اليافطة
- الزوجة بنرفزة : هي دي الأرض اللي عاوزنا نشتريها ؟؟ دي صحرا !! ده أنا ما أعرفش آجي هنا تاني !!
الزوج : يا حبيبتي الصحرا اللي انتي شايفاها دي بكرة مش هاتلاقي فيها خرم إبرة !! وبعدين ما احنا طول عمرنا عايشين في الزحمة لما اتخنقنا !! خللينا نشم هوا نضيف بقى !!
السمسار : يا مدام صدقيني الأرض دي لقطة ، وموقعها ممتاز !! وبكرة سعر المتر هايضرب ويبقى بالشيء الفلاني !! يعني إن ما سكنتوش فيها وحبيتوا تبيعوها هاتجيبلكم دهب . هو فيه أراضي بتخسر يا عالم ؟؟
الزوجة ساخرة : ده طبعاً بعد ميت سنة إن شاء الله !!
الزوج : احم احم ، أنا باقول يا معلم نتوكل على الله ونمضي العقد .
السمسار : على بركة الله . ثم ينظر إلى الزوجة بطرف عينيه ويكمل : وبعدين يعني ما هو على قد فلوسكوا !! هو فيه متر أرض بخمسين جنيه في الزمن ده ؟؟
الزوج : والله يا معلم ربنا يعلم العشرتلاف جنيه دول جايين إزاي وبعد تحويش وجمعيات قد إيه !! احنا قلنا آهي حاجة تنفع العيال لما يكبروا !! ويا عالم بكره فيه إيه !!
السمسار بخبث : قصدك العشرتلاف وخمسمية !! أنت بتنسى يا بيه ولا إيه ؟؟
الزوجة تشد زوجها من ذراعه وتهمس في أذنه : ما تديلوش ولا مليم الراجل ده !! الأراضي دي كلها كانت وضع يد ، وهو تلاقيه واخد المتر من الحكومة بجنيه !! يعني كسبان فيها خمسين ضعف !! كفاية عليه قوي الميت جنيه اللي خدها بتاعت المعاينة !! وبعدين أنا أصلاً مخنوقة منه من الصبح !!
الزوج : أيوه يا حبيبتي بس احنا متفقين معاه !! وبعدين ما تنسيش أن هو اللي هايخللي عينه ع الأرض في غيابنا !!
الزوجة : متفقين على إيه ؟؟ أنه يجيبنا في الصحرا ؟؟ وبعدين أنت مش شايفه بيلقح علينا إزاي بالكلام ؟؟ بُص أنا قلت ما تديلوش حاجة يعني ما تديلوش حاجة !! أنت خايف منه ولا إيه ؟؟ ما تنساش كمان إن احنا لسه عاوزين نبني سور !!
السمسار متهكماً : يا مدام وحدي الله ف قلبك ، سور إيه بس اللي عاوزة تكلفي نفسك وتعمليه ؟؟ طب ده انتي عشان تسوري الأرض دي هاتدفعي قد تمنها !! أنا باقول توفروا فلوسكوا (الكتيرة) دي في حاجة تانية !!
الزوجة بصوت مكتوم : الراجل ده مستفز وحرق دمي ، أنا عاوزة أعضه !!
الزوج يمسكها من ذراعيها : احم احم ، أنا باقول ع الأقل يعني نعمل سلك شايك علشان نبقى عارفين حدودها !!
السمسار : يا بيه الحارس ربنا ، وبعدين هو حد يستجري يهوب اليمة دي وأنا موجود ؟؟ أقول لك ؟؟ أنت ممكن تعمل يافطة كبيرة زي دي كده (يشير إلى يافطة كبيرة معدنية صدأة ملقاه على الأرض ومغطاه بالتراب) ، وتكتب عليها اسمك بخط كبير لزوم الوجاهة يعني !!
الزوجة تقرص زوجها من ذراعه بغيظ وتشده ناحيتها : يعني إيه تكتب عليها اسمك ؟؟ وأنا اسمي فين إن شاء الله ؟؟ هو احنا مش اتفقنا إن الأرض دي باسمنا احنا الاتنين ؟؟ ولا أنت رجعت في كلامك تاني ؟؟ أنا عاوزة أفهم !!
الزوج بعصبية : يا ستي اسم إيه وزفت إيه !! هو انتي خلاص شفتيني مضيت العقد وعملت اليافطة ؟؟ وبعدين بطلي حركاتك دي ما تخللينيش أخرج عن شعوري قدام الناس !!
الزوجة وقد بدأ صوتها يعلو : ناس مين ؟؟ أنت بتسمي الجربوع ده ناس ؟؟ وبعدين يعني هاتعمل إيه ؟؟ هه ؟؟ هاتضربني ؟؟ طب اتفضل اضربني !!
الزوج يجز على أسنانه : أستغفر الله العظيم يا رب !! هو انتي عاوزة تتخانقي وخلاص ؟؟ وبعدين هو أنا عمري رجعت في كلامي معاكي ؟؟
الزوجة تشيح بوجهها عنه ثم تقول بصوت حرصت على أن يكون مسموعاً : ما أعرفش اسأل نفسك !!
الزوج يجذبها من ذراعها بعصبية : قصدك إيه فهميني ؟؟ قوليلي إمتى رجعت في كلامي معاكي ؟؟
الزوجة : مش وقته !!
الزوج وقد ضرب الدم في نافوخه : لأ بقى وقته !!
الزوجة تنظر بسخرية إلى السمسار وتقول : يعني مش خايف على شعورك قدام الناس ؟؟
الزوج بصوت عالي : سيبك من الحيوان ده وقوليلي تقصدي إيه !!
السمسار : لا بقى !! طالما الموضوع وصل للشتيمة وقلة القيمة أنا ماشي !!
الزوج بعصبية : في ستين داهية !! آهو غار وبقينا لوحدنا يا ست هانم !!
الزوجة تتخذ وضع الهجوم : أنت نسيت الألفين جنيه بتوعي اللي خدتهم السنة اللي فاتت ؟؟ بعد ما قبضتهم من الجمعية عشان نطلع بيهم المصيف جيت سيادتك وسلفتهم لواحد صاحبك !! واتحبسنا في البيت !! صح ؟؟ وصاحبك من ساعتها ما جابش الفلوس !! أنا ما كنتش عاوزة أتكلم في الموضوع ده بس أنت اللي فتحتني !!
الزوج : ألفين جنيه إيه وزفت مصيف إيه اللي بتتكلمي عليهم ؟؟
الزوجة : أيوه ، مش فلوسي ؟؟ أقصد يعني أن بيتنا كان أولى بيهم !!
الزوج : دلوقت بقت فلوسك وفلوسي ؟؟ طب ما أنا هادفع تمنتلاف جنيه في الأرض دي ؟؟ ورغم كده وافقت أننا نكتبها باسمنا احنا الاتنين !! وبعدين يا هانم الألفين جنيه اللي انتي بتتكلمي عليهم دول ، اللي خدهم مني جوز أختك مش واحد صاحبي !!
الزوجة : جوز مين ؟؟ وفاء ؟؟
الزوج : أيوه
الزوجة : طب ليه ما قلتليش ؟؟
الزوج : دي حاجات بين الرجالة ما يصحش تعرفيها وبعدين ما رضيتش أصغره قدامك !!
الزوجة : وهو خدهم منك ليه ؟؟
الزوج : اتسرق منه خمستلاف جنيه من فلوس عهدة بتاعت الشغل وقصدني ساعتها ، وما كانش قدامي غير الفلوس دي !! أقصد فلوسك دي !! وبعدين المصيف أنا قدمت عليه في الشغل بس ما طلعناش في القرعة .
الزوجة : تصدق أنت كسفتني قوي دلوقت !! أنا آسفة بجد !! حقك عليا يا حبيبي .
الزوج : لا حق ولا باطل !! خدي الألفين جنيه بتوعك من فلوس الأرض وأنا هابقى آخد سلفة من الشغل وأكملهم .
الزوجة : ما يبقاش دمك تقيل بقى !! وآدي راسك أهي يا سيدي !! سامحني بقى عشان خاطري !! وبعدين احنا مش عاوزين نزنق نفسنا أكتر من كده ، كفاية أقساط الجمعيات ومدارس العيال ومصروف البيت !!
الزوج : عادي !! بجملة الزنقة !!
الزوجة : قول بقى إنك عاوز ترجع في كلامك وتكتب الأرض باسمك لوحدك ؟؟
الزوج : تاااااني أرجع في كلامي ؟؟
الزوجة : باهزر معاك يا أخي !! إيه بلاش ؟؟ وبعدين أنا عارفه أن جوزي حبيبي عمره ما يرجع في كلامه أبداً .
الزوج مقموصاً : يا سلام ؟؟ دلوقتي جوزي حبيبي ؟؟
الزوجة : أه حبيبي ونور عيني وكل دنيتي إذا كان عاجبك .
الزوج يحتضنها : ربنا يبارك لي فيكي ولا يحرمنيش منك أبداً ، بس اليافطة مش هاكتب عليها اسمك !! ما عنديش ستات اسمها يتحط على يفط !!
الزوجة بدلال : ولا حتى هاتكتب كلمة "وحرمه" ؟؟
الزوج مبتسماً : أه كده ماشي !! تعالي نشوف اليافطة اللي هناك دي كده يمكن تنفع لو اتدهنت . (يمسك يدها ويتجها نحو اليافطة الكبيرة المعدنية الصدأة الملقاه على الأرض والمغطاه بالتراب)
الزوجة : يااااه دي شكلها مبهدل خالص !!
الزوج : استني اقلبها ع الناحية التانية يمكن تكون أنضف !!
بعد أن قلب اليافطة على وجهها الآخر وأزاح عنها التراب وجد مكتوباً عليها بخط كبير :"منطقة عسكرية ممنوع الإقتراب أو التصوير"
الزوجة : ابن النصااابة !!
الزوج : يا ريتني كنت سيبتك تعضيه !!
يضحكان عالياً كما لم يضحكا من قبل ، حتى يستلقيا على الأرض ، ثم يقول الزوج وهو يسعل من كثرة الضحك : بُصي أنا رأيي تكتبي عليها اسمك لوحدك !!
هههههههههههههههههههههههههههه
ردحذفتحفة يا شريف
تحفة
لأ وواقعية وجميلة جدا
يارب تكون بخير انت وعائلتك الكريمة
د/ ستيتة
ردحذف:))
ياااااااااه يا دكتورة نورتي الدنيا كلها والله العظيم
:)))))
ربنا يفرح قلبك يا رب زي ما فرحتيني بزيارتك الكريمة وتعليقك الجميل اللي خللاني في منتهى الإنشكاح :))
احنا الحمد لله بخير في نعمة من المولى عز وجل ودايماً والله فاكرينك وبندعيلك بظهر الغيب بكل خير :))
سلام كبير جداً لحضرتك ولأسرتك الكريمة مني ومن زوجتي والننايس المفاعيص اللي مطلعين عينينا ياسين وآدم
:))
نورتينا
:)
ردحذفعارف ... جميله ... وسردك رائع ... وبعدين كمان فيها تمكن من قراءتك لعقليات الرجل والمرأة :)
woman mentalities
اخيرا لقيت التعليقات مفتوحه
ردحذفاحمدك يارب
اولا شكرا علي سؤالك عني الفترة ال فاتت تحياتي لبنت باشا بجد شكراا
ثانيا انا عايزة اعرف هما هيروحو ازاي من الحته المقطوعه دي بعد الراجل ماسابهم ومشي
ثالثا بقي فين حته الارض دي ال المتر فيها بخمسين جنيه
اخيرا الموضوع جميل بجد وتسلم ايدك
تحياتي
هههههههههههههههههه
ردحذفحلوا خااالص
يخربيت كده
ردحذفموقف من الحياه العامه
بس تعالي هنا التعليقات مفتوحه يافرج الله
انا مفقوعه مرارتى من البوستات اللي اتمسحت
خاصتا البوست اللي كان في قول كلام اى كلام ملحقتش اشوف ردك عليا
انا عندى مرارة واحده الله يخليك ما تفقعها وتغيظها اكتر من كده ههههههههههههههه
اسكتش ممتع للقطة ممكن تتكرر كتير في الحياة ...اسلوب حضرتك رائع و بسيط .. ده غير انك اضفت ليومنا ابتسامة .
ردحذفتحياتي و وارجوك متتأخرش علينا في البوستات .
شكرا
ENG./ELSAYED,PMP
ردحذف:))
منور الدنيا كلها يا كبيرنا :))
ربنا يكرمك ويسعدك ويفرح قلبك يا غالي على تشجيعك الكريم وزيارتك الجميلة
:))
والله يا معلمي هي جت كده D:
أنت عارف إن أنا باكتب حاجة واللي بانشره حاجة تانية خالص !!
بس طالما عجبك يبقى حلو :)
نورتنا
وصف الاحساس
ردحذف:))
يا ألف أهلاً وسهلاً يا باشمهندسة ، نورتي البلوجر والله :))
يا فندم لا شكر على واجب احنا أخوات ، يا رب تكوني بخير إن شاء الله ومش عاوزين انقطاعات تاني بقى ، وبنت باشا تهدي حضرتك أعطر تحية وأطيب سلام :))
بالنسبة لجزئية هايروحوا إزاي دي ، فسبحان الله بجد !! أنا فعلاً كنت قافل القصة بالسؤال ده بعد ما خلصوا ضحك ، بس فضلت النهاية المرحة دي .. شفتي إزاي إننا مفتقدين قاصة متميزة وقارئة خبيرة زي حضرتك ؟
أكيد فيه أراضي كتيرة المتر فيها بخمسين جنيه (عند اليافطة) D:
لأ بجد مش حاجة تزعل إن بلد بالمساحة دي والناس عايشين فيها فوق بعض ؟
شكراً جداً لذوقك وزيارتك الكريمة وتشجيعك يا أستاذتنا
:))
نورتينا
سوبيا
ردحذف:))
يا ألف أهلاً وسهلاً بحضرتك في زيارتك الأولى ، نورتينا والله يا أستاذة
شكراً جزيلاً على كلماتك الرقيقة ، بنتعلم من حضراتكم والله
:))
نورتينا
rona ali
ردحذف:))
هههههههههههههههههههههههههههه
يا ألف أهلاً وسهلاً يا أستاذة منورانا والله بتعليقاتك الجميلة ،ربنا يكرمك يا رب ويفرح قلبك
:))
أيوة أيوة افتكرت !!
البوست المفتوح !!
وتعليق حضرتك بتاع عيون القطر اللي ماشية بتلتهم اللي قدامها !!
حاضر يا فندم إن شاء الله هانشر القديم تاني بس أصل فيه حاجة أنا مش فاهمها خالص بجد بتحصل في المدونة كل فترة .. بالاقي فيه مواقع معينة (إعلانية غالباً) بتدخل مرة واحدة في توقيت واحد !! غالباً هاكرز .. وقبل كده كان الأكاونت اتسرق ولقيت نفسي اتضفت على كام مدونة وبقى فيه شريك معايا من غير ما أعرف !!
أنا بصراحة شكيت في البوستات اللي فيها فيديوهات أو اللي بتبقى فيها تعليقات كتيرة فحفظتها في المسودات .. مش عارف هل فيه برنامج لحماية المواقع والمدونات بيتسطب جوه المدونة ولا لأ ؟؟
بصراحة خفت كمان إن حد يستولي عليها ويستغلها في نشر حاجات مش كويسة .
كده كده أنا عملت من المدونة نسخة تانية احتياطي بس مش عارف اتصرف في الموضوع اللي بيتكرر ده إزاي ؟؟
المواقع دي غالباً من روسيا وأمريكا
مش عارف هل د عنده حل ولا إيه ؟؟
أفيدونا
:))
نورتينا
قصه جميله تنفع تتعمل حلقة في مسلسل اذاعي
ردحذفجيلان حمزة
ردحذف:))
يا ألف أهلاً وسهلاً يا أستاذتنا منورانا والله :))
ربنا يكرم حضرتك يا رب ويسعدك ويفرح قلبك زي ما بتفرحينا بزيارتك الكريمة وتشجيعك :))
بالنسبة للنشر سموك ؛ في والله حاجات كتيرة جداً مكتوبة من فترة بس عاوز أفلترها وأنقحها ، كمان موضوع المدونة ده قالقني شوية (فضلاً راجعي ردي في التعليق السابق) .. مش فاهم يعني اللي بيعمل كده بيستفيد إيه ؟؟
اللي مخوفني إن فيه مدونات كتيرة لقيتها اتقرصنت وبقت كلها إعلانات !!
ربنا يستر
:))
نورتينا
بس بمناسبة الاراضي اللي في الصحراء الحقيقه احنا عندنا بيت في مرسى مطروح كان فاضي ولم اذهب إلى هناك من 4 سنين ومفيش حد في العائله يعرف مكانه غيري واظن والله اعلم اني لو رحت هناك هلائي العرب كبسوا عليه
ردحذفبالإضافة إلى أرض في صحراء بالوظة في شمال سيناء اخذناها من سنة 2002 والله أعلم باللي جرالها !
فكرتني بالإثنين دول ولله- ضاع فيهم فلوس كتير يا باشا- وللأسف مفيش حد في العيله يعرف مكانهم غيري- يعني لما اموت العيله هاتتسوح !
moataz farouk
ردحذف:))
حمداً لله ع السلامة يا كبير :))
منور الدنيا كلها يا غالي ، عامل إيه يا دكترة ؟؟ يا رب تكون بخير وفي أحسن حال إن شاء الله :))
وماله يا باشا .. بس كده ؟؟ نعملها مسلسل إذاعي .. ترشح مين في دور اليافطة ؟؟
:))
نورتنا
moataz farouk
ردحذف:))
يا عم ألف بعد الشر عليك .. تصديقاً لكلامك احنا برضه كان عندنا أرض وما حدش كان بيعرف يروحها غيري أنا وأبويا وبعدين بجملة تضييع الفلوس بنى عليها بيت وكان عاوزنا نروح نقعد فيه .. فضلت وراه لحد ما خليته باعه D:
طب ما تحاولوا تأجروا البيت الي في مطروح ده بدل ما بجد حد يستولي عليه ؟؟
بالنسبة للأرض بتاعت سينا فمش عارف بصراحة فين بالوظة دي ؟؟
ما تشوف كده لو تنفع تتزرع ؟؟ أو حتى تأجرها ؟؟ بدل ما حد يحط إيده عليها ؟؟ خسارة والله يا معتز !!
ماشاء الله عليك السيناريو والحوار في منتهي التشويق وخفة الدم الغير مصطنعة
ردحذفالستات دي يا أخي لما تحط مناخيرها ف حاجة تبوظ علطول ((:
حاولت كتير أدخل عندك بس التعليقات كانت مقفولة ، أشكر معايدتك الرقيقة ودعواتك الصادقة بجد أسعدتني يارب سنة سعيدة عليك وعلي أسرتك
طيب سماح وهستنى تنزل لما يكون الوضع آمن
ردحذفاتفضل اللينك دة اقرأ الاسباب وفي لينك لجوجل تحمي حسابك عن طريق رقم تليفونك
لو حد اخترق هيبعتلك يسالك لو انت تكمل لو مش انت هيديك كود وهيقفل على اللي قدامك يدخل
http://www.traidnt.net/vb/traidnt2147700/
ديدي
ردحذف:))
يا ألف أهلاً وسهلاً يا أستاذة ، نورتي البلوجر والله ، عوداً حميداً بإذن الله :))
ربنا يكرمك ويجازيكي كل خير على مجاملتك الرقيقة وتشجيعك الكريم ، بالنسبة للتعليقات ، إن شاء الله هاتبقى مفتوحة بعد كده :))
وكل سنة وحضرتك طيبة وبألف خير وإن شاء الله تكون سنة حلوة وسعيدة على حضرتك وعلى أسرتك الكريمة تحققين فيها ما تتمنين بإذن الله
:))
نورتينا
rona ali
ردحذف:))
يا فندم أخجلتم تواضعنا باهتمامكم وردكم الكريم ، جزاكي الله عنا كل خير
:))
احم احم .. هي بس فكرة الموبايل دي (وأنا عارف إن فيه ناس هاتقع ع الأرض من كتر الضحك لما تقرا التعليق ده) ما تنفعش خاااااالص مع واحد زي حالاتي بيفتح الموبايل -- ده لو افتكرته أصلاً -- مرة أو مرتين في الشهر بالكتير ، كل مرة فيهم لا تتعدى الخمس دقائق D:
أنا باقول أحط للهاكرز دول سِم في المدونة D:
مرة تانية شكراً جزيلاً لاهتمامك وردك
نورتينا
فلوسه حلال ما راحتش اونطة ...حلوة كالعادة وحشني قصصك الكوميدية وكل سنة وانت طيب يا شقيق
ردحذفTarkieb
ردحذف:))))))))
يا ألف نهار أبيض :))))
أنت أنت بجد ولا حد سارق الأكاونت بتاعك ؟؟
أنا مش مصدقني لحد دلوقت !!
واحشني جداً والله العظيم ودايماً في بالي والله يا غالي :))
حقيقي أنا فرحان جداً إن البوست ده رجع لنا كل الناس الحلوة اللي مختفية من زمن :))
ربنا يطمننا عليك يا رب وتكون في أحسن حال وأتم صحة وسعادة ورضا وراحة بال :))
وما ننحرمش أبداً من طلتك علينا يا أستاذنا ومش عاوزينك تختفي تاني بقى !!
كل سنة وأنت طيب وبخير ويا رب تكون سنة حلوة سعيدة عليك وعلى أسرتك الكريمة إن شاء الله
:))
نورتنا
تحفة بجد حلوووووووووووة اوووووووووووووى بجد أنا حمووووووووت من الضحك أصلا تسلم ..وبجد نورتنى بتعليقك عندى أخيرا لقيت حد عبرنى وجه المدونة هههههههههه منور دايما ورافع معنوياتنا
ردحذف:))))
ردحذفالخناق جاب نتبجه اهو :))
ولله احنا حاولنا نبيعه لكن المشكله اني حاسس ان السمسار اللي كان بيحاول يبيعه هو اللي قاعد فيه دلوقت !
ردحذفمسيري اروح وآخد الصدمه
الحمد لله
ردحذفنفدوا من النصاب بأعجوبة
Tarkieb
ردحذفتركيبوووا ظهر!!
ياالف مرحبااااااا
يامجمع المدونين ياباشا :)
ياااااه
ردحذفبجد حلوا جدا :)
shoshta_ joker
ردحذف:))
يا ألف أهلاً وسهلاً يا فندم في زيارتك الأولى ، منورانا والله :))
ربنا يعز حضرتك ويكرمك ويحفظك ويسعدك زي ما أسعدتينا بمرورك الكريم وتعليقك الجميل :))
وشرف لينا إننا نتابع حضراتكم
نورتينا
شمس النهار
ردحذف:))
يا ألف أهلاً وسهلاً يا أستاذتنا منورة الدنيا كلها والله العظيم
:))
أه والله .. شفتي حضرتك ؟؟ رب ضارة نافعة :))
ربنا يكرم حضرتك ويبارك لك ويحفظك ويسعدك زي ما بتسعدينا بمرورك الرائع وتشجيعك الكريم
نورتينا
moataz farouk
ردحذف:))
أوووبا !!
تصدق ممكن فعلاً !!
ربنا يسترها والله يا دكترة .. إن شاء الله تلاقيه زي ما هو :))
ابقى طمننا عليك يا غالي
نورتنا
norahaty
ردحذف:))
يا ألف أهلاً وسهلاً يا دكتورة منورانا والله العظيم
شفتي المفاجأة الحلوة دي ؟؟ إيه رأيك ؟؟
سبحان الله .. تركيب ده فيه شيء لله .. وأنا باشوف تعليقات السادة الزملاء الأفاضل اللي مختفيين بقالهم فترة ، قلت في سري : ما يجيش تركيب يعلق عشان نتطمن عليه ؟؟
والحمد لله آهو ظهر وبان عليه الأمان وشرفني وفرحني بتعليقه الجميل :))
يا رب ما يختفي تاني بقى !!
ربنا يكرمك يا دكتورة ويحفظك ويسعدك زي ما بتسعدينا دايماً بسؤالك الكريم
نورتينا
sony2000
ردحذف:))
يااااااااه سوني !!
حمداً لله ع السلامة يا بنتي .. نورتي الدنيا كلها :))
ربنا يكرمك يا سوني ويبارك لك ويحفظك ويفرح قلبك زي ما فرحتيني بتعليقك الجميل :))
طبعاً هاتختفي سنة كالعادة D:
نورتينا
عفوا ياباشا
ردحذفليا سؤال:هو انت شيلت
مدونتى من البار اللى على الجنب؟ليه ياترى ياهل ترى؟احب اعرف السبب؟
المال الحلال مبيروحش ابدا ...اهو لولا نكد الزوجة المصرية الاصيلة وانها حطت التاتش بتاعها كان زمانه ياعيني راحت منه كل حاجة...اصيلة يا ام السيد ههههههههههههه
ردحذفتحفة بجد وواقعية جداااا
ودائما وابدا بعد طول غياب باجي هنا عشان تترسم ابتسامة عريضة على وشي :)))
ربنا يكرمك ويسعدك انت واسرتك الكريمة وكل سنة وانت طيب :)
تحياتي
ردحذفأيوة بقى التعليقات مفتوحة أخيرا ^_^
رب ضارة نافعة لو مكانوش اتخانقوا كان اتنصب عليهم :)
بحب اقرأ تدويناتك جدا
norahaty
ردحذف:))
لا والله العظيم يا دكتورة ما حصل أبداً
.. وهو أنا أقدر ؟؟ .. طب دي أحلى حاجة في المدونة هي مدونات حضراتكم .. الفكرة بس إن المدونات مقسمة لمجموعات (نظراً لعددها الكبير) ولو حضرتك ضغطتي على "إظهار الكل" أسفل كل مجموعة هاتظهر لك القائمة أسفلها كاملة :))
وممكن والله أعلم يكون تهييس من بلوجر !!
نورتينا
أفكار مبعثرة
ردحذف:))
هههههههههههه أيوه هو التاتش بتاعها ده ، ومسألة التاتش دي مش في مصر بس ، لأ ، دي جينات أصيلة في الستات كلها
D:
ألف حمداً لله على السلامة يا أستاذة وعوداً حميداً بإذن الله وكل سنة وحضرتك طيبة وبألف خير وصحة وسعادة ويا رب تكون سنة سعيدة وحلوة على حضرتك وعلى أسرتك الكريمة وتحققين فيها ما تتمنين
نورتينا
أمممممم!!
ردحذفطيب انا جاية
ابــــــــــــــــــــص
اهوووة وأعاين موقع المشكلة :)
:)
ردحذف:) :)
:) :) :)
شكــــــــــــــــــراً
Lady E
ردحذف:))
يااااااه سمو الليدي E شخصياً عندنا ؟؟
:))
يا ألف أهلاً وسهلاً يا أستاذتنا منورانا والله العظيم .. ويا فندم التعليقات هاتكون مفتوحة على طول إن شاء الله ، طالما هاتخللينا نتطمن على حضراتكم ونتشرف بتعليقاتكم الجميلة
:))
فعلاً والله رب ضارة نافعة .. بس أنا كان نفسي تعض السمسار بصراحة D:
شكراً جزيلاً لمرورك الكريم وتعليقك الجميل يا ليدي ، ومش عاوزينك تختفي تاني بقى !!
نورتينا
norahaty
ردحذف:))
الشكر ليكي يا دكتورة على سؤالك واهتمامك وعتابك الرقيق :))
ربنا يكرمك يا رب ويجازيكي كل خير ويسعدك ويفرح قلبك زي ما بتفرحينا بتعليقاتك الجميلة :))
نورتينا