الفتافيت
- الحياة حلوة .. صدقني .. والله العظيم يا عم الحياة حلوة حتى لو أنت مش شايفها كده !! .. النهاردة مثلاً ؛ وأنا واقف بانزل برانيك العيش من جوه صندوق العربية النص نقل كنت فرحان أوي بجد .. ورغم إني اتعورت وإيدي اتجلطت علشان اتعافيت وحاولت أشيل ست برانيك مرة واحدة وفي الآخر وقعت بيهم على الأرض في منظر يفطس من الضحك إلا إني كنت فرحان وضحكت أول واحد على منظري حتى قبل ما الستات اللي كانوا واقفين في الطابور يضحكوا عليا .. لما ضحكت ؛ شجعتهم إنهم يطلعوا الضحكة اللي كانوا بيحاولوا يداروها وهما مكسوفين !! .. صحيح أنا ما كنتش مضطر إني أنزل برانيك من العربية ولا أصلاً كان في نيتي أجيب عيش من الفرن خالص لأني كنت نازل باجري علشان أروح الشغل لأني كنت متأخر كالعادة وطبعاً ما رحتش !! بس مش مهم !! .. لو تشوف منظر الناس وهي بتجري على الفرن اللي كانت قافلة من ساعة العيد علشان تلحق تشتري عيش ؛ قلبك ينشرح بجد .. عارف المشهد اللي فتحت فيه شادية الهويس في فيلم شيء من الخوف ؟؟ آهو أنا كنت حاسس إني زيها بالظبط !! .. كنت فرحان أوي وأنا باحمل البرانيك على دماغ الستات اللي كانوا واقفين في الطابور واللي طلعوا أجدع ميت مرة من الكام نطع اللي كانوا واقفين زي البهوات مستنيين لما العيش ينزل من العربية ويترص في الأرفف جوه الكشك والست البياعة المنتقبة تاخد منهم الفلوس وتبيع لهم !! .. نسيت أقول لك صح ؛ إن كان فيه كام واحد للأمانة بيحملوا معايا لازم أذكرهم : راجل كبير أسمر بجلابية بيضا وشاب لابس ترينج أزرق وولد سوري لابس فانلة حمرا وبنطلون ترينج أسود !! .. قمة الضحك ؛ لما الاتنين رجالة الكبار (اللي فوق الستين سنة) مسكوا في خناق بعض في الفرن وضربوا بعض علشان دور في الطابور !! .. الست اللي كانت لابسة عباية سودة راحت داخلة ما بينهم ومحجزة بإيديها علشان تحوش الراجل أبو جلابية عن الراجل التاني اللي كان لابس قميص وبنطلون !! .. وبقت تزعق فيه وتقول له : بتضربه ليه ياللي تتشك في إيدك !! ضربه في قلبك يا بعيد !! وهب تروح ناطه في الهوا وضارباه بالقلم وتجري تستخبى ورانا ههههههههههههههه .. يا خرابي يا جدع ع المسخرة !! .. تقولش الولية ما صدقت تضرب راجل !! .. لأ وبقت تطلع له لسانها وتفلفل له بإيديها علشان تغيظه !! .. ولا الراجل أبو قميص وبنطلون اللي إتاخد على خوانة يا عيني !! الراجل كان قرب يعيط وصعبت عليه نفسه وبقى يقول وهو مش قادر يقف وبيتهز :حرام عليكم ده أنا عيان !! بتضربوني ليه !! .. احنا طبعاً في الأول كنا متأثرين جداً بس بعد ما الراجل أبو جلابية مشي من الفرن ، والتاني فضل مشغل الإسطوانة ، عرفنا أنه بيتسهوك علشان الولية تفضل تطبطب عليه !! .. راخر الولية لما خدت بالها راحت رافعه له الشبشب وقالت له : تصدق إنك راجل وسخ ومُهزأ !! يعني أنا باحوش عنك تاخدها حلوانة في سلوانة وتلقح جتتك عليا ؟؟ غور جتك القرف !! وراحت زقاه جامد ، الراجل وقع ع الأرض !! وقعد يقول : حرام عليكم ده أنا عيان !! بتضربوني ليه !! .. الست المنتقبة اللي بتبيع العيش كانت فكراني هاخد بعشرة جنية مثلاً علشان نزلت البرانيك !! ولما قلت لها : أنا عاوز بجنية واحد بس ، ما صدقتش !! وقعدت تدعيلي كتير !! .. صدقني ، إحساس تاني خالص وأنت شايل شنطتين العيش وراجع بيهم !! .. بتحس كأن البت بتاعتك ضحكتلك !!
الحياة حلوة .. صدقني والله العظيم .. عارف لما طلعت البيت بالعيش ؟؟ .. المدام بصراحة عملت لي سندوتش جبنة بيضا معتبر .. والله يا عم طعمه أحلى من الكباب !! .. الأحلى بقى !! .. الإكتشاف المذهل اللي اكتشفناه أنا وهي !! .. عرفنا الحاجات اللي بتختفي بتروح فين !! .. واحنا بناكل ، الواد ياسين سهانا وخد لقمة صغيرة ودخل بيها الحمام !! .. أنا وأمه بقينا مش فاهمين الواد ده بيعمل إيه بالعيش في الحمام ؟؟ .. اتسحبنا على رجلينا ودخلنا وراه ، ما لقيناش اللقمة في إيده !! .. بس لاحظت أن الواد السوسة حاطط إيده على بستلة المية وبيبص لنا من تحت لتحت زي ما يكون خايف لنفضح سره !! .. فتحت البستلة يا عم وألاقي لك الواد مقطع اللقمة فتافيت صغيرة وراميها في المية للمشابك !! .. أه والله يا عم !! .. ياسين ابني مربي مشابك غسايل بلاستيك عقبال آملتك !! .. والواد من حنية قلبه ما بيهونش عليه ياكل لوحده ، فبيروح من ورانا يرمي لهم عيش في المية !! .. طبعاً هو فاكرهم صاحيين وبيمشوا !! .. لأنه كل ما بيضرب بإيده في المية بيتحركوا مع الموجات اللي بتعملها ضربة إيده !! .. فيك الخير والله يا ياسين !! شوف الثواب اللي أنت خدته قد إيه دلوقت !! يجعله في ميزان حسناتك يا ابني !! .. أبوك يعمل قرد ويتشعبط جوه صندوق عربية نص نقل وتقع عليه البرانيك ويتعور ويدخل وسط خناقة وهدومه تتبهدل علشان يجيب لك العيش ، وأنت تأكِل المشابك يا ابن الكلب !! .. هالاحق عليك ولا على أخوك ولا على المشابك أنا مش عارف !! .. لأ وإيه مش بيحط لهم أكل بس !! لأ ده كمان بيحط لهم لعب !! .. طب ما تعاملني وتعامل أمك زي ما بتعامل المشابك دي يا ابني ولا احنا مش قد المقام ؟؟
الحياة حلوة .. صدقني والله العظيم بس أنت حاول تشوفها كده :)
كنت محتاجة جداً أحاول اغير نظرتى للحياه فى اللحظة دى بالذات .. لما دخلت بلوجر و لقيت تدوينة جديدة من حضرتك فرحت و قلت يا رب تكون مفرحة :)
ردحذفو لكنها كانت أكتر من مفرحة .. كانت فى وقتها تمام ..
أصحك الله سنك و بارك لك فى أسرتك :)
الحقيقه انا اللي ضحكني بشده التشبيه الخاص بفتح شاديه للهويس
ردحذفبصراحه التشبيه ده كان جبار
وبعدين فينك يا عم انت بتروح فين؟
ردحذفعلا
ردحذف:))
ربنا يكرم حضرتك ويسعدك ويفرح قلبك دايماً يا رب زي ما فرحتينا وأسعدتينا بتعليقك الجميل أوي ده :))
نورتينا
moataz farouk
ردحذف:))
ههههههههههههه ربنا يفرح قلبك يا معتز ويسعدك زي ما بتسعدنا دايماً بزيارتك الكريمة
:))
والله يا عم حسيت فعلاً إني زيها في الفيلم وكل واحدة من الستات تيجي لي عند العربية وتقول لي : شيلني يا أستاذ !!
اتضح إيه بقى ؟؟
إنهم بياخدوا البرانيك دي جنب الكشك ويفرزوا العيش وكل واحدة تاخد لها بتاع خمسة ستة جنيه عيش ويحاسبوا الست اللي بتبيع ويمشوا !!
* بالمناسبة صح .. كنت بعت لسموك إيميل من كام يوم على الهوتميل مش عارف وصلك ولا لأ ؟؟
الإيميل اللي هو في وسطه أندر سكور ده !! معايا أنت ؟؟
احنا بخير ولله الحمد .. شكراً على سؤالك يا كبير :))
نورتنا يا غالي
كل ما ادخل عندك كتابتك و أسلوبك بيجبروني أسيب تعليق.
ردحذفتضفي على روحي شعور بالبهجة و تقريبا كل كتاباتك بتعبير عن عنوان البوست ده :)
انت ساخر بارع
أحيانا نحتاج إلى بعض من السخرية حتى نستطيع مواصلة الحياة
:))
ردحذفربنا يبارك فيه ويخليه
الاطفال بتبقا ليهم مواقف مضحكه
وعلي فكره بيتعايروا بيها لما يكبروا :))))
انا شخصيا واخده صور وفديوهات علي حفيدي الاول هبتزه بيها لما يكبر:))
احمد ربنا انها جت علي المشابك :))
بس نصيحة هاتله سمك يربيه واضح انه حنين وبتاع مسؤلية
Carol
ردحذف:))
ربنا يكرم حضرتك ويسعدك ويفرح قلبك دايماً يا رب .. شرف حقيقي لينا إننا نقدر نسعد حضراتكم والله
شكراً جزيلاً على تشجيعك الكريم ومرورك الراقي
:))
نورتينا
شمس النهار
ردحذف:))
يا ألف أهلاً وسهلاً يا أستاذتنا وألف حمداً لله على سلامتك
:))
ربنا يبارك في حضرتك يا رب ويبارك لك في أحفادك وأولادك ويفرح قلبك بيهم وتشوفيهم أحسن ما تتمني ويحفظهم لك من كل سوء اللهم آمين
حلوة فكرة الإبتزاز دي عجبتني بصراحة D:
الواحد بس خايف إن الصور اللي محفوظة على الكمبيوتر ومتسجلة على إسطوانات وفلاشات دي تتمسح وتضيع معاها الذكريات دي !!
متهيألي برضة ما فيش أحسن من الصور المطبوعة اللي كنا بنصورها بالأفلام زمان ونوديها الاستوديو علشان تتحمض ويدينا ألبوم هدية :))
بالنسبة للسمك .. هي فكرة كويسة .. بس أنا ما باحبش أشيل مسئولية تربية حاجة فيها روح !! علشان كده باستسهل وباجيب السمك مشوي أو مقلي D:
نورتينا