ديليفري
تطلب البنت رقم تليفون الكبابجي الموجود في الإعلان ، فيرد عليها صاحب المحل فتنادي على أمها في فرحة طفولية : واحد رد عليا يا ماما وقال آلــو
الأم تحلف على زميلتها الجالسة بجوارها على كنبة الأنترية : والله يا سوسن لانتي قايلة تاكلي إيه !! عيب حتى ده انتي أول مرة تشرفيني ، هو انتي بخيلة ولا إيه ؟؟
سوسن : والله ما له لزوم اللي انتي بتعمليه ده يا هدى !! انتي كده بتحسسيني إني ضيفة !!
الأم : إخص عليكي إوعي تقولي كده أحسن أزعل منك !! ده انتي صاحبة بيت !!
سوسن : خلاص يبقى الموجود يسد !! وبعدين بصراحة أنا باقلق من أكل الشارع .
الأم : لالالا .. المطعم ده نضيف ومضمون ، طب ده احنا كل يوم بنجيب من عنده
سوسن : لزومه إيه بس تكلفي نفسك ؟؟ (في سرها : يا لهوي على الفشر !! طب يا أختي هاتيلك جزمة بدل اللي اتهرت في رجلك)
الأم : يا ستي لا تكلفة ولا حاجة ، وبعدين ما احنا كده كده هانطلب !! (في سرها : هي صحيح فلوس الجمعية اللي جايبهالي هاتخس ، بس مشكلة ، علشان لما تروح الشغل وتقعد تنم عليا تقول لهم هدى أكلتني كباب)
البنت صائحة : ياللا يا مـــامـــا الراجل مستعجل !!
سوسن : هو طبعاً عنده ديليفري
الأم ترتبك قليلاً ثم تقول : أه طبعاً عنده ، ده مطعم عالى قوي ما شاء الله ، انتي فكرك تعرفي تدخليه إلا بالحجز ؟؟ ده ما بيخشوش غير الفنانين يا بنتي والناس الهاي لايف !!
سوسن : أهم حاجة بس شوفيه هايجيب الطلبات بعد قد إيه وقوليله لو الأكل بارد هانرجعه !!
الأم : لا يا بنتي بارد ده إيه ، هو احنا أول مرة نتعامل معاه ؟؟ عن إذنك بس أروح أمليه الطلبات .
سوسن : اتفضلي يا حبيبتي .
تمسك الأم سماعة الهاتف وتقول بكل ثقة : آلـو ، لو سمحت يا ريس عندكوا ديليفري ؟؟
صاحب المحل : إن شاء الله يا فندم .
الأم : طازة ؟؟
صاحب المحل : هو إيه اللي طازة يا فندم ؟؟
الأم : هو إيه اللي هو إيه ؟؟ باقول لك الديليفري اللي عندكوا طازة ؟؟
صاحب المحل : إن شاء الله ، ولو مش طازة نطيزهولك يا فندم !!
الأم : أصل قبل كده طلبنا اتنين ديليفري ووالله اترموا زي ما هما في الزبالة !!
صاحب المحل : أكيد مش من عندنا يا فندم !!
الأم : مش فاكرة الصراحة جوزي كان جايبهم منين !! بـُص أنا أهم حاجة عندي النضافة !!
صاحب المحل : لا من الناحية دي ما تقلقيش حضرتك ، اللي عندنا كلهم نضاف ومستحميين وقمامير .
الأم : طب بـُص نقي لنا اتنين حلوين كده على ذوقك ، واعمل حسابك لو طلعوا باردين هارجعهملك !!
البنت تجذب أمها من عباءتها : وأنا كمان يا ماما ، هاتيلي واحد أنا كمان !!
الأم تبعدها عنها : ششش !! ابقي كـُلي معايا ، هابقى أديكي الزلمكة اللي بتحبيها !!
البنت تغضب وتدبدب على الأرض بقدميها : ما ليش دعوة أنا عاوزة واحد لوحدي !!
الأم تصيح فيها : قلت لك بس !! ما تخللينيش أمد إيدي عليكي ؟؟ وبعدين انتي مش هاتقدري تاكليه كله لوحدك وفي الآخر هايترمي برضه !!
البنت : والله هاخلصه !! ما ليش دعوة هاتيلي واحد !!
صاحب المحل : خلاص بقى ما تزعليهاش يا مدام !! احنا ممكن نبعت لها ناشيء صغير كده تقزقز فيه على حساب المحل !!
الأم تستحلف لها بأن تمسح بيدها على ذقنها : ماااااشي يا تـُقى !! وحياة أمك لأوريكي بعد ما طنط تمشي !! .. تقرب سماعة التليفون من أذنها وتستكمل : معلش أنا آسفة ، أنت عارف بقى العيال و زنهم .
صاحب المحل : لا يا فندم ما فيش حاجة ، ربنا يخللي .
الأم : قوللي كده حسابك كام ؟؟ ومش هاوصيك بقى علشان عندي ضيوف !!
صاحب المحل : قلنا اتنين ديليفري طازة ونضاف وما يكونوش باردين .. تحبي حضرتك معاهم سلطة وعيش ؟؟
سوسن من الداخل بصوت عالي : يا هدى ما تزوديش في الأوردر بدل ما كل ده يترمي حرام !!
الأم : معلش خلليك معايا ثانية واحدة !! .. بتقولي إيه يا سوسن ؟؟
سوسن ترفع صوتها أكثر : باقول ما تزوديش في الأوردر بدل ما كل ده يترمي في الآخر !!
الأم : أيوة يا ريس !! بـُص ما تزودش في الأوردر علشان ما حدش هنا بياكله هات بداله سلطة كبدة لو عندك !!
صاحب المحل : موجودة يا فندم تحت أمرك .
الأم : كلك ذوق والله .. شوف كده حسابك كام ، ومعلش أنا آسفة طولت عليك !!
صاحب المحل : لا يا فندم العفو ، أصل احنا النهاردة كنا عاملين عرض على مخاصي صاحب المحل وحضرتك فزتي بيهم .
الأم : إيه ده بجد ؟؟ عندكوا مخاصي ؟؟ طب معلش خلليك معايا ثانية واحدة !! .. سوسن !! يا سوسن !! بتحبي المخاصي يا سوسن ؟؟ .. طب بص يا ريس إلغي الديليفري وهات لنا .... تيت تيت تيت .. آلــو .. آلــو.
زمانه قفل المحل واعتزل المهنه وبيلعن اليوم الى كلمها فيه كل ده علشان وجبه دا أنا اتضيقت له بس تعرف فيه نوعيات من دى فى المجتمع مع إختلاف الموقف بيحب يخنق الى بيكلمه والا ميتبسطش
ردحذفإوعى تفكر تجيب دليفرى يا باشا وخصوصا لو معزوم :)
Gamal Abu El-ezz
ردحذف:))
صباح الخير عليك يا أستاذنا يا جميل
اللذيذ في الموضوع أنه كمل معاها الحوار عادي جداً ، بالنسبة للعزايم فلو اتعزمت أكيد هاطلب واحد ديليفري ع الفحم أوردر بره D:
جمعة مباركة عليك بإذن الله
الحقيقة أنا سمعت عن الدليفري و الاوردر بس عمري ما دقتهم ..
ردحذفقتلتنا ضحك الله يسعد أيامك :)
يااه!
ردحذفانت لخصت مُجتمع كامل في تدوينة وحدة!
جيلان حمزة
ردحذف:))
هههههههههههههههههههههههههههههههه
يا نهار ع القفشة يا جدعان مش ممكن كمية الضحك اللي ضحكتها من تعليق حضرتك بجد ، ربنا يسعدك يا أستاذتنا ويفرح قلبك زي ما فرحتينا :))))
ما هي المشكلة إن المطاعم دي بتبقى بالحجز !!
بس احنا ممكن نلم من كل مدون اتنين جنيه ونشترك في واحد نجربه D:
نورتينا
عُلَا وَتَدْ ~
ردحذف:))
ربنا يكرم حضرتك ويسعدك زي ما أسعدتينا بمجاملتك الرقيقة وتشجيعك الجميل :))
وبعدين يعني ؛ هو المجتمع إيه غير شوية ديليفري بيتاكلوا من شوية ديليفري تانيين ؟؟
D:
نورتينا
ههههه هي لغت الاوردروعملته سلطة كبدة ...علي ايامي كان لسان عصفور من سمير بتاع الكبدة في شارع زين االعابدين....فكرتنا بايام زمان ومحلات الركييب ههههه
ردحذفدي عزومة في المركبية..كويس أن راجل صبر كل ده ..
ردحذفTarkieb
ردحذف:)))))
زين العابدين
ياااااااه يا عمنا !!
والله العظيم يا عم أنا مجرد ما قريت الكلمة بس ابتسمت :)
لقيت نفسي غمضت عيني كده لثواني وسرحت لبعيد قوي وأنا باحاول افتكر كل تفصيلة من تفاصيل المنطقة وذكريات الصعلكة هناك .. تعرف إن أنا ما دخلتش الشارع ده من 2006 ؟؟ رغم إني كنت – ولا زالت - بانزل السيدة كتير جداً ، بس يا دوب باعدي عليه من بره زي ما تقول كده خايف والله يا تركيب !! .. خايف أنزل علشان أشوف الحتت الجميلة دي أتصدم ، زي ما تكون بتهرب من أنك تبص لنفسك في المراية وتكتشف قد إيه أنت عجزت !! .. خايف أنزل ما ألاقيش : الناس اللي كنت متعود أشوفها في كل مرة كنت باعدي فيها من الشارع ، الستات الكبيرة اللي كانت بتقعد في البلكونات وترازي في البياعين ، الستات المتدلعين اللي الواحدة فيهم كانت بتوقف المنطقة كلها على رجل لما تعدي ، نفس شلل الرجالة الكبار اللي بيقعدوا في نفس مكانهم على القهوة وبرضه بيزعقوا وبيتخانقوا ع الشيش دو !! .. خايف ألاقي المحلات اتبدلت (ده لو ما كانتش اتباعت وغيرت نشاطها أصلاً) واتجددت للأسوأ ، وبدل الأبواب القديمة ومرواح السقف أو الكاريوكا والفتارين العتيقة والصور اللي بطرابيش ألاقيهم ركبوا ألوميتال وستاير هوا وتكييف وقلبوا موبايلات وهدايا بـ 2,5 وحطوا بوسترات زاعقة مالهاش طعم !!
رغم إن فيه حتت كتيرة في السيدة وضواحيها ما لفتهاش من زمن ، بس لما كنت بانزلها كل مرة ، كانت رجليا عمرها ما بتخونني فيها !! كنت باخدها زجزاج .. أه والله يا عم .. كنت انزل أبو الريش وأضرب كبدة عند سامح اللي في آخر الكوبري أو عند الطاهرة اللي في أول شارع السد بعد ابن حميدو وأخرم يمين من ورا في شمال لحد السوق وأطلع قلعة الكبش وأنزل ع السبيل وأرجع من مراسينا ونضرب فطير من عند الراجل اللي على أوله وبعدين نتمشى لحد قدري ونخش شمال ع الحنفي ونطلع من الناصرية ونرجع ع الرحماني وساعات كنا نروح عند سمير لو العملية متيسرة ونضرب ربع مشكل ونتمشى في شارع بورسعيد لحد الحلمية ونخرم ع المغربلين على باب زويلة ع الحسين وبعدين ندخل ع الجمالية والخرنفش وشارع الجيش ع العتبة على محمد علي على باب الخلق !!
كنا مجانين !! .. وكانت الدنيا دي كلها بتاعتنا لوحدنا !! .. كنا أبرياء والله العظيم يا عم !! .. ما كناش بنعمل حاجة غير إننا ناكل وبعدين نقوم نتمشى علشان نهضم ونقعد على قهوة علشان نحبس لحد ما نلاقي نفسنا جوعنا فنقوم ناكل :)
والأهم من كل ده إننا كنا بنعرف وبنقدر نضحك من غير ما نخاف ونقول اللهم أجعله خير .. ايييييييييييييييييييه !! ثم تنهيــــدة طويــــلة
الحمد لله على كل شيء :)
أنت قلت إيه بقى بعد زين العابدين ؟؟ :D
سامحني معلش أصل أنا وقعت منك أو وقعت مني عادي بقى ما تدقش !!
مش ناسي أنا السوبيا المِزز اللي عليك هه ؟؟
ربنا يطمننا عليك يا رب ونشوفك في أحسن حال ومش عاوزينك تختفي بقى يا معلم
أخوك / شريف
نيللي علي
ردحذف:))
لأ هي الشهادة لله الست كان في نيتها تعزم بس الراجل هواللي ما عندوش ديليفري ولا أوردر ، تعمل هي إيه ؟؟
هو المفروض الراجل كان دبح لها واحد من عنده .. أهو منه يكسب زبون ومنه يخلص من أجرة الواد الديليفري ومنه يتعدم والست يتقبض عليها ونبقى خلصنا من الكل في عزومة واحدة D:
نورتينا يا أستاذة
طيب و جوزها رأيه إيه في موضوع مخاصي صاحب المحل؟
ردحذفههههه، و الله ضحكتني، بحب حواراتك و الله يا باشا. ربنا يكرمك زي ما بتضحكنا و تنسينا الهم.
Mona el Dawakhly
ردحذف:))
ههههههههههههههههههههههههه
أكيد هايرحب بالموضوع ده طبعاً D:
ربنا يكرمك يا باشمهندسة ويسعدك ويجازيكي كل خير على تشريفك وتشجيعك لينا
نورتينا