باللغات
يا أخي جوجل ده فيه حاجات عجيبة والله !! .. حطيت اسمي "شريف" في صفحة الترجمة بتاعة جوجل ، وقعدت أشوف شكله في اللغات المختلفة ؛ فاكتشفت إن له أشكال كتيرة قوي ونطق مختلف من لغة للتانية .. سواء باعتباره اسم أو كصفة (انظر الصورة) .. وبصراحة عجبني الحوار ده :)
- عندك مثلاً بالأسبانية : الجواسيل .. تحس كده أنه اسم موسيقي جميل .. يعني لو قطعته يبقى : الجو أسيل !! .. أسيل الحبايب يا قلبي يا دااايب !! .. وينفع برضه يبقى اسم مسحوق غسيل أو مستحضر تجميل !! .. الجواسيل !! .. ياااه ع الجمال والدلع !!
- عندك مثلاً بالأسبانية : الجواسيل .. تحس كده أنه اسم موسيقي جميل .. يعني لو قطعته يبقى : الجو أسيل !! .. أسيل الحبايب يا قلبي يا دااايب !! .. وينفع برضه يبقى اسم مسحوق غسيل أو مستحضر تجميل !! .. الجواسيل !! .. ياااه ع الجمال والدلع !!
- باللغة الاندونيسية : اسم ابن ستين كلب يودي السجن !! .. أه والله يا عم !! .. كل ده اسم ؟؟ .. كيبالا بوليسي دايراه !! .. يا نهار أسود !! .. ليه كده يا أندونيسيا ؟؟ .. افترضنا مثلاً أن الأيام لفت بينا وزرت بلدكم ومواطن صديق حب ينده عليا في الشارع ، ده أنا يكون جالي البقبيح في الأذن الوسطى على ما يخلص !! ساعتها أنا ممكن أقول له : قشطة كده !! أنت النهاردة ندهت عليا ، بكرة آجي أشوف أنت عايزني في إيه !! .. وبعدين هي مين دي اللي دايراه لا موأخذة ؟؟ ليه العوأ ده يا أخواننا ؟؟ .. أكيد طبعاً لازم يكون فيه بوليسي طالما هي دايراه !! .. لالا بجد أنا زعلان ، حاولوا تشوفوا لكوا حل في الاسم ده !!
- بالأيرلندي : سيرام !! .. متهيألي ده اسم دوا كحة !! .. بس مش وحش شغال !!
- بالآيسلندي : احم احم !! سيس الأمور ههههههههههههه !! مش عارف أنا إزاي يبقى سيس وأمور في نفس ذات الوقت !! .. يعني على كده لو أنت آيسلندي وأنا اتصلت بيك وأمك ردت عليا ، ما أزعلش لما أسمعها بتنده عليك بصوت حياني : واااااااد يا عرة كلم السيس ع التليفون !! هههههههههههههه آخرابي ع المسخرة !! .. طبعاً هي استحالة تصدقك لو أنت قلت لها عليا إني واد جدع !!
- بالزولووية : أيوه أيوه اضحك براحتك ، لك اسم هايترد عليه !! .. المشكلة إني مش عارف أنطق الاسم أصلاً !! هو أوله سيكا وآخرة أونيكي !! .. يعني تنطقه من الشمال أعورك ، تنطقه من اليمين أقول ده بيتحرش بيا وأدخلك السجن هههههههههههه .. ثم الزولوية دي لغة أهل إيه ؟؟ .. قبائل الزولو ؟؟ .. طب إلهي اللغة دي تزولو من عندهم علشان نستريح !!
- بالفارسية : كلانتر !! .. تحس كده أنه اسم له شمخة وهيبة !! كلانتر شايل سيفه !!
- بالفيتنامية : اسم ده ولا خناقة ؟؟ راجع من فضلك باب اللغة الاندونيسية !!
- بالماورية : هيريوي !! .. أيوه فعلاً أنا إنسان هيريوي من صغري وعلشان كده دايماً تلاقي بنطلوناتي بتتهري بسرعة الهيريوي إسماعيل هههههههههه .. :D
- بالنسبة لباقي اللغات المرسومة : لو تسألني عن رأيي في شكل الاسم اللي عجبني أقول لك : اللغة التاميلية !! وواضح من اسمها أنها لغة تأملية !! شوف يا أخي اسمي ملولو وجميل إزاي ؟؟ أينعم هو نطقه يفرس "أورتاليفر" بس شكله عاجبني !! .. ولغة التيلوجو وكذلك بلغة الكانادا واللغة الغوجراتية (اللي أنا أصلاً ما أعرفش دول لغات مين !!) بس ناس تشكر برضه .. أما عن شكل الاسم اللي ما عجبنيش ، فاللغة التايلاندية على رأسهم !! تحس أنه برشامة امتحان فيزيا مش اسم !! ده غير نطقه اللي من تسعين مقطع وكله نونوة !! .. وكذلك اللغة البنغالية نفس الشيء !! .. بالنسبة لأكتر نطق ضحكني كان باللغة اليابانية !! تحس أن اللي بينطق الإسم روبوت مدبلج !!
ياللا جرب حظك يا مواطن خش وشوف اسمك وضحكنا معاك :)
سلام عليكم
ردحذفبجد فكرة روووعة
هنروح فين في اسلوبك الممتع و الكوميدي و المشوق في نفس الوقت .
بجد البوست يجنن تسلم أيدك
بالمناسبة بقا حضرتك مردتش على أخر أقتراح ليا بخصوص المشروع المشترك و اللي المفروض يتنشر بكرا حسب أخر كلام .. فأنا متلغبطة و مش عارفه هننشر و لا هنأجل ؟؟
أنا كتبت بس لسه مكملتش ..
تحياتي الخالصة
يا أخي انت دماغك بتفكر في حاجات عجيبه
ردحذفجيلان حمزة
ردحذف:)
وعليكم السلام ورحمة الله وبركاته ، يا ألف أهلاً وسهلاً يا أستاذة ، منورانا والله
ربنا يكرم حضرتك ويجازيكي كل خير على تشجيعك الكريم ومرورك الرائع :)
حقيقي بنفرح لما اللي بنكتبه بيعجب حضراتكم وبيسعدكم :)
بالنسبة حضرتك للقصة ؛ فأنا مش ناسي والله وعذراً حقيقي إذا ما كنتش علقت تاني عند حضرتك بس أنا فهمت أن لو فيه أي تعديل على إقتراح حضرتك بخصوص النشر يوم الثلاثاء فأنا المفروض أعلق وأقول رأيي .. وهو ده السبب اللي خللاني ما أعلقش تاني لأني وافقت على الميعاد .. هو أينعم أنا لسه ما كتبتش ولا حرف حتى الأن !! بس الأفكار لا تزال في رأسي D:
الفكرة كلها بس أني أسخن وأدخل في الموود ، سبب تاني خللاني أأجل الكتابة برضه لآخر وقت هو زي ما تقولي حضرتك كده باختبرني :)
يناسب حضرتك إمتى بكرة إن شاء الله علشان ننشر البوست ؟
:)
شرفتينا
moataz farouk
ردحذف:)
ههههههههههههههههههههههه
الفراغ يعمل أكتر من كده يا معتز يا أخويا :)
بس آهو الواحد برضه ضحك شوية حلوين :))
نورتنا يا غالي
أعجبني :)
ردحذفتعرف يا شريف لما باجي هنا بحس بالفرح بجد و بنشكح جدا
يدوم الابداع و الضحك و الفرح :))
هههههه
ردحذفعجبتني اووي
وهشوف اسمي كدة عامل اية
ده انا كنت لسة بقول لبنت اختي ان زمان مكانش في حد بيناديني رحاب كله كان بيناديني باسم تاني يعني مثلا رحمة وعتاب وماهيتاب ورباب ةوريهام
يعني علي الاقل ريهام كان اسمي التاني
لكن الباقيين دول معرفش جولوي منين
المهم جميل اووي البوست ةوهشسوف كدة رحاب اية اخباره معاهم
هدير
ردحذف:)
ربنا يفرح قلبك ويسعدك يا أستاذة ويجعلنا دايماً عند حسن ظنكم وسبب لإنشكاحكم :))
فرحتيني والله بتعليقك شكراً جداً ليكي
:))
رحاب صالح
ردحذف:))
هههههههههههههههههه يا خبر يا رحاب كل دي أسامي ؟؟ بس تعرفي ، الأسامي الكتير دي بتنقع برضه ، يعني ممكن تنقذك من مواقف سخيفة كتيرة ، يعني لو واحدة مثلاً ليها عندك فلوس وبتطاردك وعارفاكي باسم ريهام تخرجي مع واحدة تانية بتناديكي باسم رباب علشان لما تصر على إنك ريهام صاحبتك اللي معاكي تقول لها لأ دي رباب ، المهم يا ماهيتاب مش عاوزك تتلخبطي في اسمك تاني D:
بس جوجول ماترجمش اسمك هو ترجم الصفة شريف لان الاسناء ما تترجمش ولو اني زمان كنت باسمع مغني فريق بوليس ستينج ولاقيت واحد كان اسمه افطيم قريطم ههههه بيقول عليه في البي بي سي المغني لسعة اول مرة اعرف ان في الايطالي قريبة جدا شريف في المعني حلو يامعلم اوووي وفكرتني بالنكتة بتاعة وزير خارجية تركيا والجزائر ههههه
ردحذفصباح الخير
ردحذفماشاء الله عليك لسه مكتبتش و واثق من قدرتك على النشر في الميعاد ... أنا كمان لسه مخلصتش بس أوك خلينا نتحدى نفسنا ( ونختبرنا ) و ننشر أنهارده منتصف الليل ... لو مش مناسب لحضرتك و تحب بدري شوية أوك ... وربنا يستر .
تحياتي
Tarkieb
ردحذف:))
أيوه يا أستاذنا أنا ما عنديش مانع أنه يترجم الصفة بس من غير تجريح لا موأخذة D:
إيه ده أنت بتسمع أغاني الفرنجة يا تراكيبو ؟؟ :))
وبعدين يا عمنا هو أنت تيجي لحد النكتة وتسكت ؟؟ ينفع كده ؟؟ يا كبير لو فيها ألفاظ كده ولا كده إغمز لي وأنا أعمل إشراف ع التعليقات :))
ماليش دعوة عاوز أعرف النكتة !!
جيلان حمزة
ردحذف:))
مساء النور يا أستاذتنا
لأ هي مش مسألة ثقة والله ... بس أنا أصلي بقالي فترة كبيرة جداً ما قعدتش علشان أكتب مخصوص ، وكتير جداً بتبقى عندي أفكار قصص بس للأسف باكسل أكتبها .. ولو كتبت حاجة وما نشرتهاش ، إستحالة أعدل عليها بعد كده وأنشرها !! ما بقاش ليا خُلق للكتابة ومثابرة زي الأول !! بالإضافة إلى أني بقالي فترة كبيرة جداً ما قريتش !! فما بقاش عندي لغة !! علشان كده معظم البوستات هنا بالعامية .. لأني باعتبر أن الفصحى لها احترامها وجلالها ما ينفعش أعك فيها !!
علشان كده أنا أجلت الكتابة لآخر وقت قلت أشوف هاعرف أكتب تاني ولا لأ ؟؟ وآهي الفكرة موجودة ناقص بس الواحد يبدأ :))
وبصفة عامة الموضوع مش تنافس والله .. بس أنا نفسي فعلاً الواحد يرجع يكتب تاني والناس تشجع بعض على الكتابة وترجع للتدوين .
حلو ميعاد الساعة اتناشر بالليل .. ربنا ييسر والواحد يعرف يكتب !!متهيألي كده ماليش حجة D:
بسم الله الرحمن الرحيم
ردحذفكتبت مقدمة المشاركة D:
هييييييييييه
فاضل ساعة إلا ربع ونلم الورق .. اتقدم تاتاتا اتقدم تاتاتا
هههههههه ايوا الحال من بعضه احساس لم الورق
ردحذفعلى فكرة مين جاب سيرة الفصحى ... أنا كاتبه بعامية ركيكة .. الموضوع مش تنافس أبدا و لا خطر ببالي هو أنا هروح فين جنب حضرتك .
ربنا يسترررر
فكره جميلة يا باشا بس على فكره كل التراجم دى للصفة انما الأسماء تقريبا واحده فى النطق
ردحذفوتستحق تحيه كبيره على الفكره دى لانها جديدة جدا :)
جيلان حمزة
ردحذف:))
أنا عاوز أقول لحضرتك إني بدأت كتابة البوست الساعة عشرة ونص بالظبط !!
حداشر وربع كنت خلصت المفتتح اللي في الأول .. وخلاص بقى سخنت ودخلت في الموود وبدأت أكتب القصة وأرص الأفكار اللي في دماغي ، قلت أدخل مدونة حضرتك أراجع الفكرة تاني !!!
أول ما شفت كلمة "بياع جرايد" حسيت وكأن جردل مية ساقعة اتدلق عليا !! أه والله العظيم !! لخبط لي حساباتي خاااالص !! أنا كنت ناوي أكتب حاجة تانية خااااااالص ، وبالفعل كنت راسمها في دماغي وما كانش ناقص غير إني أكتبها ع الوورد ، لحد ما شفت بتاع الجرايد ده واضطريت أغير القصة اللي كانت جاهزة في دماغي !! حسيت زي اللي كان قاعد بيذاكر فيزياء واكتشف أن عنده امتحان جغرافيا !!
راخر أنا ما رضيتش أقرا اللي كتبته بعد ما نشرته علشان ما أمسحوش ، أنا نشرته زي ما هو ويا دوب لسه قريه دلوقت وصححت كام غلطة كتابية !!
:))
Gamal Abu El-ezz
ردحذف:))
منور الدنيا يا كبيرنا :))
التحية واجبة لحضرتك على تشريفك لينا وتعليقك الكريم يا أستاذنا :))
تاميلي و جوجراتي مش غوجراتي (بلاش الترجمات اللبناني اللي تفرس دي) و التيلوجو و الكانادا كلها لغات هندية، التيلوجو أكتر لغة شائعة في الهند من حيث التعداد يليها الهندي و بعدين التاميلي.لغات مشهورة في موطنها و قليل قوي من الدول المجاورة. طبعاً كلها في مقاطعات لها سينماتها المستقلة غير بوليوود يعني تلاقي كوليوود و توليوود و صندلوود و مفيش مشاكل لو لقينا شبشب وود برضه كله شغال.. زمان كنت زيك كدة اتفرج على اللغة التاميلي دي و اقول ياااه طبق مكرونة اسباجيتي..أخويا كان يبص لها و يقول دي لغة مستحيل حد يبقى خطه وحش فيها :) . هي بصراحة فرجة في حد ذاتها بخطوطها و حركاتها دوناً عن أي لغة تانية.
ردحذفمرة زمان عملت حاجة كدة بس دورت على معنى لأسمي، و لقيت انه متكرر بمعاني كتير في اللغات من ضمنها وحيد للأبد و كئيب و ربة القمر، و متفرد من نوعه و شوية حاجة لطيفة كدة.
سنكوح شنن لملوم سامي
ردحذف:))
ماذا أقول بعد كل ما قيل ؟؟
الله يفتح عليكي يا باشمهندسة ويجازيكي كل خير على توضيحك الرائع ده :))
أتاري الهند دي حوار يا جدعان :))
والله حضرتك جيتي في بالي ساعة كتابة البوست ده وقلت ما حدش هايفيدنا وينورنا غيرك :))
بالمناسبة صح ،، كنت اتفرجت من فترة طويلة على فيلم حياة باي بترجمتك الجميلة المتميزة ونسيت أشكرك وقتها على المجهود الجبار والترجمة الراقية ،، فعذراً للسهو وبجد ألف ألف شكر
:))
نورتينا