في المصيف
قرر صابر (بعد زن شهرين من مراته) أنه ياخد الفاموليا ويروحوا يصيفوا .. آهو منه تغيير جو .. ومنه يشوف البحر اللي ما شافوش من عشرين سنة .
اتصل بعدد من شركات السياحة فاكتشف أن المبلغ اللي عامل حسابه يقضي بيه عشر أيام ما يكفيهوش يبات ليلة لوحدة على السلم في فندق رُبع نجمة .. فقرر أنه يستعين بصديق اسكندراني علشان يشوف له شقة محندقة يقعد فيها أسبوع .. وبعد ما صديقه بشره أنه لقى له شقة لقطة أول نمرة ع البحر على طول ، وبخمسميت جنيه بس في اليوم ، أجر عربية بيجو سبعة راكب علشان توصلهم وطلع البيت علشان ياخد الفاموليا.
صابر : إيه يا وليه الحلل دي كلها ؟؟ هو احنا رايحين صحرا ؟؟
مراته : ده يا أخويا الأكل اللي هناكله في السكة .
صابر : كل ده ؟؟ ليه هو احنا هانركب جمل ؟؟
مراته : ده يا دوب حلة محشي وحلة مكرونة وصينية رقاق وصينية فراخ وصينية كفتة.
صابر : وإيه الإزازة الملفوفة في جرنان دي ؟؟
مراته : دي إزازة ملوخية علشان موءه بيحبها.
صابر : يا وليه ده احنا عقبال ما نوصل هايكون الأكل ده كله باظ !! وإيه التبة اللي هناك دي كمان ؟؟
مراته : ما فيش !! دول يا دوب تلات كوفرتات وست ملايات وست أكياس مخدات والمكواة والكولمان وترمس الشاي وكام طبق على كام معلقة وبستلة مية وهدومنا وجزمنا ولعب العيال وعجلة موءه وشوية جرايد قديمة علشان أفرش بيهم المطبخ هناك.
صابر : بس ؟؟
مراته : لأ ما أنا خدت كمان شوية خزين ؛ كيسين لحمة وكيس كفتة رز وفراخ وصلصة وكيس بسلة وعلبة سمنة وإزازتين زيت وإزازة خل وشاي وبن وسكر وملح وفلفل وكام راس توم على شوية بصل وبطاطس وبتنجان والبوتاجاز الكلوب وصابون سايل وصابون وش ومسحوق غسيل وفينيك ومنشر الغسيل والمشابك .. أنت فكرتني صح ، آخد معايا الأحبال ولا هانلاقي هناك ؟؟
صابر : وده كلام برضه ؟؟ أمال يعني لو حبيت أنتحر ، أنتحر إزاي ؟؟ .. كنتي خدتي بالمرة هدوم الجيران نغسلها لهم هناك !! .. أنا رأيي إننا نربط الشقة ونحطها على العربية ونسافر بيها .
مراته : أنت بتتريق ؟؟ طب اقلع البنطلون اللي عليك ده والبس الجلابية !!
ــــــــــــــــــــــــــــــــــــ
أول ما وصلوا إسكندرية .. العيال ما طاقوش يشوفوا البحر من غير ما ينزلوا يبلبطوا .. فاضطر صابر أنه يسيب العـِزال على العربية اللي مأجرها ويقعدهم ساعة على البحر عقبال ما صاحبه ييجي .. راح علشان يأجر شمسية وتلات كراسي ؛ فاكتشف إن إيجار الشمسية خمسين جنيه والكرسي الواحد بعشرين جنيه والترابيزة بخمسة وعشرين جنيه .. بتاع الشماسي بعد ما دبسه ودق له الشمسية قال له : يا بيه خلي عنك خالص ، الحساب وأنت قايم بعد ما تنبسط أنت والأولاد .. وبعد ما الراجل مشي اكتشف صابر أنهم قاعدين في الصف التاسع من البحر !!
العيال نزلوا يبلبطوا في الميه بالأندرويرز (ما عدا البت الكبيرة نزلت بهدومها) .. وصابر راح مطلع الجرنان وقعد يقرا فيه .. شوية والواد موءه طلع من الميه وهو بيترقـّص وقافش على لا موأخذة بإيده!!
موءه : بابا بابا بابا .. عاوز أروح الحمام.
صابر : امسك نفسك شوية لحد ما نروح الشقة.
مراته : يستنى ده إيه ؟؟ ده عيل صغير !! أنت عاوزه يبهدل نفسه ؟؟ طبعاً ما هو مش أنت اللي بتغسل !! .. إقلع يا واد اللباس وانزل اتصرف في الميه .
صابر مشدوهاً : هه ؟؟
موءه : يا ماما دي التقيلة مش الخفيفة !!
مراته : خلاص ، روح هناك كده قـُرب الشارع وقرفص ، بس إوعى تلغوص نفسك !! وحاسب العربيات ، أنت فاهم ؟؟ .. إديله يا صابر ورقة من الجرنان اللي في إيدك علشان يمسح بيها .
يخطف موءه صفحة الجرنان من يد أبيه -- الذي كان لا زال فاغراً فاه من الصدمة -- ويجري مبتعداً وهو بلبوصاً !! .. تنادي عليه أمه بصوت عالي : واد يا موءه ابقى شوف كده فيه ناس كتير بتعدي ولا لأ عشان لو حبيت آجي أنا وأختك !!
موءه بصوت عالي جداً : اعملوها ف الميه يا ماما .
تأتي الننوسة المفعوصة بعد قليل وتطلب من أبيها مائة جنيه .
صابر صائحاً : ميت جنيه ليه ؟؟
الننوسة : حق الصور يا بابا!!
صابر : جن لما يصورك !! صور إيه يا بنت ؟؟
الننوسة في خجل : أصل المصوراتي كان معدي فقلت له يصورني كام صورة ع البحر.
صابر : تقومي تتصوري بميت جنيه ليه سعاد حسني في زمانها ؟؟
الننوسة : ما هي الصورة بعشرين جنيه يا بابا !!
صابر : الصورة بعشرين جنيه ؟؟ .. ما تشوفي بنتك يا ست هانم !! .. يستدير صابر إلى زوجته فيجدها تفاصل إحدى البائعات المتجولات!!
مراته : هات مية وخمسين جنيه يا صابر.
صابر وقد ضرب الدم في نافوخة : بتوع إيه إن شاء الله ؟؟
تجيبه زوجته وهي لا تزال تقلب في البضاعة : أصلي اشتريت جلابيتين خفاف للبيت وقميصين نوم .. ثم توجه حديثها للبائعة : عندكيش كلوتات ؟؟ ثم تخفض صوتها وتكمل : بس لا موأخذة تكون قطن !!
صابر يدفن وجهه في الجرنان ويغلقه عليه كالذي يلطم !! ثم يقول بصوت خفيض : يعني أنتي اتكسفتي وأنتي بتقولي قطن وما أتكسفتيش وأنتي بتقولي الكلمة التانية ؟؟
مراته تشيح بيديها : يا أخويا ما تبقاش حنبلي كده وتدق ع الواحدة !!
البائعة : عندي حاجة مستوردة هاتعجبك أوي !!
الننوسة : هات الفلوس يا بابا علشان الراجل واقف !!
صابر بعصبية : هي عشرة جنيه بس ما فيش غيرها !! .. ثم يوجه حديثه إلى زوجته : يا ولية خلصي بقى احنا في الشارع ، والناس بتتفرج!!
مراته : وفيها إيه يا أخويا ما هم بيتباعوا في كل حتة !! وبعدين هو أنت شفتني يعني هاقلع وأقيسهم ؟؟
صابر متهكماً : لو كنتي قلعتي كان أهون !! ثم يكمل في سره : كانوا هايدوروا وشهم !!
الننوسة تتمحلس لأمها : يا ماما قولي لبابا يديني ميت جنيه حق الصور !!
أمها : ميت عفريت ينططوكي !! علشان تاني مرة ما تبقيش تتصرفي من دماغك اللي عاوزة كسرها !! وبعدين تتصوري لوحدك ليه من غير أخواتك ؟؟ هه ؟؟ ولا أبوكوا قاعد على تل فلوس علشان كل واحد يتصور بميت جنيه ؟؟ قربي هنا تعالي قيسي الجلابية دي !!
الننوسة : يوووووه بقى يا ماما !! مش عاوزة جلابيات أنا !!
أمها تقوم من على كرسيها وتجذب البنت من ذراعها : تعالي هنا يا بنت الجزمة بدل ما أقوم لك !!
يظهر الولد الكبير المعجباني ويقول لصابر : بابا هات ميتين جنيه !!
صابر بعصبية : ودول بتوع إيه بقى إن شاء الله ؟؟
الولد المعجباني : أصلي عزمت رانيا وأختها وأخوها الصغير على بيتزا والحساب ميتين جنيه .
صابر : وتطلع مين بقى ست رانيا دي اللي عزمتها هي وأخواتها ؟؟
الولد المعجباني : دي واحدة صاحبتي اتعرفت عليها من ربع ساعة ع الكورنيش !!
صابر : اتعرفت عليها من ربع ساعة وعزمتها بميتين جنيه ؟؟ ده أنا خطبت أمك سنتين ما عزمتهاش باتنين جنيه !!
تنظر إليه زوجته وهي تمصمص شفايفها : علشان بس تعرف قيمتي !!
يظهر سائق البيجو : لو سمحت يا أستاذ صابر إديني أجرتي ستميت جنيه غير الشاي بتاعي !! نزلت لك العفش بتاعك هناك ع الرصيف والبيه الصغير واقف جنبه !!
الولد المعجباني : إنجز بقى يا حاج !! البت في المطعم ومنظري هايبقى وحش !!
الننوسة تتدخل في الحوار : ما تديلوش ولا مليم يا بابا ؛ علشان قلت له يعزمني على بدال وما رضيش !!
صابر ساخراً : ويعزمك ليه ؟؟ هو أنتي رانيا ؟؟
الننوسة : والله يا بابا لولا رامي عزمني ما كنتش ركبت !!
تقترب منها أمها وفي عينيها نظرة افتراس : ويطلع مين بسلامته إن شاء الله ؟؟
الننوسة في خجل بعد أن شعرت بأنها قد تسرعت في الكلام : ده ولد مؤدب يا ماما ركبني معاه علشان ما حدش يعاكسني !!
أمها تشدها من شعرها : وأنتي تعرفيه منين يا بنت الـ ..... علشان تركبي معاه لوحدك ؟؟
البائعة المتجولة : هتاخدي الجلابية اللي ع البنت ولا لأ يا مدام خلصيني ؟؟ كده حسابنا ميتين جنيه !!
الننوسة وهي تستنجد بأبيها : يا ماما والله ما كنا لوحدنا !! كان معانا طارق وكريم كمان !!
الولد المعجباني ساخراً : يا نهار أسود ع السفالة !! أختي اتعمل عليها حفلة يا جدعان !! ثم يوجه حديثه لأبيه : أتفضل يا عم أدي آخرة دلعك المِرق !! هات الميتين جنيه خليني أبعد عن المستنقع ده !!
المصوراتي : لو سمحت يا بيه عاوزين ميت جنيه حق صور العروسة !!
يظهر ضابط شرطة برتبة كبيرة وبصحبته عدد من الضباط والمعاونين وفي مقدمتهم أحد المخبرين الذي يدفع موءه أمامه!!
صابر يقف مذعوراً : إيه خير ؟؟ فيه إيه ؟؟
الضابط الكبير وهو يشير إلى إتجاه الكورنيش : الزبالة اللي هناك دي تبعك ؟؟
ينظر صابر حيث أشار الرجل فيجد عمال النظافة يرفعون أغراضه من على الرصيف ويلقون بها داخل سيارة جمع القمامة!!
صابر بعصبية : أيوه دي حاجتي ؛ انتوا بتعملوا إيه ؟؟
الضابط الكبير : هانرميها يعني هانكون بنعمل إيه ؟؟ حد قال لك تعمل إشغال طريق وتوسخ الشارع ؟؟
يأتي مؤجر الشماسي على مشهد الزحمة : خلاص كده يا بيه ألم القعدة ؟؟ الحساب بقى لو تكرمت !!
صابر موجههاً حديثه إلى الضابط الكبير : يا فندم دي هدومي أنا والعيال وكنت حاططها على العربية اللي هناك دي والسواق هو اللي رماها !!
سائق البيجو : أبداً والله يا باشا أنا حطيتهم على جنب !!
صابر بنرفزة : يا سلااام ؟؟ يعني الهوا هوا اللي رماهم كده وبعترهم ؟؟
موءه يشد أبيه من جلبابه : لا يا بابا دول وقعوا مني لوحدهم وأنا بادور على إزازة الملوخية !!
صابر والدم قد ضرب في نافوخة : ملوخية يا ابن الكلب !!
الضابط الكبير : ملوخية باميه ده مش شغلنا !! عليك غرامة بيئة ألف وعشرة جنيه !! هاتدفع ولا تشرف معانا في القسم ؟؟
صابر في غيظ : هادفع وأمري لله !! بس من فضلك خليهم ينزلوا الحاجة .. ثم يرفع ذيل جلابيته ليخرج محفظته من بنطلونه فيتذكر بأنه قد أعطاه لزوجته في البيت !!
صابر يقترب من زوجته ويهمس لها : البنطلون فين ؟؟
زوجته : هه ؟؟ بنطلون إيه ؟؟
صابر : يا ولية البنطلون اللي قلتيلي في البيت اقلعه والبس الجلابية !!
زوجته : أأأه .. ما أنا لقيته مش نضيف فسبته هناك !!
يقع صابر مغشياً عليه !!
هههههههههه ليه دول مش رايحيين مصيف ده نويين يعزلوا بس بصراحة رائع البوست مسخرة بمعنى اوضح افكار حضرتك مجنونة غصب عننا بنعجب بيها
ردحذفتحياتى
رائع ومشوق جداً .. لازم تعملها حلقات لإن العيلة دي أكيد يطلع منها أحداث كتير .
ردحذفتحياتي لقلمك المبدع
Ma As
ردحذف:))
ما هي الأشكال اللي زي دي بتخلي الإسكندرانية يلعنونا ويلعنوا البحر وموسم الصيف عموماً .
المفروض دول نعمل لهم شاطيء خاص مليان سمك قرش !!
:))
نورتينا
ديدي
ردحذف:))
يا فندم حضرتك تؤمرينا والله
:))
فكرت في الموضوع ده فعلاً ؛ وربنا يسهل أكمل لهم البوستات اللي كنت كاتبها من فترة وأنشرها على فترات .
:))
نورتينا
تصوير حي للواقع :)
ردحذفأحب أقولك أن مدونتك بتخليني أكون جوه التدوينة.. يعني في تدوينة النهاردة مثلا أنا كنت قاعدة وراهم في الصف العاشر وبتفرج على كل حاجة وصابر صعبان عليا :)
على الضحك اللي ضحكته و أنا بقرأ.
ردحذفشفت الأشكال دي كتير و الله و نسيت تضيف العيل اللي بيزن و يصرخ و مش عايز ينزل البحر و مرعوب و اخته تقوله طيب اقعد و جدو العجوز بتاع الشمسية اللي جنبهم يقوله أنا هقلعها لك ملط و اعلقها من رجليها و اضربها لك و لا تزعل انت بس نفسك.
هههه
مرحتش اصيف في اسكندرية ابداً، بس عارفة أن الاسكندرانية بيكرهونا عشان المناظر دي.
هههههه انا فطست على نفسي من الضحك بصراحه
ردحذفقلمك بجد جميل جدا
هههههههههههههههه
ردحذفمش معقولة بجد
بس انا توقعت النهاية دي
بتاعت الفلوس الي في البنطلون
بجد تموت م الضحك
انا نهجت من الانفعال
ردحذفحرام عليك بجد
بس تعليقا على الجزء الأول بس:
صابر لازم يشكر ويحمد
هو فيه ستات بتطبخ قبل ما تروح تتفسح؟ :)
ثم موءة ده اختصار ايه؟
دول مينفعش يروحوا مصيف
دول يروحوا السيرك
مع انيسة وميمون
يكسبوا دهب
تحياتي يا وليد باشا
فعلا باشا
موناليزا
ردحذف:))
يا فندم دي شهادة نعتز بيها من مبدعة في قامة حضرتك ؛ ربنا يكرمك ويسعدك
:))
غالباً بتحصل عشرة من طول القعدة ع الشط .. فتلاقي بعد شوية جيرانك اللي في الشمسية اللي جنبك بقوا قاعدين معاكي تحت شمسيتك وبيقروا الجرنان بتاعك وبيستعملوا الترمس بتاع الشاي بتاعك بكل أريحية .. يسيبوا لك العيال علشان يعرفوا ينزلوا الميه .. يطلعوا من الميه يستعملوا فوطتك وبشكيرك .. وطبعاً هايكونوا جاعوا فياكلوا أكلك .. وبعد كده يلعبوا بمضارب الراكيت بتاعتك .. ويصوروا بالكاميرا بتاعتك .. ولما اليوم يخلص ممكن الكائن الحسيس اللي فيهم يقول لك : إيه ده أنتي مش هاتنزلي الميه شوية ؟؟ دي الميه تجنن !! .. خلاص لو مش هاتنزلي وناوية تقعدي شوية كمان ابقي هاتي لنا معاكي الحاجة ع الشالية :D
:))
نورتينا
ردحذفMona el Dawakhly
:))
مشكلة معظمنا عموماً كشعب غلبان ؛ إننا ما بنعرفش ننبسط صح .. يعني تلاقي الست بتوضب في حاجة المصيف شهر قبليه ؛ وتروح هناك برضه تبقى شقيانة وعلى أعصابها .. وترجع تشقى تاني في البيت !!
حتى لو حبيتي تكوني إنسانة طبيعية رايحة علشان تستجم وتقعد مع نفسها ؛ مش هتخلصي من نظرات الناس وانتهاكهم الصارخ لخصوصيتك وتطفلهم وإزعاجهم !!
بقت مهمة كل واحد أنه يتفرج ع التاني ويعاينه ويفحصه ويفليه من فوق لتحت ويراقبه ويحكم على تصرفاته ويقارنها بتصرفاته وبعد كده ينتقده ويسخر منه ويشتمه !!
فبتكون النتيجة إننا بنبقى متوترين وتايهين وفوضووين ومزعجين ؛ لكننا بنكون أبعد ما يكون عن الفرح والإسترخاء !!
ونرجع من هناك نقول بس مش عارف ليه يا أخي ما انبسطش !!
ما هو طبعاً لازم ما تنبسطش ؛ لأنك لا عارف تنبسط ولا سايب روحك تنبسط ولا حتى سايب الناس التانية تنبسط في حالها !!
بالنسبة للاسكندرانية ؛ فسمعت أنهم هايكهربوا الميه في الصيف
:))
نورتينا
ردحذفwegdan eldawakhly
:))
ربنا يبارك في حضرتك ويكرمك ويسعدك ويفرح قلبك ويجازيكي كل خير على تشريفك الرائع وتشجيعك الجميل ؛ شرف لينا إن اللي نكتبه يسعد حضراتكم
:))
نورتينا
ردحذفرحاب صالح
:))
طب مش كنتي تقولي لمرات صابر إن المحفظة في البنطلون اللي في البيت بدل ما يتحط في الموقف ده يا رحاب ؟؟
:D
ربنا يكرمك ويسعدك ويفرح قلبك
:))
نورتينا
ردحذفد/ ستيتة
:))
مممم بالنسبة لمسألة الطبيخ فمش عارف بصراحة !! بس الستات بتاكل قبل وأثناء وبعد أي فسحة دي حاجة معروفة !! وبعد كده يرجعوا يقولوا عاوزين نعمل ريجيم :D
موءه ده اختصار عبد السلام يا دكتورة :))
وبعدين يا فندم دول مش محتاجين يروحوا سيرك !! دول هما السيرك القومي بذات نفسه !!
ربنا يبارك في حضرتك ويكرمك ويسعدك ويفرح قلبك ويجازيكي كل خير على مرورك الرائع
:))
نورتينا
ههههههههههههههه
ردحذفصيف ساخن جدا جدا جدا :)
كل سنة وإنت طيب :-)
ردحذفههههههههههههههههههههههه تيبيكال مصيف مصري اصيل لعائلة مصرية اصيله :) :)
ردحذفرائع جدا والوصف خلاني اشوف المشهد حي ومن الواقع فعلا ..ناس تجيب شلل
الراجل ياعيني زمانه جاله السكر :)
تحياتي ودمت مبدعا وراسم للبهجة
norahaty mo
ردحذف:))
يا أهلاً وسهلاً يا دكتورة كل سنة وحضرتك طيبة وبألف خير وصحة وسعادة وراحة بال
فعلاً صيف ساخن جدا
:))
نورتينا
Marwa Friday
ردحذف))
يا ألف أهلا وسهلا يا فندم في زيارتك الأولى
:))
كل سنة وحضرتك طيبة وبألف خير وصحة وسعادة
:))
نورتينا
افكار مبعثرة
ردحذف:))
ههههههههههههههه
طب بذمتك مش بيحصل كده وأسخم من كده كمان ولا لأ ؟؟
ربنا يكرمك ويسعدك ويفرح قلبك ويجازيكي كل خير ؛ وكل سنة وحضرتك طيبة وبألف خير وصحة وسعادة
:))
نورتينا