وانتوا عاملين إيه ؟
"دعــوة للرغي"
حد يرشح لنا كتاب أو بوست حلو نقراه أو فيلم شافه وعجبه أو يفرحنا بخبر حلو أو يحكي لنا موقف حصل له أو معلومة نستفيد بيها أو يرشح لنا موضوع هايف نتكلم فيه إن شالله حتى يعزم علينا بكمترايه :D
طبعاً انتوا عارفين أنه ممنوع الكلام في السياسة وحال البلد !
طبعاً أرشح كتابي"خبايا نسائية"
ردحذفمش لأنه أجمد كتاب ممكن تقرأوه ولا لأنه مليء بالمواعظ اللي ممكن تستفيدوا منها
بس لأنه نتاج قلمي
أيون عنصرية هي :)
ولأن لو المدونين رفقاء الكفاح ماجابوهوش مين هيشتريه ويقرأه ويقولي رأيه :)
هتلاقوه في مكتبة ألف بجميع فروعها
وفي مكتبة "فكرة " كمان
--------------------
عايزة اتكلم عن مسلسل "حكاية حياة" لو كنت اتفرجت عليه
عايزة حد ياخد ويدي معايا في الكلام عنه
والنهاية بالنسبة لك كانت متوقعة ولا لأ
----------------
ممكن نتكلم عن الاعلانات وايه أجمد اعلان وإيه الاعلان اللي تحب تتكلم عنه سواء بالايجاب أو السلب
بالنسبة لي اعلان موبينيل الأخير بتاع "بحتاجلك وتحتاجلي" أحلى بكتير من بتاع كريم عبد العزيز
وكمان "دور جوه ذاتك أهراماتك"
يعني ايه ندور جوانا على أهراماتنا أنا مش فاهمة
بس عجبتني الجملة دي "قوم بدل ملامح يومك"
الجدير بالذكر اني مش فاكرة الاعلان ده أصلا بيعلن عن إيه :)
-------------------
عن فيلم قلب الأسد بيقولوا عليه بذيء
واعلاناته توحي بكده فعلا فلقتني بترحم على أيام الليمبي اللي أول ما نزل
الناس كلها هاجمته رغم ان مافيهوش لا لفظ بذيء ولا مشهد خارج
بس الكل علق على أسلوب المساطيل اللي محمد سعد بيتكلم بيه
دلوقتي وبعد نجاح فيلم محمد رمضان
بجد الله يرحمك يا ليمبي
--------------------
بقول كفاية رغي كده :)
:)
ردحذفازيك أولا :)
و كل سنةو انت طيب ثانيا ..
بص بالنسبة للكتب : الرجل ذو البدلة البيضاء الشركسكين
دي رواية او سيرة ذاتية عن قصة خروج عائلة يهودية من مصر في الستينيات ؛ اجمل ما فيها الانسانية الشديدة في الوصف اللى انا متأكدة ان الترجمة عن اللغة الأصلية أخذت كثير من دفئه ؛ بالرغم ان الترجمة العربية ممتعة لحد بعيد .. هتوحشك مصر بتاعة زمان و هتزعل بجد على اليهود المصريين اللى مشيوا - حتى لو عندك تحفظات ما .
في كمان الأسد المغاغي و المرأة الفاقوسية (اه و الله دا كتاب) و هيعجبك جدا و م الاخر يعنى هو النسخة العربي من النساء من الزهرة و الرجال من المريخ .
:D
اي خدمة يا سيدي !!!!
كده بردو يا باشا تختفي الفتره دي كلها؟
ردحذفهههههههههه
ردحذفشوف يا سيدي
انا اخر بوست عندي ف حياتي لكن مش حرة فيها بتكلم عني
انا بجحت
وواحد قالي بحبك
وانا عايزة ابعد عنالناس اللي بحبهم
و....كدة يعني
ومدونة حوليات اهو بكتب فيها بشوية جرأة عن حياتي
ينفع تتكلم عنها هههه
:(
ردحذفنفسي أرغي بس ماليش نفس :(
ردحذفأنا عايزة أخرج من البلد دي..
http://sanko7shanan.blogspot.com/2013/06/blog-post_28.html
ردحذفالنهاردة عيد ميلاد أخويا، اتجند في الجيش.بصراحة حاسة إني مفتقداة قوي اليومين دول، البيت الحريمي الخالص ده بيبقى دمه يلطش.
ردحذفهنا وش كدة اللي يقولك بلد البنات و حياة البنات، قول لهم البنات محتاجين شوية تستستيرون يظبط الدنيا شوية حواليهم.
و اقرا التدوينة اللي بعتها لك.
و صحيح أنا بفكر اغير اسم المدونة
ردحذفاسميها ايه؟
و متقوليش سميها ناهد و لا ثريا !
اسميها حقيقة علمية؟
و لا اسميها في المترو
بما إني بكتب كلام كتير قوي على المترو و حواديت الإنتظار
موناليزا
ردحذف:)
يا ألف أهلاً وسهلاً يا أستاذة منورة الدنيا كلها والله
بالنسبة للكتب .. للأسف الشديد بقالي فترة معتزل القراءة :( .. من وقت للتاني باحاول أدور على حاجة تفتح شهيتي تاني للقراية اللي بجد مفتقدها .. مسكة الكتاب أصلاً وحشتني جداً .. مفتقد الإحساس بالحميمية والونس والدفا مع القصص والعِشرة اللي بتتخلق مع أبطالها على مدار القصة ، مفتقد التعايش مع الأحداث والغرق في التفاصيل والمشاهد والتصاوير ، مفتقد العينين اللي بتجري بلهفة فوق السطور والإيدين اللي بتسبقها علشان تقلب الصفح والواحد ريقة ناشف من كتر اللهفة ، مفتقد أصلاً ريحة الورق !! .. يمكن حبيت آخد هدنة شوية وأدي نفسي مساحة أكتر للتأمل في الحياة بشكل عام .. مش فلسفة والله .. بس الحياة فيها حاجات كتيرة تستحق التأمل والقراءة أكتر من الكتب .
بالنسبة لكتب رفقاء الكفاح لزملائي المدونين .. بجد والله العظيم ومش مجاملة أنا فعلاً باشعر بمنتهى الفخر والسعادة لما باعرف أن مدون زميل ربنا كرمه ونزل كتاب .. لأني عارف هو تعب قد إيه علشان يوصل للمرحلة دي ، وأخد وقت قد إيه علشان يوصل لنا خلاصة ذهنه ومشاعرة وتجاربة وأحاسيسة .. وقعد قد إيه يفاضل بين جملة والتانية وحرف والتاني .. مجهود جبار وعمل شاق جداً علشان في الآخر يوصل بين إيدينا بالشكل النهائي ده .. وأنا باعتذر جداً والله عن كسلي وتقصيري الشديد معاكم ، وإن شاء الله في أقرب فرصة أتشرف بإقتناء كتبكم .. يمكن الكتاب الوحيد اللي لقيته قدامي في صدفة سعيدة بجد كان كتاب الزميلة المبدعة / إيناس حليم صاحبة مدونة شيزوفرينيا "يحدث صباحاً" في إحدى المكتبات .. كنت باقول للموظفة بمنتهى الفخر وأنا بادفع تمن الكتاب : دي زميلتي (رغم إني في الواقع ما اتشرفتش بمعرفتها شخصياً) .. وبجد ما خذلتش توقعاتي ، مجموعة قصصية روعة (في مجملها) وفي منتهى النعومة والرقي زي ما كنت متوقع بالظبط ، ما حستش أصلاً إني خلصتها غير لما لقيتها خلصت فعلاً !! .. وبقيت زعلان والله إن كتاب حلو زي ده بخمسة جنية بس !! في حين أن هناك كتب تانية لكتاب المفروض للأسف أنهم كبار بخمسين وستين جنية وبتطلع مقلب !! .. ماشاء الله عليها ربنا يحفظها ويبارك لها في موهبتها ويوفق الجميع .
بالنسبة للتليفزيون .. فأنا آخر واحد يتكلم عنه !! بس المسلسل بتاع "حياة" ده شفت الديكورات بتاعته في البلاتوة ، صارفين بصراحة !! وكانوا جايبين عربيتين بي إم وبورش خرافة .. إوعدنا يا رب .
نورتينا
هدير
ردحذف:)
يا ألف أهلاً وسهلاً يا أستاذة منورة الدنيا كلها والله
الحمد لله بخير في نعمة بفضل الله .. كل سنة وحضرتك طيبة وبألف خير انتي وأسرتك الكريمة .. "الرجل ذو البدلة البيضاء الشركسكين" الكتاب ده أنا فاكر إني دورت عليه على النت من فترة علشان آخد فكرة عنه بس للأسف ما لقيتوش ، بس طالما حلو يبقى إن شاء الله اشتريه .. وكان فيه فيلم وثائقي اسمه "يهود مصر" لأمير رمسييس بس ما لحقتوش في السينما !!
كان فيه كتاب تاني برضه عن الهيئة العامة لقصور الثقافة اسمه (حكايات أسرة أرمنية) للدكتور نبيل حنفى محمود رحت عشان اشتريه من مكتب الهيئة اللي في مساكن العرايس قالوا لي إن منفذ البيع في جاردن سيتي ، وكانت الساعة عدت تلاتة فكانوا قفلوا !! .. تقريباً ساعتها كنت باحضر لحاجة أكتبها عن "وردان الرومي" -- له شارع باسمه في منطقة الجيارة -- وكنت محتاج لمصادر .
فيه فترات كده في تاريخ مصر بتنكشني عشان أقراها .. مثلاً فترة ما قبل دخول العرب مصر .. (زي رواية البشموري لـ سلوى بكر اللي عندي بقالها فترة ولحد دلوقتي ما قرتهاش) .. فترة الحرب العالمية في مصر والجاليات الأجنبية اللي كانت موجودة فيها وقتها .
فيه كمان حاجة باحاول أجمعها بقالي فترة عن المهن اللي اندثرت واللي قربت تندثر في مصر .. زي عمال المسابك والمراجل والكلافين والعلافين والمغربلين والمدلكاتية والمكبساتية وغيرها من المهن .. الناس دي اللي عايش منهم دلوقتي عايش إزاي ؟؟ وبيشتغل إيه ؟؟ .. نفسي أنزل جولات ميدانية في منطقة الأزهر والجمالية وباب الخلق وأقعد مع الناس دي .. أشم التاريخ الحي ده وأعيش فيه ولو لحظات .
بالنسبة لكتاب الأسد المغاغي و المرأة الفاقوسية اللي هو النسخة العربي من النساء من الزهرة و الرجال من المريخ فمن فترة شفت النسخة الساخرة من نفس الكتاب الأخراني بعنوان : الرجال من بولاق والنساء من أول فيصل .. كنت عاوز اشتريه بس بصراحة عشان أعرف إيه هي مواصفات الستات اللي في أول فيصل :D
شكراً جزيلاً لترشيحاتك يا أستاذتنا
نورتينا
moataz farouk
ردحذف:)
طب وربنا واحشني جداً يا كبير ومنور الدنيا كلها والله العظيم
أصيل والله يا معتز .. معلش حقك عليا يا غالي بس والله غصب عني يا اخويا .. الأول كل سنة وأنت طيب وبألف خير وصحة وسعادة أنت وكل أسرتك الكريمة ، ويا باشا ألف ألف مليون شكر على الفانوس الجميل بتاع السنة دي وتسلم إيدين اللي عمل طبق الكحك المعتبر ، ربنا ما يحرمنا منك أبداً يا رب ولا يقطع لك عادة قادر يا كريم وإن شاء الله العيد الجاي تكون في بيتك مع الزوجة الصالحة اللي تفرح قلبك وتسعدك آمين يا رب العالمين .
طمنني عليك .. عامل إيه ؟؟ وأخبارك إيه ؟؟ .. يا رب تكون بخير وفي أحسن حال إن شاء الله
احنا الحمد لله بخير في نعمة بفضل الله .. ربنا رزقنا من فضله بـ آدم باشا اليومين اللي فاتوا عقبال ما ربنا يرزقك كده ويرزق الجميع بالذرية الصالحة إن شاء الله .. وما أقوللكش بقى على اللي عامله ياسين باشا فيه وفينا !! .. آخراااااااابي يا جدع !! .. الواحد مش عارف أصلاً ينام !! .. تنيم واحد التاني يصحى يقوم مصحي الأولاني وسيمفونية زن وإواء لا تنقطع !! وتقعد بقى تحلّق من هنا وتحوش من هنا وتشيل ده وتهنن في ده لما طلع لي البُقبيح بعيد عنك وعن السامعين !!
الحمد لله على كل شيء .. باقول لك يا دكترة ، تاخدلكش عيل كده يومين تلاتة ؟؟ .. الواحد ياخد هدنة بس !! .. يعني لا تبقى اتجوزت ولا معاك عيال ؟؟ ينفع كده ؟؟ .. فين الأخوة ؟؟ اعتبره تدريب يا أخي !! إخص عليك يا معتز ده أنا ولادي نسمة !! ده على اعتبار إنك ما قريتش الفقرة اللي فوق :D
نورتنا يا غالي
re7ab.sale7
ردحذف:)
يا ألف أهلاً وسهلاً يا أستاذة منورة الدنيا كلها والله
ألف ألف مبروك على النجاح وعقبال الدكتوراة إن شاء الله .. ليه يا بنتي بس عايزة تبعدي عن الناس ؟؟ ده حتى قالوا في المثل : الجنة من غير ناس ما تداس !! .. إن شاء الله نرجع نتابع كل مدونات الناس الحلوة من تاني .. ربنا ييسر لك الخير ويفرح قلبك ويسعدك اللهم آمين
نورتينا
amiraali
ردحذف:)
يا ألف أهلاً وسهلاً يا أستاذة منورة الدنيا كلها والله
ربنا يا رب يشفي عمتك شفاءاً لا يغادر سقماً ويعافيها ويعفو عنها ويقومها لكم بألف سلامة اللهم آمين
روقي وسيبيها على الله
نورتينا
Israà A. Youssuf
ردحذف:)
يا ألف أهلاً وسهلاً يا دكتورة منورة الدنيا كلها والله
نسأل الله السلامة يا دكتورة .. ربنا يسترها إن شاء الله ويفرجها علينا
روقي وسيبيها على الله
نورتينا
سنكوح شنن لملوم سامي
ردحذف:)
يا ألف أهلاً وسهلاً يا باشمهندسة منورة الدنيا كلها والله
بالنسبة للبوست .. ربنا يكرمك يا رب ويحفظك ويبارك لك ويسعدك ويفرح قلبك زي ما فرحتينا بكلامك الجميل وذوقك الراقي .
بالنسبة لأخوكي .. كل سنة وهو طيب وبألف خير وصحة وسعادة .. ربنا يحفظه يا رب ويرجعهولكم بألف سلامة إن شاء الله .. وأحب أقول له : ما تقلقش يا برنجي ، أنا سجلت لك هنا الاعتراف بتاع أختك علشان لما ترجع بالسلامة إن شاء الله وتناقر فيها من تاني تشوف كلامها هنا وتعرف بس هي كانت بتقول عليك إيه في غيابك :
Mona el Dawakhly
" النهاردة عيد ميلاد أخويا، اتجند في الجيش. بصراحة حاسة إني مفتقداة قوي اليومين دول، البيت الحريمي الخالص ده بيبقى دمه يلطش."
ربنا يبارك لكم في بعض ويهديكم على بعض ولا يحرمكم أبداً من بعض اللهم آمين .
بالنسبة لاسم المدونة سموك .. مممممم .. هو الاختيار بين الاسمين دول بس ؟؟ ولا ممكن نفتكس من عندنا ؟؟ .. حلو اسم حواديت بس واخداه رحاب بسام D:
حالياً ما فيش حاجة في بالي ، إن شاء الله أول ما ييجي في بالي اسم مطرقع كده هاقول لك عليه .
نورتينا