أول علقة




- كان بقالنا كتير ما اتلمناش بصراحة .. كل واحد فينا اتفاجيء بالتاني ع القهوة .. وعرفت إن صابر 5 هو اللي اتصل بباقي الشلة ولمنا ع القهوة .
ملحوظة أولانيه : جميع الأشخاص المذكورين في هذا الموضوع من وحي الخيال ، وبالنسبة لاختيار الأسماء : صابر 1 ، صابر 2 ، صابر 3 ، صابر 4 ، صابر 5 ، فهذا لأن الناس دي كلها عندهم نت في البيت وممكن مرات أي واحد فيهم تدخل بالصدفة ع المدونة وتقرا الموضوع :-D
ملحوظة تانية : ربنا يستر

صابر 5 : أنا آسف يا جماعة إني نزلتكم في الجو ده !
صابر 3 : ما خلاص نزلتنا يا عم أنت هاتمثل .
صابر 5 : أنا أصلي بصراحة ما كنتش متوقع إن كلب فيكم هايعبرني وينزل يقابلني دلوقت عشان كده اتصلت بيكم كلكم ، واحشنّي يا أوغاد !
صابر 1 : وأنت أوحش .
صابر 2 : ما تنطق يا ابني الله يحرقك الجو رصاص !
صابر 5 : أنا اتخانقت مع مراتي .
صابر 4 : هههههههههههههههههه .. طب وريني قفاك كده !
صابر 5 : أنا باتكلم بجد !
صابر 1 : هات لنا طاولة يا عم ، الواد ده شكله رايق وهايخنقنا وأنا مش ناقص !
صابر 5 : نفسه تصعب عليه وعينه تدمع .. باقولكوا إيه أنا قايم .. انتوا أصلكوا جزم وهاتتريقوا عليا وأنا اللي فيا مكفيني !
صابر 2 : وأنت فيك إيه إن شاء الله ؟
صابر 5 : باقوللك اتخانقت مع مراتي !
صابر 3 : طب إيه المشكلة ؟؟ .. فين الموضوع ؟؟
صابر 5 : أصلها استفزتني فشتمتها راحت شتماني وحدفتني بالريموت وجريت ع الأوضة وقفلت على نفسها بالمفتاح !
صابر 1 : ولا يهمك ، أنا عندي ريموت زيادة في البيت ابقى خده ، بس ابقى شيله بعيد عنها .
صابر 5 : (بصوت عالي) .. ريمووووووت إيه وزفت إيه ؟؟ باقول لك ضربتني !!
صابر 4 : طب اهدى بس كده ووحد الله .. فرجت علينا القهوة الله يحرقك .. اللي أنا عاوز افهمه بجد منك دلوقت ومش باهزر والله العظيم ، أنت زعلان عشان ضربتك ؟؟
صابر 5 : أيوه طبعاً ! .. أنا أول مرة حد يضربني !
صابر 1 ، صابر 2 ، صابر 3 ، صابر 4 : ههههههههههههههههههههه
صابر 5 : بعد ما يشتم ويسب ويلعن .. يضحك معانا .
صابر 2 : لو تشوف منظرك وأنت بتقول ضربتني ! .. يموت م الضحك ! .. وبعدين برضة أنا مش فاهم أنت مكبر الموضوع كده ليه ؟ .. ما كلنا بنتضرب من مراتتنا .
صابر 3 : معلش يا ابني ده أصله مستجد ! .. بــُص ! هي دايماً أول مرة بتبقى صعبة كده بعد كده هاتتعود صدقني .
صابر 4 : أهم حاجة ما تضربكش على قفاك !
صابر 2 : أه الضرب ع القفا إهانة .
صابر 1 : وبعدين أنت أصلك غشيم .. عارف هي لما ضربتك كنت عملت إيه ؟
صابر 5 : وقد بدأ عليه الذهول .. كنت عملت إيه ؟؟
صابر 1 : كنت طلعت لها لسانك وقلت لها ما وجعتنيش !
صابر 5 : نعم يا فالح ؟؟
صابر 3 : أه والله يا ابني .. عارف لو كنت عملت كده معاها ؟؟ .. كانت اتجننت !
صابر 5 : ده كان ممكن الريموت يخـُش فِ عيني يصفيها !
صابر 2 : طب الحمد لله ربنا ستر ، بعد كده يا حمار لما تتخانق اختار مكان تعرف تستخبى منها فيه .. يعني أنا مثلاً لما باتخانق مع مراتي باجرجرها لأوضة العيال ، طبعاً هي لئيمة بتبقى عاوزه تجرجرني للمطبخ بس على مين ؟
صابر 4 : وبعدين اوعى تشتمها حتى لو شتمتك .. يا سيدي لو الشتيمة حرقتك أوي ، قوللها الله يسامحك الشتيمة بتلف تلف وترجع لصاحبها !
صابر 3 : عارف ؟؟ .. هاتلاقيها بتهري في نفسها ! .. وبتنكشك وبتستفزك بأي طريقة علشان ترد عليها ! .. ولا كأنك سمعت حاجة ، كأنك هوا .
صابر 1 : المهم إنها بعد ما تهدى ، تروح تصالحها !
 صابر 5 : أنا اللي أصالحها ؟
صابر 2 : أه طبعاً ، وتتحايل عليها كمان !
صابر 3 : ولا أنت عاوز مسلسل النكد يستمر ؟
صابر 2 : كله من التليفزيون ! .. هو اللي بوظ دماغ الرجالة و فِ الآخر بيتنفخوا في البيوت !
 صابر 4 : بــُص ! .. لما تشوف راجل ماشي هو ومراته في الشارع ومنشكح أوي وبيضحك تعرف إن ده لسه مضروب طازة ، أما اللي ضارب بوز ومش طايق نفسه فده لسه يا عيني هايروح ياخد العلقة !
صابر 5 : طب لو ماشي معاها عادي وما بيتكلمش ؟
صابر 1 : ده تلاقيه أخرس يا عيني هههههههههههههههههههههههههه
صابر 3 : أنت فكرك يعني أبوك لما كان بيزعق لأمك قدامك ده كان بجد ؟؟
صابر 5 : أمــال إيه ؟؟
صابر 2 : دي تمثيلية يا حمار !! .. يا ابني هما كانوا بيتفقوا من ورانا إنه يشخط فيها ويزعق لها قدامنا عشان يحافظ على برستيجه ، إنما من ورانا كانت بتظبطه !
صابر 4 : أنت ما حدش قاللك على التلات قواعد بتوع الخناقات ؟؟
صابر 5 : لأ والله !
صابر 1 : يا ضنايا !!
صابر 4 : طب هات ودنك أحسن يكون فيه حد عازب قاعد ويسمعنا ! .. تاني قاعدة ...
صابر 5 :  أمال إيه هي أول قاعدة ؟؟
صابر 2 : ما تستعجلش على رزقك ، هاتعرفها لما تروح !
صابر 5 : طيب !
صابر 4 : تاني قاعدة يا سيدي : ما تنامش أنت ومراتك متخاصمين لأي سبب !
صابر 5 : اشمعنى ؟
صابر 3 : عشان ما تديهاش فرصة تفكر في طريقة تخلص عليك بيها !
صابر 1 : تالت قاعدة : اوعى تروح لأمك وأنت متخانق مع مراتك !
صابر 5 : ليه ؟؟
صابر 2 : عشان يا إما هاتسم بدنك وتنكد عليك وتشحنك زيادة على مراتك ..
صابر 4 : يا إما هاتنكد على مراتك لما تشوفها وبالتالي هاتنضرب تاني من مراتك !
صابر 3 : باقولكوا إيه ؟ .. ياللا نروح أحسن الجو صعب !
صابر 1 : ياللا استهدى بالله وروح صالح مراتك ، التأخير مش في مصلحتك !
صابر 5 : لأ أنا هاقعد شوية مع نفسي .. غوروا انتوا !
صابر 2 : شكلك كده مش هاتهمد إلا أما تعرف أول قاعدة !
صابر 1 ، صابر 2 ، صابر 3 ، صابر 4 : ههههههههههههههههههههههههه .. سلام
صابر 5 : ســلام !


ولما عاد صابر 5 إلى منزله وجد زوجته قد أوصدت باب الشقة من الداخل بالمزلاج ، وفي الصباح بعث بالرسالة التالية لأصدقائه :
"أول قاعدة : ما تسيبش البيت لما تتخانق مع مراتك ، لأن النوم ع السلم بيكسر الضهر".

تعليقات

  1. βent Pasha31‏/01‏/2012، 12:48:00 ص

    أنا رأيي برضة إن الصابرين بخير :))

    ردحذف
  2. هدير31‏/01‏/2012، 12:51:00 ص

    تحفة جدا
    تعرف كدا طمنتني على نون النسوة كلها
    بجد جميييييييلة و ربنا يكثر من الصابرين :)))

    ردحذف
  3. P A S H A31‏/01‏/2012، 1:05:00 ص

    βent Pasha
    :))
    قلنا له كده والله
    هههههههههههههههههه
    لكن تقولي إيه بقى رجاله مش عارفين مصلحتهم !

    ردحذف
  4. P A S H A31‏/01‏/2012، 1:08:00 ص

    هدير
    :))
    لا لا لا اتطمني ع الآخر :)
    المشكلة ما بقتش في نون النسوة ، المشكلة مين هايطمن الرجالة ؟؟
    ههههههههههههههه
    نورتينا والله بزيارتك الجميلة وتعليقك الأجمل
    :)
    تحياتنا

    ردحذف
  5. Israa' A. Youssuf31‏/01‏/2012، 1:57:00 ص

    طمنتني على مستقبلنا والله D:
    وبرضه الصبر حلو D:

    ردحذف
  6. E7331‏/01‏/2012، 2:28:00 ص

    بنت باشا

    انتي كدا ضمنتي انه مش هيسيب البيت

    عيشي حياتك بقى

    واهو هو اللي جابه لنفسه

    انا طبعا بهدي النفووووووووس

    ردحذف
  7. ريـــمـــاس31‏/01‏/2012، 5:41:00 ص

    صباح الغاردينيا
    هههههههههههههههه
    بجد حلوة اوي ماكان صالح مراته احسن من النوم على السلم بس بجد انا عاوزة افهم حاجة هو معقوله فيه ست بتضرب جوزها ؟؟؟ <<< بتسأل ببراءة :) "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  8. وصف الاحساس31‏/01‏/2012، 8:53:00 ص

    الله يرحمك يا رجوله
    كل ده بيحصل واحنا نايمين علي ودانا
    صابر .. صابر ... صابر
    ربنا يصبرهم كمان وكمان
    جميله والله تسلم ايدك
    تحياتي

    ردحذف
  9. Tarkieb31‏/01‏/2012، 11:17:00 ص

    ههههههه والله انا ادمنت خلاص إسلوبك ......حلوة اوووووي اكيد لو حد نام مرة ع السلم حيخلى دي القاعدة رقم واحد حلقة في ودنة وهههههه وتوبة والنبي توبة....احسنت يا معلم....بس شكلك شفت جارك نايم ع السلم فجالك وحي القصة؟؟ صح؟؟؟ اصل كل قصة عندك لها اصل م الحقيقة ههههههههه

    ردحذف
  10. افكار مبعثرة31‏/01‏/2012، 11:28:00 ص

    ههههههههههههههههههههههههههههههههههههههههههههههههههههههههههههههه
    لا لا لا انا اشجب و احتج على هذا الظلم الفادح الواقع على الجنس الناعم اللطيف الظريف الحوناين المهاود هههههههههههههههه دي الست دي كائن جميل جدا ما يتسمعلوش صوت و تحطه جنب الحيط ههههههههههههه
    انا مش بكدب على فكرة هههههههههه
    تحياتي لاسلوبك الرائع بجد ضحكت جامد جدا و طبعا انت ملتزم بالقواعد دي و حاططها حلقة ف ودنك :)
    تحياتي

    ردحذف
  11. Sarah ..31‏/01‏/2012، 12:00:00 م

    كنت هزعل لما لقيت الحوار خلص من غير ما أعرف أول قاعدة
    بس انت لحقتنى بيها فى الاخر :))

    تسلم يا شريف بجد ولازم أشكرك
    لانى كل مرة بكون هنا .. بضحك أوى بجد .. :)

    ردحذف
  12. AhMeD RaDy31‏/01‏/2012، 1:59:00 م

    باشا

    انا امبارح شوفت البوست اول لما نزل

    بجد ضحكت من قلبى !

    وخاصة على التعليقات من اصحابه والالش وطريقة تجنب العلقة

    وازاى وبكل بساطة تكون كرجل عندك روح رياضية وتدافع عن نفسك بحرق دمها بدون مجهود عضلى .. فقط امسك اعصابك واستهبل

    من الاخر البوست دا مسخرة

    والقاعدة الاولى كان لازم يعرفها على طول من اول لما فكر انه اساسا يسيب البيت

    ولنا الله معشر الرجال

    ردحذف
  13. ماجد القاضي31‏/01‏/2012، 3:32:00 م

    السلام عليكم

    ضحكتني بجد.. جميلة جدا..

    القاعدة صفر، إنك ماتقرأش نصائح زي دي ومراتك بتدخل معاك على النت!!!!!!!!!!!

    بس يا ريت الصابرين دول يحترمو بعض شوية... يعني لا احترام في البيت ولا ع القهوة!!!! :)

    تحياتي.

    ردحذف
  14. ♥نبع الغرام♥♪≈31‏/01‏/2012، 4:20:00 م

    متشكرة ليك بجد لانك رسمت بسمة جميله اوى على شفتياى كنت محتاجها موت

    ربنا يعزك يارب وكل عام وانت بخير

    ردحذف
  15. وينكى31‏/01‏/2012، 9:26:00 م

    هههههههههههههههههههههههههههههههههههههههههههههههههههههههههههههههههههه

    بجد زي العسل
    انا مت من الضحك على جملة " ماوجعتنيش"

    بس على فكرة مش دايما دا اللي بيحصل
    والله الستات غلبانين جداااا
    انت بس ما تنرفزهمش وكله هايبقى كويس :)

    ردحذف
  16. Carmen31‏/01‏/2012، 10:53:00 م

    =)) لا لا لا لا بجد مش قادرة ابطل ضحك :))

    جامدة تسلم ايدك

    ردحذف
  17. reemaas01‏/02‏/2012، 1:25:00 ص

    انا قلبى وجعنى من الضحك
    هههههههههههههههههههههه

    اختيار الاسامى والاسلوب تحفه بجد

    وبالنسة للنايح فى الجووووون يا باشا بجد

    وكله كوم واكتشاف اول قاعدةكوم تانىانا حاولت اخمنها ماعرفتش ههههههههه

    ردحذف
  18. rona ali01‏/02‏/2012، 3:05:00 ص

    هههههههههههههههههههههههههههههههههههه

    اختيار الاسامى رهيب بجد وتكمله كل واحد لحوار التانى كان مش فصلنى بتاتآ لذلك انا بطنى وجعتنى من الضوحك ^_^

    بقالك كام بوست في العلالى ربنا يسعدك دايمآ انت وزوجتك الصابرة دى :)

    ردحذف
  19. faroukfahmy5804‏/02‏/2012، 10:22:00 ص

    انا لست معك يا باشا
    انا اتصور ان التوم على السلم افضل من التوم مع انسانه مش عاوزانى وتوصد الباب فى وشى
    ده كلام ياراجل
    طب الواحد لازم يمتحن زوجته فى مثل هذه المواقف عشا يجرب نوم السلم ههههههههه
    حاولت ان اشترك ضمن متابعينك ولم اجد مربعك الجميل
    طب اشترك انت بقى على الاقل عشان اتابع اعملك الجذابة

    ردحذف
  20. شفـقــة و إحســــان05‏/02‏/2012، 8:08:00 م

    رائعة تسلم

    ردحذف
  21. P A S H A07‏/02‏/2012، 4:06:00 م

    Israa' A. Youssuf

    :)

    طب الحمد لله إني طمنتكوا ، انتوا بس امشوا ع الكتالوج وكله هايبقى تمام إن شاء الله :))

    نورتينا

    ردحذف
  22. P A S H A07‏/02‏/2012، 4:09:00 م

    E73

    :))

    وهو فيه حد عاقل يسيب البيت في السقعة دي ؟؟
    :D

    وأتاريها بتضحك
    هههههههههههههههههههههههههه

    ماشي ماشي

    ردحذف
  23. P A S H A07‏/02‏/2012، 4:12:00 م

    ريـــمـــاس

    :))

    نقول إيه بقى ، قلة عقل بعيد عنك !

    بالنسبة لسؤالك البريء عما إذا كانت فيه ست بتضرب جوزها .. فثبت علمياً إن في كوكب المريخ ما فيش الكلام ده خاااااااااالص D:

    نورتينا

    ردحذف
  24. P A S H A07‏/02‏/2012، 4:16:00 م

    وصف الاحساس
    :))

    "كل ده بيحصل واحنا نايمين علي ودانا"

    وأكتر من كده وحياتك .. قطعوا الرجالة وقطعت سيرتهم ، أمال أنا ما باحبهمش ليه
    هههههههههههههههههههههههههههههههه

    ردحذف
  25. P A S H A07‏/02‏/2012، 4:23:00 م

    Tarkieb
    :))

    "اصل كل قصة عندك لها اصل م الحقيقة" فَشَر .. هو أنا مجنون عشان أقع بلساني وأقوللك إن .........

    لا يا عم ، الجو سقعه والعضمه كبرت D:

    وبعدين بيني وبينك (أنا ما عنديش ترباس أساساً) نياهاهاهاها

    ردحذف
  26. P A S H A07‏/02‏/2012، 4:24:00 م

    افكار مبعثرة
    :))

    "دي الست دي كائن جميل جدا ما يتسمعلوش صوت و تحطه جنب الحيط" .. طب والحيط ذنبه إيه بس ههههههههههههههههههههههه

    غير معرف
    عشان المدام جنبي

    ردحذف
  27. P A S H A07‏/02‏/2012، 4:41:00 م

    Sarah
    :))
    A votre service
    :)
    ربنا يكرمك يا رب ، بتفرحونا بزيارتكم والله
    :)

    ردحذف
  28. P A S H A07‏/02‏/2012، 5:12:00 م

    AhMeD RaDy
    :))
    برنس والنعمة ، ربنا يحميك يا أحمد :)

    شوف أنت لخصت البوست كله وحال الرجاله عموماً في كلمة واحدة : "وتدافع عن نفسك "
    احنا لازم نطالب بالمساواة واه واه واه
    عن نفسي أنا عاوز علبة سجاير وتُمن لب سوبر وأقعد جنب الشباك D:

    ردحذف
  29. P A S H A07‏/02‏/2012، 5:22:00 م

    ماجد القاضي
    :))
    وعليكم السلام ورحمة الله وبركاته
    منورنا والله يا أستاذنا :)

    بالنسبة للقاعدة صفر .. علم وينفذ يا ريسنا .. بس القواعد المنشورة هنا دي قواعد للتمويه على العدو ، أما القواعد الأصلية فهي في كتاب النحو D:
    أما الصابرين اللي هنا دول زي ما تقول حضرتك كده بيطلعوا غلبهم في بعض ! يعني لا يبقى في البيت ولا ع القهوة ؟
    هههههههههههههههههههه

    شرفتنا

    ردحذف
  30. P A S H A07‏/02‏/2012، 5:24:00 م

    ♥نبع الغرام♥♪≈

    :))

    يا أستاذة احنا اللي بنشكركم بجد على تشريفكم لينا ودعواتكم الطيبة اللي بتفرحنا والله :)
    ربنا يكرم حضرتك وكل سنة وانتي بألف خير وصحة وسعادة إن شاء الله

    ردحذف
  31. P A S H A07‏/02‏/2012، 5:27:00 م

    وينكى

    :))

    "انت بس ما تنرفزهمش"
    هههههههههههههههههههههههههههههههه
    ههههههههههههههههههههههههههههههههه

    وربنا تعليقك زي العسل ، ربنا يسعدك يا رب :)

    هاتيلي راجل واحد .. وان أونلي مان .. يقدر ينرفز واحدة ســت ؟؟

    ههههههههههههههههههههههههه

    أما من جهة غلبانين .. فهما غلبانين .. أنا أقدر اتكلم ؟؟؟
    :D

    ردحذف
  32. P A S H A07‏/02‏/2012، 5:30:00 م

    Carmen

    :))

    تسلمي يا أستاذة ، ربنا يكرمك يا رب ويسعدك :)

    ردحذف
  33. P A S H A07‏/02‏/2012، 5:33:00 م

    reemaas
    :))
    هههههههههههههههههههههههههههه
    ربنا يكرمك يا رب ويسعدك ، بالنسبة لأول قاعدة .. هو برضه حاول يخمنها وماعرفش ومن ساعتها وهو بيضحك
    ههههههههههههههههههههههههه

    ردحذف
  34. P A S H A07‏/02‏/2012، 5:37:00 م

    rona ali

    :))

    هههههههههههههههههههههه

    ربنا يكرمك يا أستاذة ويسعدك ، متشكر أوي لذوقك ودعوتك الطيبة :)
    بالنسبة للأسامي .. فالبوست أصلاً وهمي .. أمال إيه ! .. دول صحابي يا عالم D:

    ردحذف
  35. P A S H A07‏/02‏/2012، 5:45:00 م

    faroukfahmy58
    :))

    يا ألف مرحب بعمنا الغالي وأستاذنا القدير ، منورنا والله :)

    من جهة أن النوم على السلم أفضل من البقاء مع إنسانة زي دي .. فهو بصراحة أفضل D:
    بس أنا بصراحة فضلت ما أقولش الرأي ده أحسن أصحاب العمارات يطمعوا في السلالم ويأجروها بعد كده لوحدها للأزواج المساكين :(
    وبعدين أنا مش موافق حضرتك على موضوع الامتحان ده .. لأنه بياخد وقت هههههههههههههههههه
    شرفتنا

    ردحذف
  36. P A S H A07‏/02‏/2012، 5:45:00 م

    شفـقــة و إحســــان
    :))

    ربنا يكرمكم يا رب ويجازيكم كل خير
    :)
    نورتونا

    ردحذف
  37. EMA10‏/02‏/2012، 11:34:00 ص

    ههههههههههههه

    لا فظيعة بجد

    حوار تحفة بجد يموت من الضحك ..و لو انه ظلم برده الستات طيبين اوى و الله بس النفس بقى ههههههههه

    تسلم ايدك يا باشا على الموضوع الجميل


    دمت بخير

    ردحذف
  38. eng_semsem10‏/02‏/2012، 10:36:00 م

    كلنا صابرين وراضين بس هما يرضوا ويسبونا في حالنا
    ههههههههههههههه
    جميله قوي وبجد ضحكت من قلبي
    تحياتي

    ردحذف
  39. P A S H A12‏/02‏/2012، 7:39:00 ص

    EMA

    :)

    ربنا يكرمك يا رب ، وياشكرك على مرورك الكريم وتعليقك الطيب الراقي

    شرفتينا

    ردحذف
  40. P A S H A12‏/02‏/2012، 7:40:00 ص

    eng_semsem

    :)

    تروح فين الشمس من على قفا الفلاح ؟ D:

    هههههههههههههههههههه

    منورنا

    ردحذف
  41. zizi02‏/03‏/2012، 1:15:00 ص

    لا لا لا انت ما حصلتش بجد ..وبعدين الحوار مترابط بطريقة تلقائية رائعة الله يخليك ضحكتني بعد أغنية محمد فؤاد الكئيبة ..

    ردحذف
  42. P A S H A05‏/03‏/2012، 4:17:00 ص

    zizi
    :))
    ربنا يفرحك يا رب زي ما بتفرحينا بتعليقاتك الحلوة المشجعة :)

    أسعدتينا جداً بمرورك الراقي الجميل وتعليقك الرائع
    :)
    لك منا أطيب تحية وأجل تقدير واحترام

    ردحذف

لا يسمح بالتعليقات الجديدة.