كل الطائرات تذهب إلى فرن أبو سمير
- وأنا صغير ، لما كنت باطلع ألعب فوق سطح بيتنا القديم وأشوف طيارة طايرة في السما كنت بافضل أتنطط وأشاور لها علشان تنزللي وألعب بيها شوية .. لكن ما كانتش بتنزل !! .. كانت بتفضل ماشية ماشية لحد ما تختفي في السما !! .. الموضوع ده خنقني وضايقني قوي .. لأني كنت عارف أنها بتروح للعيال التانية اللي ساكنين في العمارة العالية اللي ورا بيتنا .. فرحت جايب كام قالب طوب ورصيتهم فوق بعض واتشعلقت لحد ما طلعت على البرميل الصاج الكبير وبعدين طلعت فوق سقف العشة وفضلت مستني !! .. ولما عدت أول طيارة فضلت أتنطط وأزعق وأشاور لها علشان تنزللي وألعب بيها شوية ، لكن برضه ما نزلتش !! .. بس عرفت ساعتها أنها ما بتروحش للعيال اللي في العمارة العالية اللي ورا بيتنا لأني لما شبيت شوية لقيتها كملت مشي وراحت عند فرن أبو سمير اللي في الشارع اللي ورانا !!
"أنا والله مش هاكسرها أنا هالعب بيها شوية بس وأطلعها فوق تاني" .. "لما تسمع الكلام هانوديك عندها" .. بيني وبينك ما أقتنعتش بكلام أمي ، وحبيت أعتمد على نفسي في الموضوع ده .. وفي أول مرة نزلت فيها الشارع لوحدي ، جريت على الشارع اللي ورانا من غير ما أقول لحد من العيال ، وفضلت قاعد على البسطة الأسمنت اللي جنب فرن أبو سمير (اللي كانوا الناس بيهووا العيش عليها) مستني الطيارة ؛ لحد ما نمت !! .. كل اللي فاكرة ساعتها أن طنط أم وليد جارتنا شافتني نايم هناك فشالتني وودتني البيت لأمي ، اللي بقت تحضنني جامد قوي وهي بتعيط وأنا مش فاهم فيه إيه ؟؟ بس كنت باعيط علشان هي بتعيط !! ما فيش شوية صغيرين بقيت باعيط من كتر الضرب بالشبشب !!
بعد كام يوم .. اتخانقت مع الواد محمد (أخو وليد) وضربته ؛ لما قال لي أن أمه جابت له طيارة ومش هايلاعبني بيها !! .. ساعتها قلت له : الطيارة دي بتاعتي أنا ؛ وأمك خدتها مني لما نمت عند فرن أبو سمير !! ولو ما جبتهاش هاضربك !! .. ما جبهاش ؛ فضربته !! .. وزعلت قوي من أمي ساعتها علشان زعقت لي لما عرفت أني ضربته !! .. حسيت أنها نصرته عليا !! .. وحلفت لأروح كل يوم عند فرن أبو سمير ومش هانام خالص غير لما ألم كل الطيارات اللي بتروح هناك !! .. ورحت جايب كرتونة صلصة لقيتها مرمية قدام محل عم صلاح البقال وفرشتها بشوية قش من اللي كان فوق السطوح وقفلتها وخبيتها تحت السرير !! .. وبقيت كل شوية أدخل المطبخ أسرق شوية رز وعدس وفول وأحطهم في الكرتونة على جنب علشان الطيارات تلاقي أكل لما أجيبهم !! وحطيت لهم كمان إزازة مية ساقعة .. كان كل خوفي أن أمي تيجي تنضف الأوضة وتشوف الكرتونة !! .. علشان كده كنت كل شوية أدخل الأوضة اتطمن عليها وأخرج أقعد عادي خالص ولا كأن فيه حاجة !!
تاني يوم الصبح .. لقيت ماما بتقول لي وهي بتصحيني : ياللا اصحى علشان تفطر وتأكل الطيارة بتاعتك !! .. قعدت ع السرير شوية كده متنح وباحاول أستوعب هي بتقول إيه ؟؟ .. وبعدين افتكرت الكرتونة اللي تحت السرير فخفت تكون شافتها وشافت الحاجة اللي فيها !! .. نزلت ع الأرض وبصيت بجنب عيني كده ع السرير ، لقيت الملاية نازلة والوضع مستقر ، فاتطمنت وعملت نفسي رايح الحمام علشان تخرج هي من الأوضة وأرجع أتطمن ع الكرتونة .. لقيتها راحت رافعة ملاية السرير وبتقول لي : مش هاتطلع الطيارة بتاعتك علشان تفطر ؟؟ .. أنا ساعتها اتسمرت مكاني ورحت فاتح بقي هه ؟؟ .. وأول ما لقيتها سحبت الكرتونة من تحت السرير ؛ رحت راجع خطوتين لورا علشان أبقى قريب من الباب لو حاولت تجري ورايا بالشبشب (علشان الأكل اللي سرقته من وراها) لكن لقيت بابا في ضهري ؛ وهب راح شايلني ووداني عند الكرتونة !! .. وهو بيفتح الكرتونة بإيده ؛ كنت أنا باداري وشي بإيدي علشان اتفادى القلم اللي هاينزل عليه !! .. لكن لقيت الاتنين بيضحكوا قوي !! .. بابص كده بطرف عيني لقيت طيارة صغيرة نايمة جوه الكرتونة :)
"دي طيارة !!" .. "طيارة بجد يا بابا !!" .. "طيارة يا ماما !!" .. "أنت جبتها من عند فرن أبو سمير ؟؟" .
ساعتها .. ما زعلتش أنها ما بتطيرش !! .. أو يمكن زعلت شوية ونسيت بعد كده !! (زي ما نسيت أحطلها أكل في الكرتونة بعد يومين تلاتة !!) .. بس ساعتها كنت شايفها أحسن طيارة في الدنيا دي كلها !! وأكبر بكتير من كل الطيارات اللي في السما اللي قد عقلة الصباع !! دي حقيقية !! وليها أربع عجلات !! ولمبتين في كل جناح !! .. وو .....
بعد كده بكام يوم ؛ طيارة الواد محمد ضاعت (اللي هي طيارتي أنا أصلا) ؛ وقال لي تعالى معايا عند فرن أبو سمير علشان نجيب طيارة تانية !! .. قعدنا كتير على البسطة اللي جنب الفرن ؛ لكن ما فيش ولا طيارة رضيت تنزل من السما !! .. ساعتها .. عرفت أن كل الطيارات اللي بتعدي من فوقنا دي أكيد بتروح ناحية الأرض الفاضية اللي في الشارع اللي ورا فرن أبو سمير !! .. بس ما رضيتش أقول لمحمد .
انت مبدع ومختلف يا شريف ... ودماغ متكلفه ... ويك انك لو تكتب سيناريو بقا الله يرضى عنك :)
ردحذفصباحك نادى ان شاء الله مش مركز شباب ولا ساحه شعبيه :)
و الله العظيم يا بني انت خسارة في النت. أنت مفروض تكون كاتب كبير و الكل بيقرأ لك.من المصايب اللي بتكتب في الجرايد و عاملين نفسهم كتاب كبار و هما آخرهم كبار في السن و في العقل العجوز المريض.
ردحذفخليتنا نرجع سنين طفولة كتير قوي لورا يا شريف..ربنا يكرمك و يفرح قلبك.و صحيح عملت ايه لما رحت الارض الفاضية ..لقيت طيارات و لا لأ؟ :)
نهارك أبيض
بص هو أنا بعد ما خلصت قراءة حسيت أني محتاجة أعلق
ردحذفولما فتحت صفحة التعليقات اكتشفت أني مش عارفة أقول إيه الحقيقة :)
التدوينة خلتني ابتسمت جدا وده في حد ذاته يخليني ممتنة ليك .. بس كده :)
هههههه موتنى ضحك فظيعة بجد فعلا رجعتنى لكام سنة لورا كنت اول ما ايمع صوت الطيارة اجرى واشاور وانا فاكرة انهم شايفينى ولحد النهارد اطلع فوق السطوح واتفرج بس اكتشفت ان الطيارة اكبر من اللى بنشوفها فى السما .... واكتر حته عجبتنى حته المكرونة والرز حسيت ان حضرتك بتربى كتاكيت بس بصراحة بوست رائع
ردحذفتقبل مرورى
أنا هاخدها كنموذج للعرض للشباب لمسابقة التكية
ردحذفتسلم دماغك
هتلاقيها هنا
https://www.facebook.com/events/331655683648883/
راائع
ردحذفوانا بقرأ الكلام كنت حاسة اني شايفه المشاهد كلها ..
ردحذفومش عارفه ليه اتأثرت جدا بأخر كام سطر بطريقة درامية .
وكالعادة استمتعت جدا
شكرا و تقبل تحياتي
انا كانت ماما بتعملى طيارة بلون ابيض من ورق الكراسات لكن طول عمرى كان نفسى فى طيارة الوان اللى بتبقى كبيرة ولما تطير فى السما تبان حلوة اوى زى النجمة كان حلم حياتى يكون عندو واحدة بس ماما قالتلى دى للولاد بس وانتى بنت وبما انى ماليش اخوات ولاد فكان من المستحيل تدخل بيتنا النجمة دى ولما وقعت يوم واحدة عند بيتنا قولت لماما هاخدها قالتلى حرام دى اسمها سرقه وكانت اول مرةاشوفها من قرب كانت ضخمةاوى غير الصغننة اللى فى السما وكمان بتتطير بخيط ماكنتش اعرف السر كنت فاكراها بتطير لوحدها فضلت اتمناها كام سنة لحد مازهقت من الحلم وبس وحاولت انساه زى كل الاحلام اللى بعد كده .. فكرتنى بحاجة جميلة كانت فى يوم اهم الاحلام شكرا لك :)
ردحذفانا مش عارفة اعلق بجد
ردحذفحاجة فوق الوصف مينفعش اكتب عنها اي كلام وخلاص
وكالعادة اول ما اجي هنا واقرا تترسم ابتسامة كبيرة اوي ع وشي :)))
ردحذفكم البراءة اللي ف البوست غير عادية بجد
تحياتي ليك ودمت مبدع :)
ENG./ELSAYED,PMP
ردحذف:))
يا كبير كفاني فخرا إن حضرتك قريته و عجبك ما بالك بقى لما أشوف كمان تعليق منك ؟؟ تخيل بقى أنا منشكح قد إيه :)))
ربنا يعزك يا هندسة ولا يحرمنا من تشجيعك يا غالي ويكرمك ويسترك ويفرح قلبك ويطمننا عليك ونشوفك في أحسن حال بإذن الله
:))
نورت الدنيا كلها يا معلمي
Mona el Dawakhly
ردحذف:))
ربنا يعزك يا باشمهندسة يا رب ويكرمك ويفرح قلبك زي ما بتفرحينا بزيارتك الكريمة وتشجيعك المستمر :))
برضه أنتوا الأحسن واحنا بنتعلم من حضراتكم والله :))
وبعدين يا فندم هو لسه فيه جرايد ؟؟ ولا حد بقى يقرا جرايد ؟؟
ماله بلوجر ؟؟ أهو فيه ناس زي الفل زي حضراتكم بنقرالها وبنتعلم منها وبنستمتع بكتاباتها :))
شرفتينا
:))
نهارك فل بإذن الرحمن
موناليزا
ردحذف:))
العفو يا أستاذتنا ده شرف لينا والله أن حضرتك تقري لنا وإن اللي بنكتبه يعجب حضرتك حتى لو ما علقتيش فيكفينا إن حضرتك ابتسمتي :))
ربنا يفرح قلبك ويجعل أيامك كلها فرحة وسعادة وابتسامات كتيرة إن شاء الله :))
شرفتنيا
Ma As
ردحذف:))
متهيألي إن احنا بنشوف الطيارات حلوة علشان هي بعيدة وعالية فوق فوق في السما ولما نعمل كده بصباعيننا الاتنين (السبابة والإبهام) بنقدر نمسكها ونقفل عليها ونبتسم و بس :))
وبعدين أنا ما جبتش سيرة مكرونة خالص في البوست ؟؟
أه تصدقي صح كان ناقص مكرونة ويبقى طبق كشري :))
ربنا يكرمك ويسعدك ويفرح قلبك وينجحك في امتحاناتك بإذن الله
:))
نورتينا
إيمان الدواخلي
ردحذف:))
يا فندم احنا لينا الشرف والله إن البوست يعجب حضرتك وتشرفينا بتعليق حضرتك عليه :))
ربنا يكرمك يا أستاذتنا ويسعدك ويفرح قلبك ويجازيكي كل خير على زيارتك الجميلة وتشجيعك الكريم
:))
المدونة كلها تحت أمركم يا جماعة :))
:))
شرفتينا
إيمان
ردحذف:))
ربنا يكرمك يا رب ، شكراً لذوقك
:))
شرفتينا
جيلان حمزة
ردحذف:))
ربنا يكرمك يا أستاذتنا ويسعدك ويفرح قلبك ، دي شهادة نعتز بيها والله :))
بالنسبة لآخر كام سطر ،، يمكن علشان كانت القفلة أو النهاية .. زي ما تقولي حضرتك كده أنه كان حلم جميل والواحد صحي منه :))
ده مجرد تفسير .
:))
شرفتينا
واقع الخيال
ردحذف:))
الله على الجمال والبراءة :))
تعليق حضرتك جميل جداً في منتهى العفوية والبساطة وبجد أحييكي وأشكرك عليه :))
بس متهيألي لسه في فرصة أنك تشتري طيارة وتطلعي فوق السطح وتطيريها أو إديها لطفل صغير واتفرجي على السعادة اللي هاتترسم على وشه وهو بيطيرها :))
ربنا يسعدك يا رب ويكرمك ويحقق لك كل أحلامك :))
شرفتينا
رحاب صالح
ردحذف:))
يا خبر يا أستاذة ؟؟
وهو فيه بعد الكلام الحلو ده كلام ؟؟ ده كفاية تشريفك لينا والله
:))
ربنا يسعدك يا رب ويفرح قلبك ويجازيكي كل خير على تشجيعك الكريم
:))
نورتينا
افكار مبعثرة
ردحذف:))
ربنا يحفظك يا أستاذتنا ويكرمك ويبارك في حضرتك ويسعدك ويفرح قلبك زي ما بتفرحينا بتعيلقاتك الجميلة :))
:))
شرفتينا
ياااااااهــ !
ردحذفعلى ذكريات الطفولة
الجميلة المختلطة بالدموع
والضحكات والذكريـــــات
أنا كنت بــأعمل
ردحذفباى باى بذمة اوووى
يمكن الطيار يشوفنى
ويحدفلى هدية :)
كتابتك خلتنى فعلا اشوف الموقف ...ما توقفش كتابة
ردحذفnorahaty
ردحذف:))
صباح الفل يا دكتورة :))
أه والله حضرتك عندك حق .. الواحد كان بيعمل باي باي بذمة قوي وياما تخيلت فعلا أن الطيار شايفني وهايجيب لي معاه حاجة حلوة وهو راجع ويحدفها لي من الطيارة .. وكتير كنت باتخيل أنه هيقرب بالطيارة لحد البلكونة ويعمل لي باي باي وهايروح يركن في الأرض الفاضية وياخدني معاه لفتين فوق البيت وأنا أقعد أشاور للعيال صحابي بقى :))
شرفتينا
maya shalabie
ردحذف:))
ربنا يعزك يا أستاذة ويفرح قلبك :))
شكرا لذوقك ومرورك الكريم
:))
شرفتينا
هو ليه البروفايل بتاعك مش فيه معلومات عنك
ردحذفنشوه
ردحذف:))
المدونة بروفايلي
:))
نورتينا
الرجل الغامض :)
ردحذفبس نقص المعلومات كاميل او صفحة ويب خاصه بيك بتقلل ال rate
ردحذفمدونتك جات لى بالصدفه اقيمها نقص المعلومات اديتها medium بس هى حلوه لففت نظرى مع انى مش من هواة المدونات
norahaty mo
ردحذف:))
لا والله يا دكتورة مش غموض ولا حاجة ؛ ولا قصدت أبداً إن ردي يبان كأنه تهكم أو فيه نبرة تعالي .. ويمكن حضرتك من الناس اللي احنا اتشرفنا بأننا نتابعها وتتابعنا من أول ما بدأت تدوين خالص (من أيام المدونة القديمة من ست سنين لحد دلوقت) ؛ ونعتز ونتشرف بزمالة حضرتك لأنك أخت كريمة فاضلة وزميلة محترمة .
يمكن صحيح ما أتشرفتش باسم حضرتك (وكتير جداً من الزملاء الأفاضل في الحقيقة) لحد دلوقت ولا أعرف إذا كان اسم بروفايلك هو إختصار لـ نور ولا نورا ولا نورهان .. إلخ ، بس في نفس الوقت باعتقد أن التدوين أو المساحة الإفتراضية الخاصة بينا على بلوجر خللتنا نعرف بعض بشكل أفضل من ناس كتير تعرف أسامينا في الواقع ؛ وأعتقد أننا نعرف عن بعض كتير ؛ حتى لو كنا نجهل أي معلومات عن بعض ؛ عن طريق كتاباتنا وتعليقاتنا طول الفترة اللي فاتت دي كلها.
حاجة كمان .. أكتر حاجة بجد ضايقتني جداً الفترة اللي فاتت أن المدونة اتعرفت من ناس يعرفوني بره بلوجر !! وده ضايقني جداً وخنقني وكتفني وحسسني إني متراقب !! .. طب يعني لما أحب أهرب بدماغي شوية أروح فين ؟؟ ولما أحب أكتب براحتي أعمل إيه ؟؟
مش عارف !!
نقطة كمان .. المعلومات اللي بتتكتب في البروفايل دي مش هي احنا .. يعني الكتب والأفلام والأغاني واهتماماتي وووو .... إلخ ؛ كل دي حاجات متغيرة (بالنسبة لي ع الأقل) من وقت للتاني ومن موود للتاني ومن سن للتاني ؛ نظرتنا احنا كمان ليها بتتغير مع مرور الوقت !! .. وما أعتقدش إننا هانعرف شخص ما ؛ بمجرد أننا قرينا كام سطر عرفنا فيهم هو بيحب يقرا إيه ولمين ، طب ما يمكن يكون نقل أسماء الكتب دي أصلاً من غير ما يقراهم !!
وبعدين لو رجعنا للمعلومات الشخصية فأعتقد أن حضراتكم تعرفوا عني كتير ؛ يمكن أكتر من اللي أعرفه عنكم ، صح ؟؟
ربنا يكرمك ويسعدك ويفرح قلبك وتشرفينا دايماً بتعليقاتك الجميلة :))
:))
نورتينا
:-)
ردحذفأنا اترسمت على وشي بسمة حلوة أوي من كم البراءة والطفولة اللي ف البوست بجد
خلتني افتكرت الطيارات اللي كانت بتعدي من فوق البيت عندنا .. كنت أول ما أسمع صوت طيارة جي من بعيد أجري ع البلكونة عشان ألحق أشوفها وبعدين أجري مع اتجاهها لغاية ما أشوفها من البلكونة الثانية .. يااااه كانت أيام
فكرتنا بالذي مضى يا زوجي العزيز ، بجد تسلم إيديك ع البوست الأكثر من رائع ده يا أبو ياسين
:-)
ربنا يحفظك من كل سوء ، ويبعد عنك كل شر .. اللهم أمين
دمت مبدعا :-)
نشوه
ردحذف:)
ربنا يكرمك ويحفظك ، شكراً لذوقك وتقييمك ، نردها لك في الأفراح
:)
فيه حاجات كتيرة بصراحة ما بافهمش فيها في جزئية تظبيط المدونة ؛ يعني من فترة اكتشفت أن فيه عندي أخطاء كتيرة جداً بتتقل الصفحة وبتعمل مشاكل لمحركات البحث أنهم يلاقوا المدونة .. بس أصلح الأعطال دي إزاي ؟؟ الله أعلم !!
غير كمان حكاية القرصنة اللي بتصادفني من وقت للتاني ومش لاقي لها حل برضه !!
آخر ما زهقت عملت مدونة تانية استبن ورفعت عليها كل البوستات وشكلي كده هاعزل من هنا قريب ، بس مستني لما دي تجيب جاز .
شكراًً لاهتمامك
:)
نورتينا
βent Pasha
ردحذف:)
ربنا يبارك لي فيكي ولا يحرمني من تشجيعك ليا وطلتك عليا أبداً يا رب
:)
دلوقتي بنحدف الطيارات بالبصل أنا وياسين م البلكونة ههههههههههههه
:)
نورتيني يا حرمنا المصون