نقتله إزاي؟؟

اتفقنا أننا نقتل المجرم الظالم ونريح البلد من طغيانه وشروره، لكن اختلفنا إزاي نقتله .. ولما كنا ناس طيبين ومالناش في الإجرام، روحنا للمجرم التاني اللي في البلد. في الأول، قعد ينصحنا ويوعظنا ويخوفنا من عقاب القتل في الآخرة، لكن لما شافنا مصرين على رأينا، وافق بعد ما طلب منا مبلغ كبير .. كبير جدا الحقيقة .. خرجنا من عنده بعد ما وعدناه أننا هندبر المبلغ في أسرع وقت .. "احنا صحيح عاوزين نخلص من المجرم النهاردة قبل بكرة، بس حرام ندفع المبلغ الكبير قوي ده في قتله" .. "ده القتل طلع بيكسب يا ولاد واحنا ما نعرفش!!" .. "تلاقي الجدع ده قاعد على تل فلوس" .. "لا بس برضه يا أخي شغلانة صعبة وعاوزة قلب ميت وأعصاب من حديد" .. "يعني هتكون أصعب من العيشة اللي احنا فيها؟؟" .. "على رأيك، شفت بيته أبهة إزاي؟؟" .. "شفت يا أخويا، ما تحسرناش بقى على حالنا" .. "بيت إيه اللي بتتكلموا فيه؟؟ أنتوا ما شفتوش مراته؟؟" .. "لأ طبعاً، بصيت عليها لما كان بيصلي، أجمل واحدة شفتها في حياتي" .. "تلاقيه مصاحبها، هو اللي زي ده بيتجوز زينا؟؟" .. "على رأيك" .. "وجايز يكون خاطفها من أهلها" .. "خاطفها إزاي؟؟ والعيل الصغير اللي كان على دراعها؟؟" .. "تلاقيه خاطفه هو كمان" .. "لأ، ما فيش راجل يعرف يخطف عيل، أكيد المجرمة هي اللي خاطفاه" .. "صح، وبعد كده يطلبوا فدية من أهله" .. "صحيح" .. "يوه؟؟ أنتوا خرجتونا من موضوعنا ليه؟؟" .. "قصدك العيل ولا الولية؟؟" .. "لأ هو قصده البيت الأبهة" .. "لأ بيت إيه؟؟ هو يقصد الفلوس المتلتلة اللي عند المجرم، مش كده؟؟" .. "والله ما أنا عارف!!" .. "لأ أنت عارف بس مكسوف تقول" .. "مش مسألة كسوف، الفكرة بس مين اللي هيقتله؟؟" .. "زي ما كنا هنقتل الأولاني" .. "وهنجيب مجرم تالت منين بس؟؟" .. "المجرمين كتير، المشكلة هنجيب له فلوس منين؟؟" .. "وكمان إزاي نضمنه؟؟ مش جايز بعد ما يقتلهولنا يطمع في الفلوس والبيت والولية وياخدهم لنفسه؟؟" .. "صحيح، وساعتها ما حدش فينا هيقدر يفتح بقه معاه" .. "يا جماعة تفاءلوا خير وبلاش سوء الظن ده، مش جايز ربنا يوقعنا في مجرم ابن حلال؟؟" .. "مجرم وابن حلال؟؟ بس!! يبقى ما فيش غير المجرم بتاعنا اللي كنا هنقتله" .. "طب والله فكرة، وآهو ع الأقل عارفينه وضامنينه" .. "نفس اللي كنت بافكر فيه، بصراحة أنا شايف أننا اتسرعنا في الحكم عليه" .. "كانت لحظة غضب، والحمد لله أن ربنا نور بصيرتنا ورجعنا لصوابنا قبل ما نقتله ونسيب المجرم الظالم ده يتحكم فينا ويذلنا بحكمه ومواعظه" .. "مؤكد ربنا عمل كده علشان احنا ناس طيبين ومالناش في الإجرام" .. "طب وافرض أنه ما رضاش يقتله؟؟" .. "ما يرضاش إزاي؟؟" .. "يا أخي أنا باقول افرض" .. "يبقى ساعتها نقتله" .. "نقتله إزاي؟؟".