الرخم

- أنا : إيه يا عم فينك ؟؟

- الرخم : يا عم هو أنت بتسأل !!

- أنا : معلش مشاغل والله ؛ كنت مختفي فين المدة اللي فاتت دي ؟؟

- الرخم : هو فلان ما قاللكش ؟؟

- أنا : لأ ما قالليش !!

- الرخم : ولا علان حكالك ؟؟

- أنا : لا والله ما شفتوش بقالي فترة !! خير فيه إيه ؟؟

- الرخم : أنا كمان برضه ما شفتهمش بقالي فترة !!

- أنا : أمال حكوا لي إيه وعادوا لي إيه ؟؟ فيه حاجة حصلت يعني ولا إيه ؟؟

- الرخم :لا يا عم الحمد لله ؛ أنا باتطمن عليهم بس !! المهم أنت عامل إيه ؟؟

- أنا : الحمد لله

- الرخم : تخيل شفت مين الأسبوع اللي فات ؟؟

- أنا : مين ؟

- الرخم : ميييين ؟؟

- أنا : أنت بتسألني ليه يا عم ؟؟ هو أنا اللي شفته ؟؟

- الرخم : شفت مين ؟؟

- أنا : أستغفر الله العظيم يا رب !! يا عم ارحمني !! أنت اللي شفته مش أنا !!

- الرخم : آآآآآآه .. تصدق نسيته !!

- أنا : أ*ا وعاوزني افتكر بدالك يعني ولا إيه ؟؟

- الرخم : طب حتى خمن كده ؟؟

- أنا : مش هاتنيل !!

- الرخم : افتكرت !!

- أنا : طلع مين ؟؟

- الرخم : قول مين ؟؟

- أنا : هضربك بالجزمة !! خلاص مش عاوز أعرف !!

- الرخم : طيب !! هو عامة حد أنت ما تعرفوش !!

- أنا : ...................

- الرخم : باقول لك صح أنت فاضي ولا مستعجل كالعادة ؟؟

- أنا : خير ؟؟

- الرخم : يا عم ريحني بس !!

- أنا : مش لما أعرف الأول فيه إيه ؟؟

- الرخم : عادي يعني ما فيش حاجة !! بس أصل كل ما أقف معاك دقيقتين تقول لي أنا مستعجل وتسيبني وتمشي !!

- أنا : تصدق فعلاً أنت فكرتني بمشوار مهم لازم أعمله !!

- الرخم : آآآآآه .. قول بقى أنك مش عاوز تقف معايا !!

- أنا : مش الفكرة بس ما باحبش وقفة الشارع وبعدين الجو سقعة ؛ ويادوب ألحق !!

- الرخم : سقعة مين يا عم ؛ الجو حلو أهه وزي الفل !!

- أنا : لا معلش يا دوب ألحق المشوار بتاعي وكويس أني اتطمنت عليك ؛ أبقى خللينا نشوفك !!

- الرخم : رايح فين يا عم والله ما يحصل !! أستنى هاوصلك !!

- أنا : توصلني فين يا عم ؟؟ هو أنت عارف أنا رايح فين ؟؟

- الرخم : لأ !!

- أنا : طب معاك عربية ؟؟

- الرخم : إيه ده هو أنت معاكش عربية ؟؟

- أنا : يعني أنا لو معايا عربية هتوصلني إزاي ؟؟ إيه هاتشيلني أنا وهي ؟؟

- الرخم : أنا أصلي افتكرتك رايح إمبابة فقلت آجي معاك !!

- أنا : أروح إمبابة أهبب إيه ؟؟

- الرخم : نشوف خالي !!

- أنا : لا يا عم روح أنت وأبقى سلم لي عليه !!

- الرخم : هيزعل على فكرة لو عرف أنك كنت معايا وما جتش تسلم عليه !!

- أنا : ما يزعل ولا يتفلق ولا يولع بجاز !! ما تخرجوناش عن شعورنا بقى يا أخي !! هو أنا كنت أعرفه ولا كان من بقية أهلي ؟؟

- الرخم : الله يسامحك يا عم !!

- أنا : حقك عليا يا عم ما تزعلش مني بس أنت أصلك استفزتني بصراحة !!

- الرخم : لا يا عم ما فيش حاجة ؛ أنا مش صغير برضه علشان أروح أقول له !!

- أنا : تقول لمين ؟؟

- الرخم :  خالي !!

- أنا : يا أخي يلعن .............. أوووووف !!

- الرخم : خلاص بلاش نروح لخالي لو أنت مش عاوز تقعد معاه ؛ هو أصلاً رخم !!

- أنا : :D

- الرخم : ياللا نروح المشوار بتاعك علشان ما نتأخرش !!

- أنا : مشوار إيه ؟؟ هو أنت عارف أصلاً أنا رايح فين ؟؟

- الرخم : لأ ؛ بس ما يصحش برضه أسيبك لوحدك !!

- أنا : يا عم هو أنت شايفني حامل ؟؟ ولا طالع من تحت عربية ؟؟

- الرخم : يا جدع ما تفولش على نفسك بعد الشر عليك !!

- أنا : أستغفر الله العظيم !! طب أنا رايح لأمي في المعادي !!

- الرخم : وماله يا عم !! صلة الرحم واجبة برضه !!

- أنا : صلة رحم إيه وخره إيه ؟؟ هي كانت أمك أنت ؟؟

- الرخم : يا ابني الناس الكبيرة دي بركة اسمع كلامي !! فيه فكهاني هناك أهه تعالى نجيب اتنين كيلو موز واتنين كيلو برتقان !!

- أنا : موز وبرتقان إيه اللي هنجيبه ؟؟

- الرخم : يا عم دي أمك برضه مهما كان !!

- أنا : ولما هي أمي يا أخي ؛ أنت مال أمك ؟؟

- الرخم : ما تخافش !! والله ما هاطلع مليم من جيبي علشان ما تزعلش !!

- أنا : لأ بقى أنا عاوزك تزعلني !! مش أنت هتيجي معايا ؟؟ يبقى ما يصحش تدخل على أمي وإيدك فاضية وهات كمان تفاح علشان بابا بيحبه !!

- الرخم : طب أقول لك حاجة حلوة ؟؟ احنا نعدي ع الواد محمود ونخليه ييجي معانا وندبسه في تمن الحاجة !!

- أنا : وماله ؛ ونجيب بيرة وحشيش بالمرة !! أصل أنا واخدك بيت دعارة يا ** أمك !!

- الرخم : أستغفر الله يا عم !! باقول لك إيه ؛ أنا سقعت !! تعالى نروّح !!

- أنا : يا ابني أنت بتجمع الكلام ليه ؟؟ ما تروّح هو أنا ماسكك ؟؟

- الرخم : مش عاوزك بس تفتكر أني مش عاوز آجي معاك عند الحاجة وتزعل مني !!

- أنا : لا لا ما تخافش؛ هي لو عرفت أنك كنت معايا وما جيتش هتفرح قوي !!

- الرخم : المهم لما تزورها ابقى سلملي عليها والنبي !!

- أنا : من عيني ؛ ياللا مع السلامة !! .. إيه ده أنت رايح فين ؟؟

- الرخم : إيه ده أنت مش هتطلع معايا ؟؟

- أنا : أطلع معاك فين ؟؟ ده بيتي !!

- الرخم : يعني لا أزور أمك ولا أزورك ؟؟ ليه يا عم هو أنا ما عنديش ذوق ولا إيه ؟؟ تصدق كنت هانسى !! تعالى بس الأول نجيب حاجة حلوة للعيال !!

- أنا : يا عم ما فيش حد فوق !!

- الرخم : طب فيه عيش فوق ولا لأ ؟؟ علشان ما تنزلش تاني ؟؟ بص أنا مزنوق وعاوز أخش الحمام !! هات المفتاح وأشتري أنت الحاجة براحتك وحصلني !!

- أنا : طب بعد ما أجيب الحاجة أتصل بيك ؟؟ ولا أطلع على طول ؟؟ أحسن يكون الوقت مش مناسب ولا حاجة !!

- الرخم : أقول لك ؟؟ روح أقعد عند محمود ؛ وأنا هاخد دش وأقيل شوية وأبقى أجيلكم بالليل ع القهوة !!

- أنا : خلاص ماشي !! ياللا سلام !! بص هتلاقي الغيارات عندك في الرف اللي فوق أول ما تفتح الضرفة اليمين .. وفيه مكرونة بالباشاميل وحتة فرخة محمرة في التلاجة وتقريباً فيه بواقي رز وقلقاس ؛ دعبس في القلقاس هتلاقي لحمة متفتفتة وعندك كمان تفاح وموز وبرتقان في التلاجة وفيه كيكة وبسيسة ما دقناهمش والله عاوزك تطلع وتاكل هه ؟؟ وهتلاقي شنطة كبيرة مليانة بسكويت وعصاير وشيكولاتات بتاعة العيال بالهنا والشفا عادي برضه ؛ بس سيب لهم المصاصات !! اللبن !! عاوزك تشرب لبن !! فيه لبن في اللبانة وفيه علب لبن خالي الدسم في الباب !! وعندك الفريزر مليان ما شاء الله لحمة وسجق وكبده وفيليه هتلاقي كل كيس مكتوب عليه جواه إيه !! بس مش عارف فيه سمك ولا لأ ؟؟ بس فيه رنجاية لو عايز يعني والتونة هتلاقيها فوق المطبخ .. وما تنساش تاخد معلقتين عسل ع الريق !! فيه عندك عسل نحل وعسل أسود !! القشطة والجبن هتلاقيهم في الرف اللي تحت الفريزر ؛ يا ريت تسيب لي حتة جبنة ريكفور بعد إذنك !! وفيه عندك شرابات صوف جديدة في ضرفة الدولاب اللي تحت وهتلاقي شبشب فرو كاروهات برضه جنب السرير !! إيه تاني ؟؟ أه الباسوورد بتاع النت هتلاقيه في ملف وورد ع الديسكتوب .. اللمبة اللي في الطرقة مش محروقة هي بتاخد وقت على ما تنور !! .. وأي حاجة تعوزها اتصل بالبواب يجيبهالك ؛ الفلوس هتلاقيها في محفظة متعلقة جنب الباب !! ونمر الديليفري كلها في الأجندة الصغيرة اللي جنب البن !! .. ما تنساش تقفل سدادة البانيو بعد ما تستحمى !! يا ريت بس ولو فيها إساءة أدب تحدف لي شنطة الأدوية من فوق !! لا إله إلا الله .. معلش آخر حاجة !! ممكن أجيب اعيال يلعبوا شوية باللعب بتاعتهم يوم الجمعة بعد الصلاة ؟؟ ومش هتحس بيهم خالص والله !!