اوزن لنا يا ابني الكلمتين دول

في إطار الـ ما أعرفش إيه ومن أجل أصل ما أدرك إيه (حقك طبعاً تقول لي: ألعب باليه بس ما تزعلش من الرد :D)  اتنشكلت في البتاع دوكهوه:

(اضغط هنــا)

اللي فهمته .. على قد فهمي يعني (وأنت عارف أني نادراً ما بافهم فما بالك بقى أني أحاول أفهـِم) .. أن الحدث ده بيتعمل مرة كل سنة في شهر نوفمبر (واحنا نايمين) .. علشان كل واحد يتشجع ويكتب روايته .. وبيسموه جـِدر قصدي شهر الرواية يا ضنايا .. تحرجني وتفحمني وترخم على مزاجي وتسألني: يشجعوهم إزاي؟؟ أقول لك: إلهي يا رب أعدم الفلـَس ما أعرف!! .. وعلشان أسد الباب في وشك من أولها وأحبطك، أحب أقول لك أن الموضوع ما فيهوش أي برادس ولا سحلبان!! ولا حتى فيه أمل أنك تكسب صورة خليعة لقطة بتعمل بيكيناو ع السلم!!

ولأنك مقاوح هتعمل لي فيها المثقف القنوع اللي بيكتب من أجل الكتابة لأن الكتابة تحييه وتداويه وتفسفس الفسافيس اللي معششة فيه وهي النداهة اللي من ع القعدة بتقومه وتناديه؛ وهتقول لي: مش مهم الفلوس المهم الناس تقرا (على أساس أنك كتيب يعني) .. هقول لك: اديني قلب تاني وخد قلبك معاك اديني عمر تاني وابعدني عن هواك .. ما هو يا ابني ده البيكيناو بذات نفسه!! .. لييييييه؟؟ لأن ما فيش حد هيقرا يا موهيي!!

هههههههههههههه

يا دين النبي على منظرك دلوقت!!

هههههههههههههه

لأ بجد مش قادر!! هاموت م الضحك!!

- خلاص عرفتوا اللي فيها؟؟ اتكلوا ع الله يا رجالة.

:D

- نتكلم جد شوية .. اعتبر الموضوع ده زي الجيم اللي بتكسل تروحه لوحدك علشان ما بتلاقيش حد يشجعك ويروح معاك .. لكن لو لقيت حد؟؟ مش هتتحمس وتتشجع بذمتك؟؟ .. طبعاً ده مثال عبيط، بس هو اللي جه على بالي دلوقت .. حضرتك ممكن تشوف الموضوع سخيف ومحبط حقك، لكن أنا شايفه جميل ومحفز جداً .. ليه؟؟ .. لأن وباختصار شديد الموضوع مش إلزام ولا إمتحان وما فيهوش ضغط ولا شدة أعصاب وقلق ووصاية ومراقبة .. مش مسابقة ولا سبـّق فيه مكسب وخسارة وتقييم .. والأهم أن الموضوع في التوب سيكريت .. أنت وكيبوردك فقط لا غير .. اكتب ما شئت كيفما شئت .. شفت ديليكاه خالص إزاي؟؟

حتى الأن، ولحد حرف النون اللي في كلمة "الأن" والله العظيم ما أعرف هاكتب إيه .. ولا فكرة الرواية هتكون عن إيه!! لأني أصلاً رافض تماماً موضوع الكتب والروايات  (لأسباب كتيرة مش مجالها هنا) .. كما أني حالياً دماغي فاضية تماماًً!! .. بس محتاج الموضوع ده علشان أرجع أكتب وأدخل في موود الكتابة تاني .. ده الواحد صوابعه صدت من كتر الركنة يا جدعان!! .. عاوز كمان أبطل حكاية الزهق بسرعة دي واستمر .. أنا عارف وباقر من دلوقت أنها مش هتبقى كتابة إبداعية لأني ما درستش وما قريتش كتب في بناء الرواية والسرد والحبكة قبل كده .. بس مين عارف؟؟ مش يمكن تبقى فرصة أني أتحفز وأرجع للقراءة تاني؟؟ مش يمكن أبدأ أتعلم الكتابة على أصولها لو الموضوع عجبني؟؟ .. فيه احتمالات كتيرة .. وكلها بتحفز الواحد أنه يتكل على الله ويبدأ ..  إيه يعني رواية من خمسين ألف كلمة تتكتب في شهر؟؟ .. احنا بعون الله لما الوحي بينزل علينا بنكتب أسرع من المزنوق لما بينزل بنطلونه في الحمام!! .. وبعدين فيه حل سهل جداً أني أخد البوست ده كوبي وبيست كوبي وبيست لحد ما أكملهم!! أنت بتهرج ولا إيه؟؟ D:

سيبك من القرنين اللي فوق دول دلوقت وركز مع اللي من غير قرنين اللي واقف تحت ده  وقول لي: أنا ده ولا مش أنا؟؟ .. شفت سبقتك وعملت أكاونت هناك إزاي؟؟ .. سيبك من جملة: No current novel دي أنا حاططها علشان الحسد D: .. احنا لا موأخذة جامدين قوي ومبدعين قوي والإبداع بينز من مخيلاتنا فـَشر نزانيز العسل من ع الزلابيا يا عينيا .. وإن شاء الله احتمال أنقل اللي كتبته هنا لما أشوف بقى هتقروا ولا لأ؟؟ .. وبعدين الناس مكلفين نفسهم وجايبين لابتوب وورق وأقلام وقهوة، الواحد هيحتاج إيه تاني علشان يكتب؟؟ 

:)

اكتبوا يا جماعة .. اكتبوا .. علشان نفسكوا مش علشان حد تاني .. صدقوني أنتوا أكتر ناس تستحق المتعة دي .. متعة الكتابة .. حتى لو ما حدش قرأ رواياتكم دي غيركم .. مش مهم .. اكتبوا .. ابدأوا فيها من دلوقت .. وإن شاء الله على نهاية الشهر هيكون عند كل واحد فينا رواية عليها اسمه .. مش مهم تطلع ملخبطة ومش مظبوطة ومليانة غلطات، مع الوقت والمجهود اللي بتبذله فيها هتبدأ تظبطها .. وحتى يا سيدي لو فيها العبر، صدقني هتشوف أنها أجمل رواية في الدنيا .. ياللا ابدأوا فكروا في موضوع الرواية / عنوانها / تصميم الغلاف / الإهداءات / الشخصيات / الأحداث .. هتلاقوا نفسكوا فجأة كتبتوا كتير .. ابعت ياللي بتبعت :)

* خالص الشكر والتقدير والامتنان للزميلة الفاضلة/ لبنى أحمد نور اللي عرفت الفكرة عن طريق مدونتها اللي فيها لينكات وتفاصيل أكتر.