ياللا نرغي شوية
كل سنة وحضراتكم طيبين جميعاً وبألف خير وصحة وسعادة ورضا وراحة بال ويا رب يا رب يا رب تكون السنة الجديدة سنة سعيدة علينا كلنا بإذن الله وكل واحد يحقق فيها اللي بيحلم بيه وبيتمناه
:)
باعتذر جداً جداً لحضراتكم على التقصير في المتابعة وعن قفل التعليقات المستمر ؛ وباعتذر كمان جداً جداً جداً عن عدم سؤالي على كتير من حضراتكم الفترة الي فاتت ؛ لكن دايماً والله فاكركم بكل الخير وبادعيلكم بظهر الغيب أن ربنا يكرمكم ويوفقكم ويهديكم وينجح مقاصدكم ويبارك فيكم ويحفظكم من كل شر وسوء اللهم آمين
- البوست ده مش مفتوح للمعايدة وكل واحد يخش يقول كل سنة وأنت طيب ويمشي ؛ البوست ده علشان نود بعض ونتطمن فيه على بعض ونرغي براحتنا مع بعض ونعرف أخبار بعض .. اللي عاوز يرغي في أي حاجة (طبعاً بعيد عن السياسة وحال البلد) عن السنة دي ماشي ؛ اللي عاوز يكلمنا عن أمنياته في السنة الجديدة ماشي ؛ اللي عاوز يعرفنا أخباره ويطمننا عليه يبقى تمام والله .. اللي عنده كتاب أو فكرة أو معلومة أو نصيحة أو مشكلة أو نكتة أو فيلم أو صورة أو وصفة أكل أو تعليق على أي شلولو عاوز يقوله يتفضل .. وأخيراً لو حد زعلان مني في حاجة يتفضل يصارحني ويعاتبني ؛ ولو مش عاوز يقول لي فيا ريت يسامحني ؛ أما لو مش عاوز يقول ولا يسامح ؛ فما أقدرش أعمل له حاجة غير أني أدعي لي وأدعي له بالهداية .
ياللا أتفضلوا يا جماعة خدوا راحتكم
:))
أخوكم / شريف
* بالمناسبة: التعليقات مفتوحة للبني آدمين الغير معرفين
* بالمناسبة: التعليقات مفتوحة للبني آدمين الغير معرفين
الباشا الكبير
ردحذفكل سنة وأنت فى أحسن حال
وأشكرك على زيارتك الميمونة لمدونتى الجديدة
كما أحيطك علما بأنى لن أكتب جديد فى المدونة القديمة
لك منى كل التقدير والإعتزاز
مدونة الفرسان
ردحذف:))
أستاذنا الكبير المحترم ؛ كل سنة وحضرتك بألف خير وصحة وسعادة ويا رب السنة الجاية تكون سنة حلوة وسعيدة على حضرتك وعلى كل حبايبك بإذن الله
:))
وبعدين الشكر لله يا عم ؛ احنا اللي أتشرفنا والله .. وألف مبروك على المدونة الجديدة وإن شاء الله تملاها بمواضيعك المميزة الجميلة
:))
خالص تحياتي وعميق تقديري واحترامي
انت مدون جميل ومن الناس الي بحب اتابعها ليه متنزلش كتاب اوتكتب في موقع وهل ليك حساب عالفيس وعندك كام سنه؟
ردحذفالباشا الكبير
ردحذفنكتة ع الماشى
مصرى بيسأل لبنانى: ايه اخبار الدنيا معاك؟
اللبنانى قاله: مفيش. بالنهار سايق هامر و بالليل جنبى قمر.
و انت ايه اخبار الدنيا معاك؟
المصرى قاله: مفيش. بالنهار سايق تريلا و بالليل جنبى غوريلا
هههههههههه
غير معرف
ردحذف:)
ربنا يحفظك ده بس من ذوقك ؛ بالنسبة للكتاب مش في دماغي خالص الموضوع ده والله ؛ لسه قدامي كتير قوي على ما أتجرأ وأفكر آخد خطوة زي دي ؛ الكتابة مسئولية كبيرة يا عم !! هنا حلو ؛ دفا ؛ شريف بيحب هنا .. وبالنسبة للمواقع ومجلات ؛ فيه أكتر من زميل محترم رشحني لحاجة زي كده ؛ بس بمنتهى الأمانة ومش إدعاء تواضع قسماً بالله العلي العظيم ؛ أنا ما أنفعش خالص للكلام ده .. الكتابة بالنسبة لي حاجة كده زي قعدة المصطبة ؛ أو واحد رغاي ما تعرفوش فتح معاك كلام في مواصلة .. وقت ما بيجي لي مزاج أرغي وأكتب باكتب (ده لو اعتبرنا أن الهري اللي باهببه هنا ده اسمه كتابة) .. دايماً باقول أني عامل زي واحد قاعد ع الرصيف بيمسح جزم ؛ حياته كلها مقضيها في الشارع وفرجة على خلق الله ؛ ساعات بتكون الغزالة رايقة معاه فبيرغي مع أي حد يقابله ؛ ممكن يكون الراجل ده بيحكي حلو ؛ أسلوبه حلو ؛ بيعرف يشد انتباه اللي قدامه ؛ بس أنا مش كاتب يا جدعان !! ولو عاوز تنرفزني وتحرق دمي قول : كاتب ساخر !! .. تعالى بقى لبس الراجل ده بدلة وكرافتة وقول له اكتب أو سلمنا مقال كل أسبوع ؟؟ مش هيعرف !! .. حاجة التانية : الكتابة فعلاً مسئولية واللغة ليها احترامها ؛ وباعترف أني أوقات كتير باهرب من الفصحى علشان باخاف أكتب غلط نحوياً أو أغلط في علامات الترقيم .. ثم أن هي كتابة القصص والمقالات دي سهلة ؟؟ مش ليها أصول وقواعد ؟؟ .. سيبك من الـ "هجايص" اللي هنا دي .. أنتوا ليه بتسفهوا من الكتابة كده يا جدعان ؟؟ الكتابة دي حاجة كبيرة جداً بجد .. هو كل ابن *** عمل مدونة ولا لم كام ألف متابع ع الفيس بقى كاتب ؟؟ .. أنتوا بتهرجوا ولا إيه ؟؟ .. أكيد بتهرجوا يا إما أنتوا اللي ما بتقروش أو مش عارفين تقروا !! ..الفيس بوك ما باحبوش ؛ ليا حساب عليه ما نشرتش عليه حاجة من ساعة ما عملته ؛ وما بادخلش عليه غير مرة كل شهر أو شهرين ؛ مش ضايف فيه حد ؛ بس أحياناً باتطمن بيه على بعض الزملاء وباتلصص بيه عليهم برضه .. ماشي في السبعة وتلاتين متزوج ومعايا زغلولين صغيرين .. تعالى كـُل ؟؟ الـ لأ الـ لأ حلفتك تيجي الـ لأ الـ لأ !! .. جرب اعزم أنت كده ؟؟
:)
شرفتنا
مدونة الفرسان
ردحذف:))
هههههههههههه
أَضحك الله سنك يا أستاذنا
:)
للأسف ما فيش في دماغي نكتة دلوقت ؛ اللي عندي حالياً نكت قبيحة ودي لو اتدبلجت بتبقى بايخة !!
:)
نورتنا يا زعيم
كم كنت أنتظر هذه الخطوة الهامة وهذا القرار التاريخي .. وأخيراً تنفتح أمامي أنا المتواضع أبواب التعليق على تدوينة في مدونتك المتميزة ، سعيد بمتابعتك منذ قترة وسأكون سعيداً برد الزيارة إلى مدونتي قريباً
ردحذفكل سنة وإنتا طيب :)
مش طايقه حد! ولا حتى نفسي! حاولت انتحر مرتين السنادي وفشلت! كلو خرا!
ردحذفكل سنة وانت بخير والاسرة كلها
ردحذفوبتمني فعلا تكون سنة سعيدة علينا
بالنسبة لي مش هعرف ارغي لاني مش قادرة السنة دي 2014 كانت سنة كبيسة بالنسبة لي سنة الصدمات والألم والفشل ...كفاية كدة
موجة
ردحذف:))
يا ألف أهلاً وسهلاً بحضرتك في زيارتك الأولى لمدونتنا المتواضعة ؛ شرفت الدنيا كلها والله العظيم
:))
باعتذر جداً جداً لحضرتك ولباقي السادة الزملاء الأفاضل عن قفل التعليقات ؛ بس أحياناً بابقى مش قادر على التواصل أو زي ما تقول حضرتك كده مش في الموود ؛ والناس اللي بتشرفني هنا مالهاش ذنب ؛ كفاية اللي كل واحد فيه .
وحقيقي يا فندم أسعدتني جداً بتعليقك الجميل وزيارتك الكريمة وإن شاء الله يكون لي الشرف في متابعة حضرتك ؛ وبالمناسبة صح ؛ الصورة اللي في البوست اللي قبل اللي فات بتاع سر ابتسامة الصغار في منتهى الجمال :)
كل سنة وحضرتك طيب وبألف خير وصحة وسعادة وإن شاء الله تكون سنة جديدة سعيدة على حضرتك وعلى كل حبايبك
:)
أطيب تحياتي وعميق احترامي وتقديري
:)
شرفتنا
رحاب صالح
ردحذف:))
كل سنة وأنتي طيبة يا رحاب وبألف خير وصحة وسلامة وسعادة ويا رب تكون السنة الجديدة سنة خير وسعادة عليكي وعلى أسرتك الكريمة وكل حبايبك وإن شاء الله تحققي فيها كل اللي تتمنيه ؛ سلامنا الكبير جداً لأخو حضرتك الأستاذ / أحمد الجميل المحترم
:)
روقي يا رحاب وسيبيها على الله وإن شاء الله ربك هيفرجها
:)
شرفتنيا جداً والله
غير معرف
ردحذف:))
مش لاقي رد حالياً !!
كل سنة وحضرتك طيبة وبألف خير وصحة وسعادة ورضا وراحة بال وإن شاء الله تكون سنة جديدة سعيدة عليكي
:))
شرفتينا
ردحذفهل الكتاب الساخرين نكدين في الواقع؟
ممكن تقولي فيلم حلو بيضحك؟
كل سنه وانت طيب:)
غير معرف
ردحذف:))
ما أعرفش !!
It's A Mad Mad Mad Mad World
Death At A Funeral
كل سنة وأنت طيب وبخير
كل عام وانت بخير
ردحذفوبصحة وبسعادة وبرضا
من وعليك من الله وسبحانه
وتعالى.ادعو الله دائما وابدا
بالستر والصحة والرضا لى
وللمسلمين أجمعين
كل سنة وإنت طيب ...بصراحة كانت سنة رمة ويمين يناولني شبشب دلوقتي من بتوع باتا فرع السيدة زينب وانا انزل علي سنة ٢٠١٤ وانجدها تنجيده حلوة وبعدين اعزمك علي سوبيا في السنة الجديدة ...
ردحذفnorahaty mo
ردحذف:))
ربنا يبارك في حضرتك يا دكتورة ويجازيكي كل خير على دعائك الطيب ؛ ربنا يتقبل إن شاء الله
وكل سنة وحضرتك طيبة وبألف خير وصحة وسعادة وبإذن الله تكون سنة جديدة حلوة وسعيدة على حضرتك وعلى كل حبايبك
:)
خالص تحياتي وعميق احترامي وتقديري
:)
نورتينا
Tarkieb
ردحذف:))
كل سنة وأنت طيب وبألف خير إن شاء الله يا كبير ويا رب تكون السنة الجديدة كلها خير وسعادة عليك وعلى كل حبايبك وتحقق فيها كل اللي تتمناه
:))
قعدت أفكر كتير في اللي ممكن أقوله عن السنة دي ؛ بس بجد مش عارف أقول إيه !
الحمد لله على كل شيء.
أول ما قريت الحتة بتاعة السوبيا ضحكت جداً والله ؛ ربنا يبارك فيك يا تركيب ويسعدك ويفرح قلبك ويجازيك كل خير .
تصدق فعلاً أنا مقصر جداً مع السيدة وبقالي كتير فعلاً ما نزلتهاش ؛ باعدي عليها كتير بس ما باشوفهاش ؛ يا عم انزل بقى علشان نتصعلك فيها براحتنا
:))
نورتني يا شقيق
انت تعرف احمد ...؟@@@
ردحذفجديدة عليا دي :)
رحاب صالح
ردحذف:))
للأسف ما أتشرفتش بمقابلته يا رحاب ؛ وللأسف برضه مش متابع مدونته بصفة مستمرة ؛ بس ظني في الله أنه إنسان جميل ونضيف .
مش كلام مجاملة والله العظيم يا رحاب ؛ ولا علشان هو ممكن يشوف التعليق ده ؛ بس فيه حد كده ممكن تكوني ما تعرفيهوش لكن تحسي براحة لما تيجي سيرته أو تفتكريه . بادعي له ربنا بظهر الغيب أن ربنا ييسر له حاله ويكرمه ويبارك فيه ويسعده ويفرح قلبه وإن شاء الله تكون السنة الجديدة سنة سعيدة علينا جميعاً بإذن الله
احمد ده حتة مني مش اخويا
ردحذفانا عرفته علي مدونين كتير وقابلناهم في معرض الكتاب زي شيرين سامي واسامة ازهري وابراهيم رزق وكتيييير واصبحوا اصدقاؤه اعتقد انه يشرفنا مقابلتك انت واسرتك لو فكرت تيجي تصيف ف بلطيم عندنا :)
أولا كل سنة وحضرتك والاسره والمدونين طيبين وبخير وربنا يجعل السنة الجديدة سنة سعيده على الجميع ومليانه بالحب والتفائل
ردحذفلو هتكلم عن 2014 مش هقدر اقول غير انها 365 يوم عدوا من عمرنا وأكيد مش كل أحداثه وحشه وإن كان الغالبيه كده بس مبحبش الى بيعمم أكيد الى بيقول ان سنة 2014 مش كويسه لازم يكون شاف فيها حاجه جميله ممكن يكون نجاح عما أو ارتباط أو طفل أو تحقيق أمنيه أما لو مفيش اى حاجه يبقى العيب فيه مش فى السنة الى هى وقت .
2015 إن شاء الله هتكون سنة جميلة من باب التفاؤل بالخير لعلنا نجده ولكن لا أحد يعرف ما سيتأتى عليه فالغيب من علم الله فقط ولكننا نتمنى أن تكون سنة اجمل .
بالنسبه بقى (للباشا شريف) أنا كل يوم بيزيد لإعجابى بيك وبتفكيرك والسبب فى زيادة اعجابى بيك النهارده هو تقيمك لمن يستطيع الكتابه والتاليف ولو كان هناك كلام هجايص جميل فاكيد مش هيخرج عن مدونة هجايص الجميلة وعلى فكره انا مكنتش اعرف سن حضرتك الحقيقى ممكن تعتبرنى أخوك الصغير وتقول جمال من غير القاب وده شرف كبير لى طبعا .
ربنا يديم عليك وعلى اسرتك الصحة والعافيه والأوقات الجميلة
وشكرا لحضرتك إنك أتحت لينا الدردشة معاك شوية .
تحياتى ;
كل سنه وحضرتك طيب اعتقد انها اول زياره وان شاءالله مش تكون الاخيره
ردحذفساعات قليله ويرحل عنا هذا العام اكيد على المستوى العام في البلد كان مش ولابد ونتمنى أن العام الجديد يحمل معاه سلام داخلي لكل إنسان اتمنى ان الناس تكون اهدي في التعامل مع بعضهم ونفسي أسلوب الحوارات الهابطة والالفاظ البذيئة تنعدم
على المستوى الشخصي باقول يارب كل الناس اللي باحبهم يكونوا في صحه وسعاده ونفسي اسافر السعوديه اعمل عمره تاني وربنا يحقق لك كل أحلامك يارب
رحاب صالح
ردحذف:))
ربنا يبارك لكم في بعض ولا يحرمكم أبداً من بعض اللهم آمين
:)
اللقا نصيب يا رحاب ؛ إن شاء الله نتشرف بمقابلتكم ونشوفكم على خير
:)
نورتينا
Gamal Abu El-ezz
ردحذف:))
كل سنة وحضرتك طيب يا أستاذنا وبألف خير وصحة وسعادة وإن شاء الله السنة الجديدة تكون سنة حلوة وسعيدة على حضرتك وعلى كل حبايبك وربنا يكرمك ويوفقك وتحقق فيها كل اللي تتمناه
:)
والله يا كبير كلنا بنتمنى وبندعي وبنقول يا رب تكون سنة حلوة ع الناس كلها
:)
ربنا يكرمك يا أستاذنا ويبارك لنا في عمرك ويجازيك كل خير على مجاملتك الرقيقة وكلامك الطيب الجميل ؛ احنا بنتعلم من حضراتكم والله العظيم ؛ أنتوا الأجمل
:)
بالنسبة لحتة السن والألقاب ؛ فبعد إذن حضرتك استأذنك أقف عندها شوية !!
بص يا سيدي الفاضل وأخي الكريم .. الموضوع بالنسبة لي مش موضوع سن خالص ؛ قد ما هو احترام وتقدير لناس بجد أنا باحترمها وباقدرها وليهم عندي مكانة خاصة وظني في الله أنهم ناس جميلة ؛ ده غير أنهم بجد أصحاب فضل عليا وعلموني ولا زلت باتعلم منهم كتير ؛ ودايماً بادعي لهم كلهم بظهر الغيب أن ربنا يكرمهم ويوفقهم ويبارك فيهم ويسعدهم ويفرح قلوبهم ويجازيهم كل الخير ويحفظهم من كل شر وسوء اللهم آمين.
وإذا كانت الحياة في الواقع بتفرض علينا أحياناً أننا نبجل ونوقر ناس ما تسواش ولا تستاهل (مش نفاق قد ما هي ظروف بتحكمنا وواقع بيجبرنا) يبقى هنيجي على الناس المحترمة بجد واللي تستاهل أننا نشيل جزمها فوق راسنا وهنبخل عليها بكلمة طيبة ؟؟
:))
أنتوا كبار جداً في المقام عندي والله العظيم يا جمال .. وبجد أنا باتشرف بزمالتكم كلكم وباعتبر فعلاً أننا كلنا أخوات .. ربنا يديم بيننا المعروف والمودة والاحترام.
:)
نورتنا يا كبير
زهــــراء
ردحذف:))
يا ألف أهلاً وسهلاً بحضرتك في زيارتك الأولى ؛ نورتي مدونتنا المتواضعة يا فندم
:)
كل سنة وحضرتك طيبة وبألف خير وصحة وسعادة وإن شاء الله تكون سنة جديدة سعيدة على حضرتك وعلى كل حبايبك يا رب وبإذن الله ربنا يكتب لك ويكتب لنا العمرة
:)
مش فاكر هل أنا أتشرفت بلقاء حضرتك ولا الأستاذة لولا في لقاء المدونين بتاع إسكندرية نوفمبر 2010 ؟؟ .. تقريباً حضرتك جيتي عند القلعة يومها واحنا كنا رايحين نركب المركب !!
:)
شرفتينا
كل سنة وانت طيب :)
ردحذفطب واللى عاوز يعيد ويجرى :)
ردحذفكل سنة وانتى طيب يا باشا سنة مثمرة يارب
يمامة شاردة
ردحذف:)
كل سنة وحضرتك طيبة وبألف خير وصحة وسعادة وإن شاء الله النسة دي تكون سنة خير وسعادة على حضرتك وأسرتك الكريمة وتحققي فيها كل اللي تتمنيه
:)
أسعدتيني جداً بتعليقك ؛ وشرفتينا جداً والله
reemaas
ردحذف:)
هو احنا فينا من كده ؟
:)
عموماً جزاكي الله كل خير على معايدتك الرقيقة وزيارتك الكريمة يا دكتورة اللي فرحتنا جداً والله
:)
كل سنة وحضرتك طيبة وبألف خير وصحة وسعادة ويا رب السنة دي تكون سنة حلوة وسعيدة على حضرتك وعلى كل حبايبك بإذن الله وتحققي فيها كل اللي تتمنيه
:)
شرفتينا جداً