اوزن لنا يا ابني الكلمتين دول

في إطار الـ ما أعرفش إيه ومن أجل أصل ما أدرك إيه (حقك طبعاً تقول لي: ألعب باليه بس ما تزعلش من الرد :D)  اتنشكلت في البتاع دوكهوه:



اللي فهمته .. على قد فهمي يعني (وأنت عارف أني نادراً ما بافهم فما بالك بقى أني أحاول أفهـِم) .. أن الحدث ده بيتعمل مرة كل سنة في شهر نوفمبر (واحنا نايمين) .. علشان كل واحد يتشجع ويكتب روايته .. وبيسموه جـِدر قصدي شهر الرواية يا ضنايا .. تحرجني وتفحمني وترخم على مزاجي وتسألني: يشجعوهم إزاي؟؟ أقول لك: إلهي يا رب أعدم الفلـَس ما أعرف!! .. وعلشان أسد الباب في وشك من أولها وأحبطك، أحب أقول لك أن الموضوع ما فيهوش أي برادس ولا سحلبان!! ولا حتى فيه أمل أنك تكسب صورة خليعة لقطة بتعمل بيكيناو ع السلم!!

ولأنك مقاوح هتعمل لي فيها المثقف القنوع اللي بيكتب من أجل الكتابة لأن الكتابة تحييه وتداويه وتفسفس الفسافيس اللي معششة فيه وهي النداهة اللي من ع القعدة بتقومه وتناديه؛ وهتقول لي: مش مهم الفلوس المهم الناس تقرا (على أساس أنك كتيب يعني) .. هقول لك: اديني قلب تاني وخد قلبك معاك اديني عمر تاني وابعدني عن هواك .. ما هو يا ابني ده البيكيناو بذات نفسه!! .. لييييييه؟؟ لأن ما فيش حد هيقرا يا موهيي!!
هههههههههههههه
يا دين النبي على منظرك دلوقت!!
هههههههههههههه
لأ بجد مش قادر!! هاموت م الضحك!!
- خلاص عرفتوا اللي فيها؟؟ اتكلوا ع الله يا رجالة.
:D
- نتكلم جد شوية .. اعتبر الموضوع ده زي الجيم اللي بتكسل تروحه لوحدك علشان ما بتلاقيش حد يشجعك ويروح معاك .. لكن لو لقيت حد؟؟ مش هتتحمس وتتشجع بذمتك؟؟ .. طبعاً ده مثال عبيط، بس هو اللي جه على بالي دلوقت .. حضرتك ممكن تشوف الموضوع سخيف ومحبط حقك، لكن أنا شايفه جميل ومحفز جداً .. ليه؟؟ .. لأن وباختصار شديد الموضوع مش إلزام ولا إمتحان وما فيهوش ضغط ولا شدة أعصاب وقلق ووصاية ومراقبة .. مش مسابقة ولا سبـّق فيه مكسب وخسارة وتقييم .. والأهم أن الموضوع في التوب سيكريت .. أنت وكيبوردك فقط لا غير .. اكتب ما شئت كيفما شئت .. شفت ديليكاه خالص إزاي؟؟

حتى الأن، ولحد حرف النون اللي في كلمة "الأن" والله العظيم ما أعرف هاكتب إيه .. ولا فكرة الرواية هتكون عن إيه!! لأني أصلاً رافض تماماً موضوع الكتب والروايات  (لأسباب كتيرة مش مجالها هنا) .. كما أني حالياً دماغي فاضية تماماًً!! .. بس محتاج الموضوع ده علشان أرجع أكتب وأدخل في موود الكتابة تاني .. ده الواحد صوابعه صدت من كتر الركنة يا جدعان!! .. عاوز كمان أبطل حكاية الزهق بسرعة دي واستمر .. أنا عارف وباقر من دلوقت أنها مش هتبقى كتابة إبداعية لأني ما درستش وما قريتش كتب في بناء الرواية والسرد والحبكة قبل كده .. بس مين عارف؟؟ مش يمكن تبقى فرصة أني أتحفز وأرجع للقراءة تاني؟؟ مش يمكن أبدأ أتعلم الكتابة على أصولها لو الموضوع عجبني؟؟ .. فيه احتمالات كتيرة .. وكلها بتحفز الواحد أنه يتكل على الله ويبدأ ..  إيه يعني رواية من خمسين ألف كلمة تتكتب في شهر؟؟ .. احنا بعون الله لما الوحي بينزل علينا بنكتب أسرع من المزنوق لما بينزل بنطلونه في الحمام!! .. وبعدين فيه حل سهل جداً أني أخد البوست ده كوبي وبيست كوبي وبيست لحد ما أكملهم!! أنت بتهرج ولا إيه؟؟ D:




سيبك من القرنين اللي فوق دول دلوقت وركز مع اللي من غير قرنين اللي واقف تحت ده  وقول لي: أنا ده ولا مش أنا؟؟ .. شفت سبقتك وعملت أكاونت هناك إزاي؟؟ .. سيبك من جملة: No current novel دي أنا حاططها علشان الحسد D: .. احنا لا موأخذة جامدين قوي ومبدعين قوي والإبداع بينز من مخيلاتنا فـَشر نزانيز العسل من ع الزلابيا يا عينيا .. وإن شاء الله احتمال أنقل اللي كتبته هنا لما أشوف بقى هتقروا ولا لأ؟؟ .. وبعدين الناس مكلفين نفسهم وجايبين لابتوب وورق وأقلام وقهوة، الواحد هيحتاج إيه تاني علشان يكتب؟؟ 
:)

اكتبوا يا جماعة .. اكتبوا .. علشان نفسكوا مش علشان حد تاني .. صدقوني أنتوا أكتر ناس تستحق المتعة دي .. متعة الكتابة .. حتى لو ما حدش قرأ رواياتكم دي غيركم .. مش مهم .. اكتبوا .. ابدأوا فيها من دلوقت .. وإن شاء الله على نهاية الشهر هيكون عند كل واحد فينا رواية عليها اسمه .. مش مهم تطلع ملخبطة ومش مظبوطة ومليانة غلطات، مع الوقت والمجهود اللي بتبذله فيها هتبدأ تظبطها .. وحتى يا سيدي لو فيها العبر، صدقني هتشوف أنها أجمل رواية في الدنيا .. ياللا ابدأوا فكروا في موضوع الرواية / عنوانها / تصميم الغلاف / الإهداءات / الشخصيات / الأحداث .. هتلاقوا نفسكوا فجأة كتبتوا كتير .. ابعت ياللي بتبعت :)

* خالص الشكر والتقدير والامتنان للزميلة الفاضلة/ لبنى أحمد نور اللي عرفت الفكرة عن طريق مدونتها اللي فيها لينكات وتفاصيل أكتر.

تعليقات

  1. الكلام سهل والله يا استاذ شريف.. :(((

    ردحذف
  2. سوبيا
    :))
    أستاذتنا .. صباح الخير والسعادة على حضرتك وعلى كل زورانا الكرام
    :))
    اسمحيلي حضرتك اسأل سؤال: أنا قلت في التدوينة أن الحدث ده طوال شهر نوفمبر صح؟؟ قلت ولا ما قلتش؟؟ .. قلت؟؟ طب تمام. هل قلت نوفمبر سنة كام؟؟
    D:
    أنا مش فاهم ليه بس يا جماعة بتصعبوا المواضيع وبتمسكوا في الكلمة!! .. وبعدين هو الأكاونت هيخسّر؟؟ مين عارف مش يمكن يغلا؟؟ .. وبعدين نفسي كده كل واحد من حضراتكم يحط مصر في اعتباره ويتخيل نفسه بيمثل مصر قدام العالم كله .. بذمتك دي مش حاجة تحفزك أنك تبدع وتحط إبداعك وإبداع اللي جنبك في الرواية؟؟ تخيل كده شعورك وأنت بتمثل مصر وأنك كنت المتسابق المصري رقم: 3792547 وفازت روايتك بالمركز قبل الأخير معايا؟؟ .. وقفت ياعم في الطابور علشان تستلم جايزتك (أنا عارف أن ما فيش جوايز بس تخيل يا أخي هو الخيال حرم؟؟) .. كنت واقف على مشارف مدينة الخرطوم ساعتها .. وعدت عليك أيام وشهور وسنين وفيــــــن على ما وصلت القاهرة علشان تستلم جايزتك (اللي هي باكو نعناع) فالسيد المسئول اللي هو حفيد حفيد حفيد السيد المسئول الحالي يقول لك: معلش والله احنا آسفين آخر باكو نعناع خده المتسابق رقم: 3792547 فتتجنن وتثور وتقول له أن ده رقمك أنت فيشاور لك على الرقم اللي أنت ماسكة في إيدك واللي كان مطبوع على الجاكيت بتاعك اللي بقى عبارة عن حمالتين: 3792548 وتكتشف أن المتسابق الأخير (اللي كان واقف وراك وعشرة معاك 70 سنة) سرق رقمك بالليل وأنت نايم وبدله برقمه علشان ما يطلعش هو المركز الأخير!! فتقرر أنك تكتب رواية تانية بدل ما تنتحر وتسميها "آخر باكو نعناع" تحكي فيها قصتك من الأول لما مرة زمان قريت بوست في مدونة اسمها "هجايص" عن شهر اسمه شهر الرواية ورغم أنك ما كنتش مقتنع بالفكرة بس قريت تعليق عنده أقنعك وحفزك و.......
    :))
    (أنتوا نمتوا لا إيه يا جماعة؟؟ ده كان تعليق)

    ردحذف
  3. انا من موقعي باناشد كل متابعي البلوج انهم يشجعوا معانا ونشجع حضرتك طوال شهر نوفمبر.. واهو كله علشان مصر :D
    اكفر بقى

    ردحذف
  4. إنت تنفع قوى فى الموضوع ده يا شريف
    وبدام مافيش جوايز
    عايزك تقرفهم من نوعية البوست اللى فات ده ( قصدى تبدعهم ) :)
    وكله فى الأخر علشان خاطر ماسر :)
    متشكرين يا عمنا

    ردحذف
  5. سوبيا
    :))
    ههههههههههههههههههههههههههههه

    طب وربنا أنا اتفحمت!!

    أظن كده وبعد التشجيع والهتافات دي كلها ماليش حجة والمفروض أني أكتب بقى علشان خاطر مصر ..
    طب إيه؟؟
    الكلام راح فين؟؟
    راح فين الكلام؟؟
    :(
    ممكن طب نشيل الأربع أصفار ونخلي الرواية من 5 كلمات بس؟؟
    "السلام عليكم ورحمة الله وبركاته"

    ردحذف
  6. محمد سلامة
    :))
    أنا اتحسدت يا محمد!!
    حاسس أني محتاج ابدأ بكتاب معلم القراءة من تاني!!
    :(

    ردحذف