !!
- أنا : هو أنتي عاوزة تتجوزي علشان تتعايقي بجوزك ؟؟ جايز يكون إنسان عملي وما بيحبش يهتم بمظهره ؛ لو هو فعلاً إنسان كويس زي ما بتقولي خاصة أنك ما بيعجبكيش العجب خلاص ابقى نجريه وعلميه يلبس وإدي له بنطلونين من عندك D:
- هي : لا يا ابني دي حاجات صعب تتغير ثم أنا ضد مبدأ ده أني أغير حد !!
- أنا : طيب .
عايزة اقول كلمة واحدة بس للرجال :
ردحذفرفقا بالقوارير
كسر قلب البنت مش هين ؛ و الله يمكن الموت أهون ! البنت لما بتتكسر بتفقد جزء كبير من روحها عمره ما بيرجع !
و للبنات :
مفيش حد (مُخلص) هييجي ينقذك من اللى انتى فيه : اجمدوا و حبو نفسكم و خليكم اقويا و فكروا كويس و بعقلانية
و اعرفوا ان الجواز (رحمة و سكن).
Heba Y. ElNil
ردحذف:))
"التواجد مع كائن اخر أمل مستحيل وجحيمي"
ليه بس النظرة التشاؤمية دي ؟؟
الوحدة مش سهلة ؛ هي حلوة أحياناً بس مش على طول :)
ربنا يسعدك ويفرح قلبك
:)
نورتينا
أفكــار مبعثرة
ردحذف:))
* بصي هاشبه لك الموضوع بمثل عبيط : افتكري نفسك لما كنتي بنوتة صغيرة ورايحة مع باباكي مشوار ؛ كنتي ما بتبقيش عارفة أنتي رايحة فين ولا مهتمة تركبوا إيه ولا في بالك باباكي هايدفع أجرة كام ؛ كنتي بتتفرجي على الدنيا وعلى العربيات وعلى الناس وعلى الفتارين وعلى الأطفال اللي في سنك ولما كنتي تتعبي من المشي كان بيرفعك ويشيلك وممكن تنامي على كتفه وتصحي تلاقي نفسك في سريرك متغطية وتفتكري نفسك كنتي بتحلمي .. لما كبرتي شوية وبقيتي مسئولة عن نفسك بقيتي حذرة أكتر وبدأتي تعرفي أسماء الشوارع والمواصلات وتعرفي الأجرة كام وتبقي بتحاولي تكوني منتبهة بقدر الأمكان علشان ما تناميش في المواصلات .. بإذن الله تعالى لما تتجوزي وربنا يرزقك بالذرية الصالحة وتخرجي مع ابنك هاتبقى عينيكي في وسط راسك أحسن يفلت من إيدك ويجري في الشارع أو تغفلي ثانية وتبصي جنبك ما تلاقيهوش لا قدر الله ؛ فغصب عنك هاتبقي ماشية دماغك في مليون حاجة وكل همك أنك توصلي البيت بسرعة علشان تحطي الولد اللي نام على كتفك في سريره :)
- الحياة كده .. مراحل بتسلم بعض .. أنتي النهاردة لسه بنوتة ما تشغليش بالك ببكرة وسيبيها على الله ما حدش عارف الغيب فيه إيه .. استمتعي بحياتك وبسنك واشبعي من الدنيا على قد ما تقدري .. مش باقول أنك هاتدفني بعد الجواز ومش هاتستمتعي ، لا والله ؛ بس غصب عنك (زي ما قلت في المثل اللي فوق) هاتتغيري ، هل ساعتها هاتقولي لأ أنا لسه بنوتة وعاوزة بابا يشيلني ؟؟ فاهمة قصدي ؟؟ .. اللي أرجوه من حضراتكن وباتمناه ليكوا من ربنا أنكن يا ريت ما تبصوش على غيركوا وبالذات النماذج والتجارب الفاشلة اللي تجيب إحباط !! .. بالله عليكن تفائلوا في الله خير واحسنوا الظن بالله .. ومش عاوز أقول كلام صعب يؤخذ عليا في حق حد .. على الأقل خالص لو ما فيش مفر أنك تسمعي ، وازني العملية .. زي ما بتسمعي لكلام واحدة متعقدة وكارهة الرجالة وبتلعنهم بسبب تجربة قاسية مرت بيها ونازلة شحن في البنات ؛ اسمعي برضه لكلام واحدة مستقرة في بيتها وحياتها .. مع أن للأسف الشديد اللي سعيدة في بيتها وحياتها هتخاف تقول أنها سعيدة أحسن تتحسد من كتر الإحباط اللي بتشوفه حواليها .
- بالنسبة لنظرتك للجواز سوداووية ومعقدة ومكلكعة ومنيلة بستين نيلة بس أنتي معذورة فيها من اللي بتسمعيه وبتقريه وبتشوفيه :)
- أما بالنسبة لجزئية الأطفال فممكن تحطي فيها نظرتك للجواز:D بجد تربية الأطفال - بالنسبة لي أنا ورأيي الشخصي - فيلم رعب !! .. بس عارفة برضه ؟؟ هما أحلى حاجة في الدنيا دي كلها !! ومهما عملوا فينا ومهما شفنا منهم بيبقى على قلبنا زي العسل :)
........ يتبع
.....تابع
ردحذف- جزئية الماديات : أنتي فكرتيني بحاجة مهمة جداً نسيت أقولها ويمكن أهم حاجة في الموضوع ده .. الماديات مش هي الأساس !! .. بمعنى -- وآسف على التشبيه -- ما تحطوش العربية قدام الحمار !! .. يعني ، مش الشقة التمليك والعربية والكام أوضة والشبكة الألماظ والقايمة والمؤخر والفرح الكبير هما الأساس !! .. الحاجات دي مش هي الجواز !! .. الحاجات دي مش هي الجواز !! .. الحاجات دي المفروض المفروض المفروض بعد ما الطرفين يكونوا اتأكدوا كويس جداً من نفسهم أنهم اتفقوا وتوافقوا ووافقوا على بعض ويدعوا ربنا بنية صافية أنهم يِخلصوا لبعض علشان ربنا يوفقهم في حياتهم .. إنما مش من المنطقي أبداً أبداً أن واحد يروح يتقدم لواحدة ويا دوب يكون شافها مرة ولا مرتين ما اتكلمش معاها فيهم عشر دقايق على بعض ؛ باباها يقول له : هات والدك علشان نتفق على التفاصيل !!!!!! .. هنــــا بجد الموضوع بيبقى مبتذل جداً وبينقلب بيعة وشروة كل طرف فيها بيحاول يستنصح ويطلع هو اللي كسبان !! .. وده سبب رئيسي -- في رأيي الشخصي -- في فشل علاقات كتيرة كانت ممكن تتم أو علاقات تمت على أساس أنها صفقات ناجحة للأهل بغض النظر عن الطرفين اللي هايتجوزوا ، اللي هما أصلاً أصحاب الشأن !!
ما باقولش لا سمح الله أستغفر الله العظيم أننا نعمل زي الغرب وأن الواحد اللي بيتقدم لواحدة يمشي معاها كام سنة ويعيشوا سوا ويعاشرها ويخلف منها وبعد كده يقرروا إذا كانوا هايتجوزوا ولا لأ !! بس على الأقل وزي ما بيقولوا في القانون المعاينة التامة النافية للجهالة (في وجود محرم طبعاً) وبعد ما الطرفين يتأكدوا كويس جداً أن فيه إيجاب وقبول ما بينهما يبدأوا الأهل يتفقوا !! .. الإتفاقات والماديات مش هي الأساس !! .. دي حاجة لازمة أه ومتتمة للجواز بس في مرحلة تانية !! .. ما هو طبيعي أن لازم يكون فيه شقة وعفش وووو بس الأول مين اللي هايسكنوا فيها ؟؟ ولا هما بيأسسوا فندق ومش مهم مين ينزل فيه ؟؟
- بالنسبة لجزئية "معظم الرجالة أنانيين" أه بصراحة ، بس غلابة والله :)
- بالنسبة لجزئية الخطوبة .. كل مرحلة وليها حلاوتها صدقيني .. البنت من دول أول ما تتخطب تقعد تعد الأيام والليالي علشان تجهز حاجتها وتروح تفرش شقتها وتتجوز وتروح بيتها وتبقى لها حياتها وووو .. بعد ما تتجوز تقول ولا يوم من أيام الخطوبة !! إلا ما جب لي حزمة بصل أخضر بفيونكة من ساعة الجواز :D
ربنا ييسر لك وبنات المسلمين الحال ويستركم ويفرح قلوبكم ويسعدكم ويرزقكم بالزوج الصالح والذرية الصالحة اللهم آمين
هدير
ردحذف:))
- بالنسبة لكلمة "القوارير"فكرتيني بكلمة كنت سمعتها من كام يوم من واحدة ست كبيرة في الميكروباص لبنتها اللي كانت شايلة كرتونة (تقريباً من جهازها وكانت فيها حاجات إزاز) أو بمعنى أصح حضناها جامد قوي ومتبتة عليها قالت لها : ما تاخديش بالك قوي من الحاجة أحسن تتكسر وتضيع :))
أهه احنا غالبية مجتمعنا كده بالظبط !! يفضل متبت ع القوارير لحد ما تتكسر !!
- بالنسبة لكلمتك للبنات .. سمعتي يا بنت أنتي وهي الأستاذة قالت إيه ؟؟؟ ولا نمد إيدينا ع الصبح ؟؟؟ ولا نغزكوا بمطواة ونخلص ؟؟؟
:D
خلاص هما سمعوا يا أستاذة :)
وإذا سمحتي لي حضرتك بتعقيب بسيط تحريفاً للمثل الشعبي الشهير : حياة واتحسبت عليك عيشها وبجح عينيك :)
ربنا ييسر لك وبنات المسلمين الحال ويستركم ويفرح قلوبكم ويسعدكم ويرزقكم بالزوج الصالح والذرية الصالحة اللهم آمين
فاكر النكتة بتاعة الراجل المسطول اللي بنته اتأخرت بره وأول ما رجعت سألها كنتي فين لحد دلوقت ؟؟ قالت له : جماعة طلعوا عليا خطفوني وسرقوني واغتصبوني !! قال لها : الإغتصاب كله ربع ساعة رحتي فين بعد كده ؟؟
ردحذفبايخة أنا عارف .. بس أنا مش باقولها لك علشان تضحك لا موأخذة !!
* صاحبنا كانت دخلته إمبارح .. صحي الصباحية ع العصر .. ع المغرب قابل أهل مراته اللي جم يباركوا ويتطمنوا وياخدوا الفستان علشان يرجعوه الأتيلية .. ع العشا كان مسرب أهله .. ناموا ع الفجر .. صحي تاني يوم الضهر ، بص جنبه ع السرير لقى الملاك نايم جنبه قام عمل الفطار وخد الخلاط في الأوضة التانية علشان صوته ما يصحيهاش وعمل لها العصير اللي بتحبه (يا سيدي ما تدقش اللي قالت له أنها متعودة تشربه أول ما تصحى) وقعد جنبها ع السرير وهو مستني يشوف نظرة عينيها أول ما تشوف صينية الفطار (هي كانت صاحية على فكرة وبتستعبط) وفضل يتأمل فيها لحد ما صحيت فرحانة وفطروا سوا .. ع المغرب اتغدوا وهما بيتفرجوا على فيلم كارتون .. ع العشا نزل يجيب سجاير وعيش ودخل ينام بدري وهي فضلت قاعدة قدام التلفزيون .. تالت يوم صحي الساعة 10 الصبح بص على مراته لقاها نايمة فكر يصحيها تعمل الفطار وبعدين قال لأ ، قام عمل قهوة ودخل البلكونة يشرب سجاير .. ع الضهر قلقت لما لقته مش نايم جنبها وصحيت من النوم ، قامت حضرت الفطار وقررت أنها تغسل النهاردة ، دخلوا الحمام وهما ماسكين كتالوج الغسالة في إيديهم علشان يعرفوا بتشتغل إزاي وبعدين هي دخلت المطبخ تغسل كوم المواعين وتحضر الغدا وهو قعد قدام الكمبيوتر ، بس ما كلمش حد ع الشات (لأنه المفروض عريس جديد ومش فاضي) .. ع العصر دخل ينام شوية لحد ما تخلص الغدا .. ع المغرب صحي من النوم وقرر يفتح الموبايل وبعدين قال لأ ، اتغدوا وقرروا ينزلوا يتمشوا .. ع الساعة 10 كانوا رجعوا بعد ما اشتروا شوية عصاير ولب وسوداني وشنطة شيكولاتات ، ما اتعشوش لأنهم اتعشوا بره كفتة وطرب ، قعد يحسب هما صرفوا كام اكتشف أنهم صرفوا في الخروجة دي 450 جنيه .. ع الفجر قام يشرب (هو كده الطرب غبي) وبعدين فتح الكمبيوتر ما لقاش حد صاحي يتكلم معاه فقفله ، طفى النور وقعد على كرسي الأنترية ، نفخ جامد وقال : أ*ا هو ده الجواز ؟؟؟ ده الموضوع كله ربع ساعة !! هانعمل إيه بعد كده ؟؟؟
شابو كبير جدا لحضرتك ع الموضوع الهايل دا معظم المشاهد هنا واقعية وبنعيشها كل يوم بس انت كتبتها ببراعة وباسلوب فوق الوصف والتسلسل كمان ف الموضوع حلو اووي وردودك ع التعليقات ودودة وامينة :)
ردحذفبصراحة اخر مشهد دا مش عارفة احييك عليه ازاي ، باشا باشا والله :)
ليه بس رجاء يا ريت تنشر الموضوع كله ف المدونة ع حلقات عشان نقدر نعمله شير ممكن؟
دمت بخير
غير معرف الأولاني
ردحذف:))
ربنا يكرم أصلك ويسعدك ويفرح قلبك زي ما فرحتيني بتعليقك الجميل ومرورك الرائع :))
بالنسبة لحكاية تشيير البوست ؛ فالمصيبة اللي بجد أن الناس تسمع الكلام ده نياهاهاهاهاهاها
اللي أقصده إننا هنا بندردش سوا ، بنفضفض ، بنفكر بصوت عالي ، مابنقولش إن هو ده كتالوج الجواز اللي لازم يحصل واللي لازم الناس تمشي عليه بالمللي علشان تحظى بحياة زوجية مثالية سعيدة أو أن اللي ما بيعملش كده هايعيش في نكد وشقاء !! .. يا جماعة يا جماعة يا جماعة أرجوكم مش عاوز حد ياخد الكلام اللي هنا إسطمبة ، أنا بس باعرض طريقة تفكير طبقاً لرأيي الشخصي معايا ؟؟ رأيي الشخصي ، الذي من المحتمل جداً أن يكون خطأ ومجحف وغير واقعي في أحيان كثيرة كما أنه غير ملزم لأي أحد .. اللي باتمناه بجد أن الناس تفكر .. تقعد مع نفسها بجد وتبدأ تفكر في الموضوع بطريقة مختلفة وتشوف هي إيه وعاوزة إيه وإيه اللي يناسبها وإمكانياتها إيه علشان تنفذ ده وبعد كده تخوض تجربتها الخاصة بنفسها ، ما تسمعش لحد ، أي حد وأولهم أنا وما تسمعش للي بيمدح ولا اللي بيقدح في الجواز !!
الجواز مش تجربة علشان الناس تقول طب ما نجربها ولا رحلة هايطلعوها كام يوم ولو زهقوا يرجعوا منها !! .. فتح البيوت مش بالساهل ولا خرابها بالساهل !!
للمرة الأخيرة بارجوكم ما حدش يسمع كلامي زي ما هو !! يا ريت يا جماعة تفكروا في كل كلمة قبل ما تدخلوها دماغكم !! .. أنتوا كده قلقتوني من أني أكمل البوست !! .. أه والله !! .. يعني أنا دلوقت دماغي شغالة في مليون اتجاه وعمال أراجع كل الكلام اللي قلته ؛ خوفاً من أن البوست ده يكون تسبب في مشكلة لحد أو ضايق حد من غير ما أعرف وأنا قسماً بالله العظيم ما قصدت غير كل خير وأني بس أدردش معاكم ونفكر سوا بصوت عالي !!
............ معلش أنا آسف ع الحدة اللي في التعليق ، بس أنا تنشنت مرة واحدة واتخنقت !! .. أنا آسف مرة تانية
:))
شرفتينا
الجواز..بصراحة معرفوش و مجربتوش، و مشفتش في الجوازات اللي حواليا كلها أي حاجة تسر بحيث أتحمس له.
ردحذفمشكلتي إيه مع الجواز و المتجوزين؟
الهدف الأسمى من الحياة في مصر أنك تشتغل في وظيفة روتينية ثابتة، و تتجوز و تجيب لك "حتة عيل" !
طيب ما حضرتك كلب الحراسة بيشتغل كلب حراسة و بيتجوز، يبقى كدة فرقنا إيه عنه؟
المشكلة معايا أني مبعرفش اتركب في الصورة الإجتماعية المطلوب، مبشتغلش وظيفة منتظمة بصحها لها كل يوم بدري و لا متجوزة و لا مخلفة و فعلياً اعتبر عانس.بالتالي الحياة بالنسبة لي عبارة عن النظرة الرخمة في عيون الآخرين أني نغمة نشاز.
فكرة الجواز بالنسبة هي الونس، مش المواعين و أني يبقى معايا راجل أخدمه..نظراً لنقطة السن بقى، بلاقي طبيعة المتقدمين عالم عايزين عروسة عندها الشقة و كمان هتقسم معاهم نص العفش! و في المقابل هييجوا على نفسهم و يرضوا أنها تكون أصغر بسنة أو سنتين.. في عريس أصغر بشهر جالي بنفس الاشتراطات الجميلة، و بيعلمني أن مع الوقت هيفكر يتجوز عليا(على أساس أني وافقت يعني) بما أني أكبر منه و أكيد الضمان هيشطب بدري.
:) .بصراحة بحس أن الحياة حلوة قوي من غير الصداع الجميل ده، و حتى موضوع العيال ، إخواتي مبطلوش خلفة من ساعة ما عرفتهم :) .
و كل من عرفني عارف أني فعلياً مبحبش العيال بالمرة، الله اعلم لو خلفت هحب ابني و لا لأ، بس المشكلة كل ما افكر في الموضوع ألاقي انها مسألة مش مضمونة بس ساعتها هبقى اتدبست و مش هعرف اتبرع بيه في حتة.
* عن نفسي .. كان عندي مبدأ مش هاتجوز يعني مش هاتجوز وماحدش هيمشيني على مزاجه دي حياتي وأنا حرة فيها عشان كده كنت باخد كلام الناس من هنا وأطلعه من الناحية التانية !! لأن ما حدش هينفعني ولا هيعوضني لو الجوازة فشلت واتطلقت ، بالعكس كلهم ساعتها هايقولوا أن أنا السبب .. وده مايمنعش الزن اللي كان في البيت عندي ؛ وكانوا كل يوم والتاني يجيبولي عريس شكل ، وبصراحة كانوا ناس محترمين ويصلحوا لفتح بيت .. لكن على مين ؟؟ كانوا كل ما يجيبوا لي عريس أطلع فيه القطط الفطسانة وأطفشه ؛ وبحجج عجيبة !! مرة أصله تخين ومرة رفيع ومرة بيدخن وسنانه بايظة وشكلها وحش ... إلخ .. الحجج الحمضانة اللي البنات بتتفنن فيها D:
ردحذف... وفعلاً كنت سربت نص جهازي والحاجة اللي جبتها أديتها لأختي الصغيرة لأنها كانت على وش جواز ، وبدأت أخطط لمشروع كنت هعمله .. لحد ما اتقدملي شريف وكنت ناوية أطفشه زي كل اللي قبله .. أول ماشفته خرجت من الصالون اللي هو كان قاعد فيه وقلتلهم ده تنك وشايف نفسه أنتوا مش شايفين ده بيتكلم إزاي؟ أنا ما أتجوزش واحد يتتنك عليا !! .. قالولي طب استهدي بالله كده وتعالي اتكلموا سوا ولو مانفعش تبقي ماخسرتيش حاجة ، دخلت تاني بس سبحان الله وبقدرة قادر بقيت شايفة واحد تاني غير اللي شفته الأول ؛ لدرجة أني تغاضيت ونسيت (مش تناسيت) موضوع التدخين خاالص !! حتى طول فترة الخطوبة – علما بأني بكره السجاير والمدخنين وريحتهم إلى أبعد ماتتصوروا – وحصل الإيجاب والقبول وهب اتخطبنا ... إيييييييييييييه نصيب :)
* بعد الجواز .. كنت داخلة ع المسئولية بقلب جامد وفاكرة أني ممكن أخلص طبيخ وغسيل وتشطيب مواعين وتنضيف بيت كل ده ف يوم واحد ؛ ده غير شغلي !! زي ما أكون حطه الدنيا فوق دماغي وزاعقة ، طبعا الموضوع مش بيمشي كده خالص ؛ خصوصا بعد ما شرفوا الأخوان رايت اللي عندي (ياسين و آدم) .. فالمقاييس اختلفت تماما ، وما بتبقيش ملاحقة على بيت ولا شغل ولا عيال ولا دراسات عليا المفروض تتعمل علشان الشغل وطبعا مش عارفة أعملها بعد الجواز والعيال !!
اللي عايزة أوضحه من الرغي ده كله أن المسئولية فعلا مش سهلة أبدا - وما أقصدش برضه أنها وحشة بالعكس ده أنتي بتحسي أنك عايشة عشان حاجة وعشان ناس عايشة ليهم وبيهم – ف اللي زعلانة انها لسه ما اتجوزتش ، واللي شايفة أنها كده حرة من غير جواز .. صدقوني عيشوا الفترة اللي أنتوا فيها دلوقت زي ما هي و ارموا ورا ضهركوا وماتهتموش باللي يحاولوا يستفزوكوا من ناحية التأخر ف الجواز ، لأن ف الأول و ف الآخر ده بيبقى نصيب ومكتوب لكم من يوم ما اتولدتوا ، واللي من نصيبك هيصيبك ولو بعد حين ، وربنا ، لو ساعتها طلعتي كل الكلاكيع والقطط الفاطسة ف اللي قدامك هتاخديه يعني هتاخديه ، ما هو ده قدرك اللي ربنا بيبقى كتبهولك ولا مفر منه أبدااااااااااااا :)
ربنا يرزق كل واحدة بالزوج الصالح اللي يقدرها ويصونها وبالذرية الصالحة
الصلاة علي النبي
ردحذفبسم الله افتتح الجلسة ياريس
:)
ده انت هتشوف ايام :)
واول تعليق عندك من غير معرفه طبعا
اكبر دليل
انا مرابطة في المدونة دي اشوف ايه اللي بيحصل ده
:)
قطع الجواز وسنينه :)
سنكوح شنن لملوم سامي
ردحذف:))
الله ؟؟
إيه ده يا أستاذة ؟؟
احنا مش كنا عدينا مرحلة الكلب ودخلنا ع الحمار ؟؟
أنتي ليه رجعتينا تاني لورا ؟؟
:))
قد اختلف مع حضرتك في الرأي ولكني احترم صراحتك في التعبير عن رأيك ، ومش عاوز أقول كلام متعاد قلته في التعليقات اللي فوق ، بس الخلاصة أن لسه النصيب ماجاش .. ربنا يا رب يسعدك ويفرح قلبك ويرزق الزوج الصالح اللي يغير نظرتك في الرجالة وفي الجواز :))
- فيه حاجة صح بمناسبة الحيوانات .. كنت زمان باتابع مقالات للكاتب الكبير / محمد مستجاب في مجلة العربي الكويتية في بدايات التسعينات تقريباً .. كان له صفحة شهرية بيتكلم فيها عن الحيوانات وبيعمل عليها إسقاط ساخر على حياتنا وتقريباً جمعها في كتاب .. ليه ما تفكريش تعملي سلسلة مقالات زي كده ؟؟ وأنتي أسلوبك الساخر هايل الحقيقة ؟؟ حاجة تكون فيها تحليل للمواقف الإجتماعية ونظرتك الساخرة ليها :))
وابدأي بالكلب :))
خالص تحياتي واحترامي
βent Pasha
ردحذف:))
يااااااااااااه يا بنتي !!
ده الكلام ده بقاله أربع سنين يا أمي !!
تنك وشايف نفسه :)))))))
ههههههههههههههههههههههههههههههه
موتتني من الضحك الجملة دي !! يجازيكي بكل خير :)) فكرتيني بأيام ما كان الواحد بيشوف نفسه !! دلوقتي الواحد لا بيشوف ولا بيسمع ، أقصد السن طبعاً D:
ههههههههههههههههههههههههههه
- فيه حاجة بجد عاوز أقولها وما تفتكريش يعني علشان أنتي علقتي هاخاف !! لأ هاقولها !! الأعمار بيد الله D:
والله العظيم تلاتة الستات في مصر ما فيه أعظم منهم حقيقي والله :))
وبجد بجد اللي هما بيعملوه ما فيه راجل يقدر يعمله (أقصد زيهم إنما ممكن نعمل أحسن منه لا مو أخذة P:)
ربنا يبارك لي فيكي ولا يحرمني منك أبداً ويبارك في أمهاتنا جميعاً ويرزق كل شاب بالزوجة الصالحة آمين
شمس النهار
ردحذف:))
يادي النور يادي النور يا ألف أهلاً وسهلاً بأستاذتنا شمس التدوين ، منورة الدنيا كلها والله :))
يا فندم احنا لينا الشرف والله أن حضرتك تنورينا وتتابعينا :))
وبجد نتمنى أن حضرتك تعلمينا من خبرتك وترشدينا وتنصحينا بنصايحك الجميلة :))
لك خالص تحياتنا على تشريفك الرائع
* بصراحة أنا مش عاوز أقفل الموضوع وباب المناقشة ، بس أنا تعبت :)
ردحذف- بالنسبة للأخ اللي كان قاعد في صفحة التعليقات وسألني على التعليقات اللي حذفتها بما فيهم تعليقه ، فأنا آسف وباعتذر لك .. بس لقيت إني اتسرعت وقلت كلام كتير شخصي مش هايفيد حد إنما هايضايقني أنا لو قريته بعد كده :))
وبعدين ما الموضوع كان مفتوح ما شاركتش ليه ؟؟
ـــــــــــــــــــــ
باعتذر جداً جداً لكل حد ممكن أكون ضايقته بكلامي أو في ردي عليه من غير ما أقصد - بس أصل ساعات الحماسة بتاخد الواحد - وللمرة التانية باقول يا ريت يا جماعة ما حدش ياخد بأي حاجة من كلامي اللي هنا !! ده مجرد رأي شخصي قد يكون خطأ ومجحف وغير واقعي تماماً وقد يكون العكس ، اللي باطلبه من حضراتكم أنكم تفكروا فيه وفي أي كلام تاني تسمعوه أو أي وجهات نظر تانية .. ويا ريت كل واحد يخوض تجربته بنفسه وما يبصش لتجارب الآخرين .. وأولاً وأخيراً هو النصيب وتوفيق من المولى عز وجل .
نسأل الله الهداية وأن يغفر لنا إسرافنا في أمرنا وأن لا يؤاخذنا بما نسينا أو أخطأنا وأن يرزق شباب المسلمين بالزوجات الصالحات والذرية الصالحة هو ولي ذلك والقادر عليه ، ربنا يسعدكم ويكرمكم ويوفقكم ويبارك لكم في رزقكم وفي صحتكم وزوجاتكم وأولادكم اللهم آمين
لا تنسونا وكل من شارك في هذا الموضوع برأي أو نصيحة أو تعليق من صالح دعاءكم وجزاكم الله كل الخير
:)
* الموضوع مفتوح للي عاوز يشارك برأيه (بحساب جوجل) لكن عذراً قد لا أتمكن من الرد على التعليقات
والسلام عليكم ورحمة الله وبركاته