كل سنة وأنتم طيبين



وإن شاء الله السنة الجديدة تكون سنة خير وسعادة على الجميع ... وتحققوا فيها كل أحلامكم ... تفائلوا في الله خير يا جماعة ... وإن شاء الله ربنا هايكرم الجميع .
طبعاً بما إني عدت للتدوين (غلس غلس صحيح) ... وطبعاً لإن السنة دي كانت بالنسبة لي سنة لوز بكل ما تحمله الكلمة من قشر ... فانا هاختمها بالبوست ده ... ولإني في الفترة اللي فاتت اتشرفت بناس مدونين زي العسل بجد باعتبرهم أحلى حاجة حصلت لي على مدار الموسم وكل موسم ... فأسمحوا لي ولأول مرة وحصرياً (مش من الزنقة عشان ما تفهموش غلط) أنشر لكم صورتي أنا والفاموليا ... ده طبعاً بإعتبار إن كلنا عيله في القناطر ... قصدي في التدوين .






ههههههههههه
شفتوني أنا والمدام والكيدز ؟ ... قمر ولا لأ بذمتكم ؟ ... أجنن مش كده ؟ ... شفتوا العيال قمامير إزاي ؟ ... ولعلمكم دول كانوا لسه صاحيين م النوم ... (بعماصهم يعني) هههههههههه
حاجة غريبة والله ... آهو أنا إذ بافتح الكمبيوتر من يومين اتفاجئت بالصورة الشنيعة دي ... بيني وبينكم قرفت قوي أول ما شفتها ههههههههه ... وحسيت إن نفسي غمت عليا ... إيه ده ؟؟ ... لأ بجد ... إيه ده ؟؟ ... هو فيه كده ؟؟
إيه الناس النضيفه دي ؟؟ ... كل اللي أعرفه إن الأخ اللي في الصورة دي بيلعب تنس ... وأكيد المزه اللي جنبه دي حرمه (يعني بمخكم كده هايتجوز أم حباحه بتاعة البيبسي ؟) ... وجوز الملايكه دول ولاده ... أو بناته ... بذمتكم لو أنتوا مكاني تعملوا إيه ؟؟ تسكتوا ؟؟ ... قلت وديني ما أنا عاتقك ... هاخدك المدونة وأخليك عبرة لمن تعتبر (حقد حقد يعني مش تهريج) نياهاهاها .
الأول بس أنا عاوز أعرف حاجة ... أنت قمور كده إزاي ؟ ... إيه بتستحمى كل 5 دقايق ؟؟ ... طب ده أنا لو كنت عشت التلاتين سنة اللي فاتت في الحمام ما كنتش هابقى قمور كده ! ... حمام إيه ؟؟ ده أنا لو كنت باكل صابون يا راجل ما كنتش هابقى مشع للدرجة دي ! ... آه ... ليك حق ... ما أنت بتلعب تنس ... ما كنتش بتتخانق زينا مع العيال في الفسحة على الدوم عشان تلعبوا بيه كوره !! ... طب ده أنا لما لعبت راكت في رأس البر ما حدش عرف يكلمني جمعتين !! ... ده لو لعب التنس بيعمل كده ... أنا أتنـّس من بكره ... غور من وشي ... مش طايق أبص في سحنتك و أنت شبه القصريه !! ... ومش هاتكلم ع المزه اللي معاك عشان عيب(هاسيب الطلعه دي للزميلات .. ومش هاوصيكوا بقى في التعليقات عاوزكوا ... فاهمني طبعاً ؟؟)
وإيه العيال دي ؟؟ ... لأ بجد ... دول أطفال بحق وحقيق ؟؟ ... مش بوستر يعني ؟؟ ... أمال اللي عندنا دول إيه ؟؟ دمامل ؟؟ أبراص ؟؟ ... بالأمانة دول لو عيالي أنا أشـَحتهم لواحد نضيف يربيهم ... بدل ما العيل من دول يكبر ويكتشف إني أبوه (ده على أساس إنه هايصدق أصلاً) ويهريني تفافه .... ده أنا اتكسف أبوسه ... أتكسف إيه ؟؟ ده أنا انتحر لو فكرت أبوسه !! ... ده أنا أأجرة للحوامل عشان يتوحموا عليه ... والبصة بخمسة جنيه والحسابه بتحسب !!
** كنت أيام الجامعة اشتركت في حملة تطعيم ضد شلل الأطفال تبع وزارة الصحة (بجد والله) ... كنا بننزل أنا وممرضة وواحدة ست عاملة (خدمات معاونة) عشان نطعم الـ الــ ... مشوها الأطفال ... وحظي اللي زي القرنبيط وقعني في منطقة بطن البقرة بمصر القديمة ... وأقسم بالله العظيم وأنا باطعم عيل من دول في مرة (أساساً بتبقى المشكلة إنك تفتح بق العيل) كان عامل بقه دكانه ... جاي باطعمه لقيت فيه دبانه طالعه من بقه !! ... قلت لأمه ده مش محتاج يتطعم يا حاجة ... بس أمانة عليكي ما تخليهوش يعض عيل أحسن يسمه ويجيب لكم مصيبة !!
العيال دي طيب بتاكل عادي كده زي العيال عندنا ؟؟ ... أصل احنا عندنا تلاقي الواحدة من دول بترمي العيل بلبوص في الشارع وتسيبه يلقط زي البط !!
** تحت كوبري أبو الريش (قبل حبايب السيدة كده) فيه واحدة متسولة معروفه قوي هناك تقدروا تقولوا المكان ده موطنها الأصلي ... كنت هناك في مرة مستني واحد (كان واقف بيعمل زي الناس وانا كنت باحدفه بالطوب ههههههه) ... ولقيت ابنها المتسول الصغنن ماسك جوافايه ... فالواد تقريباً ما كانش مستطعمها ... راح ملغمطها في التراب وقعد ياكل ...فاستلذذ قوي ... راح قعد يلغمط وياكل ... تقولوا طرشي يا أخواتي هههههه
بالحق ... تفتكروا العيال دول اساميهم إيه ؟؟ ... أكيد مش رزق ونجفة ؟
( على فكرة أنا باحب اتفرج على التنس جداً ... خاصـــة زوجي السيدات ... اللي بيلبسوا جيبات قصيرات مبهجات نياهاهاهاها )

- عاوز أقوللكم على حاجة وتصدقوني ... كل واحد فينا ... جميل ... بجد جميل ... مش شرط يكون جميل الصورة ... ممكن يكون جميل الروح ... الأخلاق ... الطباع ... الموهبة ... اللسان ... جميل بإنسانيته ... بمعاملاته ... بدينه ... بحاجات كتييييييييره جداً ... بتميزه عن غيره من البشر ... بس الفرق في اللي يعرف مصدر جماله ... نقطة النور اللي فيه ... ويحافظ عليها ... ويتقي الله فيها ... ويحمده ويشكر فضله إنه أنعم عليه بيها ... واللي ما يعرفش ... يدور ... ويدور ... ما ييأسش ... أكيد هايلاقي ... وساعتها ... هايكتشف إنه أجمل واحد في الدنيا بحالها .

*******************************************

كل سنة وانتوا طيبين ... وحلوين ... وقمورين ... ودايماً يا رب في الخير والسعادة غرقانين ... وبراحة البال والصحة والستر متهنيين ... وسنة سعيدة علينا كلنا إن شاء الله أجمعين ... والسنة الجايه نكون على عرفات واقفين . آمين آمين آمين
**
رجـــاء
باعتذر لأي حد ممكن أكون قد أسأت إليه بقصد أو بدون قصد ... حتى لو بهزار ... وباطلب منه إنه يسامحني ... ممكن ؟

(لو كان للذنوب رائحة ... ما جالسنا أحد) كلمة من السلف الصالح .. ربنا يغفر ذنوبنا جميعاً إن شاء الله

بحبكم كلكم
سلام
أخوكـــم
P A S H A
  

تعليقات