تخيلت أني رحت هناك

"أصلي مش رايح في حتة .. أصلي مش قاصد مكان"

تخيلت أني رحت هناك .. فارتحت وابتسمت .. كنت راكب بيجو وواخد النفرين اللي قدام جنب السواق .. كان مشغل أغنية "لولا الملامة" .. "لولا الملامة يا هوى لولا الملامة،، لأفرد جناحي ع الهوا زي اليمامة،، وأطير وأرفرف بالفضا وأهرب من الدنيا الفضا وكفاية عمري اللي انقضى وأنا باخاف الملامة،، وأه م الملامة" .. كنا بعد العصر بشوية .. الجو كان حلو .. كنت لابس قميص أبيض نص كم .. ومرتاح .. كنت منسجم قوي مع الحالة .. منظر الشجر والترعة اللي على جنب .. السواق الرايق والركاب الساكتين كأنهم مش معانا .. الطريق كان فاضي .. السواق ما كانش بيجري .. يا دوب 80-90 كم / س .. كان قدامنا عربية نقل قديمة .. بلوحة مرور حمرا قديمة .. العربية كان مدلدل منها جركن أحمر مقطوع من تحت جواه لمبة .. كان بيتهز زي البندول .. بس لقدام وورا مش يمين وشمال .. سرحت في نفسي .. بعدين شفت سرب طيور في السما قدام عيني .. فضل يعمل تشكيلات وبعدين دخل يمين .. واختفى .. أنا عايز أعيش هنا .. المكان ده بييجي على بالي كتير .. زي ما باوصفهولك كده بالظبط .. مع أنه مش أجمل مكان شفته .. بس أنا باحبه .. باحب اللحظة دي زي ما هي كده .. عربية بيجو وأغنية شغالة بصوت واطي .. لوردة أو ميادة الحناوي أو عفاف راضي أو شريفة فاضل .. أو أي أغنية تحس أنك أول حد يسمعها وأنها بتتغنى لك أنت بس وبتناغشك .. فتفرح قوي من جواك وتقرر تحافظ ع السر ده وما تقولوش لحد .. عربية نقل مدلدل منها جركن أحمر مقطوع .. وشجر وترعة وسرب طيور .. وبعد العصر .. حكم أصل كل مكان مرتبط معايا بحاجة معينة هي اللي باحبها وباحبني فيه جدا .. لفيت كتير أنا قوي .. أنا لفيت كتير .. كتير .. بس عايز الحق؟؟ .. مصر جميلة .. جميلة جميلة جميلة فوق ما تتصور .. أه والله العظيم يا عم .. وما يتشبعش منها .. منغشش في نافوخي مدينتين .. بالنسبة لذوقي هما الأجمل والأنسب في الأماكن اللي قفزت عليها بس البني آدم طماع يا ابن عمي .. وكل ما تلف في مصر أكتر .. تشوف جمال خام أكتر .. جمال بكر تخاف تبص عليه لتجرحه أو تحسده .. تعرف وتقتنع وتأمن أن واحد زيك ما ينفعش يتلم ويتحبس في مكان واحد .. طب يرضي مين بالذمة أننا نسيب الجمال ده كله كده؟؟ هباء؟؟ من غير ما نشوفه ونتملى منه ونمري روحنا بيه؟؟ .. إيييييه .. مصر حلوة .. حلوة قوي والله .. بابقى عايز أكتب وأحكي والله بس بعد كده باغير رأيي .. ليه؟؟ .. "سألوني كتير سألوني سألوني عليه: بتحبيه؟؟ أيوه أيوه وهانكر ليه؟؟ بصوا لي ملام وقالوا لي كلام جراح،، فرشوا لي الأرض دموع والشمس جراح،، كل ده كله علشان حبيت؟؟ ولا علشان قلت أن أنا حبيت؟؟ يا عيون عطشانة عطشانة سهر يا قلوب تعبانة تعبانة سفر،، كتروا م الحب تلاقوا تلاقوا في الضلمة ألف قمر،، بنحب يا ناس؟؟ نكدب لو قلنا ما بنحبش،، بنحب يا ناس؟؟ ولا حدش في الدنيا ما حبش،، والدنيا يا ناس من غير الحب ما تنحبش،، حتى اللايمين زينا عاشقين،، لكن خايفين لايمين تانيين"

* الكلمات الملونة من أغنية: "لولا الملامة" - كلمات: مرسي جميل عزيز - ألحان: بليغ حمدي - غناء: وردة

                              ...... ربما أكمله في وقت لاحق بإذن الله

تعليقات