العيش والشغل

لازم نشتغل. علشان الـ (فلوس). وبعدين نحاول نحوش الفلوس دي علشان نعرف نشتغل شغلانة تانية بفلوس أكتر يمكن نقدر نعيش. بس العيشة بتغلا والفلوس الكتير ما بتكفيش، بالتالي؛ لازم نشتغل أكتر وأكتر علشان نكسب فلوس أكتر تخلينا (يا دوب نعرف نعيش). بس غالباً (الحلم) ده ما بيتحققش. ليه؟؟ مش بس لأننا بنكون على طول شغالين ومطحونين، لكن لأننا بنكون مفلسين معنوياً مش عارفين إزاي نعيش؟؟ –ما اتعودناش يا أخي- حتى لو كان (أحياناً) معانا فلوس. ومش عارفين إيه هي الحياة؟؟ –ما جالناش السؤال ده في الامتحان- غير أننا نشتغل علشان نعيش ونعيش علشان نشتغل. نوئد الملاحظة التافهة دي جوانا وما نفكرش فيها، لأن العيال كبروا ومحتاجين فلوس كتير علشان يعيشوا (ما قلتش يتربوا) –ما احنا ياما عيشنا يا أخي- ويتحول مجرد الشروع في التفكير في الحياة لذنب كبير، نكفر عنه بنكران (الذات) –اعتبرها لسه موجودة- وبالشغل الكتير اللي فوق (طاقتنا) اللي نندفن فيه لحد أما نموت ويكتبوا على قبورنا: "عاش ليعمل مات ليعيش". وبالرغم من الكآبة الظاهرة في الجملة للي ما يعرفناش –بخلاف طبعاً الكدب البين والكليشيه المبتذل- إلا أنك (بما أنك مننا وعلينا) لو دققت فيها هتلاقي فيها مفارقة/ خدعة: "عاش وعمل" -الاتنين- طبعاً أنت عارف أنه لم يعش وما كانش بيعمل ولا عمل حاجة، وغالباً مات في النص بين الكلمتين أو قبلهم، بس أعتقد –وأن كنت لا أتمنى ذلك بالتأكيد- أن الشعار ده: "العيش والشغل" هيبقى منتهى الأمل اللي هنورثه لأولادنا. الأجيال الجديدة اللي بنتمنى لهم مستقبل مشرق يقدروا يعيشوا فيه و يشتغلوا (الاتنين).

تعليقات

‏قال Gamal Abu El-ezz
صباحك ورد شريف باشا
واحشنى كتير والله

" عاش ليعمل مات ليعيش "
الجملة دى حقيقية جدا لأننا تقريبا مش بنعيش الا لما نموت وننتقل لدار الخلود بس مش كله بيعيش هناك صح ههه .
بالنسبه للعمل والعيش الناس فى مصر كانت تعمل وتعيش لكن التغيرات الى طرأت عليهم وتغذية فكرة لقمة العيش والحصول على لقمة العيش خل طبقات كتير فى المجتمع تنهار ودلوقتى الناس صاحنه نفسها علشان مستوى معيشى معين قد يكون وهم خصوصا أن من ياكلون الجاتوه وليش العيش قلائل فى مصر وأحيانا فيهم سنة عنصرية . وده بيدفع الغالبيه لمحاولة الوصول لمستواهم الإجتماعى .
دا غير عدم القناعه الى مبقتش عند حد مهما بلغ غنى الشخص بيعتبر نفسه فقير ويضع سقف أعلى لكمية النقود الى مفروض تبقى معاه علشان يوصل للإشباع وطبعا مفيش سقف اساسا .

فى النهاية بشكرك جدا على التدوينة وأتمنى تكون بخير وسعادة أخى شريف
‏قال Tarkieb
أصرف ما في الجيب دلوقتي احسن من بعدين عن خبرة هههههههههه
‏قال زهــــراء
مسا الورد يا باشا
يعني افتح يومي برأس الفسيخ عند تركيب واختمه عندك بالعيشه واللي عايشين وطاقة لا نهائيه من الكلام الحلو
من كام يوم قرأت جمله فيما معناه ان الانسان اتخلق عشان ينعم بالحياه لكنه بيضيع الفرصة....

وهو ياكل يشرب يتنفس يعيش لكنه في الحقيقه هو على قيد الحياة على الورق فقط لكنه في واقع الأمر هو موت تدريجي... موت بطئ
الحياه هي أن ننضج وليس أن نعيش فقط.. نفهم... نستمتع بس للاسف ماحدش قادر يعمل كده حاليا
هاقولك على حاجه يا شريف أصدقائي بيقولوا عني خبيرة إدارة أزمات لأسباب كتير يمكن أهمها لاني كنت باقوم بتدريس إدارة الأزمات ولأن عندي ماده علميه بتاعتي الخلاصه أن في أزمات حاليا مش لاقيه لها علاج لأنها بقيت متعلقة بالعيشه واللي عايشين فيها...

دعواتي لك بالسعاده
‏قال P A S H A
Gamal Abu El-ezz
:))
صباح الورد والفل والياسمين عليك يا أستاذنا، إزيك يا جمال؟؟ يا رب تكون بألف خير وصحة وسعادة إن شاء الله .. وأنت كمان واحشني كتير والله .. مش هنتقابل قبل ما تتجوز ولا إيه؟؟

:))
مش عارف ليه أول ما قريت كلمة "لقمة العيش" في تعليقك افتكرت الأغنية دي:


https://soundcloud.com/mozakerat/ncyc6tcoy8aq

بافرح جداً بالتعليقات اللي بتكمل البوست وبتثريه وبتضيف له وجهات نظر ورؤى جديدة :))

شكراً جداً ليك يا جمال على مرورك الجميل وتعليقك الرائع
:))
يومك فل بإذن الرحمن
‏قال P A S H A
Tarkieb
:))
ههههههههههههههههههههههههههههههههه
وربنا أنت معلم كبير وتعليقاتك مالهاش حل،، لعيب لعيب يعني :))
من جهة الصرف أنا مش عاوز توصية، يا راجل ده أنا قربت أكل اللضا اللي في الجيب أساساً :))
الحمد لله على كل شيء
:))
يا رب تفضل منورني دايماً ومفرحني بتعليقاتك الجميلة المبهجة يا كبير
:))
يومك فل بإذن الرحمن
‏قال P A S H A
زهــــراء
:))
صباح الورد والفل والياسمين على حضرتك يا أستاذتنا .. يا رب تكوني بألف خير وصحة وسعادة إن شاء الله
:))
طاقة لا نهائيه من الكلام الحلو اللي زي وشي!! هههههههه قولي قولي ما تتكسفيش D:
هو موود مش أكتر وأنا باعتذر لحضراتكم عن القتامة اللي في البوست.

"الانسان اتخلق عشان ينعم بالحياة لكنه بيضيع الفرصة"
وقفت عندها كتير الجملة دي يا أستاذة،، رهيبة حقيقي وما ينفعش يتعلق عليها بأي شكل،، دي الواحد يتأملها ويقول: الله
:))
ربنا يفرج كربك ويزيح همك ويروق بالك ويصلح حالك وحال الجميع بإذن الله
:))
نورتيني وشرفتيني جداً يا زهراء .. يومك فل بإذن الرحمن
:))