عن Ask وحاجات الجارة الجبارة
إيه اللي يخللي حياتك تقف غير إنها تقف فعليًا؟
السؤال ده اتبعتلي على الموقع بتاع Ask اللي انتشر زي الفيرس الفترة اللي فاتت على النت ودي كانت إجابتي عليه :
:)
- الحزن
لأن الحزن دايماً كداب .. الحزن بيخللينا نزعل على حاجة حصلت لنا .. أو نندم على حاجة تانية ما حصلتلناش .. ونفضل شايلين هم الدنيا فوق دماغنا .. رغم إن في الحالتين قدر الله وما شاء فعل !! .. وما أصابنا لم يكن ليخطئنا وما أخطأنا لم يكن ليصيبنا !! .. .. الحزن بيخللينا نخاف أوي أحسن نفقد حاجة / حد معانا وبسب الخوف ده بننسى كم النعم اللي احنا فيها - بفضل الله والحمد لله - وما بنحسش بيها ولا بقيمتها وبتصبح كأنها عدم ومش موجودة لحد ما فعلاً تضيع !!
الأسوأ من الحزن التعود عليه !! .. لحد ما الواحد بيبقى خايف يحلم / يفرح / يعيش !! .. وبعد ما نوصل لمرحلة التشبع والتعايش والاندماج مع الحزن نتفاجيء بنفسنا إننا بقينا ممثلين هايلين أوي وإننا بنقدر نضحك قدام الناس ونضحكهم كمان حتى لو على نفسنا وعلى خيبتنا !! .. عشان ما يحسوش إننا زعلانين !!
الحزن كداب لأنه مش بيسألنا كل الأسئلة !! .. ما بيسألناش إلا الأسئلة اللي تزود حزننا وبس !! .. مع إن أهم سؤال على الإطلاق : هو احنا زعلانين ليه ؟؟
- وهنا !! .. نكتشف أن احنا ضيعنا عمرنا في لا شيء !!
فنرجع نحزن تاني !!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حاجات الجارة الجبارة
فيه حاجة معكننة عليا وحارقة دمي جداً جداً بصراحة بقالها مدة!! .. ورغم إنها مسألة محرجة شويتين، بس الموضوع زاد عن حده أوي أوي أوي!! .. وعايز آخد رأيكم فيه.
- الحكاية وما فيها .. إني كل ما أدخل البلكونة ألاقي كيلوت حريمي بين قوسين أندر وير واقع على حبل الغسيل من الست اللي فوقينا (اللي هي آخر دور) .. أقوم بمنتهى الأدب والاحترام أحطه جوه شنطة بلاستيك وأقفلها كويس وأحط الشنطة دي جوه شنطة تانية سودا وأديها للبواب .. لحد ما البواب وابنه حفظوا الأسطوانة صم!! .. وبقى كل ما حد فيهم يشوفني داخل عليه وفي إيدي الشنطة السودا، وقبل ما أتكلم يقول لي: عارف!! هاطلعها للست اللي في التاسع!!
الموضوع لو كان حصل مرة ولا مرتين ولا حتى عشرة كان بقى عادي!! .. آهو الجار للجار برضه!! .. إنما تخيل معايا حضرتك إن أنا واخد الشقة دي من أربع سنين والحوار ده بيحصل بمعدل لا يقل عن مرتين تلاتة في الشهر!! .. لحد ما بقينا نشتري لها شنط سودا مخصوص!! .. يعني أنا لو كنت باحوش الحاجات دي طول السنين اللي فاتت، كان زماني فتحت بيهم محل لانجيري!! .. وبصراحة والشهادة لله الست بتنوع لنا التشكيلة عشان ما نزهقش!! .. يعني فيه أربع مرات قفشت فيهم كيلوتات أطفالي!! .. وحوالي مرتين تلاتة لقيت قمصان نوم (منهم واحد حمالته مقطوعة)!! .. ومرة لقيت حاجة قد الكف ما عرفتش بصراحة بتتلبس فين!!
في الأول .. وقبل ما أتجوز .. ما كنتش باخد بالي بصراحة من الحكاية دي!! .. لأن اللي كان بيقع في البلكونة، كان بيبقى رزق الصنايعية اللي بيشطبوا الشقة وبياخدوه .. يمسحوا بيه إيديهم .. يلمعوا بيه جزمهم .. ينضفوا بيه .. يهادوا بيه .. المهم، إني ما كنتش بالاقي حاجة من الحاجات دي إلا لو ما فيش صنايعية شغالين في الشقة!!
وبسبب الحكاية دي اتحطيت مرة في موقف زي الزفت!! .. يوم ما جت خطيبتي – زوجتي حالياً – وأهلها علشان يتفرجوا على الشقة بعد ما اتشطبت!! .. ولسه يا دوب بافتح لهم البلكونة في أمان الله، شافوا كيلوت متعلق في الحديد بتاع السور من جوه!! .. يعني لو حد قاصد يعلقه، مش هايعلقه بالشكل ده!! .. ساعتها، كنت عاوز الأرض تنشق وتبلعني!!
اللي غايظني بقى!! .. وفاقع مرارتي!! .. إن الست هانم اللي فوق، ولا على بالها خاااااالص!! .. يعني عمرها ما نزلت تسأل على أي حاجة من الحاجات اللي وقعت!! .. ما أقصدش تسألني أنا طبعاً، أقصد أنها على الأقل تسأل مراتي .. أو تبعت حتى ابنها الصغير ياخد الحاجة اللي بتقع، إنما أبداً!! .. برود متناهي!! .. مراتي تقول لي: أكيد طبعاً هاتتحرج تسأل على حاجة زي كده!! .. يا سلااام؟؟ .. يعني هي تتحرج تسأل على حاجتها وما تتحرجش وهي بتوقعها؟؟ .. وبعدين اشمعنى الكيلوتات بس يعني؟؟؟؟؟ .. ليه ما بتوقعش شرابات مثلاً؟؟ ولا قمصان؟؟ ولا بنطلونات؟؟
كذا مرة بصراحة (وربنا يسامحني بقى) من غيظي أوقع لها الحاجة على الحبل اللي تحتينا أو في الشارع!! .. أقول علشان تبقى تاخد بالها بعد كده!! .. برضه ولا الهوا!! .. وكذا مرة أخلي الحاجة في البلكونة بالشهر والاتنين وأقول يمكن تبعت البواب ياخدهم!! .. برضه ما فيش فايدة!! .. ومرتين أديت الحاجة لجوزها، قلت يمكن يلفت نظرها ويخليها ما تنشرش الحاجات دي تاني على الحبل!! .. ولا الدوباري!!
قلت لمراتي الست دي مش هاتهمد إلا أما أروح معلق لها الأندر بتاعها بحبل في الأسانسير زي زينة رمضان كده!! .. يا إما ما نطلعلهاش حاجة تاني لحد ما حاجاتها تخلص وما تلاقيش حاجة تلبسها!! .. وآهي الشتا داخله وخليها تاخد برد نياهاهاهاهاها .. أو ممكن نجمع الحاجة دي ونتبرع بيهم في البؤجة :D
السؤال بقى : ماذا تفعل لو كنت مكاني ؟؟
هههه هي بصراحه حاجه تغيظ موضوع جارتك دي بس معتقدش ان نيتها حاجه وحشه او انها يعني تكون بتوقع الحاجات دي قاصده هي بس ست مهمله ومكبره دماغها في الحياه حبتين ....تحياتي
ردحذفعجبنى اولا يعنى تفسيرك للحزن تصدق صح؟
ردحذففعلا عننفسى بخافافرح وبمثل .......
بالنوسبة لجارتك مشعارفه احكمعليها اصلها لو مهملة دى دى ملكة الاهمال فىالعالم اعمل الاقتراح بتاع ماتردلهاش الحاجة ..وربنا يسامحنى بقى :)
هههههههههههههه
ردحذفلالالالالالالالالالا يا شريف انا لو مكان اميرتك كنت روحت اديتها علقة سخنة
بس مش هقول غير كدة
انا بقيت مفترية صح انت حاسس كدة ...؟
حلو اسك علي فكرة اوووي
وحلو تحليلك عن الحزن
بجد عجبني كتر بس مش هعلق باي حاجة كفاية الحزن البنفسجي بتاعي
مدونتك بتنعشني
كل سنة وانت والاسرة واميرة بخير وسعادة
اول مرة أعرف عنك أنك غاوي مواقع اجتماعية غير المدونة :)
ردحذفما علينا - الست اللي فوقك،بتفكرني بجيران الهنا اللي فوقنا
و عامة أحمد ربنا أنها مش زبالة يا عم الحاج، افتكر في شقة المصيف بتاعتنا في الدور الأول و البلكونة بتاعتها زيادة نص متر بالطول عن اللي فوقها، بالتالي في حتة بالجنب كدة عندنا بقت مخصصة لزبالة الأربع أدوار اللي فوقنا، و احياناً الدور الاول يتبرع و يطلع يسب لهم، بس و لا الهوا.
الموضوع اللي حارق دمك حله تركب تندة يا باشا- و بعدين عشان تبقى فاهم لم الغسيل ده فن و حرفة لا تجيدها إلا القليلات من النساء- و هي واضح انها باردة و مكبرة دماغها من العيشة تماماااااااااااااااااااااا
فالخلاصة حل أحلى كتير قوي مش تعلقه بحبل لها في الاسانسير، حاجة من اتنين يا إما تطلع تديه للبواب بدون شنط سودة و لا بيضة و يا ريت تعليق رخم كدة لو ابن البواب مراهق و هو هيقوم ببقية الواجب و هو بيديه "لجوزها" و هو طالع السلم
أو بلزق عريض تلزقه على باب شقتها مع لصق ملاحظة : "حوشوا اللي وقع منكم" و مفيش مرة توقعوا لنا فخد ضاني !
شريف باشا .
ردحذف.
.
ايهالموقف دا .. بصراحة موقف ان حد بيزورك ويشوف الموقف دا هههههههههههههه
متخيل انا الموقف
بس انا لو منك بجد بجد .. عمرى ما هطلع الحاجات دى ليها تانى .. وعلى فكرة كنت هعمل زيك مرتيين تلاتة وبعد كدا اشيلهم بقى لحد ما تحس ان فى حاجة غلط !! لو ما اتاثرتيش مش مهم ابقى اتبرع بهم !
صباح الخير ياباشا بالنسبه للحزن فلا ادرى ربما نحن لو لم يكن موجودا نعود للماضى ننبشه لنبحث عن ما احزننا لنحزن من جديد ههههه والنسبه لجارتك ربنا يعينك صدقنى لما كنت بقرا لم اتمالك نفسى من الضحك بصوت عالى الرائع فى اسلوبك انك تصف الحاله بشى من الكوميديا الساخره ..من اروع ما قرات لك
ردحذفإجابة رائعة جداً و فى منتهى الحكمة :)
ردحذفتحياتى :)
البنفسج الحزين
ردحذف:))
- "مكبره دماغها في الحياه حبتين" !!
حبتين بس يا دكتورة ؟؟ .. دي واضح إن ما عندهاش دماغ أصلاً !!
هاقول إيه ؟؟ .. ربنا يهدي :))
ردحذفReemaas
:))
- الحزن قاصف الأعمار !! .. بيوقف حياتنا .. وبيخللينا كلنا عايشين أموات !!
- ما أعتقدش هاتفرق معاها لو ما رجعتلهاش الحاجة !! .. وإلا كانت سألت قبل كده ع الحاجات اللي ركنتها فترة كبيرة !! .. ربنا يهدي :))
ردحذفre7ab.sale7
:))
- هههههههههههههههههه .. فيه حلول كتير ممكن توجع أكتر من الضرب ، بس اللي أنا بجد مش لاقي له إجابة وعايز أعرفه : ليه الحاجات دي بالذات ؟؟
- بالنسبة للحزن .. فكرتيني بجملة كنت كتبتها هنا من فترة : والهم مكلبش فينا تقولش ماسك علينا ذِلة !!
كل سنة وأنتِ طيبة وبألف خير وصحة وسعادة
:))
ردحذف:))
سنكوح شنن لملوم سامي
:))
- بالنسبة للموقع بتاع Ask .. أنا اشتركت فيه رخامة مش أكتر :D .. أصلي لقيت بتاع زليون واحد اشتركوا فيه الفترة اللي فاتت !! .. وكل واحد مشترك فيه يدخل يسأل التاني (وهو عامل مجهول) سؤال !! .. قال يعني علشان الإحراج !! .. رحت أنا مشترك وبقيت أدخل أسأل بالأكونت هههههههههههههههه .. اللذيذ بقى ، أن فيه ناس كتير بترد على الأسئلة على أساس أنها متوقعاها من ناس معينين !! .. ولو صادفت ودخلتي سألتي نفس السؤال بالأكونت بتاعك تلاقي الإجابات اختلفت !! .. زي ما يكونوا اتصدموا يا عيني ههههههههههه .. أو مثلاً زي ما يكون واحد متوقع أن حد معين هاييجي من وراه ويحط إيديه على عينه ، فيقوم يقول بسرعة : أشرف ؟؟ .. ويطلع شريف مش أشرف ههههههههههههه .. لأ بس بجد فيه زملاء اتشرفت إني سألتهم والله ، وكانت إحاباتهم في منتهى الروعة والحيادية والإبداع واتعلمت منها :))
- " لم الغسيل ده فن و حرفة لا تجيدها إلا القليلات من النساء" .. جملة هايلة وحقيقية جداً أحييكي عليها .. بالنسبة للتندة ، عندنا ستارة ولما بنطلعها بره البلكونة ، الحاجات بتقع في الشارع بس الستارة بتتبهدل من المنشر !! .. شكلي فعلاً هاجرب حكاية إني ألزقه ، بس على باب الأسانسير في الدور بتاعها :D .. وأكتب "ما فيش مرة صينية كنافة أو طبق رز بلبن"
:))
ردحذفAhMeD RaDy
:))
ههههههههههههههههههه
تصدق حلوة الفكرة بتاعة إن الواحد يشيلهم وما يطلعهمش تاني ؟؟ .. وآهي تبقى هواية جديدة !! .. زي ما فيه ناس بتجمع طوابع وعملات .. أنا كمان أجمع أندرات هههههههههههههههه .. وأعمللهم ألبوم !! .. وأبقى كل فترة كده أنزل إعلان على الفيس بوك وأكتب فيه : طقم أندرات نادر بحالة جيدة للتبادل !! .. مقابل بنطلون تريننج وشبشب بصباع :D
وحلوة برضه فكرة التبرع دي !! .. بس تخيل معايا كده يا صاحبي .. إني رحت مطبق إيدي في أندر من دول وإديته لواحدة غلبانة في الشارع !! .. ههههههههههههه .. يا نهاااااار !! .. ما أظنش أنها هاتصدق إن نيتي خير أبداااا !!
- مش عارف ليه حاسس إني هانضرب يا أحمد معايا أنت ؟؟ :D
ربنا يستر !! .. عموماً .. احنا نيتنا خير .. (الألبوم أمانة في رقبتك يا أحمد) !!
:))
ردحذفغاده عيسى
:))
- مساء النور يا أستاذتنا .. بالنسبة للحزن فعلاً والله زي ما حضرتك ذكرتي ، بس غالباً وقت الحزن ما بناخدش بالنا .. وبنبقى عاملين زي اللي فضل يعوم مسافة طويلة جداً لحد ما دخل في الغويط ولما جه يرجع للشط بيكون تعب ، فبيستسلم للغرق !! .. قليلين أوي اللي بيعاندوا ويجاهدوا علشان ما يغرقوش :))
- بالنسبة للجارة .. على رأي المثل : هم يضحك وهم يبكي :)) .. بس هانعمل إيه ؟؟ .. قدرنا وربنا يعيننا عليه !! .. شكراً جداً لذوقك ، ربنا يكرمك يا رب
:))
ردحذفعلا
:))
ربنا يكرمك ويحفظك ويبارك في حضرتك ، جزاكي الله كل خير
:))
هههههههههههههههههه
ردحذفأسلوبك موتني من الضحك :))))
لأ بجد دي ست فظييييييييعة !!!
ربنا يهديها يا رب
:)
عجبتني جدا إجابتك على السؤال رائعة :)
ربنا يحميك يا رب ويبارك لي فيك يا زوجي الحبيب :)
βent Pasha
ردحذف:))
ههههههههههههههههه
ربنا ما يحرمني منك يا رب يا رافعة معنوياتي :))
بالنسبة للمذكورة اللي فوقينا .. متهيألي أحسن عقاب ليها اللي ممكن ندعي ربنا أنه يتحقق .. أنها تكون بتدخل على النت .. والصدفة تدخلها المدونة وتقرا البوست ده والتعليقات ههههههههههههه
أو زي ما قلت لك قبل كده .. آجي في مرة أحط لها سم في البتاع أو بودرة العفريت نياهاهاهاهاهاها .. وأبقي قابليني لو وقعت حاجة تاني :))
طبعا بالنسبه لكلامك على الحزن موافقاك 100%
ردحذفوبالنسبه لجارتك انا قاعده اضحك اكتر على حلولك وخصوصا الحل الاخير بتاع الاسنانسير :)
انما انا بجد مش متخيله ابدا ان ده كله صدفه كلامك يدل على ان الموضوع ده بيحصل كتييير وفى نفس الوقت ددى حاجه مش مصنفه فى الاضطرابات الجنسيه (معلشى الصنعه تحكم)
مش قادره افسر الموقف لان مافيش حد بيقع منه حاجات بالكم ده ابدا والمفروض ان اتلفت نظرها اكتر من مره انها تاخد بالها
بص من الاخر لو اللى بيقع اندر ويرز بس يبقى الست دى فيها حاجه مش مظبوطه والله اعلم
ونصيحتى ليك انك تخلى مراتك تكلمها
تحياتى :)
على فكرة أنا بكلمك بجد في موضوع تلزقه ده، مش بهرج، أولاً أنا قلت لك أنها مكبرة دماغها بس بعدين في القراءة التانية لقيتك بتقول أن الموقف بيتكرر بتاع 3 مرات شهرياً ده يعني في كل مرة غسيل، و دول بس اللي بيقعوا؟!!! لا معلش مقصودة و لخلل عقلي في دماغها بقى أو حب استعراض من نوع قذر- أصل لو مجرد خايبة في لم الغسيل زي حالاتي مثلاً يبقى أكتر حاجة هتقع منها الشرابات و الجاكتات مش حاجة تانية- ممكن أنت تكون شخص بايخ و تشتري منشر صغير و تطلع بيه لجوزها فعلاً و تديهوله ..مسألة مكلفة شوية بس كلمه بصراحة لأن موقف بالبواخة و الحرج ده يلزمه قطع عرق حتى لو أضطررت للخلاف مع الناس، لكن الاسانسير الشقق التانية هتتحرج قوي..أوقات بعمل حركة بايخة في مواقف كدة إني أكتب ملاحظة بقلم فلوماستر و ألزقها للناس على أبواب شققهم و لا حتى باب العمارة و مش مهم يتضايقوا، ما الواحد برضه بشر و بيفيض بيه و بيتخنق- و أرجع أقولك أحمد ربنا انها مش زبالة- و فكرتني برسالة قديمة قوي في بريد الاهرام واحدة اتكلمت على حياتها اللي مليانة هم تقيل مع جوزها و قالت ان كل ده من الحياة و عادي بس اللي مضايقها ان اللي فوقها مربية كلب و بترمي "الزبل" بتاعه من البلكونة على غسيلها و تبهدل لها هدوم المولود الجديد!طبقاً لتعليق المرحوم عبد الوهاب مطاوع في تاني اسبوع ان دي اكتر رسالة جت له عليها ردود في حياته و انه اتصدم أن دي مشكلة عامة عند الناس!!!! و اتفاجيء بكم مقترحات الحلول!
ردحذفأو أنت بقى غير نوع الستارة و هاتها بلاستيك خفيف تكتم نفسكم بس متتبهدلش!!
فافى
ردحذف:))
منورة يا دكتورة يا أهلاً وسهلا :))
هو الإيراد (الغسيل اللي بيقع) كله أندر ويرز بس !! .. معظمه حريمي ونادراً أطفالي !!
هي شكلها أتعودت إن كل ما حاجة تقع عندنا نطلعها لها في شنطة بلاستيك مع البواب ، ويا ريت حتى فيه كلمة شكر !!
الواحد والله بيعامل ربنا في الأول والآخر وبنقول النبي صلى الله عليه وسلم وصى على سابع جار .. هي ممكن تكون متخيلة إن مراتي - بحكم المنطق - هي بس اللي بتشوف الحاجات دي بحكم إنها هي اللي بتلم الغسيل فبتقول عادي بقى !! .. وكأني مثلاً حرام أدخل البلكونة !!
الموضوع سخيف جداً ومستفز واللي مضايقنا أكتر حالة اللا مبالاة المتناهية اللي هي فيها !!
ربنا يهدي
:))
سنكوح شنن لملوم سامي
ردحذف:))
الحمد والشكر لله إنها مش زبالة :))
الفكرة والله كلها في أني ما بقتش لاقي لها أي عذر مع تكرار الموضوع مرتين تلاتة في الشهر !! .. ويمكن ده اللي خللاني أنشر الموضوع هنا في المدونة علشان أستفيد بأراء حضراتكم :))
بالنسبة لجوزها فهو راجل في منتهى الأخلاق والاحترام والتهذيب والتواضع والله .. بس للأسف ما شفتوش بقالي بتاع ست شهور !!
عموماً احنا إن شاء الله هانجمع لها الإيراد بتاع الشهر ونخللي المدام تعمل محاولة .. الله أعلم بالسبب برضه :))
بالنسبة لـ زبل الكلب .. الست دي غلطانة إنها تشتكي !!
ليه ؟؟
لأن في الأرياف بيعتقدوا - والله أعلم بحقيقة هذا الأمر - أن لما تحلقي زلبطة للمولود وتدهني له راسه جلة (روث البهائم) شعره يطلع تقيل !!
فالست دي ما تعرفش أن جارتها بتجاملها D:
شاكرين جداً لاهتمامك وتعبك معانا .. ربنا يكرمك يا رب
:))