زفة
البنت .. كانت راكبة فسبا ورا شاب .. كانت حاضناه بإيديها الشمال ، وبإيديها اليمين كانت حاضنة فستان فرح في الـCover بتاعه .
على يمين الفسبا .. كان فيه ميكروباص .. البنت اللي قاعدة جنب الشباك اللي ورا السواق كانت بتبص قوي على الفستان اللي في إيد البنت اللي راكبة الفسبا .. وراحت متنهدة تنهيدة طويلة ، وتمتمت بشوية كلام مش مسموع .. وبعدين بصت جنبها أحسن يكون اللي جنبها سمعها .. بس أنا عملت نفسي مش واخد بالي .
الشاب اللي سايق الفسبا ، ولع سيجارة لما لقى أن الوقفة طولت في الشارع الزحمة .. وقال للبنت اللي حاضنة الفستان : عارفه لو قلتيلي نروح في حتة تاني ؟؟ انتي النهارده طلعتي عين أمي !!
البنت اللي حاضنة الفستان : ما أنا قلتلك ننزل بدري عشان الزحمة ، أنت اللي صحيت لي المغرب !!
الشاب : لا مغرب ولا عشا !! وما تكتريش ف الكلام معايا عشان أنا على أخري !! أحسن والله العظيم أسيبك ف الشارع وأمشي !!
البنت اللي حاضنة الفستان : بالسلامة يا حبيبي !! اجري يا اخويا على الصيع بتوعك !! بس والله العظيم لأقول لأبوك !!
الشاب : باقول لك إيه يا بت ؟؟ ما تخللينيش .....
البنت اللي حاضنة الفستان وهي تلكمة بغيظ في كتفه : ما تحترم نفسك !! إيه بت دي ؟؟ بتة أما تبتك !!
الشاب يضربها بكوعة بقوة فتتألم ، وتختل جلستها على الفسبا ..
هنا يتدخل سواق الميكروباص فيغمز للشاب سائق الفسبا : مش كده يا صاحبي !! انتوا ف الشارع يا زميلي والناس بتتفرج !!
الشاب منفعلاً : يا عم دي حريم عاوزه الحرق !!
البنت اللي حاضنة الفستان تصعب عليها نفسها وهي تضبط جلستها على الفسبا وتبدأ تدمع .. ترفع الفستان اللي كان اتزحلق من على رجلها .. ثم تمسح دموعها بظهر كفها ..
تتدخل البنت اللي جنب الشباك اللي ورا السواق في الحوار وتعاتب الشاب : حرام عليك يا أخي تنكد عليها .. ثم توجه حديثها للبنت اللي حاضنة الفستان وهي تبتسم : ألف مبروك يا حبيبتي .. ربنا يتمم بخير إن شاء الله .. روقي يا قمر كده ولا تزعلي نفسك .
البنت اللي حاضنة الفستان وهي تحاول الابتسام لمحدثتها : الله يبارك فيكي .. لا ما فيش حاجة خلاص .
البنت اللي جنب الشباك اللي ورا السواق : ما تشغل لنا حاجة حلوة يا أسطى عشان خاطر العروسة .
السواق : عينيا .. يشغل كاسيت الميكروباص ثم يحاول اختيار أغنية حلوة تليق بالمناسبة من بين الأغاني المحفوظة على جهاز الإم بي فور .. تخبره البنت اللي قاعدة وراه أن يشغل إذاعة الإف إم .. وما أن ينتقل إلى الإذاعة المذكورة حتى نسمع أغنية الليلة لمحمود العسيلي .. تبتسم البنت اللي جنب الشباك اللي ورا السواق للعروسة وتخبرها : شفتي بقى وشك حلو إزاي ؟؟ ياللا اضحكي بقى وبطلي كلضمة ..
الليلة
غير كل يوم وليلة
السهرة دي طويلة
في قلوبنا سامعين مزيكا
عند إعادة الكوبلية مرة تانية .. تبدأ البنت اللي جنب الشباك اللي ورا السواق التصفيق ..
دي طبلة
وده رق
ودي كمانجة
ده أنا قلبي فرقة جامدة
هاتغني ليكي الليلة
هنا البنت اللي جنب الشباك اللي ورا السواق تسخن وترقع زغروطة عالية متقطعة وهي تضحك .. وتقول لنا (باقي الركاب) : انتوا إيه ساكتين ليه ؟؟ ما تصقفوا !! .. وزي ما نكون كنا بنتلكك ، فنبدأ كلنا نصقف معاها ..
خلينا نعيش مع بعض
من غير لا فراق ولا بعد
ع الحلوة أه والمرة هانعيش سوا
يبدأ الطريق في الحركة .. فيسير السواق وراء الفسبا وهو يعزف بالكالاكس نغمة الزفة المعروفة : بيب بيب بب بيب .. بيب بيب بب بيب .. يشارك سائق التاكسي الأبيض بجانبنا في العزف بالكالاكس الخاص بسيارته .. ثم يجامله سائق السيارة النصف نقل المحملة بالأخشاب .. ليصبح الشارع كله أشبه بموكب الزفة .
البنت اللي حاضنة الفستان فرحت قوي وفضلت تضحك تضحك تضحك وهي مكسوفة وبتحاول تخبي وشها ورا الفستان .. ولما حصلناها بالميكروباص اللي احنا راكبينه ، كان أخوها كمان بيضحك من قلبه بجد وبيزمر معانا بالكالاكس بتاع الفسبا .. البنت اللي جنب الشباك اللي ورا السواق قالت لها بعد ما زغرطت لها : ياللا يا ستي ادينا عملنالك زفة أهه ، ألف مبروك يا حبيبتي وربنا يتم لك على خير .
تنتهي الأغنية سريعاً ، وتقرر البنت اللي جنب الشباك اللي ورا السواق النزول .. فيقول لها السواق ضاحكاً : إيه مش هاتستني معانا البوفية ؟؟ .. وبينما هي تبتسم له في ود وتغادر الميكروباص ، كان جميع الركاب يلاحقونها بنظراتهم وهم يبتسمون لها ويرددون دعاء واحد بصوت مسموع : ربنا يسعدك يا رب ويفرح قلبك انتي وكل اللي زيك اللهم آمين
جميل البوست ده ومفرح أوي :))
ردحذفبيتهيألي مرة حصلت فعلاً إني شفت العربيات في الشارع عاملين كلاكس الزفة ده في حين أن ماكانش فيه عربية عروسة أصلا .. الشعب ده شعب سكر وربنا هههههههه مجامل ويموت في الهيصة .
دمت مبدعاً متألقاً يا زوجنا الموقر :))
عجبني اويييي و حسيت ببهجة كده لدرجة ان عنيا دمعت من الفرحة لما حسيت احساس العروسة و اد ايه ممكن ربنا يبعت لك فرحة محتاجها من حد متعرفوش بتحس كده انها هدية من ربنا و طبطبة على الروح و البنت اللي قاعدة ورا السواق دي حسيت و كانها بتطبطب على روحها حسيت بفرحتها و هيصتها للعروسة كانها بتقول انا كمان هفرح فرحتها وزي ما فرحت قلبها ربنا هيبعت لي اللي يفرح قلبي
ردحذفرغيت كتير صح :))))
بس بوست رائع ووصفك جميل جدا ابهجني و الشعب المصري ده وربنا زي العسل بيهيص ف الهيصة هههههه
تحياتي
البوست طعمه طيبة قلب المصريين
ردحذفربنا يزيدها
شكرا على البوست المفرح
:)
هههههههههههههه
ردحذفبوست جامد جدا
الشعب المصرى شعب جميل بجد مبيصدق يلاقى طرف فرحة ويقلبها فرحة كبيره
البت اللي كانت كاعده ورا السواق هي البنت اللي لازم تكون حوالينا على طول وفي أي مناسبه ... تعمل جو وفرحه
ردحذفحلوة قوي لدرجة إني عيطت لما وصلت لجملة و كأننا بنتلكك نفرح و قعدنا نصقف كلنا.
ردحذفربنا يسعد حالك يا باشا زي ما فرحتنا بالتدوينة دي.
في ناس حلوة كدة بتعرف تنبسط و في ناس مستنية يبقى معاها المرسيدس و البلاكبيري عشان "تحاول تنبسط" .
ربنا يسعد العروسة و يسعد أكتر السواق و البنت اللي قاعدة جنب الشباك اللي ورا السواق. :)
البوست روعه صورت بكلماتك مدى طيبه الشعب المصرى رغم التعب والفقر وبطريقه ابسط واروع ما يكون تستطيعون ان ترسموا البسمه وتصنعون ضحكه وسط الحزن .. لو انك تحاول ان تكتب سيناريوهات لمسلسلات متاكده انك ستنجح لانك تكتب بطريقه قريبه للقلب وتجعلنا نتخيل انفسنا وكانما نحن امام الشخاص انفسهم ..تحياتى لك يامبدع
ردحذفβent Pasha
ردحذف:))
البوست ده ما بيفكركيش بحاجة ؟؟
D:
فرحنا ؟؟
النادي ؟؟
الزفة ؟؟
معايا أنت ؟؟
نياهاهاهاهاهاهاهاهاهاها
سيبك أنت ..
إنك لسكر سنترافيش
وأنا واد زلابية وزيي ما فيش
:))
دي ارتجالاية كده ع السريع
ربنا يبارك لي فيكي يا رب ولا يحرمنيش منك أبداً ويحفظك من كل سوء اللهم آمين
افكار مبعثرة
ردحذف:))
"حسيت بفرحتها و هيصتها للعروسة كأنها بتقول أنا كمان هافرح فرحتها وزي ما فرحت قلبها ربنا هايبعت لي اللي يفرح قلبي"
أهو هو ده بالظبط اللي أنا كنت عاوز أقوله :))
ربنا يفرح قلبك ويسعدك يا رب
Baskouta
ردحذف:))
ربنا يكرمك يا أستاذة ويسعدك ويفرح قلبك .. شكراً جزيلاً على تشجيعك
ردحذفGamal Abu El-ezz
:))
فعلاً والله العظيم .. الشعب المصري ده ما فيش أحلى ولا أجدع ولا أطيب ولا أغلب منه
:))
شعبي حبيبي
ربنا يسعدك ويفرح قلبك يا رب
عالم سمسم
ردحذف:))
ربنا كبير وعظيم وما فيش أحن منه علينا وما بينساش حد والله .. ربنا يفرح قلبك ويسعدك
ردحذفسنكوح شنن لملوم سامي
:))
ربنا يكرمك يا باشمهندسة ويفرح قلبك ويسعدك زي ما بتسعدينا بتعليقاتك وتشجيعك
على رأي الدكتورة / ستيتة الله يمسيها بكل خير "السعادة إرادة"
ردحذفghada issa
:))
ربنا يعزك يا رب ويفرح قلبك ويسعدك .. والله هي كانت طقت في دماغي من أربع خمس سنين كده أعمل سيناريو فيلم فعلاً وسخنت ساعتها على فكرة حلوة كانت - ولا زالت - في دماغي .. بس بعد كده كسلت :D
الموضوع مش سهل ومحتاج وقت كتير .