التــورتة
الزوجة تفتح الثلاجة ، تبحث عن شيء ما بداخلها ولا تجده ، تغلق الثلاجة وتتجه إلى زوجها في غرفة المكتب ..
الزوجة : ما شفتش يا حبيبي التورتة اللي كانت في التلاجة ؟؟
الزوج (محاولاً أن يبدو مشغولاً في قراءة الجريدة) : وهو احنا عندنا تلاجة ؟؟ تصدقي أول مرة أعرف المعلومة دي !
الزوجة (تبتسم ابتسامة صفراء من تحت الضرس وتأخذ الجريدة من يد الزوج) : كانت فيه تورتة في التلاجة اشتريتها امبارح ، راحت فيـــن يا حبيبي ؟؟
الزوج (يأخذ الجريدة من يد الزوجة ويقرأ بصوت عالِ) : بيقول لِك كيلو الفراخ هايغلى اتنين جنيه ، ابقي اشتريلنا دبوس عشان عازم جماعة صحابي رُخمة بكرة ع العشا.
الزوجة : يعني مش عاوز ترد عليا ؟؟
الزوج (يكمل قراءة بصوت عالِ): بيقول لِك الفراخ رخصت أربعة جنيه .. الحمد لله إن احنا ما جبناش الدبوس !
الزوجة (تغير من نبرة صوتها): راحت فين التورتة يا حبيبي ؟؟
الزوج : فيه إيه بس يا حبيبتي ؟؟ تورتة إيه بس اللي انتي مضايقة نفسك عشانها ؟؟ إنتي تورتة حياتي وبسبوسة عمري وجلاش السلام الآلي .
الزوجة (ما يدخلش عليها طقم التثبيت ده وتقاطعه) : أصل التورتة دي كنت شارياها عشان عيد ميلاد مامتك النهاردة و..
الزوج : أنا أمي مؤدبة ما بتاكلش تورتة .
الزوجة : وهو أنا قلت حاجة على طنط ؟؟
الزوج : ماهو ده اللي ناقص إنك تغلطي في ماما كمان ، عموماً أنا متربي ومش هارد عليكي ، الله يسامحك .
الزوجة : ؟؟؟؟؟ أففف صبرني يا رب !!
الزوج : وكمان مش عاجبك كلامي ؟؟ وبتنفخي في وشي ؟؟ والله عال يا ست هانم ! مش بعيد كمان تكوني بتشتميني في سرك ؟ صح ؟ أه أكيد بتشتميني في سرك ، أنا لا يمكن أبداً أقبل إنك تهينيني بالشكل ده ، هو أنا إيه ما عنديش كرامة ! .. أنا هاسيب لك البيت كله وأنزل بدل ما أفقد أعصابي ، وأولع سجاير وأنا مبطل بقالي أربع ساعات ! .. وبعدين أصلاً أصلاً أمي ما بتحتفلش بعيد ميلادها !
الزوجة : ما هو يا حبيبي أنا كنت هاعملها لها مفاجأة !
الزوج : أأأأأه قولي بقى إنك عاوزه تـِسرعي الولية عشان تتخض تقوم تـُطب تموت ، يا حبيبتي يا ماما ، ألف بعد الشر عليكي يا ست الحبايب يا ..
الزوجة : حبيبة يا أغلى من روحي ودمي تيرارارا
الزوج (وهو يطبل ع المكتب) : وصلي صلي .. صلي .. ع النبي صلي ..
الزوجة : برضه أنا عاوزه أعرف التورتة راحت فين ؟؟
الزوج : وإشمعنى أنا يعني اللي أتسئل في أم البيت ده ؟؟
الزوجة : وهو فيه غيرك أصلاً ؟؟
الزوج : احم احم .. تصدقي أفحمتيني ! .. طب استني لما أفكر لك في كدبة مقنعة تصدقيها .
الزوجة (تشير بسبابتها في وجهه علامة الإتهام) : جاوب بسرعة وبصراحة !
الزوج : بسرعة ولا بصراحة ؟؟
الزوجة (تزغر له وتشخط فيه): ها ؟؟ جاوب باقول لك !
الزوج : أصل كان فيه واحد غلبان ماشي في الصالة شكله ما داقش الأكل من سبع سنين قلت أكسب فيه ثواب وأديله التورتة ياكلها .
الزوجة : ماشي في الصالة !!.. ممممم .. وكان غلبان أوي يعني ؟؟
الزوج : يوووووووووه دي حالته كانت تصعب ع الكافر !
الزوجة : تصدق أقنعتني ! وأنا اللي كنت أستغفر الله العظيم يا رب هاظلمك وأقول إن أنت اللي أكلتها لما شفت بقعة الشيكولاتة دي على هدومك !
الزوج (ينظر إلى ملابسه حيث أشارت) : أن أن أن تش تش .. تصدقي صح فيه بقعة شيكولاتة ! .. أدي آخرة اللي يعمل خير في الناس !
الزوجة : عاوزه اعتراف كامل وصريح ومفصل لو سمحت !
الزوج : أنا هاحكيلك اللي حصل وانتي يا ستي احكمي .. بقى أنا بافتح التلاجة الصبح لقيت خير اللهم اجعله خير علبة شكلها حلو .. بافتحها لقيت جواها تورتة شكلها أحلى .. قلت يا ترى دي هنا بمناسبة إيه ؟؟ .. ولما قعدت أفتكر تواريخ كل المناسبات وما افتكرتش حاجة ، قلت حلال الله أكبر !
الزوجة (شهقة) : يعني كلتها كلها لوحدك يا خاين ؟؟؟
الزوج : أنا والله ما كان قصدي أكلها لوحدي .. أنا الأول لقيت كريزياية شكلها مش عاجبني قلت لو كلتها هايبقى شكل التورتة أحلى .. رحت واكلها .. وأنا باشيلها راحت طبقة الشيكولاتة اللي على الوش اتلخبطت رحت جايب سكينة وقاطع الجزء اللي اتلخبط وقلت أكله أنا وأسيب لك الجزء السليم .. وبعد ما قطعت وكلت اكتشفت أن الجزء اللي كلته هو الجزء الكبير السليم فبصراحة اتضايقت أوي من نفسي عشان كلت الجزء بتاعك .. بس خلاص كان أمر الله نفد .. ورحت واكل الجزء بتاعي وأنا متضايق ع الآخر والله .. لأن بطني كانت وجعتني أوي بصراحة ! .. شفتي إزاي بقى إني ضحيت بنفسي عشانك ؟؟
الزوجة : فدائي من يومك يا سبعي !.. طب حيث كده بقى يا زوجي الحبيب .. قررنا الآتي : أولاً : إنك تجيب لي تورتاية زي اللي أنت أكلتها بالهنا والشفا بالظبط عشان أكلها لوحدي ومش هاتدوق منها فتفوتة واحدة ولا كريزياية ... ثانياً : تجيب تورتة تانية لمامتك بدل التورتة اللي أنا هاكلها لوحدي طبعاً ... ثالثاً : تجيب تورتة تالتة تصالحني بيها وناكلها سوا احنا الاتنين ، قلت إيه ؟؟؟
الزوج : إيييييه هو ده ؟؟ تلات تورت بحالهم ؟؟ ليه هو عيد التورتة ؟؟ ولا أكونش حلواني ؟؟
الزوجة : إيـــــه ؟؟ حقي ولا مش حقي ؟؟
الزوج : حقك يا أبو كمــال ، حقك يا أخويا !
الزوجة : نسيت أقول لك رابعاً : وهو إنك أنت يا حبيبي يا قمور يا شطور اللي هاتغسل التي شيرت المبقع ده لوحدك !
الزوج : ده أنا مش هاغسله وبس .. ده أنا هاقطعه حتت بسناني وأولع فيه بجاز !
الزوجة : أقول لك على فكرة حلوة ؟؟ .. أنت ممكن بعد ما تغسله تتبرع بيه لأي حد غلبان يكون معدي في الصالة.
ههههههههههههههههههههه
ردحذفإيه الراجل الأوفر ده ؟
:-)))
(( وكمان مش عاجبك كلامي ؟؟ وبتنفخي في وشي ؟؟ ....... وأولع سجاير وأنا مبطل بقالي أربع ساعات ! ))
لأ حلو نظام التثبيت ده .. ده أنا كنت قربت أصدق إنها غلطت فيه .
إيه البراءة الفظيعة دي مع دليل الإتهام ( بقعة الشيكولاتة )
بس بصراحة هو يستاهل العقاب بتاع الزوجة ، أنا لو منها أخلليه يجيب تورتتين ماكن التورتة اللي أكلها ,آكلها أنا لوحدي
نياهاهاهاهاها :-q
إلا صحيح هو الدبوس النهاردة بكام ؟؟
دمت مبدعا يازوجي الحبيب
:)حلوة
ردحذفوعجبنى دلعه لمراته وهو بيقولها يا أبو كمال :)
يااااااااه أهى دى الرومانسية :)
حقك يا أبوكمال D :D:
ردحذفمسخرة السنين والله..
أنا فعلا مابصدق تكتب حاجة جديدة عشان أدخل أقرأ وأضحك D: ربنا يكرمك :)
:) حلوة
ردحذف*********************************
ردحذفتعليق للباشمهندس / سيد أبو منعم
**********************************
تصدق بالله أنا اتعكننت آخر عكننة لما لقيتك قفلت المدونة !!
ليه بس تقفل المدونة يا أخي ؟؟ أمال نتطمن عليك إزاي ؟؟ يا سيدي خلليها وبلاش تكتب ! .. وبعدين يرضيك إن حضرتك بجلالة قدرك (وأنت عارف ومن غير حلفان قدرك وقيمتك عندي وعند الناس كلها عاملين إزاي) تقفل مدونتك اللي كنت باظبط فيها دماغي ، يبقى أنا أعمل إيه ؟؟
:))
روق يا أبو منعم وسيبها على الله وافتح المدونة يا راجل خللينا نتطمن عليك مش كفاية إنك غطسان بقالك شهر وزيادة .
أخوك / شريف
صباحك ورد ..موقف حلو بين زوجين.. حضرتك تجيدصياغه الموقف بطريقه مميزه وموشقه تقبل مرورى ..وازهار توليبى
ردحذفحلوة :))))
ردحذفمساء الغارديينا
ردحذفهههههههههههههههه
بجد ازاي اتحملت الراجل دا بس على فكرة دمه خفيف اوي بس طلعت زكية أقتراحاتها حتوبه ياكل تورته بعد كدا هههههههه"
؛؛
؛
بجد أسلوبك جنان
لروحك عبق الغاردينيا
كانت هنا
reemaas
علي فكره هو المفروض يجيب خمس تورتات مش تلاته بس
ردحذفالاتنين الزياده دول للناس ال نفسهت هفتها علي التورته بعد ما قرت الكلام ده كله دي واحد
التانيه بقي لل اقترح الاقتراح ده هو وعائلته
لا محدش يفهمني صح
هههههههههههه
تحفه بجد
تسلم ايدك
تحياتي
اصل الزوج اخد زوجته فى عشره غلبه عشان هو يغير الموضوع .. بس الزوجه مصممه بقى
ردحذفوالمثل بيقول خدوهم بالصوت قبل ما يغلبوكم
وكمان بتقولى حاضر .. طب خدى .. آآآآى
تُحفه بجد :)
ردحذفبقالي كتير مضحكتش زي المجانين كده لوحدي :)
حوار مصري صميم يعني
تسلم افكارك
الله حلوه اوي :D
ردحذفانا بضم صوتي لصوتك وبأطالب بفتح مدونة هسهس من تاني :)
مفتقدين الهسهس يا هندسه
βent Pasha
ردحذف:))
لا والله ده راجل عسل بس هو اللي عبيط عشان ما شالش أثار الجريمة نياهاهاهاها
وبعدين الحاجات الحلوة كترها مضر ع الصحة D:
الدبوس النهارده بكام ؟؟
لا ما هو بيقوللك الفرخة بقت بشلن عشان الديوك هي اللي بقت بتبيض هههههههههههههههههههههههههه
إنك لسكر وبتقول كلام بسكوت
موناليزا
ردحذف:))
ويا ريت الدلع جاب نتيجة يا أستاذة .. هو قال يدلعها يمكن ربنا يهديها وتنسى ما نسيتش ! والراجل اتدبس يا ولداه !
شرفتينا
Israa' A. Youssuf
ردحذف:))
ربنا يعزك يا رب ويكرمك ، إيه رأيك في فيلم العار ده ؟؟
ههههههههههههههههههههههههه
نورتينا
E73
ردحذف:))
ربنا يكرمك يا رب ، شكراً لذوقك
شرفتينا
ghada issa
ردحذف:))
صباح الفل يا أستاذة ، شكراً لذوقك وتعليقك الجميل ربنا يكرمك يا رب
نورتينا
لبنى أحمد نور
ردحذف:))
شكراً لذوقك يا أستاذة ، ربنا يكرمك يا رب
شرفتينا
ريـــمـــاس
ردحذف:))
صباح الفل يا أستاذة ، والله أنا قلت أنه راجل عسل ، وبعدين الست دي مفترية ، ده بدل ما تقول له بالهنا والشفا ؟؟
D:
هو كده مش هايبطل ياكل تورتة وبس ده هايبطل ياكل أساساً هههههههههههه
نورتينا
وصف الاحساس
ردحذف:))
ههههههههههههههههههههههههههه
خمس تورتات بس ؟؟
سبعتاشر يا أستاذة ولا يهمك وهو احنا غرمانين حاجة :))
بس بصفتي اللي كتب البوست ده فاسمحيلي حضرتك أخد منهم اتنين بس (قنوع أنا من يومي) والباقي هانوزعه رحمة ونور على فلوس الزوج هههههههههههههههههههه
شرفتينا
فشكووول
ردحذف:))
يا مرحب بأستاذنا الفاضل القدير
هههههههههههههههههههههههههههههه
هو فعلاً كده بالظبط زي ما حضرتك قلت ، وصاحبنا اللي دفع في الآخر !
والله الرجالة دول مظلومين حتى مع التورتة :(
مع أن المفروض أن التورتة في خدمة الشعب :))
شرفتنا
شيرين سامي
ردحذف:))
ربنا يكرمك يا دكتورة يا رب ويعزك ، يسلم لنا مرورك الجميل وتشجيعك الراقي
فرحتينا بزيارتك الجميلة
mira@
ردحذف:))
شكراً لذوقك ، ربنا يكرمك يا رب
- سامع الهتافات يا باشمهندس ؟؟؟؟
إن شاء الله ربنا هايطمننا عليه ويكون بخير ، وشوية صغننين نلاقيه فتح المدونة تاني ويرجع يبدع ويتألق :)
شكراً جداً ليكي
شرفتينا
ههههههههههه حلوة جداااا
ردحذفبجد الحوار جميل اوى
ضحكتنى والله ومكنش ليا نفس خااااااااالص :(
دمت بخير
رؤى عليوة
ردحذف:))
ربنا يكرمك يا رب ، متشكرين أوي لذوقك ومرورك الكريم ، مبسوطين أنه عجب حضرتك :)
نورتينا
صباح خفة الدم والروقان يا استاذ ):):
ردحذفكل سنة وأنت وأسرتك بخير وسعادة
حلوة، و الحلو فيها أن الحوار سريع قوي و ذكي، مقدرش أقول عفوي بس ينفع حوار في مسلسل من مسلسلات السيت كوم :)
ردحذفبس برضه فكرة أنه أكل تورتة لوحدة صعبة على فكرة مهما أن كان طفس، لييييييه يا عم؟ بطن ذرية دي و لا إيه؟
و كدة نحسب بقى بما أن أقل تورتة في محل حلويات نص نص بحوالي 75 جنيه تقريباً، اضرب بقى يا عم في تلاتة...يلحق يشتري دبوس الفرخة أحسن.
دمت بخير يا باشا
ديدي
ردحذف:))
يسعد صباحك بالخير والهنا والسعادة ، كل سنة وحضرتك وأسرتك الكريمة طيبين وبخير وبسعادة
نورتينا
سنكوح شنن لملوم سامي
ردحذف:))
اتفق معاكي في ملاحظتك بخصوص أن الحوار مش عفوي وبالذات في فكرة أنه ياكل تورتة لوحدة دي ، فعلاً ده حتى لو سيد قشطة :)
"يلحق يشتري دبوس الفرخة أحسن"
ههههههههههههههههههههه
والله على رأيك ع الأقل أوفر له :)
دمتي بخير وسعادة
شرفتينا
هههههههههههههههههههههههههههههههه تحفة تحفة
ردحذفوكله كوم و (صلي صلي ع النبي صلي دي كوم تاني )
ياكل التورتة لوحده المفتري بس حرام برده ده كان بيضحي علشانها :))))
تحياتي
افكار مبعثرة
ردحذف:))
ربنا يكرمك يا رب ويعزك ومتشكين جداً لذوقك الراقي وتشجيعك :)
بالنسبة للتضحية ، ما الراجل ضحى بالتورتة كلها لوحده أهه لحد ما بطنه وجعته
هههههههههههههههههههههههههه
نورتينا