ست الحسن
لـ بهاء جاهين
قابليني يوم
في أول المنيل
في خمسة سبتمبر سنة تلاتين
قابليني تحت الرَبْع في القلعة
في جامع السلطان حسن شمعة
و في الرفاعي مقام وناس مساكين
أنا مش ح اقول لك حددي لي معاد
قابليني صدفة واحنا متخاصمين
في السيدة زينب في حارة جاد
أو ستة شارع ساقية الطواحين
قابليني في البرج اللي تحت البير
قابليني في الأحلام وفي الطوابير
في اسكندرية وشندويل وشبين
قابليني في محطة فراق القطر
قابليني في مصحة لقا المجانين
عارفك أنا. مش بالشَبَه بالعطر
مسك الحسين وروايح البساتين
ملح البيوت اللي أكلها البحر
ريحة سحالي الأرض والجعارين
قابليني عند وزارة الصحة
و اشفيني من ريحة الدوا
قابليني في نَفَس الهوا
و اشفيني م الكحة
قابليني عند تقاطع الألفي وعماد الدين
شَحَّاتة في إشارة المرور
بتبيعي مناديل الورق ويس
قابليني في الشبورة في دولاب الهدوم
وأنا بابكي في الملايات وفي الفساتين
أنا من زمان وأنا بافتح الجرانين
و باتوه من العناوين
أنا من زمان و أنا بافتح المَنْدَّل
ما بشوفش غير مَنْزَّل
أنا من زمان وأنا بافتح الكوتشينة واقرا تنوة الفناجين
ما بشوفش غير شارع لا بيوَصَّل
و لا بأقابلك فيه
قابليني بين الخُرس والمعاتيه
قابليني في الخيشة اللي في الجردل
قابليني في الحزن اللي عارفك بيه
أنا يا صبية مانيش بتاع أفراح
و لا قصر م الحواديت وبهو سفيه
أنا من هنا .. من شارع السَيَّالة
فواعلي طوب واقع من السقَّالة
باترجَّى فيكي وانتي مش سامعة
قابليني يوم جمعة
بعد الصلاة، و خديني ع النقالة
و ارميني وسط الشحاتين العُمي
يمكن أشوف وشك عجيب الضي
اللي لا شافه إنس ولا عفريت
يا وش ست الحسن في الحواديت
***
اول مرة اقراها
ردحذفدي خمسة سياحة
:)
فهمتك أنا كدة -عرفت ليه قلت بتحب العامي عن الفصحى :)
ردحذفحلوة و خمسة سياحة و جايبة كآبة العاصمة
جميله فعلا
ردحذفتحياتي
يا سيدى يا سيدى ...
ردحذف:p
يا رايق
شمس النهار
ردحذف:))
ياااااااااااااااااااااه يا أستاذتنا انتي لسه فاكره البرنامج ده ؟؟
مش ده كان بتاع جانيت فرج ؟؟
الموسيقى بتاعة تتر البرنامج ده مش ناسيها لحد دلوقت وكنت عاملها نغمة موبايلي من فترة :))
شكراً لحضرتك بجد لانك فكرتيني بالذكريات الحلوة دي :))
سنكوح شنن لملوم سامي
ردحذف:))
يمكن باحس إن العامية - بما إنها اللغة اليومية المتداولة بيننا - فيها حياة وإيقاع أكتر من الفصحى باحس إن القصايد المكتوبة بالعامية فيها ريحة الشارع وأصوات الناس والزحمة والجو بتاع مصر :))
وعلى فكرة هي لغة مش سهلة في الكتابة يعني كل فين وفين لما تلاقي حد عارف ينحت منها معاني حية وحقيقية وصاحية وتحسي إنها جديدة وانتي بتقريها مع إنك بتستخدميها كل يوم :))
وصف الاحساس
ردحذف:))
ربنا يكرمك ، يسلم ذوقك
AhMeD RaDy
ردحذف:))
منور الدنيا كلها يا معلمي والله ، المهم تكون عجبتك يا باشا :))
رغم إني قريتها من فترة طويلة ،، إلا إني بصراحة بانبسط كل مرة أقراها فيها ،، بتفكرني أيام الصعلكة ،، أيام ما كان عندي شعر D:
نورتني يا غالي
اختيار جميل للقصيده وعجبنى ردك لاننى اؤيدك فيما ماكتبته من كلمات فى تعليقك على سنكوح (.يمكن باحس إن العامية - بما إنها اللغة اليومية المتداولة بيننا - فيها حياة وإيقاع أكتر من الفصحى باحس إن القصايد المكتوبة بالعامية فيها ريحة الشارع وأصوات الناس والزحمة والجو بتاع مصر :))
ردحذفلازلت احفظ شيئا من قصيده بلدى وحبيبتى للرائع احمد فواد نجم ..واعتبرها رائعه مصريه لكننى لم احصل عليها كامله للاسف ..كلكم يا اهل مصر ابداع وفن وحس ..رمضان كريم
ghada issa
ردحذف:))
ربنا يكرمك يا رب ويجازيكي كل خير إن شاء الله
بالنسبة للعامية تحسي كده إنها عامله زي الجلابية الواسعة اللي الواحد بياخد فيها راحته :))
يمكن المشكلة اللي ظهرت من فترة وانتشرت انتشار رهيب وفظيع وخطير جداً هي دخول اللغة المنطوقة للعامية وبصفة أخص لو الشخص اللي بيكتب ده ما بيعرفش ينطق أصلاً !!!!
يعني مثلاً تلاقي واحد يقول لك "انتا" بدلاً من "أنت" و"شكرن" بدلاً من "شكراً" و"فالنة" بدلاً من "فانلة" ..... إلخ ،، والفيس بوك وتويتر وما شابه من المواقع الاجتماعية ساعدت للأسف في انتشار اللغة دي بشكل كبير !!!
حتى كمان الإعلانات للأسف بقت تستخدم اللغة دي باعتبارها اللغة الأكثر تداول بين الشباب علشان تقدر توصل لهم !!!!
بجد كارثة !!!
وكل واحد بيكتب غلط ما بيعرفش أن بكتابته الغلط دي فيه كذا واحد ممكن يقروا له ويلقطوا منه ويكتبوا الكلام غلط زيه بالظبط !!!
الواحد من كتر ما بقى يقرا الكلام مكتوب غلط بطل قراية !!!
عزائي الوحيد أنهم خريجين جامعة D:
__________________________________
بالنسبة لقصيدة عمنا الكبير / نجم فهي طبعاً أكتر من رائعة ،، يسلم ذوقك والله :))
مش عارف إذا كانت كاملة في الرابط ده ولا لأ ؟؟
http://www.jammoul.net/forum/showthread.php?4390-%C8%E1%CF%ED-%E6%CD%C8%ED%C8%CA%ED-%C3%CD%E3%CF-%DD%C4%C7%CF-%E4%CC%E3
نورتينا
شكرا لك عزيزى تعبتك معايا قرات القصيده كامله والى كان مفقود عندى الاسطر العشر الاخيره تقريبا ..شكرا لك من قلبى اقولها تحياتى للمدام ورمضان كريم ..
ردحذفghada issa
ردحذف:))
العفو يا أستاذتنا انتي تأمري والله تعبك راحة :))
بس ينفع يعني تشرفينا كده بالنهار والدنيا صيام وما نعرفش نعزمك على حاجة ؟؟ طب كوباية عرقسوس حتى ولا خشاف عشان الطريق :))
والمدام تهديكي أعطر تحية وأطيب سلام
نورتينا
بهاء جاهين
ردحذفمن اجمل ماكتبه
اختيار موفق لأنك فنان
لازم لما ادخل مدونتك الاقي شئ
جميل
كل سنه وحضرتك بخير وبنت الباشا بخير
وسعاده والاولاد ايضا
تحياتي
كارولين فاروق
ردحذف:))
ربنا يكرمك يا أستاذتنا ويبارك فيكي ويفرحك ويسعدك زي ما بتسعدينا دايماً بمرورك الكريم وذوقك الراقي يا مبدعة :))
كل سنة وحضرتك بألف خير وصحة وسعادة إن شاء الله انتي وأسرتك الكريمة وكل حبايبك وإن شاء الله عيد سعيد عليكم و علينا وعلى المسلمين جميعاً بإذن الله
:))
نورتينا
:))
ردحذفمش قادرة غير إني أبتسم :)
كل سنة وأنت وبنت باشا طيبين D:
Israa' A. Youssuf
ردحذف:)
ربنا يسعدك دايماً يا دكتورة ويفرح قلبك بكل خير إن شاء الله :)
كل سنة وحضرتك طيبة وبألف خير وصحة وسعادة انتي وأسرتك الكريمة وكل حبايبك وإن شاء الله عيد سعيد عليكم وعلى المسلمين جميعاً بإذن الله
:)
اول مره اقراها
ردحذفبس جميله اوى
Bent Men ElZman Da !!
ردحذف:))
شكراً جداً لذوقك ، ربنا يكرمك يا رب
وكل سنة وحضرتك طيبة وبألف خير وصحة وسعادة انتي وأسرتك الكريمة وكل حبايبك وعيد سعيد عليكم وعلى المسلمين جميعاً بإذن الله
:))
كل سنة وانت طيب :)
ردحذفحلوة اووووي واول مرة اقراها تسلم ايدك ولو انها فكرتني بايام حلوة في كل الاماكن دية..كانت ايام حلوة ...كل سنة وانت طيب يا معلم
ردحذفشمس النهار
ردحذف:))
كل سنة وحضرتك طيبة وبألف خير وصحة وسعادة يا رب وإن شاء الله يكون سعيد على حضرتك وعلى أسرتك الكريمة وكل حبايبك إن شاء الله :))
أسعدتينا جداً بجد بمعايدتك الرقيقة ربنا يكرمك يا أستاذتنا ويفرحك دايماً إن شاء الله
:))
نورتينا
Tarkieb
ردحذف:))
يااااااااااه :)))))
حمداً لله ع السلامة يا زعيم :))
والله يا عم ليك وحشة كبيرة جداً وربنا وكنت عاوز اتطمن عليك والله :))
ربنا يكرمك يا عمنا ويسعدك ويفرحك زي ما بتفرحنا بتعليقاتك الجميلة وما يحرمناش أبداً من طلتك علينا وإن شاء الله تكون كل أيامك حلوة وسعيدة :))
وكل سنة وأنت طيب وبألف خير وصحة وسعادة أنت وأسرتك الكريمة وكل حبايبك وبإذن الله يكون عيد سعيد عليكم جميعاً :))
نورتنا