شكة دبوس
- مساء الخير يا فندم .
- مساء النور
.
- ممكن ناخد
من وقتك خمس دقايق ؟؟
- اتفضلي .
- إحنا برنامج
"باب الخير" ..
- يا أهلاً
وسهلاً ، وده بيتذاع على قناة إيه ؟؟
- لأ .
هو في الحقيقة لسه ما اتذاعش منه ولا حلقة عشان مشاكل إنتاجية ، بس فيه ناس
متكلمين عليه عشان يتذاع على قناة "إل إم" في الراديو .
- طب وأنا
مطلوب مني إيه دلوقت عشان بس الجو حر وعاوز ألحق أروّح .
- أبداً يا
فندم ، إحنا بس هناخد منك كلمتين للبرنامج ، ها ؟؟ نبدأ ؟؟ أنا هاشغل التسجيل في
الموبايل أهه .
- إنتي ماعكيش
ميكروفون ؟؟
- أنت
هاتتقمر ؟؟ .. ما قلنا فيه مشاكل إنتاجية !! .. خلليك حسيس بقى يا أخي وما تخنقناش
!! .. هاتبقى أنت والمنتج علينا ع الصبح !! .. ناس إيه دي يا ربي !! .. وبعدين أنا
لو معايا مايك أصلاً ما كنتش وقفتك !
- يا ستي
بالراحة شوية !! .. ده مجرد سؤال !
- ما تيجي
تذيع بدالي أحسن طالما هاتسأل ؟؟ .. أووف !!
- يا ستي
أنا آسف ، صبرك بس عليا لحد ما أفهم ، أصل أنا أول مرة بصراحة أطلع في برنامج ،
فتلاقيني متاخد شوية .
- (في
سرها) وإن شاء الله آخر مرة !! .. عموماً يا فندم ، ما تشيلش هـَم ، الموضوع زي
شكة الدبوس !! .. ها ؟؟ نبدأ ؟؟
- ابدأي
يا ستي ، بس مش تعرفيني الأول البرنامج ده بتاع إيه ؟؟
- ده
برنامج اسمه "باب الخير" ، بنوجه فيه رسالة للناس اللي ظروفها صعبة ،
عشان ما يحسوش إن هما لوحدهم ويعرفوا أن الحياة لسه فيها خير ، وحلقة النهاردة عن
"أم عمرو" من الزقازيق ، دي واحدة ست غلبانة جوزها طلقها بعد ما سابها
بأربع عيال واتجوز عليها ، والست رفضت إنها تمد إيديها أو تتجوز وتجيب للعيال جوز
أم يبهدلهم ، خدت قرض من بنك ناصر وعملت بيه عربية كسكسي عشان تصرف على عيالها .
- طب
والله ست جدعة !! ..إن شاء الله ربنا هايعينها ويقويها .
- إن شاء
الله . أنا بقى في البرنامج هاسألك : تحب تقول إيه لأم عمرو ؟؟ .. بس كده !
- ماشي ،
ابدأي .
- مساء
الخير أعزائي المستمعين ، بنرحب بيكم في برنامجنا "باب الخير" اللي
بنوجه من خلاله رسالة لكل واحد قدر يتحدى الظروف الصعبة وبنقول له: أنت مش لوحدك !
إحنا كلنا جنبك ، وأول ضيف معانا في حلقة النهاردة الأستاذ / ..... نتعرف على
حضرتك ؟
- (يهمس
للمذيعة) إيه أتكلم ؟؟
- (توقف
التسجيل) أستغفر الله العظيم يا رب !! .. يا عم في عرض دين النبي انطق وخلصني !!
.. العملية مش ناقصه غباوة !!
- يا ستي
بالراحة ! مش حضرتك كنتي بتتكلمي في الموبايل ؟؟ .. أعرف منين إنك بتكلميني ؟؟
- يا دي
النيلة !! .. يا فندم ما حضرتك عارف إن احنا بنسجل الصوت في أم الموبايل عشان ما
فيش زفت مايك ، وأنا باضطر أقرب الموبايل من بـُقي عشان الصوت يظهر في التسجيل !!
.. وبعدين لو سمحت نفض شوية للمزز اللي معدية وركز معايا عشان فيه هدية آخر الحلقة
.
- بجد ؟؟
- والله
أنت وشطارتك !! .. يا للا نكمل ؟؟ .. وأول ضيف معانا في حلقة النهاردة الأستاذ /
..... نتعرف على حضرتك ؟
- نبيه
وائل .
- (تحاول
كتم ضحكتها) .. أهلاً بيك أستاذ / نبيه في برنامجنا ، طبعاً حضرتك عرفت قبل
التسجيل قصة الكفاح المشرفة لأم عمرو ، تحب تقول لها إيه ؟؟
- أنا
بصراحة فخور جداً بالست "أم عمرو" وباحييها على عزيمتها وإصرارها
وتضحيتها الكبيرة اللي عملتها عشان خاطر ولادها وأقول لها : إن شاء الله ربنا
هايكرمك آخر كرم يا أم عمرو يا ست يا جدعة يا أصيلة يا عفيفة وهايعوضك خير في عمرو
وأخواته و...
- (المذيعة
تهمس في أذنه) بلاش تجيب سيرة عمرو عشان بتقلب عليها المواجع !
- هه ؟؟
- (توقف
التسجيل) كنت باقول لك بلاش يعني تجيب سيرة عمرو !! .. أصله ما رجعش البيت من ساعة
ما علا اتمسكت !
- علا
مين ؟؟
- علا أخته
الصغيرة ! .. أصلهم كانوا مسكوها بكيسين بودرة من فترة واتحبست ، فعمرو ساب البيت
وحلف ما يرجع إلا أما يجيب كرش صلاح جوز عبير أختهم الوسطانية ، لأنه
افتكر إن هو اللي دبس علا في التهمة دي وهرب !! .. لكن اللي عمل كده هو عاشور اللي
علا كانت متجوزاه عرفي !! .. المشكلة كمان أن عمرو ما يعرفش لحد دلوقت أن جلسة
الحكم بتاعة عزة كمان أسبوع !!
- عزة
مين ؟؟ وجلسة إيه ؟؟
- عزة دي
أختهم الكبيرة ، حتة سكرة والله بس حظها قليل !! .. اتورطت في قضية أداب من شهرين
عشان الشقة اللي راحتها كانت متراقبة !! .. هي الدنيا كده !! .. ما تجيش إلا ع
الغلابة وتحط !
- غلابة
؟؟ .. يا نهار أسود ومنيل على دي عيلة !! .. دول المفروض يتولع فيهم بجاز في ميدان
عام !! .. والولية أم عمرو عارفه كل البلاوي دي ؟؟
- وهي
يعني الست المسكينة هاتعمل إيه ؟؟ .. قدرها كده !! .. مالهاش خير في جوزها ولا في
عيالها !! .. الحمد لله أنها عارفه تكافح في الظروف دي !! .. وآهو لولا الكام قرش
حشيش اللي بتبيعهم جنب عربية الكسكسي كان زمانها اتحبست عشان فلوس القرض !! ..
إييييه دنيا !! .. المهم دلوقت خللينا نكمل الحلقة بتاعتنا بس من غير ما تجيب سيرة
عمرو عشـ ...
- حلقة إيه ؟؟
وزفت إيه ؟؟ .. ده أنا لو أعرف مكان أم عمرو دي أبلغ عنها !!
- إيه ده
؟؟ .. يعني بعد كل العطلة دي مش هاتكمل الحلقة ؟؟ .. مش مهم !! .. عموماً برضه يا
فندم هتاخد هديتك .
- هدية
إيه ؟؟
- ألف
مبروك يا فندم ، حضرتك كسبت معانا طبق كسكسي !
- نعم يا
اختي ؟؟ طبق كسكسي ؟؟ .. من عند أم عمرو طبعاً صح ؟؟
- (تغمز له
بعينيها) أه يا مكــار !! .. عرفت منين ؟؟ .. صدق فعلاً اللي سماك
نبيه ! .. بس فيه شرط ! .. عشان تستلم هديتك لازم تدفع تلتمية وخمسين جنيه قيمة
الشحن من الزقازيق لحد هنا !
- تلتمية
وخمسين جنيه يا نصابة يا حرامية !
- ليه
العوأ ده بس يا فندم ؟؟ .. أنا عامله محترمة معاك من الصبح !! .. عموماً لو مش
معاك المبلغ كله ممكن ناخد الموبايل والساعة رهن ! .. ولا إيه رأيك يا صلاح ؟؟
(يظهر صلاح
فجأة من خلف سيارة نقل كانت تقف بجوار الرصيف ، ضخم الجثة عريض المنكبين وما فيش
في وشه حتة شبه التانية .. يضع طبنجة في جنب الأستاذ/ نبيه ، الذي يصيبه الذعر
فيستسلم له ويتركه يأخذ كل ما في جيوبه !!)
- تسأله
المذيعة بسخرية: ها بقى إيه رأيك في برنامجنا ؟؟
- الله
يلعن أبو البرامج اللي تشلح الواحد بالشكل ده يا شيخة !!
- (يزغر
له صلاح بعينيه) : بتقول حاجة ياد ؟؟
- لا لا أبداً ، كنت باقول أن حضرتك إيدك خفيفة أوي بصراحة والموضوع فعلاً زي شكة الدبوس!
( الحمد لله أنها عارفه تبيع حشيش جنب عربية الكسكسي وإلا كان زمانها اتحبست عشان ما سددتش فلوس القرض )
ردحذف:-))
أه والله ده ربنا عالم بحالها هي وعيالها
هههههههههههههههههههههههههه
إيه ياعم العيلة اللي عايزة الحرق دي ؟؟ ههههههههههه
لأ بس جامدة الجايزة اللي بالعافية دي ، ولا شحن الزقازيق .. ده الواحد مواصلاته للزقازيق مش هتاخد عشرين جنيه
ربنا يحفظك يارب .. دمت مبدعا :)
:(( اللهم احفظنا
ردحذفهههههههههههههههههههههه و الله ضحكتني و انا ماليش نفس و مازلت بقولك حرام عليك الموهبة و لازم تنشر كتاباتك دي.ده أنت أقل تشبيه عندك اللي غايب في وسط الكلام يفطس من الضحك: مفيش حتة في وشه شبه التانية!
ردحذفو الله لذيذ يا باشا و ربنا يكرمك و يفرحك بزوجتك و يرزقك خير دائما يا رب على الضحك اللي بتضحكه لنا.
يالا قولوا آمين
ههههههه
ردحذفعائلة محترمة جداا
جميلة اووي الحكاية
βent Pasha
ردحذف:))
أمال إيه يا بنتي ؟؟ ناس شقيانة ورا لقمة العيش ههههههههه
سيبك أنت منور الدنيا كلها يا جميل
:))
E73
ردحذف:))
آميـــن يا رب
نورتينا
:)
سنكوح شنن لملوم سامي
ردحذف:))
ربنا يكرمك يا باشمهنسة ويجبر بخاطرك :))
شكراً لدعواتك الطيبة ربنا يجازيكي كل خير يا رب .
بالنسبة للكتابة ! .. أخشى أن أمتهن الكتابة فأزهد فيها :)
خلليني كده في الهجايص أحسن :)
نورتينا
ياسمين
ردحذف:))
دي عيلة مكافحة طحن D:
نورتينا
وكل ده والست ام عمرو غلبانة يا عينى هههههههههههههههههه ربنا يسترها علينا
ردحذفقلــــــــــ حائر ــــــــــــــــم
ردحذف:))
أم عمرو ؟؟
وهو فيه زي أم عمرو ولا أخلاق أم عمرو ولا ولاد الــ ..... ولاد أم عمرو D:
ربنا يسترها ع الجميع بإذن الله
نورتينا
جت في وقتهااااااا
ردحذف:))
قاعدة حزينة من الصبح
وازهري يقولي اشربي نعناع واقعدي في البلكونة
:))
اهو ومن بلوجر
مواهب زي الفل
وضحكتني وبجد من قلبي
تسلم موهبتك
:))
شمس النهار
ردحذف:))
يا خبر أبيض يا أستاذتنا ؟؟ بقى حضرتك تزعلي واحنا موجودين ؟؟ ألف سلامة عليكي من الحزن والوجع تسلمي من كل شر يا رب وإن شاء الله ربنا يجعل أيامك كلها فرحة وهنا وسعادة وسرور :))
ربنا يكرمك ويجازيكي كل خير على تشجيعك الجميل ومرورك اللي بيرفع معنوياتنا دايماً :))
أقول لك حاجة حلوة ؟؟
خدي انتي النعناع وهاتي البلكونة عشان الجو هنا حر أوي D:
نورتينا
هههههههههه
ردحذفيا مسا البنفسج
والله العظيم عسل
انا مضحكتش من زمان
والله افتكرتك يا باشا لاني كنت هكتب بوست عن ابو الريش واول مرة روحت هناك وقابلتكم
رمضان كريم
اجري يااااااااااا مجدي
ردحذف:)))
جميلة يا باشا جدا , تسلم ايدك :)
هههههههه
ردحذفربنا يجازيك خير عن البسمة اللي رسمتها على وشي وانا ف عز الحاجة ليها:)
تحياتي
هههه صباحك ورد وشكرا لك على الضحكه التى اهديتها لنا الله يسعد ايامك وتكتب وتمتعنا ..مبدع دائما سردك محبتى وتوليباتى سيدى العزيز
ردحذفهو كله من ام متحت دي ال وشها فقر
ردحذفبس قلي طبق الكسكسي مكنش فيه حتت حشيش تطري القعده
بجد تحفه
تسلم ايدك طسﻻمي لبنت باشا
re7ab.sale7
ردحذف:))
يا مساء الورد يا أستاذتنا :)
ربنا يكرمك يا رب ويجازيكي كل خير إن شاء الله
بالنسبة لليوم بتاع أبوالريش كان يوم جميل جداً والله بكل صحبة الخير اللي كانت منورة فيه واللي حقيقي اتشرفت بمعرفتهم هناك ، ربنا يا رب يجعل هذا اليوم في حسنات كل المشاركين ويجازيهم خير الجزاء عنه اللهم آمين
نورتينا
هدير
ردحذف:))
ههههههههههههههههههههههههههههه
ههههههههههههههههههههههههههههه
وربنا وربنا كمان مرة تعليقك ضحكني أكتر من البوست يا أستاذة ربنا يجازيكي خير يا رب :))
هو أنا في الحقيقة ما كنتش فاهم التعليق في الأول - نظراً لأني ما باشوفش تليفزيون - بس لما دعبست ع الجوجل وشفت الإعلان ضحكت أوي بصراحة !
هو فعلاً صلاح اللي في البوست ده فيه شبه كبير من اللي كان بيجري ورا مجدي تقوليش أخوات في الرضاعة من أم عمرو D:
نورتينا
افكار مبعثرة
ردحذف:))
ربنا يكرمك يا أستاذة ويجازيكي كل خير على مرورك الكريم اللي بيسعدنا وتشجيعك الجميل :))
نورتينا
ghada issa
ردحذف:))
صباح الفل يا أستاذتنا منورانا والله :)
وربنا يكرمك يا رب ويسعدك زي ما أسعدتينا بتعليقك الجميل ومرورك الأجمل :)
نورتينا
وصف الاحساس
ردحذف:))
ههههههههههههههههههههههههههه
أيوه أيوه هي أم متحت دي السبب شكلها كانت في نفس دفعة أم عمرو في مدرسة الزقازيق التخريبية ، وفضلوا يلعبوا في الزقازيق لحد ما بقاش فاضل فيها ولا زقزوق واحد يوحد ربنا D:
شكراً لسلامك وبنت باشا إذ تهديكم جميعاً أطيب تحية وأرق سلام :)
نورتينا
ههههههههههههههههههههههه
ردحذفايه يا عموناالكلام دا كله
مش ممكن يعنى !
ربنا يارب يهدى
استمر استمر وربنا يارب يسترها علينا وعليك يارب
AhMeD RaDy
ردحذف:))
ههههههههههههههههههه
منورنا وربنا يا كبير :))
ما انحرمش منك يا غالي ولا من زيارتك الجميلة يا باشا :))
وربنا يسترها علينا جميعاً إن شاء الله
:))
بلاش تجيب سيرة عمرو والنبى يا شريف :)
ردحذفلمّا شوفت البوست دا من يومين
ردحذفكان جايلى ف وقتها
لأن يومى قفل معايا جدا
فلما جيت هنا ضحكت ..
شكرا يا شريف .. :)
إنت جميل جميل ):
ردحذفربنا يكرمك ويروق بالك إن شاء الله
ENG./ELSAYED,PMP
ردحذف:))
ههههههههههههههههههههههههههههه
أنت تأمر يا هندسة :))
وبعدين والله أنا ما جبتش سيرته ولا حاجة هي اللي سيرتهم على كل لسان D:
نورتني ونورت الدنيا كلها يا أجدع باشمهندسين المحروسة :))
وحشتني جداً على فكرة .. إش ناوي تشرفنا بزيارة للقاهرة قريب ؟؟
فكر كده ويا ريت تيأه (توافق يعني)
:))
Sarah
ردحذف:))
العفو يا أستاذتنا حضرتك تأمرينا والله وبجد ده شيء بيشرفنا وبيبسطنا إننا نقدر نفرحكم ولو بحاجة بسيطة زي دي :))
وشكراً بجد لحضراتكم جميعاً على تشجيعكم لينا وحسن متابعتكم وتعليقاتكم الكريمة
ربنا يفرحكم ويسعدكم دايماً يا رب
:))
نورتينا
ديدي
ردحذف:))
ربنا يحفظك يا أستاذة ويجبر بخاطرك ويسعدك ويروق بالك إن شاء الله :))
متشكرين على كلامك الرقيق ودعوتك الطيبة ، ربنا يجازيكي كل خير إن شاء الله
:))
نورتينا