قوللي سبب واحد يخليك متضايق ؟؟
- كل واحد فينا أكيد عنده بدل السبب مليون سبب يخللوه متضايق .. علشان كده يا ريت كل واحد فينا يقول سبب / أو عدة أسباب مضايقينه ومنكدين عليه عيشته .. مين عارف ؟؟ يمكن لما حد فينا يقرا الأسباب اللي مضايقه غيره يحس بالنعم اللي هو فيها فيرتاح ويحمد ربنا .. ويمكن اللي عنده سبب مضايقه لما يلاقي إن غيره متضايق لنفس ذات السبب يعرف إنه مش لوحده في الهم .. ويمكن واحد بمجرد ما يتكلم ويقول على السبب اللي مضايقه يرتاح إنه طلعه من صدره .. ويمكن حد من اللي هايقروا يكون عنده حل لمشكلة حد هنا .. اعتبروه نوع من الونس أو الفضفضة .. البوست مش هايكون عليه إشراف – كالعادة - وهافتح التعليقات للغير معرف (علشان بصراحة أنا عاوز أعلق بغير معرف) ونستقبل أول مشكلة معانا النهارده ونقول ألــــو ........
مفلسة جدا جدا جدا
ردحذفالو يافندم
ردحذفبصراحه اول ماقريت العنوان قلت ايه ده
هنكدب من اولها
سبب واحد بس !!
ده يبقا بطل اللي عنده سبب واحد بس :)
شوف ياسيدي انا هحكيلك حكايه
كان يامكان في سالف العصر والاوان ملك حكيم اسمه لقمان
الملك تعب من كتر ماالرعيه بيشتكوا من الهم وكل واحد فاكر ان همه ده مافيش زيه واخر العالم وان الملك لازم يحل له هو عشان همه اكبر من التانين
بات الملك مهموم وحزين علي شعبه
وتاني يوم اعلن في البلاد ان كل واحد يحط همه في زكيبه ومايكتبش عليها اسمه ويحط الزكبيه علي سور القصر باليل
ولماالرعيه عملت كده نادي منادي ان كل واحد حط زكيبه يروح ياخد زكيبه تانيه مش بتاعته يفك الهم اللي فيها اللي هو اقل من همه وساعتها الملك هيحل له همه
الناس عملت كده ومافيش نص ساعه الناس رجعت جري كل واحد بيرمي الزكيبه اللي اخدها وبيدور علي زكيبته وبيقول الحمد لله علي همي الله يكون في عون الناس التانيه :))
وتوته توته فرغت الحدودة
حلوة ولا ملتوته:))
عارف لو قلت ملتوته :)))
:))
نيجي بقا للسبب من المليون سبب اللي مزعلني
ردحذفان الناس هاجره بلوجر ومش موجودين
مع ان ده المكان اللي جمعنا وعرفنا ببعض
والونس الراقي
لو الناس رجعت تاني هنبسط بجد
اما باقي الاسباب
علي راي السادات(مش عايزين نغم الناس خاللي الطابق مستور والحمد لله)
ربنا يرفع عن مصر الغمه
ولله مفتكرش اني ممكن اجاوب على السؤال ده لأني لو اتكلمت هاخد وقت البرنامج كله
ردحذفبلاش انا ونبي
أقولك حاجه كده على الماشي:
ردحذفمش بروح شغلي الخاص من شهرين إلا يوم واحد في الاسبوع لأن الاثنين اللي انا مشاركهم قاموا بتزوير شيكارة مثل المستورده تماما وقاموا بتعبئة المواد اللي بنصنعها فيها وبيضحكوا على الناس ويقولوا لهم ان دي حاجات مستورده من الاتحاد الأوربي وبالتالي بيكسبوا فيها الضعف لأنها أجنبيه مش مصريه، وانت عارف اليورو أرتفع والدولار ارتفع فكانت الفرصه لتحقيق الارباح!!!!!!!!!!!!!!!!!
أقولك حاجه كمان:
عرفت واحده قلت افتح معاها خط كده وأشوف الموضوع ايه- قالت لي انا عاوزه اعترف لك بحاجه- قلت لها ايه يعني كنتي تعرفي واحد؟ قالت لي لأ انا كنت أعرف واحده!!!!
يعني طلعت من النوع اللي بيبقى كويس مع بعضه
هههههههههههههههههههههههههه
قمت عرفت واحده تانيه قالت لي ان اللي عاوز يتجوزني لازم يجيب لي شقه جنب ماما لأن انا اهم حاجه عندي في الدنيا بابا وماما واخواتي- قلت لها خلاص خليكي قاعده جنبهم
كفايه كده عليك النهارده
عشان لو قلت لك الباقي انت نفسك هايجيلك اكتئاب
الاخوان فى السلطة ...اى حاجة تانيه راضى وشاكر وساجد ..... ان لله وان اليه راجعون اللهم اجرنى فى مصيبتى وابدلنى خيرا منها
ردحذفلبن الأطفال
ردحذف- المفروض أن علبة اللبن المدعم بتتباع ف الصحة بتلاتة جنيه .. طبعاً أنت لو رحت وسألت عليها هاتلاقيهم بيبصوا لك باستغراب أوي وكأنك بتسألهم عن طائر الرُخ أو بيض التنين !! .. وده لأن بتوع الصحة نفسهم عمرهم ما شافوها !! .. ده غير بقى الكلام اللي بتسمعه من الوقت للتاني عن اللبن المدعم ويخوفك منه أصلاً من أنه مشع وفيه مواد مسرطنة ووو
البديل بتاع العلبة أم تلاتة جنيه (الغير موجوده) أنواع زي بيوميل ونكتاليا ... المفروض أنهم بيتباعوا في بعض الصيدليات مدعمين برضه بس زي ما تقول دعم جزئي فسعر العلبة 18 جنيه !! ودول برضه لما تيجي تسأل عليهم الصيدلي تلاقيه بيعاينك وبيبصلك من فوق لتحت وكأنك بتسأله على كودافيين !! ويقول لك دول مدعمين يا بيه وما بينزلوش !!
البديل بتاع العلبة أم 18 جنيه .. أنواع زي بيوميل بـ 42.50 جنيه وسيميلاك نايس شور بـ 67 جنيه !! وهل تفتكر أن البيوميل اللي علبته بـ 42.50 جنيه متوفر ومرطرط ؟؟ برضه بقى قليل نتيجة الطلب عليه وبنجيبه بالواسطه !!
مع العلم أن علبة اللبن البيوميل أو النكتاليا اللي بـ 18 جنيه 450 جرام والنوع اللي بـ 42.50 جنيه اللي هو البيبيلاك 400 جرام والسيميلاك أبو 67 جنيه 385 جرام !! .. يعني كل ما سعره بيزيد وزنه بيقل !!
هانقول في المتوسط أنت عاوز لطفلك من خمس لـ ست علب في الشهر يعني تقريباً 220 جنيه ده جنب السيريلاك والزبادي وده بخلاف البامبرز اللي تقريباً في المتوسط نفس سعر اللبن شهرياً احسب كمان فلوس حضانة ومش هاقول لك احسب كشف الدكتور والأدوية والهدوم !!
هاتلاقي تقريباً في المتوسط أن حتة العيل اللي لسه بشخة وقد البرص مصروفه ف الشهر مش أقل من سبعميت تمنميت جنيه !! طب الموظف اللي ما حيلتوش غير مرتبه يعمل إيه ؟؟
راخر الواحد لما بيشوف الناس - الموظفين برضه - اللي فاتحين بيوت وعندهم عيال في مدارس وبنات وشباب على وش جواز بيتكسف على دمه ويقول الحمد لله .
في الحقيقة انا لما دخلت الموضوع . ما عرفتش اخرج منه الا لما اضيف اي رد حتى لو كان مش السبب اللي بيخيليني اتضايق . الاسباب كتير واللي يضايق ما فيش اكتر منه . ولكن الفكرة ذاتها واسلوبك هوا اللي شيء رائع بجد . اللي يشوف بلاوي الناس تهون عليه بلوتة . وكمان فكرة انك تلاقي حد عنده نفس المسكلة اللي عندك فيبقى انتوا متشاركين في نفس المشكلة وان فية غيرك كتير زيك .
ردحذفبجد موضوع رائع . تسلم عليه . تشكراتي . دعواتي . كامل احترامي وتقديري . تحياتي
الأستهياف..لما بتكلم و محدش يسمعني خاصة لما بكون بقول كلام بجد. و تيجي تحصل مصيبة و لا أتصرف بناء على اللي قلته قبل كدة و ألاقي اللي قصادي مصدوم و يهزأني مثلاً بطريقة مقلتيش ليه و لا أنا متوقعتش تتصرفي كدة!
ردحذفيا ابن الحلال ما أنا قايلة
مسمعتكيش.أو مخدتش كلامك بجد!!!
ثانياً سواء محترم و لا مش محترم محدش بيحترمك بالمرة لسبب رباني اسمه نوع المولود أنثى !
في شغلي الأولاني كنت بعمل ضعف شغل زمايلي و يكسروا وسطي شغل و بقبض أقل منهم رغم الدرجة الوظيفية الواحدة عشان صاحب العمل مقرر أن الراجل يقبض اكتر من الست و هو كدة و خلاص !
منكد عليا بجد أن ماليش أصحاب بجد..صاحبتي اللي معتبرة نفسها أنتيم فخورة بصداقتنا لأنها معتبرة أني "مثقفة ذات شعر منكوش" من اللي بيطلعوا في الافلام و البرامج و ده مش حقيقي و مبسوطة بتعجب الناس حواليها احنا متصاحبين ازاي..و مش قادرة تفهم ان جوايا فراغ كبير قوي تجاهها.
في حاجة بقى مضايقاني من غير تريقة من حد، طوب الأرض شايفني شخصية شلق و قليلة الذوق..بس قاعدة حاليا مع شخصية عمالة تسمعني قد ايه انا معقدة و مبتقبلش أي "مرونة أخلاقية" من الناس و أنها مقتنعة ان افي اللبس الواحدة لازم تغطي شعرها و تعري وسطها !
معكنن عليا حياتي الحضانة اللي جنب البيت..مجمع حضانات بيعملوا مسابقة أعلى صرخة كل يوم الصبح وداعاً للنوم
مشكلة مادية بقى، إني شخصية بتعرف تعيش بأي فلوس تيجي لها مهما أن كانت قليلة، مش الموديل اللي بيجيب موبايل بمعرفش كام...دي ميزة بس العيب فيما يلي..لما اللي حواليك يقرروا أنهم ينصبوا عليك..حالياً محتاجة الفلوس جداً لأسباب صحية و علاجية فالشغل اللي عملته و كله شغل يدوي و بالتالي مفروض أن له سعر في السوق أغلى من المكن طوب الأرض مقرر أن له نصيب فيه معرفش أزاي و مفروض "إني أشوف بقى حقه فيه كام"
ردحذفيا جدعان خلفت ام اللي جابوكم و نسيتكم؟ و الرد البجح المستفز
جرى إيه يا منى ما أنت على قلبك قد كدة؟!!!!!!!!!!!!!!!
مين قال أن على قلبي قد كدة؟
هو اللي على قلبها قد كدة هتمسك موبايل ب 200 جنيه و تتنطط في الأوتوبيسات و المواصلات؟!!
في نفس الوقت الخامات اللي بنشتعل بيها سعرها نط نطة محترمة جداً هتخرب بيت الشغل تماماً..غير إننا في مجال يعتبر فني نوعاً ما و الغاوي ينقط بطاقيته، يعني اللي هيشتري واحد غاوي بس و دول بقوا ماسكين في فلوسهم عشان حال البلد اللي زي الزفت.
مضايقني إني كنت بكتب كوميدي زمان كتير جداً..الكل كان شايف إني شخصية كوميدية دمها خفيف..حاسة بسواد رهيب جوايا تجاه الكون بحاله.. خايفة أتجوز و أخلف أطلع عيل مظلوم من ضمن المظاليم في البلد دي اللي مفيش انسان يستاهل يتعمل فيه العملة السودة بتاعت انه يشيل جنسيتها!!!
الموضوع فكرته خطيرة رغم ان كل واحد لو كتب فعلا ايه اللى مضايقه هيبقى منتهى الكآبه
ردحذفعن نفسى فيه حجات كتير بتضايقنى ده طبيعى بس اللى مش طبيعى انى بقول لنفسى انى قادرة اصبر
اكتر وقت بكون مخنوقه فيه فعلا لما اعمل ذنب كان ممكن معملوش وقتها بحس ان اى حاجة بتحصلى انا السبب فيها وفعلا بدخل فى حالة اكتئاب لان مبيكونش عندى امل انى هطلع من الحاله بسبب ذنوبى
حجات كتير مقدرش احكيها مش عاطفيه بالمناسبه
او يمكن امنيتى ان يكون عندى اطفال اعملهم شغل كروشيه كتير واهتم بيهم لو ده حاجة عاطفيه ماشى :)
بزعل من الناس وببعد على اد ما بقدر لعند ما الموضوع قلب وبقيت فى نظر الكتير متكبرة ومش عاجبها حد وربنا يعلم انى ببعد عشان بتعب من الغدر والخيانه وطريقة الكلام على بعض بحقد وتريأه
كفاية كده
اول حاجة عجباني الفكرة جدا و الصراحة اول ما قريت الموضوع تنحت كده و قلت طيب اقول اييييييييييه لقيتني مش عارفة
ردحذفممكن يكون اني لسه خارجة من مشكلة كبيرة اوي وابشع موقف ووجع ممكن اكون حسيته طول حياتي خلاني افقد الثقة في نفسي و في اللي حواليا لدرجة اني ابتديت احس اني وحشة و ان ده عقاب من ربنا و بقيت بين اني عودت اللي حواليا اني قوية و مفيش حاجة بتاثر فيا و توقعني و بين اني عاوزة اقع و اصرخ و اعيط و اقول اني تعبانة و ضعيفة التمثيل ده و الحياة بازدواجية متعب جدا
حاجة تانية اعترف اني فعلا نفسي ربنا يرزقني باطفال وبيت و زوج صالح زي اي بنت ولسه ربنا ما ارادش ليه بقى المجتمع المنيل اللي احنا فيه ده محسسني اني بعاهة و ان فيا حاجة غلط او اني خلاص رجلي و القبر و لسه لحد دلوقتي سينجل و افتخر هل نسيوا ان ده رزق ولا لازم ارمي نفسي لاي حد و خلاص عشان انال شرف لبس الدبلة حاجة تغيظ بجد
ايه تاني ايه تاني؟؟ عارفة انك قلت حاجة واحدة بس تحسني ما صدقت
اقول على البلد؟؟ ولا الغلا؟؟؟ ولا الحال المايل و الفساد؟؟ ولا عدم الامان؟؟ ولا ايه ولا ايه ولا ايه
اسمحلي اقول كمان تعليق و هو ان فعلا فعلا الحمد لله رب العلمين في السراء و الضراء و ربنا كريم و رحيم حتى في ابتلاءه و دايما بيجي الاختبار على قدر قوة الاحتمال
ردحذفالحمدلله :)
مشكلتي مشكلتي
ردحذفمساء الفل اولا
ازي حضرتك
كانت مشكلتي اني بلاقي الناس مكشره ف الشارع في الاول وعارفه انهم ف هم كبير
لكن لما بقابل ده بابتسامه بحس انهم حايضربوني بالقلم بالرغم اني عندي مشاكل زيهم ويمكن اكتر
دلوقتي بقي انا مش بلاقيهم مكشرين انا بلاقيهم ف عنيهم نظره انتقام ماتعرفش نظره ناس داخله تتخانق يعني متحفزين لوحدهم فبخاف ابتسم احسن يضربوني :)
فقربت ابقي زيهم علشان مايبقاش في حد احسن من حد :)
انا مش عايزه الناس تحب بعضها لان ده كتير بصراحه لكن علي الاقل مايبينوش ده ع الاقل
طبعا عندي مشاكل كتيـــــــــر لكن مااقدرش اتكلم عنها
لكن الفكره حلوه من حضرتك
تحياتي
انا مش هافضفض تاني
ردحذفكفايه ال 3 حاجات دول
اعتقد انهم كفيلين بأنهم يعقدوا أي حد
لورنس العرب..طيب يا عم احمد ربنا أن مجالكش عريس عايزك تجيب الشقة و العفش !
ردحذفزمايلك في الشغل ده العادي على فكرة، إحنا شعب نصاب بطبعه..لامؤاخذة يعني اللي يقولك احلى حاجة في مصر شعبها ركز معاه قوي على حروف الحاء و الألف في الكلام.
----------------
شريف باشا..مشكلتنا كلنا والله، مصدر البروتين في الحياة هيبقى الجبنة اللي غليت و نطت، طيب و حق الدواء و العلاج..ليا صديق شايف أن من حق كل عيل يتدلع عشان العيشة هتفرمه لما يكبر، بس زميلي ده بقى بيلف حوالين نفسه مش عارف يصرف على عياله بالمرة و هو مخلف 2 بس.
و هو و مراته بيشتغلوا صبح و بعد الظهر !
لبن الأطفال و الله ما أعرف أقولك ايه اصلاً..أنا اخويا صيدلي و باصص باستغراب للي أنت بتقوله و بيقول هي الأنواع دي بتنزل أصلاً..هو شافهم بعينه قبل كدة !!!
---------------
أنا ملخص اللي مضايقني بجد بقى هو أن الخيارات محدودة قوي قصادي..هما خيارين فقط:
يا الواحد يبقى كلب يا يبقى ابن كلب.
هممت بسرد كل الأشياء اللى مضيقاني
ردحذفوبعدين معرفتش
لقيتها مصدر قوة والمفروض مااضايقش
يعنى مثلا كوني اتظلمت فى حاجات كتيييييير وعلى مختلف المواقف ولسه حقي ماجاش ومفيش حتى بصيص أمل إنه ممكن ييجي بس بقول أنا كده عندى أوبشن دعاء المظلوم.
فى مرضي مثلا برضه ببص إن كده عندي أوبشن إن ربنا عندي ودعائى مجاب
فى إنى حالياً عاطلة( لأسباب ممكن تشل مش بس تتضايق) ومعنديش دخل.. بببص إن الحمدلله ليا أهلي يصرفوا عليا
فكرت فى كلام رؤى وأفكار مبعثرة وأنى سنجل وكلام الناس وكده
لقيته أنه عادى أنا كده عندى وقت أقدر أعمل فيه اللى يعجبني وأستمتع بصحبة أهلي أطول فترة ممكنة
عن كتابي اللى محدش يعرف عنه حاجة من الإعلام ولا حتى المكتبات رغم محاولاتى بقول أهي تجربة وأوقات بقول أهي مرة :)
يمكن اللى بجد ممكن أقوله إن بُعدي عن ربنا ده مش بس ممكن يضايقنى ده ممكن يموتني وأنا على قيد الحياة
(ماقصدتش بالبعد عدم ممارسة العبادات ولكن أقصد أنى أمارسها بلا روح)
بيضايقنى أنى مش عارفة أحس اني بعبد ربنا بطريقة ترضيه
بيضايقني إنى مش عارفة أرجع أحس بحلاوة الإيمان اللى كانت عندي فى أول التزامي
بيضايقني كل فرض أديته كده أداة واجب
وأكتر حاجة ممكن تجيب آخري وتسبب لي انهيار بجد إن ربنا يمنع عني طاعة كانت متاحة ليا.. ياااااه ببقى حساه أقسى عقاب وماببقاش عارفة وقتها أعاقب نفسي إزاى ولا أعمل إيه علشان الطاعة تبقى ميسرة ليا تاني
بيضايقنى برضه إنى مش عارفة هموت إمتى
مش عايزة أتفاجئ :)
وطبعا ماينفش ننسى كلنا نتضايق من قطع الكهرباء والمية من غير سبب
وأزمة البنزين دى تغيظ
وتهنيج الكمبيوتر وأنت بتعمل حاجة مهمة ولسه مادوستش سيف
وتعامل الممرضات فى المستشفيات وكأنهم ضمنوا نفسهم وصحتهم
ونصب المحامين على موكلينهم وبيعهم للخصم اللى دفع أكتر
ولما تحس انك عاجز عن مساعدة حد استنجد بيك
ولما تكون فى عز ألمك وتلاقي مطالب منك تضحك وتهزر لإن اللى حواليك ملهمش ذنب
فى كل الحاجات دى افتكروا اننا لسه فى الدنيا و طبيعي كل ده يحصل
أمال هنشتاق للجنة ازاى :)
مشاكل ماديه ده شئ اساسى
ردحذفبادور على شغل اضافى ومش لاقيه
مش عايزه اعيش فى مستوى غير مستوايا بس على الاقل عايزه الاقى اللى يكفى مصاريف كليتى وطلباتى كبنت
انا حساسه زياده عن اللازم ومحدش بيقدر
وكأن كل اللى حواليا غاويين يدوسوا على وجعى
عندى 30 سنه ونفسى احب واتحب واتجوز وابقى ام زى خلق الله
مشاكلى مع امى ملهاش حصر ومش هاكدب لو قلت لك ان مشكلتى الكبيره هى امى مفيش بينا اى نوع من التفاهم
كنت باكتب خواطر واشعار وبطلت :(
بقيت عصبيه قوى وخلقى ضيق ومش باستحمل حد
انا جدعه مع اصحابى قوى وباقف فى ظهرهم واى حد يحتاجنى بيلاقينى لكن يوم ما اقع بلاقى نفسى لوحدى لان كل واحده فيهم عندها حياتهاومشاكلها
تعرف انا نفسى فى ايه ؟
ردحذفعايزه اغرق همومى فى حضن احس انه حنين بجد
مفتقده الحنيه قوى :(
جيت أقول حاجات كتير ..
ردحذفبس إتكسفت بصراحة ..
الحمد لله على كل شىء .. و ربنا يخفف عننا جميعاً :)
فكره رائعه بجد أحييك عليها ......
ردحذفانا بقا في حاجات كتير مضايقاني بس اللي مسيطر علي تفكيري دلوقتي هو شعور القلق أكتر من الاكتئاب والمضايقه لأني اخترت اختيار هيتحدد علي اساسه كل حياتي الجايه بتمني من ربنا أكون اخترت صح وميخبش ظني في اختياري لانه اختيار العمر كله
أنت لسه زي ما أنت ؟؟ - ضحكة صفرا وبعدين صعبانيات ثم سيل نصايح
ردحذف- الجملة اللي فاتت دي غالباً كانت بتتقال لي بنفس الوصف السابق !! .. نادراً ما كانت بتتقال لي على سبيل المدح أو إن اللي بيقولها لك فرحان أنك ما اتغيرتش والزمن ما عرفش يلوي دراعك !! .. كنت أقابل الواحد من دول بعد فترة غياب باشتياق حقيقي وبلهفة وبفرح إني لقيته وشفته ألاقيه بيقول لي بعد سيل الأسئلة ((( اللي بيها بيبقى عاوز يعرف كل حاجة عني ؛ وكده كده هو راسم لي في دماغه صورة الانسان السلبي الفاشل المثير للشفقة اللي الزمن مهما جري بيه مش هايتغير وبيسقط عليا كل نقائصه وعقده وكلاكيعه المهم أنه ف الآحر لازم يطلع أحسن مني ))) وقبل حتى ما أكمل كلامي : إيه يا ابني ؟؟ أنت لسه زي ما أنت برضه ؟؟ ما فيش جديد ؟؟ وهو بيحاول يكتم ضحكته الصفرا بشوية الصعبانيات وتمثيل الأسف على حالي والشفقة لأوضاعي !! ولما أقول له : يا عم الحمد لله أنا زي الفل أهوه ومش شايف أن فيا حاجة غلط أو ناقصني حاجة !! ألاقيه بدأ بعد كده بسيل من النصايح تتلخص في أن العمر بيجري ولازم أتغير وألحق أعمل لنفسي حاجة وما أسيبش نفسي كده !! – ده كده المفروض أنه بيساعدني – وتلاقيه بيأكد لي من وقت للتاني أنه بيقول لي كده علشان همه على مصلحتي ، ما احنا علاقتنا ببعض مش أي علاقة !! ده احنا بيننا عيش وملح !! .. وبعد ما أسيبه يستمر في شحني وتفريغ شحنة النقص اللي عنده فيا وأبين له أنه فعلاً على حق وأنه أحسن مني وإني ابن ستين كلب فاشل طول عمري وماشي بدماغي اللي عاوزه كسرها ومش عارف مصلحتي وووووو على أمل أنه فِ الآخر مثلاً يديني حل أو نصيحة بجد أو أني أشوف نتيجة مادية ملموسة لكل الهري ده أي مصلحة إن شالله حتى نـُص كبده بعد المحضر اللي عملهولي والمحاكمة اللي أدانني فيها ألاقيه بيمصمص في شفايفه وبيقول لي : سيبها على الله إن شاء الله هاتفرج ، وبعدين يا عم أنت الحمد لله زي الفل أهوه وما فيكش حاجة غلط !! وبإذن الله لينا قعدة تانية مع بعض ، ياللا سلام بقى ، مش عاوز حاجة ؟؟ لا إله إلا الله .
الناس اللي بتتدعي والناس الحاقدين
ردحذف- الصنف ده من الناس بألعنه !!
ربنا باليني بشوية ناس من العينة دي !! .. اللي هو أول ما يقابلك ومن غير حتى ما تسأله عن أخباره أو حاله يبدأ يشتكي لك ويدِّعي الفقر أو المرض أو الهم أو الفلس !! .. وبالذات بقى لو فيه نعمة ظهرت عليه !! .. يعني واحد زميلي في الشغل جاب عربية من سنة ونص وما قالناش غير اليومين دول بعد ما فضل شهر ينكد علينا وعلى اللي خلفونا كل يوم بقصص أنه استلف خمستاشر ألف جنيه غير عشرين ألف تانيين كاتب على نفسه بيهم شيكات وأنه في مشاكل مع مراته بقالهم سنة بس هو اللي مش عاوز يقول لنا - لأنه حسيس - وكانوا هايتطلقوا بسبب أنه ما عندوش عربية وبعد ما نكد علينا وشيلنا همه شهر بحالة أخد كل واحد على جنب وقال له على موضوع العربية على أساس أنه سر وأنه والله مستلف تمنها ووووو نفس السيناريو اللي فوق !! وكل يوم ييجي الشغل العربية اتخبطت .. العربية عند السمكري .. أنا صارف عليها بتاع تلات ألاف جنيه لحد دلوقت .. أنا عيالي ما ركبوهاش لحد دلوقت .. اللعربية دي من ساعة ما جبتها وهي قدمها فقر عليا وعلى طول في مشاكل ووووووووو
واحد تاني بقى !! كل ما يشوف خلقة أهلي .. يشكيلي من أمه وضهرها ورجليها وضغطها وسكرها وبعدين يدخل على حماته والشريحة اللي مركباها والعلاج الطبيعي وأخو مراته اللي طلق وفي مشاكل مع أهل طليقته وبعدين ياخد نفسه شويتين كده ويقول : الحمد لله .. أنا بس مراتي كان فيها ومكفيها وتعبانة وحرنانة وطفشانة والبنت بنتي كمان تضح أن عندها وعندها وعندها .. وأخوه اخانق معاه وضربوا بعض وموتوا بعض ووووو
وكل ده علشان يغلوش أنه جاب مثلاً قميص جديد أو جزمة جديدة !! .. وطبعاً أنا استحالة أقول له مبروك القميص الجديد لأني هاسمع نفس الفيلم ده تاني !!
بجد بجد .. أم الناس دي !!
بما أننا بنتكلم على النكد و العكننة،تلك اللحظة اللي تترزع فيها مع حد يقولك أمك أعز أصحابه و أنت قرفان منه و مش عارف ده بيتكلم جد و لا عايز يستلف فلوس! في نفس اليوم يرفض و يطنش يرجع لك بقية فلوسك اللي البياع اللي مش لاقي فكة كالعادة أداكم حسابكم مجمد و جنابك تروح البيت مشي و مفلس مفيش في جيبك نكلة:( - لما تدخل مطعم مع المخلوق ده و أنت مبتطيقش المطاعم أصلاً، و تطلب و يعجبك طلبك بس حضرته ميعجبوش يقوم ببجاحة يسحب طبقك من قدامك و يبدله بطبقه! و في أي مرة تروح معاه لازم يد إيد القذرة في طبقك بمنتهة الآلاطة و ياكل..و حط في الاعتبار أنك موسوس و مبتطيقش حد ياكل بإيده قصادك اصلاً و لا بتطيق تخمس في الأكل.
ردحذفلما تقعد تسمع في نصايح مستمرة و لانهائية في شكلك الغلط، و في شخصك الغلط جداً و في غباءك و أنك لا بتتحرك و لا بتتقدم و في عيلتك الأغبياء اللي كلهم دكاترة بالمناسبة!و تفضل طول ما أنت شغال عمال تسمع في وصلات مستمرة من تعظيم الذات و المنظرة الفاااااااارغة لحد ما هتبقى تفرقع، و المحاولات المستميتة طول الوقت لتحويلك لنسخة ممسوخة و ماسخة من الشخصية دي و اللي في رأيي الشخصي جزء كبير قوي من تصرفاتها محركه الأساسي الغيرة و كلاكيع النقص و غباء إجتماعي نادر و قدرة نادرة على الزن يخليك أحياناً تضطر تبقى منافق و تقول و أنا كمان بعزك جداً و أنت نفسك تغزها بحاجة.
و لما تسمع مضطر قد إيييييييييه الشقر بيموتوا و ينجذبوا لهذه الشخصية" الفااااااااتنة" و تبقى عايز تقول لفظ قبيح لا تسمح به تربيتك..لأنك مش مقتنع أن في راجل بكامل وعيه مالم يكون مختل عقلياً أو مريض مرض مزمن و معدي ينجذب للشخصية دي بالمرة.
و لما تشوف ناس ماتت في ثورة و تلاقي الرد المعتبر الضيق أن الصيدليات قافلة و مش هتعرف تشتري اللوشن اللي عايزاة! ولا البلاكبيري اللي عليه عرض لأن المحل أتنهب!
و أما تحاول طول الوقت تقطع علاقتك بيه و تلاقيه زي القراضة مستمررررررررر
---
لو عايز القرف و النكد الأكبر بقى..لما تتسرق من زميل عمل و أنت عارف أنه سرقك بدل المرة تلاتة و تحذر الناس اللي يطلعوا كلهم أتسرقوا و أتنصب عليهم كذا مرة منه و أدوا له فلوس صدقة و زكاة و تشتكي بدل المرة ألف و مع كل شكوى تفاجيء بأنه بيترقى !!!!!!!!!!
كل اللي هتحسه ساعتها: ما أنتو يا مقاسمين معاه يا إما ماسك عليكم زلة.
تحس أن مفيش رجا و لا في فايدة و كفاية ادعاء احترام بقى.
هجايص باشا، حضرتك ضحكتني و فطستني من الضحك بكلامك على الزمايل بتوعك..فكرتني بزميلتي الحرامية الي سرقتني في ساعة و كاميرا ده طبعاً بعد ما عرفت أن الــ250 جنيه اللي دفعتهم صدقة لهفتهم في جيبها..المهم مرة زميلة تانية اتخطبت و وزعت حاجة ساقعة كانز على كل الموجودين..و الهانم بقى قامت متنهدة تنهيدة عاصفة و قالت..يعني جابت كانز كلفها 243 جنية (شوف الدقة و السرعة في الحساب) مش كانت الفلوس دي راحت لعلاج حد أحسن ! (النصباية بتاعتها كانت عاملة مريضة بالسرطان و مكانش بيوصل لها فلوس طبعاً)
ردحذفعلى فكرة أنا خدت وقت البرنامج كله بس واضح إني سودة و مهببة قوي من جوة :((((
اسمحولي بعد إذن حضراتكم أحكي لكم موقف شفته إمبارح .. كنت واقف فِ البلكونة وشفت واحد زبال راكب عربية بحمار (من اللي بتبقى متقفلة بخشب قديم من الجناب) وراكب جنبه ولد صغير تقريباً ابنه عنده عشر سنين .. من منظر العربية واضح أن تخصص الراجل ده يلم الكراتين الفاضية اللي بتبقى مرمية قدام المحلات والبيوت وفي الشارع لإعادة تدويرها .. لأن العربية ما كانش فيها زبالة عضوية خالص !! .. المهم أن ابنه اللي كان قاعد جنبه بقى كذا مرة يمد إيده من ورا ضهره وياخد كرتونة يفككها ويمزعها ويقطعها ويروح راميها من ورا على ضهره على العربية تاني من غير ما يقوم من مكانة أو يبص عليها !! .. ولأن الهوا كان شديد قوي فكل الكراتين اللي الولد كان بيفصص فيها ع العربية طارت وبقت عماله تطوح في دوامات وف الآخر نزلت ع الأرض وعملت طابور عشوائي ورا بعضها ع الأرض !! .. وما فضلش ع العربية غير الكراتين المقفولة (لأنها كانت تقيلة) زي ما هي !! .. طبعاً أنت هاتقول : فيها إيه لو الولد ده كان ساب الكراتين دي سليمة وفصصها هناك في المقلب براحته ؟؟ .. أو فيها إيه لو كان تعب نفسه شوية وقام بص ع الكراتين اللي عمال يحدفها ورا ضهره وشاف مصيرها إيه ؟؟ .. أو فيها إيه لو أبوه كان وقف على جنب وبص ع الكراتين اللي ابنه عمال يفصص فيها بدل ما تعبه وشقاه يروح هدر ؟؟ أو أو أو ..
ردحذفأرد على سيادتك وأقول لك بمنتهى البساطة وبإختصار شديد جداً :: إن أنا اللي كنت واقف في البلكونة وشايف المشهد ده كله من فوق !!
:))
- اللي أقصده من كلامي .. أن الولد اللي كان بيقطـّع الكراتين استحالة كان قاصد أنه يضيع شقا أبوه وتعبه هو كمان معاه هباءاً ويرميهم في الشارع !! أكيد كان قصده أنه يساعد أبوه .. كون الولد بقى اتصرف بكسل أو بغباء أو ما درسش وحلل الموقف كويس أو أنه نسي وعمي عن بديهيات منطقية ما كانش المفروض ينساها بحكم أن دي مهنته أو أو ........... فـ ده لأنه هو اللي كان في قلب الموقف ؛ ما كانش واقف فوق في البلكونة زيي ولا قرا الموقف ع الجاهز زي ما سيادتك بتتفضل مشكوراً وبتقراه دلوقت !! .. تسمي اللي حصل ده قدر أو غباء أو قلة حظ أو نصيب ؛ مش هاتفرق كتير !! .. المهم ما تقولش كلام جارح في حق الولد ؛ لأنك ما تعرفش لو كنت مكان الولد ده في نفس الموقف كنت هاتتصرف إزاي ؟؟ .. ومش هاتبقى أنت والهوا عليه !!
بس اللي أنا متأكد منه أن العلقة السخنة اللي الواد ده خدها من أبوه بعد ما روّحوا وشافوا الكراتين اللي باقية – ده إذا كانت ما طارتش كلها أصلاً – هاتعلمه إنه ياخد باله بعد كده وهاتعرفه يتصرف إزاي في المواقف اللي زي دي !!
أما بالنسبة لأبوه فـ ربنا إن شاء الله ها يعوضه عنهم خير ويرزقه بأحسن منهم .
pasha
ردحذفقريت اخر موقف انت شفته و قعدت افكر اوي الصراحة مفكرتش في ان الولد كان ممكن يعمل كذا او كذا ولا اي حاجة شغت بالي غير حاجة واحدة بس الناس دي اكل عيشها كله قايم على الكراتين الفاضية يعني بتاكل و تشرب و تتكسي و تجيب حق دواها ده لو بتجيبه اصلا من الكراتين الفاضية اد ايه غلابة و فيه غيرهم كتير اغلب منهم و اد ايه بجد الواحد لو مهما كتر همه هيبص حواليه و يقول الحمدلله اوي
و بمناسبة بقا فقع المرارة و الناس اللي تجيب شلل رباعي اكتر حاجة تفقع مرارتي الاس الشكاية البكاية اللي تقولك ده انا فيا و فيا و فيا و الواحد عنده مشاكل الدنيا و الاخرة و تبص تلاقي عنده حاجات يستاهل يحمد ربنا عليها و يبطل شكوى و يحط لسانه ف بقه و يسكت تلاقيه لابس براند معرفش ايه و راكب عربية ايه طيب ما تسكت و لا اسكتي و بطلي شكوى و احمدي ربنا و لا فاكرة هحسدك؟؟؟طيب و حياة امي مش هحسدك بس حللي عن دماغي انا فيا اللي مكفيني
من اكبر اسباب سعادتي حاليا انى اخيرا لقيت التعليقات متاحة على الموضوع
ردحذفكنت كل ما اجي اقرا موضوع واحب اعلق عليه الاقى ان التعليقات متشالة وابقى متضايقه قوييييي :)
المهم.. قبل ما اتكلم على اى حاجة مضايقانى اكيد انا بحمد ربنا وبشكر فضله عليا
انا قريت هنا كم من المشاكل حسستني انى فعليا انسانة منعمة ومترفة ومافيش فى دماغها حاجة :)
او يمكن اكتر حاجة تاعباني بجد هى دماغي
احساس التوهان اللي انا فيه
مابستمرش فى اى حاجة اعملها او ادخل فيها
وصلت لسن كل اللي حواليا فيه حققوا حاجة - اى حاجة - فى حياتهم
وانا ماحققتش اكتر من منظر
لما تحس ان حياتك فارغة.. خداعه.. فاضيه من جوه
مش راضي عن حالك ولا عن انجازاتك وشايفها كلها وهم ف وهم
كنت بتدور على انك تكسر الدايرة وتخرج بره الصندوق ولما عملت كده لقيت نفسك وسط العدم
أنا انسانة وحيدة وتايهة قوي
السلام عليكم ورحمة الله وبركاته
ردحذف:)
قبل ما ابدأ في الرد على مشاركاتكم وتعليقاتكم أحب أشكركم جداً على تواصلكم وتفاعلكم مع البوست واهتمامكم بالمشاركة وبادعيلكم كلكم بظهر الغيب أن ربنا يفرج عنكم كربكم ويزيح همكم وييسر لكم الخير في أموركم ويرزقكم بالحلال ويفرح قلوبكم ويغنيكم بفضله عمن سواه ويبارك فيكم ويحفظكم من كل شر وسوء اللهم آمين
ـــــــــــــــــــــــــــــــــ
ممممم .. يمكن بصراحة لما نشرت البوست ما كانش في بالي هدف معين غير أني أبعبع وأفضفض وأتكلم عن شوية حاجات من الحاجات اللي مضايقاني وأشرككم معايا في الفضفضة - مش في النكد والله - لأني باعتقد أن بيوتنا كلها مِنفدة على بعض ومشاكلنا تقريباً واحدة وإن تعددت الأسباب أو وسائل التعبير زي ما قال جاهين "الهم واحد والملل مشترك" .. وده اللي فعلاً اتأكد لي بصورة أكبر بعد ما حضراتكم شاركتوا في البوست .
بس يمكن لما قريت التعليقات أتمنيت - ولا زلت - أن التفاعل كان يتم بصورة مثمرة شوية عن كده .. بمعنى .. مشكلة زي مشكلة تأخر سن الزواج اللي هي تقريباً صاحبة النصيب الأكبر في البوست .. كنت أفضل مثلاً أن كل واحد زي ما شرح وجهة نظره فيها يقترح ويساهم بحلول أو يتكلم بصراحة عن وجهة نظره في الموضوع أو إيه هي المشاكل اللي واجهته فعلياً .. والتعليقات مفتوحة للغير معرف علشان الإحراج .. لأن زي ما اتضح لنا أن معظم مشاكلنا واحدة باعتقد كمان أن الحلول بالنسبة لمشاكلنا هاتكون قريبة لحد كبير .. أو على الأقل لو حطينا إيدينا ع المشكلة يمكن نقدر نساعد بعض أننا نلاقي الحلول .. يمكن مثلاً فلانة شايفة أن موضوع الجواز ده فاشل من أساسه ويمكن فلان خايف من الجواز لنفس السبب .. طيب دول ما نقدرش نقدم لهم مقترحات أو أراء أو حلول إلا أما نسمع وجهات نظرهم الأول .. وكنت ولا زلت برضه باطلب ممن هم أكبر سناً وأكثر خبرة ودراية بموضوع الجواز يفيدونا بخبراتهم وتجاربهم في الموضوع ده .
عموماً احنا كلنا بنكمل بعض .. والتعليقات مفتوحة لغير معرف اللي عاوز أو اللي عاوزة يسأل / تسأل أي سؤال أو عنده وجهة نظر أو رأي أو إقتراح ومحرج يعلق بالأكاونت بتاعة احنا كلنا هنا تحت أمره وهانحاول على قد ما ربنا يقرنا نقدم له النصيحة لوجه الله تعالى .
أخوكم / شريف
غير معرف (المفلسة)
ردحذفنصيحتي ليكي .. طلعي شيء لله.
أي شيء إن شالله نص جنيه ، بلوزة قديمة ، شوية فاكهة من عندكم في البيت ... إلخ
وعلى فكرة الموضوع ده مش سهل !!
ما أقصدش الشيء اللي هاتطلعيه أياً كانت قيمته ، أنا أقصد إنك تلاقي حد يكون محتاج فعلاً علشان تدي له !! لأنك هاتلفي كتير وهاتتعبي علشان تلاقي الحد ده لأن في الأصل انتي اللي محتاجاه مش هو !!
لو تلاحظي إن لما بيكون معانا فلوس ، كل شوية بنتشنكل في واحد محتاج وغالباً بننفض له وبنهرب من قصاده !! وما نعرفش أن احنا اللي محتاجينه علشان ربنا يبارك لنا في فلوسنا ويطهرها لنا .
مش باتفلسف والله العظيم ، عموماً جربي مش هاتخسري حاجة ، وإن شاء الله لما ربنا يفرجها عليكي ما تنسيناش في الدعاء .
:))
شمس النهار
ردحذف:))
يا ألف أهلاً وسهلاً بأستاذتنا الكبيرة ، منورة الدنيا والله ، والحدوتة حلوة قوي والله تسلمي يا رب :))
بالنسبة لبلوجر وأهل بلوجر .. يمكن أكتر حاجة بتفرحني والله العظيم هنا في بلوجر أني ألاقي فلان اللي كان غيب بقاله فترة رجع يكتب تاني أو علق عند حد أو مثلاً أسمع خبر حلو أن فلان نجح في دراسته أو كان مسافر يسعى على رزقه ورجع بالسلامة أو ربنا كرمه وخطب أو اتجوز أو ربنا رزقه بالذرية الصالحة .. إن شاء الله ربنا يرجع الغايبين ويطمننا عليهم ونرجع نود بعض تاني أكتر من الأول :))
نورتينا حقيقي والله
لورنس العرب
ردحذف:))
منور الدنيا كلها يا كبير والله العظيم وليك وحشة قــــد كـــــده والله :))
وبعدين يا عم دي مدونتك والله خد وقت البرنامج وصاحب البرنامج زي ما تحب :))
والله بافرح لما بتنورني وبتشرفني بتعليقاتك :))
والله يا جماعة انتوا اللي بتخللوا للمدونة طعم ولون :))
لورنس العرب
ردحذف:))
بص يا صاحبي بالنسبة لمشكلة الاتنين الحلنجية اللي أنت مشاركهم .. هما شايفينها فرصة وتلاقيهم بيقولوا الجملة اللي وداني اتهرت منها الفترة اللي فاتت : " اللي ما عملش فلوس السنتين اللي فاتوا مش هايعمل فلوس " .. ما هي البلد سايبة وكل اللي يعرف يعمل حاجة يعملها ، ده حتى اللي ما بيعرفش النصب اتعلم وبقى شيخ منصر !!
ما عنديش حاجة أقولها غير حسبي الله ونعم الوكيل !!
أنت صح .. بس ما تنساش إن أنت الأدرى بظروفك من أي حد تاني .. يعني مع اتنين زي دول أقول لك حرّص وخون وبلغ عنهم كمان D:
(أنا باهدي النفوس ليس إلا)
اللي أقصده خللي بالك منهم أحسن تيجي الطوبة ف المعطوبة يا برنجي وتتاخد في الرجلين وأنت لا ناقة ليك ولا جمل !! وعلى رأي المثل "أردب ما هو لك تحضر كيلة تتعفر دقنك وما ينوبك إلا شيله" .. والله المستعان .
ـــــــــــــــــــــــــــ
بالنسبة للعروسة اللي كانت تعرف واحدة .. كنت قلتلها : وأنا كمان أعرف واحد ههههههههههه
بالنسبة للعروسة اللي قالت لك : أنا باحب بابا وماما واخواتي وعاوزه شقة جنبهم .. اسمحلي أقو لك إنك اتسرعت في ردك عليها !! .. دي كنت قلت لها : وأنا كمان باحبهم وما يخلصنيش أبعدك عنهم وعلشان كده أنا موافق أقعد معاكم في شقتكم D: وهو حد لاقي شقق يا معتز يا اخويا ؟؟ .. مش لازم يكون عندك نظرة مبعدية ؟؟ .. يعني لو لا قدر الله لا قدر الله حصل في الأمور أمور وطلبت الطلاق ؛ ما تجيش تاخد منك الشقة والعفش ؛ كل اللي هاتعمله حضرتك ساعتها إنك تاخد شنطة هدومك وتخرج صاغ سليم وسلاموا عليكم وعليكم السلام ، وتسيبهم يسألوا نفسهم خالتي جت عندكم ؟؟ لأ ما جتش :))
للأسف تعيش ندل تموت مستور يا معتز :))
نورت الدنيا كلها يا غالي
توقيــع / غير معرف
حنعيش يعنى حنعيش
ردحذف:))
يا ألف أهلاً وسهلاً يا دكتور ، منور الدنيا كلها والله العظيم :))
- للأسف مصر بقت نكتة بايخة ما بتضحكش !!
ربنا ييسر الحال ويزيح عننا الغمة دي ويفرجها علينا من عنده ويحفظ البلد دي وأهلها من كل سوء وشر اللهم آمين .
نورتني جداً بزيارتك الكريمة
تقبل خالص مودتي وعميق احترامي
SHARKawi
ردحذف:))
يا مساء الفل على أبو الذوق كله :))
منورني جداً يا غالي والله العظيم ، وحقيقي شرفتني ونورتني بمداخلتك الكريمة وأخجلتني بذوقك الراقي :))
ربنا يا رب ييسر لك حالك ويسعدك ويزيح عنك همك ويفرج كربتك ويبارك فيك ويحفظك ونشوفك في أحسن حال إن شاء الله اللهم آمين
نورتني جداً والله
تقبل خالص شكري وعميق تقديري واحترامي
سنكوح شنن لملوم سامي
ردحذف:))
يا ألف أهلاً وسهلاً يا باشمهندسة منورة الدنيا والله .. وبجد بجد باشكرك على مشاركاتك وتعليقاتك اللي أثرت الموضوع .. ربنا يكرمك يا رب وييسر لك حالك ويسعدك ويفرحك ويرزقك ويحفظك ونشوفك في أحسن حال إن شاء الله :))
وبعدين حضرتك وباقي الزملاء الأفاضل أصحاب مدونة يعني تتكلموا براحتكم زي ما انتوا عاوزين :))
- حكاية الاستهياف .. والتي مرادفها عدم الاستعناء والتجاهل .. بصي ، للأسف معظم الناس ما بتصدقش البني آدم الدوغري ، الناس بتحب اللي يضحك ويحور عليها !!
- النوع أنثى .. أقول لك على حاجة مضايقاني جداً جداً ، وما لاحظتهاش إلا مؤخراً بعد ما ربنا رزقنا بياسين .. أن معظم أصحابي وقرايبي اللي ربنا رزقهم بمولودة بنت أو كانت خلفتهم كلها بنات متضايقين جداً ومكسوفين أنهم خلفوا بنات !! .. وتلاقي الواحد من دول بنته ما كملتش خمس سنين وملبسها حجاب وبيخرجها بإسدال !! وطبعاً ممنوع تلعب مع صبيان أو تبات عند خالتها اللي عندها صبيان !! وكل شوية كلام من عينة : غطي شعرك يا بت !! وهادوب الشبشب عليكي لو نزلتي الشارع من غير طرحة !! وكأنها كائن منتقص أو جريمة لازم يتستروا عليها !!
مش عاوز افتح ف الموضوع ده لأنه بيخرجني عن شعوري ، وأكيد انتوا عارفين الباقي !!
- موضوع الصحاب اللي بجد .. اسمحيلي أتكلم فيه من زاوية مختلفة .. انتي عاوزه صحاب بجد ولا صحاب شبهك ؟؟ .. يعني عاوزه مثلاً صاحبه تكون من نفس مستواكي الاجتماعي وتفكيرها قريب من تفكيرك واهتماماتكوا واحدة وسنكم واحد و ..... إلخ يعني بإختصار شبهك في كل حاجة ولا عاوزه صاحبة تنصحك وتبقى سندك في كل موقف حتى لو مش موجودة فعلياً وقت الموقف ، صاحبه تعاتبك وتتخانق معاكي لو شافتك غلطتي في حاجة وتدعمك وقت يأسك ؟؟
أصل الصحاب اللي هما شبه الواحد دول سهل أوي أنك تعتري فيهم وتلاقيهم لو دعبستي عليهم أو على الأقل هاتلاقي واحدة فيه نقط تلاقي كتيرة بينك وبينها .. بس وبعدين ؟؟ هاتلاقي نفسكوا مع الوقت بتعوموا على عوم بعض في كل حاجة علشان ما فيش واحدة فيكن تزعل التانية منها !! مش مهم اللي بتعملوه صح ولا غلط المهم أنكن بتعملوه وقت ما بتحبوا تعملوه وبالطريقة اللي تيجي على مزاجكن !! والنتيجة أن الصحاب اللي شبهك دول لو ما أخروكيش هايخللوكي محلك سر !! والعمر بيجري يا باشمهندسة .. ولو الدنيا ما بعدتكوش ولهتكوا عن بعض هاتلاقي أن مع أول تعارض مصالح بينكن هاتختلفوا وكل واحدة فيكن هاتمشي في طريق ومش هاتسيب للتانية غير ألم وفراغ !!
باعتقد في رأيي الشخصي أن الصحاب اللي بجد – إن وجدوا وقدرنا نتحملهم – عملة نادرة .. لازم علشان نكتسبهم يكون عندنا صدر رحب للنقد وتقبل الاختلاف بيننا وبينهم .. العلاقة بيننا وبينهم بتكون قايمة على الصراحة والشفافية والوضوح وبتكون علاقة واعية وناضجة حتى لو قامت على تبادل المصالح .. ما بيكونش فيها تكافوء بقدر ما بيكون فيها تكامل .
لو تلاحظي حضرتك .. أن من واحنا صغيرين ما اتعلمناش إزاي نختار أصحابنا .. لأننا في الغالب كنا بنصاحب اللي شبهنا ؛ في حين أن أهلنا كانوا دايماً عاوزيننا نصاحب الأشطر والأكثر أدباً والتزاماً علشان نتعلم منهم ، ده خللانا في كتير من الأحيان نتمرد على اختياراتهم ونختار رفاق السوء علشان نعرف منهم – وهما ف الأصل مش عارفين زينا – اللي احنا مش عارفينه !!
علشان كده لو تاخدي بالك .. هاتلاقي أن النابغين في أي مجال – من المجالات اللي مش قايمة على الموهبة - مالهمش أصحاب !! .. هما كان ليهم هدف وراسمين لنفسهم طريق واحنا كنا بالنسبة لهم زي أي حاجة بيقابلوها في الطريق ده .. عربيات / كشافات / محطات / استراحات ... إلخ .
ومتهيألي لو كل واحد فينا رجع بالذاكرة شوية لورا هايفتكر ناس كتير عدوا عليه وسبقوه ، وكان فاكرهم ف يوم من الأيام أصحاب .
ما باقولش أننا فشلة ؛ بس ممكن نكون عاطفيين زيادة عن اللزوم ؛ متشربين بفضائل منقرضة مثل الإخلاص والتفاني والشهامة في زمن مادي جشع بتسيطر عليه مفاهيم تانية خالص .
الموضوع كبير ، وباعتذر عن الإسهاب والإطالة :))
- بالنسبة لحكاية أن الأخرين شايفينك شخصية شلق و قليلة الذوق .. فبمنتهى الصراحة أنا ما اتشرفتش بحضرتك علشان أقدر أقول لك إذا كنتي كده ولا لأ .. ممممم .. ممكن تكوني هجومية ومتحفزة شوية (ده مجرد إنطباع) .. وعموماً رأيي ورأي غيري مش مهم ، المهم انتي شايفة نفسك إزاي ؟؟
- بالنسبة لحكاية الحضانة .. فـ عندنا برضه حضانة بتعكنن عليا كل يوم الصبح !!
أرجو أنك تتقبلي رأيي بصدر رحب :))
نورتينا وشرفتينا حقيقي والله
سنكوح شنن لملوم سامي
ردحذف:))
- بالنسبة للمشكلة المادية .. فكرتيني بـ سمير غانم في مسرحية المتزوجون لما كان بيقول جورج سيدهم : أنت عاوز فلوس ؟؟ وأنا كمان عاوز فلوس !! ههههههههههه
ألف سلامة على حضرتك ربنا يا رب يعفو عنك ويقومك بألف سلامة إن شاء الله .
- بالنسبة للكتابة .. فحضرتك م الناس اللي بجد أسلوبها الساخر اللاذع بيعجبني جداً ومن غير مجاملة والله .. هما بس اليومين دول الزهق والقرف منتشرين بغباوة وسادين نفس الواحد عن أي حاجة مش الكتابة بس !!
ربنا يفرجها من عنده اللهم آمين .
- موضوع خوفك من أنك تتجوزي وتخلفي عيل مظلوم .. احنا مش هانكون أحن عليهم من اللي خلقهم .. ربنا كريم أوي أوي والله العظيم وما بينساش حد .. وما حدش عارف بكره فيه إيه ؟؟
ربنا ييسر لك الحال ويرزقك الزوج الصالح والذرية الصالحة إن شاء الله
رؤى عليوة
ردحذف:))
يا ألف أهلاً وسهلاً بأستاذتنا منورانا حقيقي والله .
- " اللى مش طبيعى انى بقول لنفسى انى قادرة اصبر" .. صدقيني والله يا أستاذة كله بيعدي ، بحلوه بمرة بيعدي !! .. وزي ما بيقولوا ياما دقت ع الراس طبول !! .. إن شاء الله بكره أحلى .
- جزئية الذنوب دي بصراحة خلتني اتكسفت قوي من نفسي لما قريتها !! .. كان أحد السلف الصالح له كلمة بتقول : "لو أن للذنوب رائحة ما جالسنا أحد" .. ربنا يا رب يحفظك ويبارك فيكي ويثبتك على الحق ويغفر لك ويغفر لنا جميعاً ذنوبنا إن شاء الله .
- إن شاء الله ربنا يرزقك بالزوج الصالح عاجلاً ويجمع بينكما في خير ويرزقكم بالذرية الصالحة اللي تقعد تلعب لك في الكور الصوف بتاعة الكروشية وتلعبكهملك ما تعرفيش تفكيهم :))
- بالنسبة لحكاية الزعل من الناس .. مش هاتعرفي ترضي كل الناس ، ودلوقتي للأسف بقيتي علشان ترضي الناس لازم تغضبي ربنا .. يبقى ارضي ربنا ونفضي للناس .. وثقي تماماً إن رضا ربنا عليكي هاييسر لك ويجند لك الناس اللي تستحق أنك تعامليها .. إنما اللي يزعل منك وانتي صح حطيه تحت جزمتك .. (مؤدب أنا) D:
نورتينا جداً بزيارتك الكريمة وتعليقك الجميل الراقي
هههههه - كدة مفروض يخلوا الحضانات في مناطق صحراوية معزولة و لها جدران عالية بأسلاك شائكة :)
ردحذفمش أنا اللي عيانة على فكرة ده حد قريب مني..بس ربنا يتقبل دعائك و يعفي عنها.
الأصحاب..أنا متفهمة رأيك، بس أنا مش عايزة حد زيي و لا نسخة مني و لا حد ينسخني منه.عايزة "قبول" متبادل و رؤية حقيقية.
عجبني رأيك اللي قلته للورانس العرب.بجد نصيحة ذهبية.طيب ما الحل الأسهل هو عايز يتجوز و البنات اللي بيتكلموا على الجواز عايزين يتجوزوا، طيب ما تشوفوا وسيلة تعارف ملاءمة جايز يبقى في نصيب!
نصيحة لك بعملها في حالات الفلس..البحث عن البديل الأرخص.أكيد في بديل غذائي للبن الأطفال النادر الوجود، لو الولد أقل من السن اللي يشرب فيه حليب (سنة تقريباً)، ممكن تخف سريلاك أو غذاء أطفال لدرجة أنه يبقى سائل قوي و يتحط في الرضعة.لو في سن ممكن ياكل فيه، يبقى الحل الذهبي بتاع الجزرة المضروبة في الخلاط و تتحط في برطمان صغير بيتشال في شنطة اليد في الشغل..بص هيبقى في بحث و سؤال بالهبل في الموضوع ده لأنه مش بالساهل.ده زي شرا الهدوم في الاوكازيون و من بواقي التصدير كدة عشان التوفير.
أفكار مبعثرة
ردحذف:))
يا ألف أهلاً وسهلاً بأستاذتنا ، منورانا والله
ربنا يكرم حضرتك يا رب ويحفظك شكراً جداً لذوقك وكرم أخلاقك :))
- والله يا أستاذة ما عارف أقول إيه لحضرتك !! .. بصراحة كنت كتبت كذا رد وبعدين مسحتهم ، لأني لقيت مضمونهم ما يختلفش كتير عن الجمل والعبارات والتعليقات اللي انتوا أكيد زهقتوا منها من كتر ما سمعتوها !! .. الجمل اللي كلها حكم ومواعظ وتطيب خاطر وفض مجالس !! .. لدرجة إني لما قريت رد من الردود اللي أنا كتبتها لقيته استعراضي بشكل خللاني كرهت نفسي !!
- حضرتك جيتي للأعور (وأقصد هنا المجتمع) وحطيتي صباعك فِ عينه !! .. ما لفتيش ودورتي في الكلام ولا زوقتيه ولا ترفعتي عن الكلام في المشكلة اللي كتير جداً بيعانوا منها لكنهم بيعملوا نفسهم مش واخدين بالهم وكأنها مش مشكلتهم أصلاً !! .. المجتمع الأعور اللي بيشوف كل حاجة بعين واحدة (وغالباً ما بيشوفش بيها) لازم يطلع فيكوا ميت عاهة ويحملكم مسئولية وذنب كل حاجة ويعيشكوا في ظلم و قهر ونكد وخوف وقلق علشان ما فيش واحدة فيكوا تيجي تعمل اللي حضرتك عملتيه دلوقتي وتقول له : يا أعور .
للأسف ما عنديش حالياً غير تعليق حضرتك التاني :
"الحمد لله رب العلمين في السراء و الضراء و ربنا كريم و رحيم حتى في ابتلاءه و دايما بيجي الاختبار على قدر قوة الاحتمال . الحمد لله "
:))
ربنا يا رب يرزقك ويرزق بنات المسلمين بالزوج الصالح عاجلاً ويرزقكم الذرية الصالحة اللي تفرح قلوبكن إن شاء الله اللهم آمين
نورتينا جداً بزيارتك الكريمة وتعليقك الجميل الراقي
كارولين فاروق
ردحذف:))
يا ألف أهلاً وسهلاً بالفنانة المبدعة ، منورانا والله
مساء النور على حضرتك يا أستاذتنا .. الحمد لله بخير .. ربنا يكرم حضرتك يا رب ويحفظك شكراً جداً لذوقك وكرم أخلاقك :))
- حضرتك جيتي على المشكلة اللي بجد باحاول أهرب منها علشان مش لاقي لها حل !! .. مش عارف ليه انعدمت البشاشة من وجوه الخلق ؟؟ .. ليه كل واحد باتعامل معاه مُصر يحسسني إني زبون ؟؟؟؟؟؟ يعني جنيه هايدخل جيبه وخلاص !! .. باستغرب بجد لما باقول لواحد : بعد إذنك / لو سمحت / من فضلك / حضرتك / شكراً ... إلخ ، وألاقيه بص لي باستغراب قوي وكأنه بيقول في سره : ده عبيط ده ولا إيه ؟؟
ليه المعاملات ما بيننا بقت تفتقد لأبسط الأداب الانسانية ؟؟ ليه ما بقاش فيه رحمة ولا أخلاق ولا شهامة ولا ولا ولا ولا ؟؟
ليه بقت المصالح هي اللي غالبة ؟؟ ويا ريت فيه مصالح ولا يحزنون !!
ليه مثلاً زي ما حضرتك ذكرتي " لما قابل ده بابتسامه باحس إنهم هايضربوني بالقلم بالرغم اني عندي مشاكل زيهم ويمكن أكتر " ؟؟
والله العظيم يا أستاذة ما تتصوريش الكلمة دي وجعتني جداً قد إيه : " أنا مش عايزه الناس تحب بعضها لأن ده كتير بصراحة ......" !!!!!!!!!!
بس للأسف الشديد جداً بقى هو ده الحال .. بقى فعلاً كتير أننا نحب بعض ؛ كتير أصلاً أننا نحب نفسنا !!
ربنا ييسر الأحوال إن شاء الله ويفرجها من عنده قادر يا كريم
نورتينا جداً بزيارتك الكريمة وتعليقك الجميل الراقي
لورنس العرب
ردحذف:))
مدونتك يا كبير .. وتفضفض فيها زي ما أنت عاوز .
سنكوح شنن لملوم سامي
ردحذف:))
الحمد لله اللبن بنلاقيه بس بعد شوية لف .
بالنسبة للخيارات المحدودة فإن شاء الله ربنا يفرجها عن قريب اللهم آمين
موناليزا
ردحذف:))
يا ألف أهلاً وسهلاً بأستاذتنا منورانا حقيقي والله .
ربنا يبارك في حضرتك ويثبتك على الحق ويحفظك من كل سوء ويرزقك بالزوج الصالح عاجلاً ويرزقكما بالذرية الصالحة إن شاء الله اللهم آمين
بجد الواحد اتعلم ولا زال بيتعلم من حضرتك الكتير .. ربنا يسعدك يا رب ويجازيكي كل خير إن شاء الله على كلامك المشجع الجميل اللي كله حكمة وصبر وأمل :))
يمكن أكتر حاجتين فعلاً بيضايقوني :
- " لما تحس أنك عاجز عن مساعدة حد استنجد بيك "
الاحساس ده رهيب جداً بجد .. باحس معاه بمنتهى الضيق والخذلان !!
- " لما تكون فى عز ألمك وتلاقي مطالب منك تضحك وتهزر لإن اللى حواليك ملهمش ذنب "
متهيألي أن دي من كتر ما بتحصل للواحد ، فالواحد ما بقاش عارف إذا كان فرحان ولا متضايق !! .. المشكلة إن الناس ما بتقدرش اللي انتي فيه ولا بتقدر اللي انتي بتعمليه علشان تباني قدامهم كده ، وزي ما يكونوا خلاص اتعودوا أنهم يشوفوكي بتهزري وبتضحكي وكأنك عايشة في كوكب تاني ، ولو جيتي مرة واحدة انهرتي وصرختي من كتر الضغط ، تسمعي الكلمة الباردة : فيه إيه يا عم ؟؟ ما كلنا عندنا مشاكل !! هو أنت بس اللي عندك مشاكل !!
وعلى رأي حضرتك " أمال هنشتاق للجنة إزاى ؟؟ "
ربنا ييسر الأحوال إن شاء الله ويفرجها من عنده قادر يا كريم .. نورتينا جداً بزيارتك الكريمة وتعليقك المميز الجميل
غير معرف
ردحذف:))
يا ألف أهلاً وسهلاً يا فندم منورانا حقيقي والله .
بصي ، بالنسبة لحكاية الحساسية الزيادة عن اللزوم دي – مع إني عارف أنها بتبقى طبع – بس حاولي تروضي نفسك وتعوديها على اللامبالاة لأنها أكيد تاعباكي جداً وهاتتعبك جداً جداً جداً لو استمريتي فيها .. حاولي تكوني كائن جبنص !! .. زي بقية الطحالب اللي عايشين حواليكي .. ده يستلزم معاه إنك تتعالجي من داء الشهامة الي بيودي الواحد في داهية .. بالنسبة للكتابة ، اكتبي لو الكتابة بتريحك ، أهي ع الأقل تهربي بيها شوية من الواقع وتقابلي نفسك وتقعدي معاها وتاخدوا بخاطر بعض .. بالنسبة لوالدتك ، أحب أقوللك إنك بتتكلمي بلسان حال معظم البنات تقريباً ، لدرجة أنها ما بقتش مشكلة أصلاً !! .. أنا أصلاً مسغترب أن لسه فيه واحدة بتفكر في خلافاتها مع أمها !! .. وهاتلاقي الخلافات دي كلها بتدور حوالين حالك اللي مش عاجبها – ومش هايعجبها أبداً بالمناسبة - ودماغك اللي عاوزه كسرها وأن نفسها تجوزك وتفرح بعيالك زي بقية البنات (اللي هما أصلاً مش لاقيين جواز) D:
كلمة حاضر تريح . وأديكي كده كده ملهية في دراستك وفي شغلك وإن شاء الله تلاقي شغل تاني عقبال ما ربنا يرزقك بالزوج الصالح والذرية الصالحة اللي تفرح قلبك اللهم آمين
بالنسبة لموضوع الحنية .. والله العظيم تلاتة ما فيه أحن ع الواحد من ربنا .
نورتينا بزيارتك الكريمة وتعليقك الجميل
علا
ردحذف:))
يا ألف أهلاً وسهلاً بأستاذتنا منورانا حقيقي والله .
ربنا يبارك في حضرتك وييسر لك حالك ويسعدك ويحفظك من كل سوء ويرزقك وبنات المسلمين بالزوج الصالح والذرية الصالحة إن شاء الله اللهم آمين
:))
شرفتينا جداً بمشاركتك وبمرورك الكرريم الراقي
البنفسج الحزين
ردحذف:))
يا ألف أهلاً وسهلاً يا دكتورة ، منورانا حقيقي والله
ربنا يا رب ييسر لك حالك ويهديكي للخير حيث كان ويرضيكي بيه ويفرح قلبك ويرزقك الزوج اصالح والذرية الصالحة اللي تفرح قلبك إن شاء الله اللهم آمين
شرفتينا جداً بمشاركتك الكريمة ومرورك الجميل الراقي
سنكوح شنن لملوم سامي
ردحذف:))
بالنسبة للكائن البرمائي اللي انتي بتتكلمي عليه (مائي لأنه ممكن يعيش تحت التفافة أطول فترة ممكنة) ، فالنوع ده أنا عندي منه اكتفاء ذاتي وباصدر منه كمان :))
- عجبني قوي التعليق بتاع صاحبتك الحرامية فطسني م الضحك بصراحة :))
ربنا يهديهم يا رب ويبعدهم عننا اللهم آمين
أفكار مبعثرة
ردحذف:))
"طيب و حياة امي مش هحسدك بس حللي عن دماغي انا فيا اللي مكفيني"
ههههههههههههههههههههههههههههه
أه والله العظيم يا أستاذة ، خدتيها من على لساني ، بس أنا بصراحة ساعتها بابقى مش عاوز أرد عليهم بلساني ، بابقى عاوز احدفهم باللي ف رجلي D:
وينكى
ردحذف:))
يا ألف أهلاً وسهلاً يا أستاذتنا ، منورة الدنيا والله
وبجد بجد أنا باعتذر لحضرتك ولباقي الزملاء الأفاضل عن حكاية قفل التعليقات ، أديني فتحتها هنا أهه :))
بالنسبة للمشاكل .. فالحمد لله كلنا عايشين في نعم لا حصر لها بفضل الله .. حتى مشاكلنا دي – على فرض أنها مشاكل يعني – فهي ولله الحمد مش كوارث وتعتبر بالنسبة لناس تانية نعم :))
والله يا فندم إن جيتي للحق .. فبمنتهى الصراحة ، معظمنا دماغه تاعباه لكن ف نفس الوقت عاجباه !!
بالنسبة لجزئية الناس اللي حققت حاجة دي –- طبعاً مع الأخذ ف الاعتبار كنه الحاجة دي وأهميتها بالنسبة لك والهدف من ورا تحقيقها وإمكانية تحقيقها -- السؤال هنا : هل انتي حاولتي تحققي حاجة وفشلتي ؟؟ .. وعلى فرض أنك حاولتي وفشلتي ، ليه ما حاولتيش تاني وتالت ورابع ؟؟ .. وبعدين فيه سؤال مهم هل الحاجة دي في إمكانك إنك تحققيها ؟؟ أقصد إنك ممكن تحققيها لوحدك ؟؟ يعني الجواز ده حاجة ما ينفعش تحققيها لوحدك أو تلومي نفسك عليها أنها اتأخرت أو أن كل اللي حواليكي اتجوزوا وانتي لأه ؟؟ فاهماني ؟؟ .. بالمناسبة ما حدش فينا راضي عن حالة .. حتى اللي انتي ممكن تكوني شايفاهم حققوا حاجة ، لو سألتيهم هايقولوا لك احنا فشلة وما حققناش حاجة !! .. فيه حاجة كمان مهمة جداً "الرضا" .. ممكن تكوني انتي فعلاً محققه حاجات كتيرة جداً غيرك بيطمح إليها بس انتي مش شايفة أنها حاجات ذات قيمة أو تستاهل !!
الفراغ والأوهام والعدم والتوهان والوحدة .. لو قريتي مشاكلنا كلنا هاتعرفي أنها بتدور حوالين الكام حاجة دول :))
روقي وسيبيها على الله وإن شاء الله ربك هايفرجها عن قريب .
ربنا يا رب ييسر لك حالك ويهديكي للخير ويسعدك ويرزقك بالزوج الصالح وبالذرية الصالحة اللهم آمين
نورتينا وشرفتينا حقيقي والله بزيارتك الكريمة وتعليقك الجميل
سنكوح شنن لملوم سامي
ردحذف:))
ما اعرفش العيل من دول متعلق باللبن الصناعي كده ليه ؟؟ تقوليش فيه سحر ؟؟
- موضوع وسيلة التعارف المناسبة .
حد عنده اقتراحات قبل ما نقفل البوست ؟؟
اكتر حاجة بتضايقني ... اني احس ان ارادتي ضعيفة احيانا
ردحذفذات النطاقين
ردحذف:))
يا ألف أهلاً وسهلاً يا أستاذة ، منورة الدنيا والله
باعاني منها كتير المشكلة دي .. طب تفتكري الحل إيه ؟؟
نورتينا وشرفتينا حقيقي والله بزيارتك الكريمة وتعليقك الجميل
أقول ماقولش أنا خايف أقول D:
ردحذف.
.
مشكلتي الأساسية و عقدة حياتي هي الناس..أو يمكن "أنا"!
نفسي أغمّض عيني وأفتحها ألاقي نفسي بقدرة قادر ساكنة جزيرة لوحدي..
أو طلع لي جناحين مثلا وبقيت طائر..واتخلصت من بشريتي
أو اتحوّلت لوردة مثلا..
أي كائن مالوش عقل مابيبطلش تفكير..صاحي أو حتى نايم
المهم عندي أتخلّص من حِمل التعامل اليومي مع البشر..أو حتى مع نفسي..
...............
نفسي كمان الحياة يبقى فيها أوبشنز
replay - pause - stop
من غير أي أعباء/تعقيدات/مشاكل
..............
نفسي أتخلص من كل الحاجات/الناس الوحشة اللي في الدنيا
نفسي الدنيا تخلص بأه و نروح عند ربنا
نفسي أعيش في سَكينة أبدية..مش تيجي يومين وأتعذب سنة
نفسي أعمل shift+delete لجزء معين من ذاكرتي منغّص عليا حياتي
...............
حاسة إني خرجت تماما عن النص
بس يمكن حبيت أفضفض شوية
المهم دلوقتي كلمة أخيرة (يمكن بقولها لنفسي قبل أي حد): أنا راضية تماما بكل اللي عندي..اللي كتير محرومين منه
الحمد لله أولا و أخيرا
الحمد لله أبدًا أبدًا
يمامة شاردة
ردحذف:))
يا ألف أهلاً وسهلاً يا أستاذتنا ، منورة الدنيا والله
متهيألي - بعد إذن حضرتك - أن فيه غلطة صغيرة في التعليق كلمة "نفسي" المفروض تبقى "نفسنا" :)))))
ينفع يعني تستمتعي بالأوبشنز دي كلها لوحدك ؟؟ هه ؟؟ ينفع ؟؟
وبعدين يا فندم حضرتك ما خرجتيش إطلاقاً عن النص ده هو ده بالظبط اللي كلنا عاوزينه .
الحمد لله الحمد لله الحمد لله
نورتنيا جداً بتعليقك الرقيق ومرورك الكريم