باب الجزيرة
- ساعات كتيرة أوي كده بأقعد أسرح وأتخيل في مكان جديد الواحد يروح يقعد فيه .. في الغالب تصوري للمكان ده -- وهو الأقرب للواقع -- بيكون عبارة عن حتة أرض في منطقة بعيدة الواحد يزرعها ويبني فيها بيت صغير كده يعيش فيه .. بس بارجع وأقول طالما تخيل بتخيل يبقى ليه ما تكونش جزيرة ؟؟ .. أه والله ليه لأ ؟؟ .. وبالفعل قعدت فترة طويلة أتفسح على الجوجل إيرث في الكرة الأرضية وأكتشف الجزر المحدوفة المتنتورة في كل حتة وأشوف صورها وأعرف موقعها وطبيعتها وطبيعة الجو فيها .. نشنت كده على كام جزيرة مش بطالين .. بس برضه الجزر دي مش هي اللي في خيالي .. بص يا سيدي .. أنا عاوز جزيرة تكون شرحة وبرحة كده وتكون مساحتها كبيرة .. صحيح أنا مش عارف هاعمل إيه بالمساحة الكبيرة دي دلوقت ؛ بس برضه أنا عاوز مساحتها تكون كبيرة علشان كل يوم أكتشف فيها مكان جديد .. ما تشغلنيش بأرقام لو سمحت .. سيبني أتخيل .. في نفس الوقت أنا عاوز مناخها يكون كوكتيل .. يعني جزء منها يكون إستوائي مطير ؛ أمشي فيه بلبوص وماسك رمح طويل في إيدي .. وجزء تاني يكون المناخ فيه قطبي متجمد ؛ ألبس الزلاجات وأقضيها زحلقة .. يااااااااه زلاجات !! تصدق إن أنا عمري ما شفت زلاجات يا أخي ؟؟ .. ما شفتهاش غير في مدينة البط في قصص ميكي .. التحدي هنا بما إني في جزيرة يبقى لازم أعتمد على نفسي وأعمل أنا الزلاجات دي .. أعملها من إيه ؟؟ أعملها من إيه ؟؟ .. مش وقته دلوقت !! موضوع زي كده ممكن أضيع فيه أسبوع وأنا على الجزيرة !! مش عاوز أحرق متعة الإكتشاف دلوقت .. وبعدين مش احتمال ألاقي زلاجات جاهزة هناك ؟؟ يعني مثلاً يكونوا وقعوا من حطام طيارة غرقت جنب الجزيرة ؟؟ .. حلو الاحتمال ده ؛ يريحني مؤقتاً من فكرة صنع الزلاجات !! .. إلا بالحق هي الزلاجات باللغة العامية اسمها إيه ؟؟ .. ما علينا !! .. نرجع للمناخ .. احنا قلنا مناخ إستوائي ومناخ قطبي ، عاوز كمان مناخ ربيعي !! بس ما يكونش حر !! يعني يكون مشمس كده وفي نفس الوقت يكون منسم !! .. المناخ الرابع ؟؟ المناخ الرابع ؟؟ .. مش لازم مناخ رابع دلوقت !! .. وبعدين هما ليه يعني لازم يكونوا أربعة ؟؟ افرض يا أخي أنا عاوز كذا مناخ ؟؟ .. أنا حر يا أخي ؟؟ .. أنا باقول أحسن حل إن الجزيرة دي تبقى بتلف !! .. يعني وقت ما أحب أعدلها على المناخ الإستوائي أعدلها ؛ حسيت إني اتحريت وعرقت وعاوز شوية تلج ألفها في إتجاه عقارب الساعة !! .. طب تصدق فكرة حلوة ؟؟ .. آهو منها تبقى مصيف ومشتى في نفس الوقت !! .. كمان موضوع إن الجزيرة بتلف ده هايخلليني أتحكم في عدد ساعات الليل والنهار .. يعني مثلاً لو حبيت أسهر شوية بالليل على البحر ؛ وسرحت في منظر النجوم ؛ ما أجيش ألاقي فجأة النهار طلع !! .. لأ أزعل !! .. إنما لو الجزيرة بتلف هايبقى الموضوع سهل والواحد يقدر يسهر براحته .. كمان عاوز سفينة غرقانة تكون مليانة كنوز !! .. بس ما تكونش غرقانة بعيد .. يعني يا دوب خمسة ستة متر من على الشط .. وما تكونش غرقانة قوي ؛ يعني تكون عايمة على وش المية ، علشان ما أجيش وأنا طالع بصندوق العملات الذهبية ألاقي سمكة قرش !! .. يا نهار أسود ؟؟ والقرش بيعمل إيه هنا !! .. لا لا لا !! مش عاوز قروش يا عم !! .. أنا عاوز سمك ملون ودرافيل صغننة .. وفي الجزء القطبي اللي في الجزيرة عاوز بطاريق .. حلوين البطاريق دول .. تصدق الواحد ممكن ينقي له بطريق مدملك كده ويستأنسه ؟؟ .. طب والله يا عم فكرة !! أحسن من ميت زلاجة !! .. وبمناسبة الأسماك ؛ أنا عاوز جمبري كبير !! .. أه وعاوز حوت !! .. قلتلي عاوز حوت ليه ؟؟ ده سؤال وجيه !! .. يعني بذمتك جزيرة بالإمكانيات دي كلها مش لازم لها حيوان يحرسها ؟؟ أنا هربي حوت في الجزيرة بتاعتي !! .. أنا حر يا عم !! .. وبالنهار هاربطه بسلسلة علشان ما يحوحوش على السمك يطفشه !! (أنا بصراحة ما أعرفش صوت الحوت اسمه إيه فافتكست كلمة يحوحو دي من عندي) .. ولما أحب آخد جولة كده حوالين الجزيرة أركبه .. شوف أنت الحوت ده أنا لو حبيت أؤجره للعيال يركبوه في العيد تبقى اللفة بكام ؟؟ .. وبمناسبة السمك والحيتان ، عاوز كمان في المنطقة القطبية أعمل حفرة في وسط التلج وأقعد أصطاد منها !! .. شفت بقى فكرة إن يبقى فيه كذا مناخ دي قد إيه عبقرية ؟؟ .. آهو أنا مثلاً اصطدت حاجة أو اتبقى عشا من بالليل ، أسيبه يبوظ ؟؟ ولا أروح أحطه في المنطقة القطبية ؟؟ .. طب فرضنا حبيت أسلق بيضتين ، يبقى كل ما عليا إني أروح النبع السخن اللي جنب البركان وأسقطهم فيه وأنشلهم في ساعتها !! .. ما قلتلكش أنا على البركان !! .. ده أنا مخلليهولي مفاجأة مش عاوز أحرقها !! .. بس هو هايكون فيه سرداب منور طويل على أوله توك توك هايدخلني كل مرة جوه مغامرة تاريخية !! .. فيه إيه كمان ؟؟ طبعاً الجزيرة لازم تكون مزروعة بكل أنواع المحاصيل والنباتات والأزهار !! ده شيء بديهي يعني مش محتاج كلام !! .. وكمان يكون فيها حيوانات وطيور مستأنسة !! .. المهم إني مش عاوز تعابين ولا حشرات !!
بالنسبة لوسائل الترفيه .. أكيد طبعاً هازهق من السفينة الغرقانة ومن الكنوز اللي فيها ، اللي غالباً هارميها تاني !! .. براحتي يا عم !! .. أه صح .. عاوز طيارة صغيرة من اللي هي بتمشي على المية دي !! .. علشان كل يوم الصبح آخد جولة كده بالطيارة حوالين الجزيرة .. أنت عارف برضه إن الرياضة مهمة !! .. بالنسبة لنظام الطاقة هاعتمد على الطاقة الشمسة وطاقة الرياح وأعمل طاحونة حمرا .. فكروني كمان أشتري قمر صناعي علشان الواحد لو حب يعرف أخبار الدنيا ويخش على النت !! ما هو مش معقول يعني هاجيب لي بتاع كام ألف كيلو متر سلك علشان أوصل النت !! .. عاوز كمان أجيب قطر !! .. وأطلع بيه الجبل بقى وهُب أنزل أدخل في الكهف وبعدين أطلع على الجسر الملولو اللي زي بتاع الملاهي وآخد لي شقلباظين تلاتة كده على السريع وأنا خايف ومخضوض ومغمي عينيا وبعد كده آتِش في المية !! .. وعاوز جندول أتفسح بيه ساعة المغربية كده في النهر وأقعد أقطف بقى إشي عنب وإشي موز وإشي مانجة وإشي كمترى تلاجة !! .. وكمان عاوز تيليفريك علشان أشوف بيه منظر الجبال من فوق وعش الصقور ومنظر قوس قزح فوق الشلال الكبير !! .. لأ الشلال الصغير ده للحموم !! .. يا سلام عليا بقى وأنا راكب الفيل بتاعي وباتمشى ساعة العصرية كده في الأدغال وجنبي الكنغر شايل في جيبه لب وسوداني محمص وبندق وعلى كتف الكنغر فيه سنجاب صغير بيقشر لي البندق !! .. أروح غيط التبغ ، ألاقي القرد الجابوني مجهز لي البايب العاج والتنين الأخضر الصغير بيولع لي !! آخد فنجان القهوة الميسستكوفي من إيد الباندا وأروح أمدد شوية على السرير الشبك اللي بين نخلتين جوز الهند ؛ وأنا شامم ريحة الفل والياسمين والنعناع والقرنفل والريحان اللي مزروعين حواليا !! أشاور للعصافير والبلابل اللي واقفين على الزرافة بطرف عيني فيسكتوا ؛ ويرشوا عليا براعم الورد البلدي بمناقيرهم لحد ما أنام !!
عاوز كمان أبني بيت حلو !! في الواقع أنا لسه ما استقريتش على تصميم معين بس أنا عاوزه ببلكونة كبيرة !! .. تسألني ليه البلكونة وهي هاتحدد مجال رؤيتك ؟؟ .. أقول لك أنا بصراحة فكرت في البلكونة لسبب عبيط ؛ وهو أن لما حد يجيلي الجزيرة وينده عليا من تحت أقوم باصص له من البلكونة ورامي له المفتاح :D .. احم .. طب طالما عملت بيت يبقى لازم كمان أعمل باب للجزيرة .. آهو الواحد برضه يقفل الباب ويقعد براحته .. وكمان علشان لما العيال يتأخروا بالليل بره الجزيرة أقفل الباب بالمفتاح !! .. حلو ، يبقى على أول الممشى الخشب اللي هايكون في مقدمة الجزيرة من الناحية الشمال هاعمل باب خشب عمولة !! .. وهاعمل فيه عين سحرية !! .. طبعاً حضرتك ضيف مؤدب وأكيد هاتدخل الجزيرة من بابها .. يا ريت بس حضرتك ما تفضلش دايس على الجرس كتير !! .. لأن في الطرف التاني للحبل اللي فيه الجرس هاكون معلق بغبغان أخنف ينبهني أول ما تدوس على الجرس ويقول : اصحى !! اصحى !! اصحى !!
أنا عايزة جزيرة و مفيهاش بنى آدمين، بباب بقى ولا بشباك مفرقتش.
ردحذفو عايزة قرد صغير و نسناس، و ألبس بتاع زي بتوع هاواي المنقوشين ورد كتير كبير أصفر ده و احط ورده في شعري و البس شبشب بصباع.
و يكون فيها شلال شيكولاتة و نافورة نوتيلا.
و فيها جبل عشان انا هحط بيتي على الجبل و يبقى في شلال عشان اتزفلط و انط فيه.
الخيال حلو برضه.
سنكوح شنن لملوم سامي
ردحذف:))
"قرد صغير ونسناس" .. طب والأربع قرود اللي هنا دول هاتسيبيهم لمين ؟؟ دول يبهدلوا البلوجر !!
D:
بمناسبة هاواي .. كان وقع تحت إيدي مرة إناء خشبي على هيئة نصف ثمرة جوز هند صنع هاواي monkey pod wood hawaii
كان تحفة بجد ؛ شغل يدوي بس عالي جداً
"شلال شيكولاتة ونافورة نوتيلا" وشجرتين بسكويت هدية مجانية داخل العدد :)
نورتينا يا باشمهندسة
ويكون حظي الحلو ان اول مدونة ادخلها بعد طول غياب هي مدونتك و مبطلتش ضحك بجد و سرحت معاك ف الجزيرة و كله كوم والبلكونة اللي يندهوا عليك من تحتها دي كوم تاني
ردحذفههههههههههههههه
بجد ضحكت اوي ربنا يكرمك :)
تحياتي
PASHA
ردحذفأنت عايز جزيرة شرحة وبرحة وفيها تكيف
أجمل جزيره لما تكون أرضحها رملية وفيها بعض قطعة صخور وفيها شلال مياه جانبى وتبنى شاليه صغير تحت الشلال ده
وتكون جمبها بحيره نقيه فيها كام نوع سمك على أشجار جوز الهند
أظن كده قمة الهدوء
نهارك فل سيدى العزيز كيف حالك ربما فى ظل ظروف الزحمه متهيلئلى يحق لك ان تحلم ..فى معظم تدويناتك مهما كانت طويله يكون هناك حديث بين شخوص وطريقه رائعه لوصف حاله معينه حتى لو كانت مولمه بطريقه ساخره تجعلنا نضحك وهذا بحد ذاته فن كتابه راقى ..ولكن فى هذه التدوينه لم اجدك كما اعتدت ان اجدك ..ربما طول التدوينه او وصف تفاصيل كثيره جعلنى اتيه فى جزيرتك لكن تبقى شخصيه ابن البلد الرائعه طاغيه وهذا هو المهم وعذرا منك عزيزى
ردحذفافكار مبعثرة
ردحذف:))
ده من حسن حظنا احنا والله وبجد شيء يسعدنا ويشرفنا إن اللي بنكتبه يعجب حضراتكم وينول رضاكم
:)
عوداً حميداً يا أستاذة نورتي الدنيا كلها
Gamal Abu El-ezz
ردحذف:))
الله عليك يا أستاذنا وعلى ذوقك الجميل ؛ بجد أحييك على تصويرك الأكثر من رائع :)
والله يا كبير آهو الواحد محتاج بس مكان زي ده يقعد فيه ساعتين يروق دماغة إن شالله حتى يا رب تكون سكرين سيفر على الكمبيوتر :)
نورتنا جداً
ghada issa
ردحذف:))
مساءك ورد بإذن الله يا أستاذتنا .. حقيقي فرحتيني بتعليقك ربنا يفرح قلبك ويبارك لك ويحفظك يا رب
بصراحة حضرتك معاكي حق وأنا باشكرك جداً على رأيك الصادق الأمين .. بالنسبة للتدوينة دي بصراحة أنا كنت مسحتها بعد ما نشرتها بخمس دقايق بالظبط وكتبت واحدة تانية بس ما نشرتهاش .. ربك والحق أنا بعد ما قريتها حسيت إني شرخت فيها علشان تكمل مش علشان أنا عاوزها كده .. إنما لو سيادتك سألتيني أنا كنت عايز إيه .. هاقول لك أنا باحلم بحياة بسيطة بدائية ما فيهاش تكنولوجيا ولا تعقيد ؛ حياة على الفطرة .. من غير توتر وقلق وضجيج وتلوث وتشويه بيحاصرنا وبينهشنا من كل ناحية وبيستنزف روحنا .. بس للأسف البساطة دي بقت صعبة جداً ومكلفة جداً وضريبتها كمان كبيرة جداً لأن الواحد كل مدى بيغرز أكتر في المدنية وبيندفن تحت أنقاض المدينة .. ويا سبحان الله ؛ من كلامي مع زملاء كتير الفترة اللي فاتت لقيت إن معظمهم بيحلم وبيتمنى نفس الحلم ده ، مش علشاننا احنا وبس لأ علشان ولادنا كمان من بعدنا يعرفوا يعيشوا .
أنا آسف إذا كنت سرحت شويتين في الرد :))
ورأيكم جميعاً مرحب بيه في أي وقت ، دي مدونتكم يا جماعة :))
شرفتينا