زحلونين
أنا مش قلتلك ميت مرة ما تقفلش الموبايل ؟؟ ولو هاتقعد في مكان ما فيهوش شبكة تبقى تعرفني قبلها ؟؟ أفضل أنا قاعدة قلقانة عليك كل ده ؟؟ إلا حتى ما هان عليك تبعت لي رسالة تطمنني فيها عليك !! أنت بالشكل ده هاتخلليني أحرم أتصل بيك تاني على فكرة !! وبعدين يعني هما الناس اللي أنت معاهم أهم مني ؟؟ عموماً خلليهم ينفعوك !! أنا أصلاً غلطانة إني عبرتك واتصلت بيك !! كنت فين بقى حضرتك من الصبح ؟؟ هه ؟؟ وما اتصلتش بيا ليه ؟؟ وطبعاً كالعادة نزلت من غير فطار ومقضيها قهوة وسجاير من الصبح !! أنت أصلاً لو بتحبني كنت تاخد بالك من نفسك !! طب ما هانش عليك تتصل تطمن عليا ؟؟ ماشي !! بس خلليك فاكر إنك زعلت مني لما اتصلت بيا مرة ولقيت موبايلي مقفول !! وهو والله العظيم كان فاصل شحن !! ورغم كده برضه كلمتك من موبايل واحدة صاحبتي علشان أطمنك عليا !! أنت مسحت نمرتها صح ولا لأ ؟؟ عارف لو لقيتك لسه مسجلها ؟؟ والله العظيم لأقرمك قرمة تجيب دم !! المهم ، حضرتك ناوي تيجي النهاردة الساعة كام ؟؟ ولا هاتتأخر كالعادة ؟؟ اعمل حسابك إننا هانتغدى وننزل على طول !! عشان ما تجيش الساعة تسعة زي المرة اللي فاتت وتقول لبابا عاوزين نخرج ؟؟ وبعدين ما تجيبش معاك حاجة لما تيجي !! بس عارف لما نخرج ؟؟ والله العظيم لو ما جبتلي شيكولاتاية بالبندق الحجم الكبير لأكون مورياك !! ومش هاديك منها ولا حتى مثلثاية واحدة !! وكمان هاتعزمني على آيس كريم !! بس هه !! على فكرة أنا اتصلت بمامتك من شوية !! وقعدنا نرغي قد كده !! أنا بصراحة اتصلت بيها علشان أتطمن عليك !! أنت ليه ما قلتليش صح أنها زعلت مني يوم العزومة ؟؟ أنا والله العظيم ما أخدت بالي خالص من الموقف اللي هي حكيتهولي !! بس أنا برضه عرفت أصالحها بطريقتي !! عيب يا ابني !! خلاص دي بقت حماتي صديقتي !! ولعلمك بعد كده هانتفق عليك !! تصدق أول مرة أخد بالي إنك واخد حاجات كتيرة من مامتك ؟؟ لأ ، مش هاقول لك عليها إلا أما تصالحني !! هو أنت ما كنتش قايل لها صح إنك هاتتغدى عندنا النهارده ؟؟ أنا على فكرة ما قولتلهاش !! بس حسيت إنها ما تعرفش !! كنت عاوزه أسألك على حاجة مش عارفة هاتعرفها ولا لأ ؟؟ خدت بالك من لفة الطرحة بتاعة المرة اللي فاتت ؟؟ كانت لايقة على وشي ولا لأ ؟؟ أصل أنا حسيت إنها ما عجبتكش !! أه صح !! أنت بتحب الكوسة بالباشاميل ؟؟ أصل مامتك كانت بتتفرج على طريقتها في التليفزيون وكانت بتقول هاتعملها لكم !! أنا بصراحة ما جربتهاش قبل كده !! دوقها عندكم الأول ولو عجبتك هابقى أتعلم منها الطريقة ، بدل ما أتعلمها ع الفاضي وما تعجبكش !! بابا النهاردة نزل السوق مخصوص علشان يجيب السمك المكرونة اللي بتحبه !! عارف وأنا بانضف سمكاية لقيت جواها سمكاية تانية صغننة قد كدهوة ، شكلها عسول أوي !! أنت بتعرف صح تنقي السمك ؟؟ أصل بابا بيقول فيه بلدي وفيه مزارع !! أنا بصراحة ما أعرفش الفرق بينهم !! إيه رأيك صح نعمل حوض سمك في الركن اللي جنب البلكونة ؟؟ ونجيب فيه زحلونـين ... اسمهم إيه دول ؟؟ استنى ، زحالين !! هههههههههههه هما اتنين اتنين !! اللي هما بيشلوك على ما يتحركوا مللي دول !! أيون !! حلزونين !! حلزونين !! تذكرتين !! ههههههههههه .. ونسمي واحد على اسمك وواحد على اسمي وهاخلي حلزوني يقرم حلزونك هههههههههههههه ولما حلزونك ييجي يقرم حلزوني هادخله ف القوقعة بتاعته ههههههههههههه !! بُص ، لو الحوض ده هايبقى غالي بلاش نعمله دلوقت !! تعرف إن أنا باقعد أسرح مع نفسي كتير أوي وأتخيل بيتنا شكله هايبقى عامل إزاي ؟؟ هايبقى حلو أوووووي !! أنت وحشتني أوي على فكرة !! من يومين دخلت أوضة الصالون وقعدت أشم في الكرسي اللي أنت كنت قاعد عليه المرة اللي فاتت !! ابسط يا عم هاتتجوز واحدة شمامة ههههههههههههههههه .. استنى كده !! إيه الريحة دي ؟؟ يا نهار أسود الرز شاااااط !!
هههههههه جامدة جدا زحلونين دول
ردحذفعسووولة جدا بس هتجيبله زحالين في دماغه من كتر ما دخلت ف مواضيع كتيير
ههههههه
تحياتي
ههههههههههههههههههههههههههههههههههههههههههههههههههههههههههههههههههههههههههههههههههههههههههههه
ردحذفتجنننننننننننننننننننننننن حواااااااااار ابن ستين كلب كله حب فظييييييييييييييييييييييع دى بتموت فيييييييييييييييييييه وشربااااااااااااااااااااااااااات شربااااااااااااااااااااااات
ههههه كنت بحاول احزر ما هو الزحلونين لك قدره عجيبه يااستاذ شريف ان تصوغ موقف وتجعلنا نراه ونشعر بمشاعر شخوص الموقف حتى وان كان الحديث من طرف واحد وربما جعلتنى اشعر بوجع الراس لدى من تقصده الزحلونه الرائعه .
ردحذفعزيزى تحياتى لك ومحبتى
رائعة جداً .. مليئة بالتفاصيل الحية .. أعجبنى و بشدة :)
ردحذفمطلقهاش ليه با عم وريح نفسه دى رداحة من الاخر
ردحذفعليا النعمه انا لو متجوز واحده كده او اعرف واحده بالمواصفات دي لأنتحر
ردحذففكرتني بواحده كنت اعرفها مبدئيا من أجل الزواج لكن الحمد لله ربك نجانا- كانت عامله لي احتلال بكل ما تعنيه الكلمه- كل شويه تتصل بيا تقولي انت فين- في الآخر قلت لها يا وليه يعني هكون فين الله يخرب بيت معرفتك السودا
________________
بمناسة الطرحه
انا لسه حاضر فرح من كام يوم
ولنه كان فرح صديقي كنت واقف طول الفرح وماسك الكاميرا
تخيل كده واحده طلبت مني ايه؟
قالت لي بعد اذنك ممكن تصور الخاتم اللي انا لابساه؟
قلت لها وهاصور الخاتم ازاي؟ قالت لي اعمل (زووم) بالكاميرا على ايدي وتاخد الصورة، وقالت لي بس انا عوزاها ياترى هاخدها ازاي؟ أقولك على حاجه؟ انا هاضيفك على الفيس بوك وبعدين هامسحك بعد ما تبعتلي الصوره!
افكار مبعثرة
ردحذف:))
هههههههههههههههههه
أنا متهيألي أنه لو كان سمع الحوار ده كله وكان لسه عايش ؛ يبقى زمانه جاله بري بري في الأذن الوسطى .
وبعدين معلش بقى أصلاً أصلاً الزحالين ع العروسة مع الحاجات بتاعة المطبخ D:
نورتينا
richardCatheart
ردحذف:))
طب وربنا بنفرح بتعليقاتك اللي زي العسل :))
أحلى حاجة إنك جبتي من الآخـر والله يا مارو ، هي فعلاً بتحبه وبتموت في ريحته .. بس اللي يفهم !!
* حلوة صورة البروفايل على فكرة ، عاجبني أنا الأسدين الرايقين دول اللي عايشين في دور تايتانيك :))
نورتينا
ghada issa
ردحذف:))
إزاي يا أستاذة ما تعرفيش الزحالين ؟؟
ده حتى فيه عيد مخصوص اسمه "زحالاين داي" بتلاقي فيه الزحلون الولد جايب علبة بكتيريا ملفوفة بشريط أحمر للبنت الزحلونة بتاعته اللي بتكون لابسه قوقعة حمرا وبيتزحولوا مع بعض ؛ هما أينعم بيفضلوا سنة بحالها ماشيين ماشيين ماشيين ماشيين لمسافة خمسة سنتي .. بس بيتقابلوا ف الآخر .. وبعد ما يتقابلوا تقول له : سوري مضطرة أرجع البيت علشان نسيت الشنطة البينك بتاعتي D:
نورتينا
علا
ردحذف:))
ربنا يكرم حضرتك يا رب .. وشكراً جداً لذوقك وتشجيعك الكريم
نورتينا
Gamal Abu El-ezz
ردحذف:))
يا عزيزي It's just Engagement
يعني تقدر تقول كده دي لسه خطوبة .. وبعدين حتى لو متجوزين يا جمال يا اخويا؛ يرضيك الزحالين يعيشوا مع مرات أب ؟؟
D:
بُص .. رأيي الشخصي .. إن اللي بتعمل كده بتبقى فرحانة فرحة الدنيا بخطيبها اللي هو بيبقى أول نصيب وأول فرحة ، فبتبقى عاوزة تشاركه في كل تنتوفة في أصغر فتفوتة في تفاصيل يومها .. حتى لو كانت التفاصيل دي بالنسبة لمعظمنا احنا معشر الرجال تافهة ورغي وصداع وحصار وخنقة .. بس يمكن هي ما بتبقاش عارفة تعبر له عن مدى حبها غير بالطريقة دي .. وصدقني الشخصيات المفعمة بالحياة اللي زي دي بتلاقيها مصدر لا ينضب من البهجة والسعادة هي بس عاوزه حد يفهمها ويحتويها .. اللي زي دي تنكشها تفرحك :))
هي بس المشكلة عند البنات في التوقيت .. البنت اللي ما تعرفش إمتى تفرمل دي ، بتبقى كارثة وتستاهل ضرب الزحالين على دماغها :))
نورتنا
لورنس العرب
ردحذف:))
بوررريه بوررريه بوررريه !!
طب يعني البُنية تعمل لك إيه أكتر من كده يا معتز ؟؟
يعني قالت لك صورني وكمان هاتضيفك ع الفيس ، ناقص تاخد عنوانك وتتقدم لك !!
هو التُقل صنعة أه بس مش كده ياأخي !!
بالنسبة للي كانت بتتصل بيك كل شوية دي ؛ فأعتقد أنها ينطبق عليها التعليق اللي قلته لجمال فوق .
عاوز الحق ؟؟
أنا عاذرك والله .. لأن أًصعب حاجة بجد فعلاً في حوار الجواز ده كله هي الاختيار .. وبيبقى أصعب كمان بالنسبة للبنت عننا احنا .. بعد كده كله بيعدي .. لحد ما تصحى في يوم م النوم فجأة وتلاقي نفسك مش نايم ف سريرك وتقول : أنا فين !! أنا إيه اللي جابني هنا !! سقتوني إيه يا ظلمه !! تلاقي المدام بتزغدك وبتقول لك : بتقول حاجة يا حبيبي ؟؟ .. فتقول : أعوذ بالله من الشيطان الرجيم ، الواحد بيحلم بحاجات غريبة اليومين دول ، نامي يا عمري D:
ربنا يا رب ييسر الحال للجميع ويرزقكم بالأزواج والزوجات الصالحين والذرية الصالحة اللهم آمين .
نورتنا
هههه ده له حق يقفل الموبايل دي مش الرز بس اللي يشيط ده كان الله في عونه ...حلوة ياريس كالعادة...انا قلت الحق اعلق قبل ما تجيب ضورفها وتقفل التعليقات
ردحذف:)
ردحذفو اكتر من كدا كمان؛ الحب عند البنت اصله حدوتة طويلة قوي ..
جميلة قوي !
اوباااااااااااااااااا عجبنى الحوار ده جدا على فكرة انا ممكن ابقى بطلته عن جدارة ههههههههههههههه بس هاتولى البطل دهون وانا هعمله كدهون
ردحذفالا هو اى السمك المكرونة ده
Tarkieb
ردحذف:))
واحشني كتير أوي أوي والله العظيم يا كبير وفرحت جداً لما شفت تعليقك :))
ربنا يفرح قلبك يا رب ويكرمك ويحفظك من كل سوء اللهم آمين
ما هو أصله لو قفل الموبايل هاتحوش له نصيبه برضه ؛ فهو أحسن حاجة ياخد حصته أول بأول D:
نورتنا
هدير
ردحذف:))
حابب أرغي في الموضوع ده بعد إذنكوا :))
في رأيي .. باعتقد إن المشكلة في الاختلاف ما بين طبيعة الجنسين .. يعني الراجل بطبعه - في الغالب - عملي ، بيحب ينجز ، رومانسي وحبيب وشاعر بس في أوقات معينة .. مايكونش عليه فيها ضغوط والتزامات وشقة وتشطيب وعفش وميعاد فرح .. عاوز شريكته تهتم بيه بس ما تخنقوش ولا تحاصره ولا تفضل تزن وترغي ولا تكون مجنونة في غيرتها عليه .. يهتم بالمضمون من غير دوشة التفاصيل .. لو تلاحظي في أول فترة الخطوبة هاتلاقي الراجل راح راصص لها الليستة : "بصي أنا ما باحبش كذا وكذا وكذا وباحب كيت وكيت وكيت" علشان يريح دماغه فيما بعد .. علشان كده فترة الخطوبة بتبقى فترة حرجة ، لأن الضغط فيها بيبقى كبير على الطرفين .
نيجي بقى للطرف التاني وتكملة لردي على أ/جمال .. البنت بتبقى عايشة طول عمرها ترسم في شخصية وملامح فارس أحلامها اللي بتبقى مستنياه يعيشها حياتها اللي ما عاشتهاش .. فبتبقى نفسها تشاركه في كل تفاصيلها علشان فرحانه بيه من ناحية ومن ناحية تانية بتبقى عاوزه تعرف حقيقة شخصيته عن طريق الحاجات المشتركة ما بينهم وتقعد تحلل في ردود أفعاله ومعاملته ليها .
راخر الحبيبة (اللي هما مش مرتبطين) بيبقوا مرتاحين ومزقططين والحياة معاهم حلوة وبمبي وتحسي أنهم جوز كناريا لأن ما فيش إلتزام ولا مسئولية .
كمان فيه نقطة مهمة .. إن فيه كتير مننا بيبقوا رابطين الرجولة بالخشونة وخاصة اللي ما لهومش اخوات بنات وما كانش ليهم تجارب سابقة .. يعني هو ممكن يكون إنسان حنين جداً وفي منتهى الطيبة اللي خلقها ربنا بس ما بيعرفش يبين ده بالطريقة اللي البنت بتحبها .. ممكن يكون خجل أو عدم تعود .. ممكن يكون بسبب إن البعض بيقعد ينخع قدام البعض ويقول له أنا شاكمها أنا مربيها أنا مسيطر عليها .. فيفتكر أنه لازم يعامل شريكته كده علشان تحترمه وتعمل له حساب .
-- يتبع--
--تكملة--
ردحذففكرة المسئولية كمان بتبقى مرعبة .. حتى مع الانسان اللي بيبقى متعود إنه يشيل مسئولية .. الخوف من الفشل .. الخوف من أن الجواز ممكن يعطله عن طموحه ويأثر على مستقبله .. المبالغة في الحذر .. مسألة الترويض دي كمان مهمة جداً ، يعني واحد مثلاً بيعمل اللي هو عاوز يعمله وقت ما بيحب يعمله ، ده مشكلته بتبقى في أنه إزاي يروض نفسه ويكبح جموحه .. لأنه بيبقى شايف أن الاستقرار خنقة وتكتيفة ومصاريف ومسئولية ووجع قلب والعيال دول لعنة وووو ..... علشان كده ممكن تلاقيه خايف وبيتلكك ومقضيها اختبارات فكسانة للطرف التاني .
لو رجعنا تاني للماديات .. هانلاقي أن فيه شريحة كبيرة من البنات للأسف ما بيبقاش عندها إدراك حقيقي بالحمل التقيل اللي على الراجل اللي مش بيبقى فلوس وبس .. ده فلوس وضغط أعصاب وحرقة دم وبهدلة وووووو ..... يعني مثلاً لو نزلوا ينقوا السيراميك بتاع الشقة .. هي دورها بيقف عند اختيار الألوان وشكراً وما بيجيش في بالها ما بعد ذلك .. أن السيراميك ده بيتدفع فيه ألوف مؤلفة .. من أول تمنه ونقله وتطليعه للشقة وبعد كده الرمل والأسمنت والمصنعيات وتنزيل الردش وفوق ده كله الوقفة مع الصنايعية عليهم لعنة الله ، وأكلهم وشربهم وسجايرهم ومحايلتهم وخناقهم ومواعيدهم ولكلكتهم وبرودهم .. لك أن تتخيلي أن سعر متر الرمل مثلاً بـ 25 جنية وعلشان يطلع الشقة لو في الدور العاشر لا قدر الله هايطلع بـ 150 جنية !! .. تخيلي بقى أن واحد في عز الهم ده وخطيبته اتصلت بيه زي ما حصل في البوست ده ، ممكن يعمل فيها إيه ؟؟
البنت ممكن تقعد أسبوع تفكر هاتلبس إيه لخطيبها لما تشوفه المرة الجاية ، علشان تبقى حلوة في عينه .. وتزعل لو ما خدش باله من شكل الطقم اللي لابساه أو الإكسسوارات الجديدة اللي حطاها .. في حين أنه ممكن يجيلها وعينه كلها نوم وتراب وأسمنت فيشوف النقش اللي في فستانها على أنه شبه الوَزَر بتاع السيراميك :D
الموضوع بإختصار عامل زي "المجداف والدفة" .. الاتنين بيكملوا بعض .. والاتنين مهمين علشان المركب تمشي .. إيه فايدة إن الراجل يفضل يجدف يجدف يجدف والست موجهة الدفة في الإتجاه الغلط ؟؟ بالطريقة دي كل تعبه ومجهوده هايضيع هباءاً .. لازم هما الاتنين يساعدوا بعض ويتعاونوا مع بعض ويشجعوا بعض .. من غير تحكمات وفرض سيطرة وتكسير مجاديف .. لازم يكون فيه مودة ورحمة علشان يبقوا هما الاتنين سكن بعض ويقدروا يواجهوا بحر الحياة .
نورتينا
reemaas
ردحذف:))
:))
هههههههههههههههههههههههههههه
ده انتي كده عاوزه تجيبي له جلطة .. وبعدين لازم يكون عندك نظرة مبعدية ، اللي هي إيه .. لو انتي رصيتي له الكلام ده في التليفون ، فيه كذا احتمال .. احنمال إنه يبعد التليفون عن ودنه وما يسمعكيش أو أنه يتجرأ - لا قدر الله - ويقفل التليفون في وشك .. الذكاء والمكر بقى إنك تصطاديه لما ييجي يزوركم في البيت علشان يبقى محاصر وما يلاقيش منفذ وتروحي منفجرة فيه طق طق طق .. بعد كده لما تروحي تزوريه في القرافة تقولي له : أنت بتستهبل وعامل نفسك ميت علشان ما تسمعنيش ؟؟ D:
ساعتها إوعي تسكتي لأنه هايكون سامعك على فكرة :))
احنا جايين نهدي النفوس !!
السمك المكرونة ده سمك صغير بيبقى أكبر من السبابة بشوية (تقريباً قد القلم الفرنساوي) ومبروم كده .. هي السمكاية يا دوب في لقمة وتغمسيها بالطحينة واللي بعدها :))
ممكن نجيب اتنين كيلو ونعزمك في يوم على حسابك ، وخللي المواصلات علينا زي بعضه .
نورتينا