تحب تاكل إيه النهارده ؟؟
- معظمنا بيفضل أكلات معينة ونفسه بتهفه عليها من وقت للتاني .. وأوقات بنحس بزهد في الأكل اللي قدامنا .. وأوقات بنبقى محتارين ناكل إيه ونحس أن الأكل كله بقى شبه بعضه !! .. البوست ده عشان كل واحد فينا يقول على الأكلات اللي بيحبها وبيحب ياكلها إزاي أو فين ؟؟ .. ولو حد يعرف الطريقة اللي بتتعمل بيها يكتبها في التعليقات .. مش عاوزك ترص أكلات وخلاص !! .. لأ .. أنا عاوزك تكون بتحب تاكل الأكلة دي أوي أوي أوي .. وريقك بيجري عليها أول ما تفتكرها .. يا عم اعتبر نفسك هاتتعزم عليها :D
- بالنسبة للزملاء من الدول العربية والأجنبية يا ريت هما كمان يفيدونا بأسامي ومكونات أشهر الأكلات اللي في بلادهم .. أو الأكلات الغريبة اللي أكلوها بره بلادهم ويوصفوهالنا .
- أنا مش محلل نفسي !! (عشان ما حدش يفتكر أني هاحلل شخصيته وذوقه ومستواه الاجتماعي من نوع الأكل اللي بيحبه والكلام ده ، احنا مش في معمل تحاليل هنا ) .. أنا بس كل اللي أقصده أن ممكن حد فينا يقول على اسم أكله معينة الواحد فينا ما أكلهاش قبل كده أو ما أكلهاش بقاله فترة طويلة فيعرفها للباقيين ، أو يقول على طريقة جديدة لأكلة معروفة هو بيحب ياكلها بيها بتخللي طعمها أحلى أو يحكي عن موقف حصل معاه بسبب الأكل أو أو .. المهم أن في النهاية هايبقى عندنا أكلات كتيرة هانفتح نفس بعض فيها ونعزم بعض عليها هنا :) .. الفايدة التانية : أنك لو حسيت أنك زهقان في يوم من الأكل اللي أنت متعود عليه ، أو محتار تاكل إيه النهارده ،، ممكن تيجي تشوف اسم أي أكله هنا وتجربها .
- أنا ما أعرفش تقسيمات الأكل بتبقى إزاي أو على أي أساس بس اللي في بالي حالياً : المشهيات والسلطات / المعجنات والمخبوزات والفطائر / اللحوم والأسماك والطيور / الخضروات والفاكهة / الألبان والجبن / الحلويات والتسالي / المشروبات والعصائر .
- ملحوظة 1 : يا ريت ماحدش يقرّفنا في نعمة ربنا لو ما بيحبش صنف معين .
- ملحوظة 2 : علقوا براحتكم إن شالله كل واحد يعلق ميت تعليق طالما في موضوع البوست .
- ملحوظة 3 : الصورة من جروب ضحكني شكراً على الفيس بوك .
وبالهنــا والشفـــا :)
أول ملحوظة ضحكتنى بجد :)
ردحذفوخصوصاً انى كنت ناوية أدخل أقول أنى مابحبش الأكل.. يعنى الأكل بالنسبة لى مجرد أداة علشان أعيش وخلاص
زى البنزين للعربية كده :)
لكن كله عندى عادى كلها نعمة ربنا :)
ممكن أحب صنف بعينه اه بس مش لدرجة انى افتكره اول ما حد يقولى ايه وجبتك المفضله :)
اولا انا احييك علي اختيارك
ردحذفلهذه الصوره التي موتتني من الضحك
لأن السؤال
عن الام وواجبك نحوها
الطفل ببراءه كتب عن واجبها نحوهم
وبعدين اتكلم براحته خالص وقال كل
حاجه بتعملها لهم
وثانيا عن الاكله المفضله لو تسمح لي ان
اشارك في ذلك
انا احب الرز بالخلطه جدا جدا
تحياتي
ولله يا أخي اللي كتب موضوع التعبير كان واقعي وفكر على قدر ما رآه من امه
ردحذفوفعلا على الرغم من انه صغير لكن واضح انه عبر بطريقه تؤكد له شعوره الداخلي بأنه لولا وجود امه لن يكون هناك اكل!
اما بالنسبه للأكل في حياتي- فأنا أعاني من سنين- باكل من الشارع من حوالي 15 سنه- والقولون باظ- والحقيقه قررت لما اتجوز لو العروسه مش بتعرف تتبخ هايكون ليا تصرف آخر !
طبعا وزى الكل الصورة تحففففه
ردحذفبجد بقالى كام يوم مضحكتش وتقريبا مبتسمتش حتى بس الصورة فظيعه
الاكل بقى والله فكرت اكتب اصناف وهكتبها فعلا
بس لاقيت ان الحجات اللى حبيناها حبيناها عشان اكلناها مع ناس وفى اماكن كان لها روح جمعتنا فخلت الاكل بطعم تانى
وجرب تاكل نفس الاكله بس غير الناس او لوحدك او مكان تانى
ربنا دايما يجمعنا على الخير
بحب اوى المعمر .. والفراخ فى الفرن
والمكرونه بالبشاميل بالفراخ
بس اى اكل بحبه لما اخويا يكون هنا وكلنا مع بعض
تحياتى
هههههههههههه سابونة يالهوووووووووووى
ردحذفانا بحب البتنجان ياسيدى جدا جدا بكل صورة واشكال وانواعه وبدون اى تفرقه فكلهم اولادى :D
انا من الناس اللى مبحبش اكل اى حاجه والسلام واحيانا لما بنخرج علشان ناكل بحتار اكل ايه
ردحذفبص ان الصوصات والكاتشب والحركات دى مهمه جدا مع اى اكله تتطلبهم
مبعرفش اقول المقادير بقي انا بدلق كله علي بعضه وبتطلع الاكله :))
وكمان بحب الاكل اللى ياكل اللى متحسش فيه انت اكلت كام رغيف بلدى بتنجان حبنه وبطيخ وبيض وكدهو هههههههههههههه الحاجات الفظيعه
اة انا جوعت اوى علي فكرة
صباح الغاردينيا باشا
ردحذفههههههههههههه بجد الصورة تحفة بس دا تعبير برئ وصادق اويي
بالنسبة للأكل بموت في حاجة أسمها محاشي ومكرونة بـ البشاميل امممم على فكرة أنا جعت دلوقتي :( "
؛؛
؛
لروحك عبق الغاردينيا
كانت
هنا
reemaas
أكتر أكلة بحبها : " الكشك " بحب أوي اكله بالمعلقة والبطاطس المحمرة والفراخ البانية والسمك الفيليه والمكرونة بالباشميل ويكون كتير.
ردحذفوكفاية كده لحسن أنا صايمة وهبتدي اجوع
تحياتي ):
نهاركم توليب ..اول حاجه الصوره تجنن يعنى هو الموضوع اذكر واجبك نحو الام وهو ذكر كل واجبات الام ونسى جميل واحد يعملوه فيها ..
ردحذفاحب اكل الفلافل يعنى الطعميه والحمد لله انه فيه محل ابو محمد الرجل العراقى يعملها ببراعه اما بالنسبه للاكلات الهولنديه انا بحب اكل السمك النئ همه بيعملوه بطريقه مميزه ويكون حجم السمكه بحجم الاصبع متبله بحاجات تجعلك تشعر لما تاكلها انك بتاكل خروف محشى مش سمكه هههه طعمها لذيذ وهناك طريقه مميزه للاكل وهى ان تمسك السمكه من ذيلها وترجع رقبتك للخلف ههههه وتفح فمك وتزلط السمكه ..ومطرح ميسرى يمرى ..وشكرا لك على الموضوع الحلو ياباشا ..
مكرونة بالتونة و المايونيز و الخضروات
ردحذفأعتقد المكونات واضحة يعني من الاسم، المكرونة طبعا بتبقى مسلوقة و بيضة- الخضروات هنا هي خضراوات السلطة، و أغلبها بيكون فلفل رومي بكل ألوانه و زيتون..ألخ
بطاطس بوريه : بطاطس بتتسلق و تتهرس و يتضاف عليها بيض و أحيانا معاه شوية لبن مش كتير، و تتحط في صينية، طبعاً بعد التتبيل، و ع الفرن عدل
آيس كريم فراولة
فراخ بانية بصلصة البشاميل، دي حضرتك كدة اللي بيعمل صوص البشاميل و بدل ما ترصه على المكرونة بتغمس فيه قطع الفراخ المسلوقة سلق خفيف و على المقلاة عدل.
آخر حاجة بقى و عشان الصورة اللي هلكتني من الضحك، فكرتني بعزومة اتعزمتها من سنين طويلة قوي مع ناس هنود.
سبحان الله و تبارك الله فيما خلق، الناس دي كل الأكل عندهم يندرج تحت مسمى: حاجة صفرا !
كل الأكل بلا أدنى استثناء كان لونه أصفر بمختلف درجات الأصفر، فاتح و لا غامق و لا مخضر و لا مدي على برتقالي.المهم يكون أصفر و السلام.
على ما أتذكر كان في يومها سمك مخلل بالمانجة، او المانجة هي اللي مخللة مع السمك، و رز معجن بالكاري و في سائل أصفر بيتصب عليه.و كان في محشي، بس مختلف شوية عن المحشي بتاعنا، ده الورق على جنب و بتغمس بيه الحشو اللي في طبق.
بس اللي لزق في دماغي قوي وقتها حاجتين
الأولى أختلافنا في طريقة عملهم للشاي، هل بيغلوه مية عليها و اللبن و لا بيحطوا الشاي المطحون في لبن و يغلوه و لا إيه بالظبط؟
تاني حاجة أن القعدة دي كان فيها أتنين مهندسين زراعيين مازلت إيديهم في المهنة يعني و مشالوهاش..و أنا واحد منهم بالمناسبة..و كان في شيء على الترابيزة- أعتقد مفروض بناكله - و معرفناش بالظبط ده نبات و لا حيوان.
و أفتكرت أكلتين كمان بحبهم، فراخ بسندا دي أكلة هندي، بتتعمل بفراخ و صوص زبادي و مكسرات، و بتتبل بالقرنفل و شوية توابل تانية كدة.
و السلطة اليوناني: خضار سلطة + جبنة +زيتون..و أحيانا صوص معرفش هو إيه، و الخضار السوتيه
معلش أنا من النوع اللي بيفترس بوفية السلطات في أي مطعم.
و قبل ما أنسى، كل الأكل ده مبشمش ريحته في بيتنا خالص، الوحيدة اللي بتتعمل و أنا اللي بعكها و أعمل، هي التونة، الباقي أكل مطاعم، في بيتنا إجباري الأكل كله من أوله لآخرة مسلوق مسلوق مسلوق يا ولدي...و كمان من غير ملح !
ردحذفمنك لله يا شريف جوعتنا يا أخي
بسم الله الرحمن الرحيم
ردحذف- ما شاء الله ، المائدة عمرانة مما لذ وطاب من خيرات الله ، أحمدك يا رب وأشكر فضلك ، بصراحة كل الأكل اللي ذكرتوه هنا يفتح نفس بلد بحالها :))
أولاً : الحاجات اللي بتضايقني في طقوس الأكل .
- بالنسبة لي .. أنا مش أكيل أوي بالمعنى المتعارف عليه .. بس أعتقد أني بافهم في الأكل المعمول حلو والمخدوم كويس .. فيا عيب رخم بصراحة ، هو أني ما باعرفش أجامل نهائياً في الأكل :( .. باتضايق جداً من الستات اللي بتطلسق في العمايل .. اللي الواحدة فيهم تعمل عشرين صنف في ربع ساعة ما فيهمش صنف واحد يتاكل ! وتطلعك أنت اللي ما بتفهمش في الأكل ! .. باعتقد أن السبب في ده أن فيه ناس كتيرة بتفتقد لنظرية نسبية الأذواق وبيأكلوك على ذوقهم باعتبار أن ذوقهم ده الاستاندرد ! وده شيء بيتعبني جداً .. يعني مثلاً : أنا مش كييف شاي ، ولو شربته باحب أشربه خفيف جداً جداً بمعلقة واحدة سكر في كوباية صغيرة .. فلما أروح عند حد ويحلف ميت طلاق ويمين أني لازم أشرب حاجة وأقول : قهوة ، يقول لي : ما فيش ، هاعمل لك شاي .. فأنبهه للطريقة اللي باحب أشربه بيها ، أتفاجيء بأنه عمل الشاي تقيل حبر وسكر زيادة أوي وفي شفشق ! .. ويقول لي : عملتهولك خفيف أهه ! .. أقول له : ده الخفيف ؟؟؟؟ ماشي ، بس دي مربى شاي ! .. يقول لي : ده أنا ما رضيتش أحط لك غير سبع معالق سكر ! .. أقول له : ماشي ، بس الكوباية دي كبيرة أوي ! .. يقول لي : دي كبيرة دي ؟؟ (على أساس أنهم بيشربوا الشاي في خزان !) .. فطبعاً ما أشربش الشاي ! وصاحبنا يزعل مني ! .. مش مضطر مثلاً أني آكل الحاجة مشطشطة وحامية نار وأفضل أتنطط زي القرد عشان اللي قدامي بيحب ياكلها كده ! .. كل واحد حر في معدته ! .. ومن تجارب سابقة كتيرة تعبت فيها جداً .. بقيت ما باجاملش حد في الأكل ولا باجي على نفسي وصحتي عشان حد !
- ما باحبش الأصناف الكتيرة على الأكل .. وما باحبش أي حاجة تشغلني عن الأكل .. يعني مثلاً ما باحبش الكلام ولا صوت التليفزيون ولا التليفون ولا أني أقوم أسلم على حد أو أستنى حد والأكل محطوط .... إلخ ، وقت الأكل للأكل وبس ! .. وقت الأكل بابقى في ملكوت تاني خالص ! .. ما باحبش أقعد في المطاعم والكافيهات اللي بفتارين إزاز خالص ! والناس تتفرج عليا وأنا باكل ! .. أنا أحب أكل جوه المطعم أو في الشارع :D
- الحمد لله أنا نفسي حلوة .. وما باعيبش على الأكل اللي قدامي أياً كان .. بس ريحة الأكل وطريقة العمايل والتقديم ممكن تخلليني أزهد فيه ! .. باتضايق جداً من الحلفانات والأيمانات اللي بتتحلف كتير على الأكل ! .. باحب أكون براحتي .. لو جعان هاقول أنا جعان ، والصنف اللي هايتحط قدامي هاكله .. ولو ما فيش أكل جاهز ممكن أدخل المطبخ أطبخ بنفسي (أنا باعرف أقف في المطبخ بالمناسبة) .. ما باحبش اللي يكلف نفسه ويقف على ضوافرة عشاني ويحسسني بالذنب ! .. باتضايق كمان من شغل التمثيل وعزومة المراكبية ! .. وفي الشارع ما باحبش حد يعمل فيها السبع رجالة ويعزمني ، أو حد يستقطعني ويرخم عليا عشان أعزمه ! .. باحب أمشيها إنجليزي !
>>يتبــع<<
ثانياً : الحاجات اللي بتعجبني في طقوس الأكل :
ردحذف- باحب اللمة ، بالذات مع أصحابي اللي بنفتقد جداً لمتنا زي زمان لما كنا بنشوي فوق سطوح بيت أي واحد فينا في وقفة العيد ، ونقعد نخطّف الأكل من بعض ، ونقضيها ضحك وتهريج وهزار ونستعيد الذكريات ونقعد نعمل مقالب في بعض .
- باحب لما أنزل أي بلد أو منطقة أتطقس وأشمشم لحد ما أعرف إيه محلات الأكل الكويسة فيها وأجربها ، ومع السنين بقى ليا تقريباً في كل منطقة مكان أكل فيه وقهوة أقعد عليها ، وفيه أكلات لحد دلوقت ما أنسهاش أكلتها من سنين طويلة في بلاد كتيرة .
- باحب جو الشارع وقت قبل الفطار في رمضان ، لما كنا بنساعد بعض في تحضير مائدة في المنيرة وأيام ما كانت العيلة بتتلم ونفطر في باب الخلق أو في جامع عمرو ونصلي التراويح ، وفي البيت باحب خناقات المساعدة في تحضير الأكل والعصبية والسربعة وبرضة عمرنا ما فطرنا وقت الفطار .
- باحب جداً أعرف الطرق المتوارثة في الأكل عموماً ، يعني مثلاً طريقة تسييح الزبدة وطريقة عمل الصلصة والمخلل ... إلخ ، اللي هي بإختصار سر الصنعة :)
>>يتبــع<<
يااه يااه يااه ع الموضوع الفاتح للشهية ده ، نبتدي بإيه ياسيدي .. نبتدي بإيه ؟؟؟؟
ردحذفأيووون
طبعا أساسي المكرونة البشاميل مع الفراخ المشوية والسلطات وياسلام بقى لو جنبهم صينية رقاق أو جلاش باللحمة المفرومة .
أحب الأرز المفلفل مع الملوخية أو الفاصوليا الخضرا ، ونحط معاهم شوربة لسان عصفور.
أحب شوربة الخضار جدا و دي بشتاقلها من وقت للتاني
أعز جدا المكرونة المحمرة وهي ف شوربة الفراخ .. حقيقي لها مذاق آخر
أو ممكن المكرونة الاسباجتي مع السلطة المكسيكي .
بصراحة كده بقى الحاجات اللي أنا كتبتها دي فتحت نفسي ومش عارفة أركز ف الأصناف اللي بحبها أكتر من كده .. لو افتكرت حاجات بحبها تاني أكيد أكيد هاجي هنا وأقولها.
بالمناسبة :
عجبتني فكرة الفراخ البانية بصلصة البشاميل ، وإن شاء الله هجربها
موناليزا
ردحذف:))
كله نعمة من الله سبحانة وتعالى والحمد لله على نعمة الصحة اللي بتخللينا نعرف ناكل وندوق ونستطعم خيرات الله
شرفتينا جداً بزيارتك الكريمة
كارولين فاروق
ردحذف:))
بالنسبة للصورة يا فندم العفو .. احنا اللي بنشكر حضرتك على تشريفك لينا وتعليقك الرائع ، ربنا يكرمك يا رب
بالنسبة للرز بالخلطة فحدث ولا حرج .. يسلم ذوقك يا أستاذتنا وهو فيه بعد كده ؟؟ يا مين يلايمني عليه ؟؟ :))
نورتينا جداً
لورنس العرب
ردحذف:))
ههههههههههههههه اللي كتب موضوع التعبير ده كان عامل دماغ عالية .. وتقريباً كان نفسه في الأكله دي :)
بس بجد واد أكيل :))
"هايكون ليا تصرف آخر"
D:
والله يا معتز يا اخويا .. يا اخويا يا معتز والله .. احم احم .. رأيي الشخصي في مثل تلك الحالة بالنسبة للتصرف الآخر إذا سمحت لي سموك : يا تنزل أنت تجيب أكل جاهز .. يا تدخل المطبخ وتطبخ أنت :))
في الحالتين أنت برضه :))
أنت أصلك مش واخد بالك من نقطة مهمة .. هي ليه حاجة المطبخ ع العروسة ؟؟
عشان العريس يطبخ :))
وبعدين هي قاعدة - قد يكون لها استثناء- الزوج بيعتبر فأر تجارب أول خمس سنين جواز .. والله لو نجحت التجارب دي وأثمرت عن تعلم الزوجة فن الطهي خير وبركة .. طب لو ما نجحتش ؟؟
لو ما نجحتش تعمل إيه ؟؟ هه ؟؟
تعيد من الأول تاني طبعاً D:
وصدقني ده في مصلحتك !!
لأن فيه أزواج مش عارفه مصلحتها بتصمم أن زوجاتها هي اللي تطبخ وفي الآخر الزوج منهم يا بيموت مسموم يا بيموت م الجوع !!
وبعدين يا راجل يا طيب ما دام بقالك خمستاشر سنة بتاكل من الشارع .. يبقى خلاص قربت أهه .. فاضل لك عشر سنين وتاخد إفراج :))
وصدقني .. تعب قولونك من أكل المدام هايبقى له طعم تاني خالص :))
طبعاً أنا باهذر معاك معايا أنت ؟؟
معتز يا معتز أنت رحت فين يا معتز
!!!!!!
ربنا يرزقك بالزوجة الصالحة إن شاء الله
:))
نورتنا يا كبير
رؤى عليوة
ردحذف:))
ربنا يكرمك يا أستاذة ويجازيكي كل خير إن شاء الله وشكراً جداً لذوقك الراقي ومرورك الجميل
أتفق جداً مع حضرتك فيما يخص الحاجات اللى حبيناها عشان اكلناها مع ناس وفى اماكن كان لها روح جمعتنا فخلت الاكل بطعم تانى .. ده حقيقي فعلاً بنسبة كبيرة :))
وبالنسبة للمعمر والفراخ في الفرن والمكرونة بالباشاميل فالتلاتة بصراحة أشهى من بعض :))
نورتينا
reemaas
ردحذف:))
"سابونة" شفتي حرف السين أبو أربع سنان ؟؟ هههههههههههههههه
بالنسبة للبتنجان فالعبد لله ينحني له تقديراً واحتراماً :))
كفاية بس المسقعة والبابا غنوج :))))))
نورتينا
rona ali
ردحذف:))
حضرتك ذكرتي نقطة مهمة جداً .. وهي هناكل إيه ؟؟ .. السؤال ده كان أحد ثلاثة أسئلة محرمين على الشلة بتاعتنا نهائياً لما نخرج ! - قبل ما نتجوز كلنا طبعاً - .. وده لأن اللي هناكله النهارده أكيد أكلناه إمبارح أو أول إمبارح بالكتير :)) فكنا بنتخنق جداً من السؤال ده !!
وبالنسبة للسلطات والحبشتكنات دي ، كانت بتتنسف أول ما تنزل لنا على الترابيزة في أي مطعم ونطلب تاني وتالت لحد ما نشبع ونقول للجرسون لف لنا الأكل عشان هناخده تيك أواي :))
بالنسبة للمقادير :))
أنا زي حضرتك تماماً .. كل مرة أعمل فيها أكله بتبقى غير التانية ، ما بافتكرش طريقة أو مقادير ، باعتمد على حدسي وخبرتي .. كمان أنا بالنسبة لي الوقفة في المطبخ موود .. يعني لو مزاجي رايق أعمل أحلى أكل ، ولو موودي مش حلو ما أعرفش أعمل فنجان قهوة لنفسي :))
"كمان باحب الأكل اللى يآكل اللى ما تحسش فيه أنت أكلت كام رغيف بلدى بتنجان جبنة وبطيخ وبيض وكدهوه "
هو ده أكلي المفضل الصراحة اللي باحس معاه فعلاً إني إنسان الغاب طويل الناب :))
خاصة الجبنة والبطيخ صيفاً .. بشرط أحب آكل البطيخ شقق ، إنما بالشوكة لااااااااااااااااء ومن عشقي في البطيخ راسي بقت تطرح لب بطيخ D:
نورتينا
ريـــمـــاس
ردحذف:))
صباح الفل يا أستاذة ، شكراً لذوقك الراقي ومرورك الكريم :)
وموضوع التعبير ده بجد يموت من الضحك :)
بالنسبة للمحاشي .. عندنا في مصر بيقولوا : كتير الدبكة قليل البركة :)
يعني بياخد وقت كتير في تجهيزة وعمايله ويتاكل في ثواني :)
وبصراحة .. المحشي جامد ومهما تاكلي منه ما تحسيش إنك أكلتي :)
فيه محشي كرنب ومحشي ورق عنب ومحشي كوسة وبتنجان وفلفل وبطاطس وخرشوف محشي :))
نورتينا
ديدي
ردحذف:))
"الكشــك" ده أضرب له تعظيم سلاااااام
بجد من الأكلات المبهجة ، اللي تحسي فيها كده إنك بتنبسطي لما تاكليها :)))))
وكذلك أعز السمك الفيليه :))
.. كان فيه واحد صاحبي رخم بيقول عليه السمك اللي نصه سؤال "فيه ليه ؟؟" ههههههههههههههه
نورتينا
ghada issa
ردحذف:))
نهارك فل يا أستاذة إن شاء الله :))
شكراً جداً لذوقك الراقي ومرورك الجميل ربنا يكرمك يا أستاذة ويجازيكي كل خير إن شاء الله .. بالنسبة للطعمية أنا أعزها جداً في العيش الفينو :)
هو انتوا في العراق صح بتعملوها بالحمص ولا بالفول ؟؟
احنا هنا في مصر بنعملها بالأسمنت المسلح وبنقليها في زيت العربيات هههههههههه
بس بجد الطعمية أم حمص دي رووووعة :))
السمك اللي حضرتك وصفتيه ، عندنا هنا زيه في مصر ، اللي هو السردين المملح أو الملوحة أو الفسيخ :))
بس معلش بقى إسمحيلي حضرتك أقوللك وبدون أي تمييز أو عنصرية أن فسيخ هولندا ما يجيش حاجة جنب فسيخنا :))
يكفيني أقوللك إني لو جبت فسيخ عندي هنا في البيت ، حضرتك هاتشميه وأنت قاعده في بيتك في هولندا :)) مش بعيد التيوليب المزروع في هولندا ينقلب توم من الريحة D:
عجبتني جداً طريقة شرحك للأكلة :))
فيه أكله هنا برضة بناكلها بنفس الطريقة بس مش فاكرها بصراحة دلوقتي !
لما افتكرها هاكتبها إن شاء الله
نورتينا
سنكوح شنن لملوم سامي
ردحذف:))
جميلة الوصفات يا باشمهندسة ربنا يكرمك يا رب ويجازيكي كل خير إن شاء الله فيها حاجات جديدة هانحاول نجربها :))))
"مكرونة بالتونة و المايونيز و الخضروات / بطاطس بوريه / آيس كريم فراولة / فراخ بانية بصلصة البشاميل" كلهم في الواقع أشهى من بعض ويفتحوا النفس حقيقي :))
غريب الشيء اللي كان ع الترابيزة بتاعة الهنود ومش نبات ولا حيوان ده !!
مرة برضه اتعزمت عند ناس من ماليزيا مش فاكر ولا اندونيسيا .. وقدمولنا طبق رز بسمتي بالتوابل عليه بسلة وقطع لحم صغيرة عليها صوص بالكاري مشطشط وفوقيهم قرص بيض أومليت عليه نعناع أخضر :))
بالنسبة للسلطة اليوناني دي متهيألي أكلتها قبل كده بس مش فاكر فين الصراحة ، والسلطات عموماً مزااااج :))))
بالنسبة للأكل المسلوق هو بيني وبينك صحي بس على طول دي يبقى صعب شويتين تلاتة ، أما بالنسبة للملح فعندنا برضة الأكل ملح خفيف جداً.
شرفتينا
βent Pasha
ردحذف:))))))))
حبيبي أنت يا مظبطني :))
- هو بس فيه ملحوظة أخدت بالي منها دلوقتي ومش عارف إذا كان استنتاجي من خلالها صحيح ولا لأ ؟؟
أنك و معظم الزميلات اللي شرفونا بتعليقاتهن بتحبوا الفراخ :) مع أني وأصحابي بنفضل اللحمة على الفراخ .. سواء كباب أو كفتة أو طرب أو نيفة وخلافة ، هل نقدر نستنتج من كده أن المرأة تميل إلى الدجاج بينما الرجل يميل إلى اللحوم والهُبر ؟؟ D:
وهذا قد يكون مرده إلى أن الأنثى كائن داجن بالفطرة بينما الرجل يميل إلى الافتراس والشراسة نياهاهاهاهاها
ما علينا من التحليل السابق اللي هايخللينا نتضرب :))
- بصراحة كل الأكل اللي قلتيه جوعني أوي :))
"مكرونة بالبشاميل مع الفراخ المشوية والسلطات وصينية رقاق باللحمة لمفرومة ورز مفلفل مع الملوخية أو الفاصوليا الخضرا وشوربة لسان عصفور وشوربة خضار ومكرونة اسباجتي مع السلطة المكسيكي"
أنها لوليمـة :))
ويا حبذا لو نحلي بأم علي :))))