Micmacs

Micmacs فيلم فرنسي من إنتاج 2009 مدته ساعتين إلا ربع (النسخة اللي عندي 1:39:59) من إخراجJean-Pierre Jeunet   اللي أخرج قبل كده :

(Delicatessen   (1991

The City of Lost Children   (1995)

Amélie   (2001)

A Very Long Engagement  (2004)

الفيلم بيحكي لنا (في إطار كوميدي مشوق) حكاية بازيل اللي والده بيموت في الصحراء المغربية نتيجة إنفجار لغم .. بنلاقيه بعد كده كبر واشتغل في محل شرايط فيديو وبالصدفة البحتة بيتصاب برصاصة في رأسه قدام المحل لما بيطلع يتفرج على مطاردة ما بين اتنين ما نعرفهمش .

بيبدأ الفيلم بمشهد في غرفة العمليات للجراح وهو بيقول : إذا استخرجت الرصاصة فقد يصبح في حالة ضعف ، إذا لم نستخرجها فسيعيش على حد السكين ، فالممرضة بتقول له : من الأفضل أن يكون على قيد الحياة ومهدد بخطر الموت ، من أن يعيش بدون أن يكون واعياً أنه يعيش !! وبيعملوا ملك وكتابة علشان يقرروا هايعملوا إيه (طب طب يعني مش تهريج) ، فبتكون النتيجة أنهم يسيبوا الرصاصة في رأسه :D

يخرج صاحبنا من المستشفى ويروح على شقته فيكتشف أنه انطرد ، يروح على شغله يلاقي صاحب المحل جاب واحدة بداله .. يفضل عايش في الشوارع لحد ما يتعرف على متشرد كبير في السن اللي بياخده على مقلب خردة ويعرفه على مجموعة أشخاص متعددين المواهب ويشتغل معاهم في جمع الخردة ، لحد ما في يوم يعدي من قدام مبنيين الشركتين اللي بينتجوا الرصاص والألغام فيقرر الانتقام منهما على اللي عملوه فيه هو وأبوه بمعاونة الناس اللي اتعرف عليهم وبتستمر الأحداث :)

- اللي شاف فيلم من الأفلام اللي فوق دي ، أكيد هايعجبه الفيلم ده بكل التفاصيل الجميلة والابتكارات المبهجة اللي فيه ، تخيل أنت بقى مخرج عبقري زي ده في مقلب خردة ممكن يطلع لك جمال شكله إيه ؟؟ (على سبيل المثال المشهد اللي في أول البوست) .. مش هاحرق لكم الفيلم أكتر من كده ، بس فيه تنويه أخير للناس اللي بتتكسف ، فيه لقطة كده كده في الدقيقة 52:34 لمدة 14 ثانية .