عن الشتا





من الحاجات اللي باحس بقيمتها أكتر في الشتا وباشتاق لها دايماً هي ريحة الشمس فِ البطاطين .. يا سلام لما تيجي تتغطى بيها بالليل كده فِ عز التلج وتلاقيها وثيرة وحنينة وبتدفي .. تشم فيها ريحة الشمس ، وكأنها كانت نايمة ع السرير ومتغطية بالبطانية دي وأنت رحت متسحب واتدفست معاها تحتها .. بتحس بزغب الذرات الصغيرة أوي أوي اللي زي ذرات الغبار الناعمة واللي كانت كام شعاع واتفتفتوا على البطانية .. بتحس كأنك عيل صغير نام فجأة في حضن باباه اللي لابس بيجامة كستور مقلمة ، لحد ما خدوده ورّدِت ونملت على شكل دواير معرجة :)) .. (فاصل) المدام دخلت عليا من شوية وأنا باكتب وسألتني تجيب حمص الشام ولا تعمل سحلب ؟؟ .. فقلتلها تجيب حمص الشام عقبال ما تعمل السحلب :D طعمه جامد بصراحة اتفضلوا وبلاش أنا !! .. كنا بنقول إيه ؟؟ .. أه الشتا !! .. وبمناسبة حمص الشام والسحلب .. الشتا يعني الكاكاو والقرفة باللبن اللي عليها رشة جنزبيل والهوت شوكليت والحلبة المغات والبليلة والكركدية السخن والشاي بالليمون (اللي باكرهه) .. الشتا يعني المفتقة وسد الحنك والبطاطا وفطيرة سخنة بالسكر .. الشتا يعني الحواوشي وشوربة العدس بالبصل والكشك والقلقاس وصباع محشي موحوح خارج م الحلة ملفوف بالبخار زي ما يكون خارج من زار وعلى بقك عدل .. (فاصل) حمص الشام – مش عارف ليه كل مرة أكتبه حمص الشاي – جوعني فروحت دعبست في المطبخ لقيت شوية موز ملفوفين فِ ورقة جرنان قلت أقزقز فيهم عقبال ما السحلب يتعمل :D وأنا راجع لبست لكلكوك فِ رجلي ، لك أن تتخيل – لو مش بتقرف - منظر رجلي دلوقت عزيزي القاريء !! .. كأني لابس أرنبين في رجلي !! .. كنا بنقول إيه قبل الأرانب ؟؟ .. أه الشتا !! .. الشتا يعني ما تبقاش عاوز تصحى م النوم الصبح وتقوم من تحت البطانية وتسيب العز والدفا اللي أنت فيهم حتى لو قالوا لك أن البيت بيقع ، هاتقول لهم خللوه يقع علشان نتدفا !! .. وكل شوية تقول كمان ربع ساعة ، طب كمان عشر دقايق !! .. وتلاقي الوقت اتبخر فِ ثواني كأنه مستقصدك !! .. الاحساس الحقيقي بالبرد بيبدأ أول ما ترفع البطانية من على راسك وتلاقي الهوا هووب راح لاطشك بالقلم على كورنيش قفاك !! .. تيجي تلبس الشبشب تلاقيه تلللج ، كأنك كنت راكنه ع البحر مش جنب السرير !! .. والله يا عم بافكر أبقى أنيمه فِ حضني بالليل !! .. قمت ؟؟ .. طب لو راجل بقى ادخل الحمام !! .. يا نهاااااااار مش فايت !! .. المفروض ما نعملش بي بي فِ الشتا أصلاً !! .. ساعات من كتر السقعة وخوفي من ملمس القعدة المتلج بابقى عاوز أعمل بي بي ع الطاير !! .. زي ما فيه شحن ع الطاير المفروض يبقى فيه تفريغ ع الطاير !! .. المشكلة كلها في الشطاف !! .. عاوز نشنجي !! .. خلصت حمامك ؟؟ .. تعالى بقى اغسل وشك والعياذ بالله !! .. ولا أستغفر الله العظيم استحمى !! .. أول ما تقلع بتحس إن مسام جسمك كلها زرّعت بثور وفسافيس صغيرة وكأن طلعلك حراشيف فوق جلدك !! .. بتحس إن ملمس جلدك بقى عامل زي الأرضيات الترتان بتاعة الملاعب !! .. طبعاً بتفضل كام دقيقة كده – كأنهم سنتين – وأنت واقف متكتك وكمشان وحاضن دراعاتك وجسمك بيطلع بخار ومتربص للدش ومستني درجة حرارة الميه تتظبط !! --- هو فِ الغالب أنت مش بتقتنع إن درجة حرارة الميه مناسبة إلا أما البخار يملا الحمام ويبقى خلاص هايوقع الباب !! --- وممكن فجأة تغير رأيك وتلبس تاني من غير ما تستحمى على فكرة !! .. عادي جداً ، فِ الأحوال اللي زي دي المهم النية !! .. خلاص استحميت ؟؟ .. نعيماً .. تعالى بقى البس هدومك !! .. (فاصل) فوتك أنا فِ الكلام عزيزي القاريء ونسيت أقول لك إن الكام بسكوتاية بالشيكولاتة النوتيللا اللي ضربتهم وأنا بادعبس فِ المطبخ قبل ما أجيب الموز كان طعمهم حلو وتأثيرهم قوي ما راحش بالموز ومش مخلليني عارف أركز معاك ، فروحت أعمل بسكوتاية تانية لقيت جوافة وبرتقان متقطعين جبتهم أتسلى فيهم عقبال ما الفيشار يتعمل :D .. تيجي بقى تلبس هدومك تحس أنها مبلولة أو كأنها كانت منشورة فوق السطح مش طالعة من الدولاب !! .. بس اللي خللاك استحميت فِ عز السم ده مش هاتلبس هدومك ؟؟ .. خلاص لبست ؟؟ .. فتحت باب الشقة ؟؟ .. اقفل باب الشقة !! .. ما هو مش معقول الهزار ده ع الصبح !! .. هو ما فيش غير بيتنا احنا اللي الهوا ييجي فيه ؟؟ .. ده كأنك خرجت من التلاجة ودخلت الفريزر عريان !! .. تحس إن الدولاب اللي أنت لابسه ولا عامل أي حاجة !! .. ورغم إنك بتبقى ماشي منفوخ ودراعاتك مجنحة زي اللي بيشيلوا حديد من كتر حشر الهدوم !! .. إلا إنك بتحس كأنك مش لا بس حاجة !! .. كأن هدومك دي كلها عبارة عن منديلين ورق فوق بعض !! .. وتلاقي شبورة بخار طالعة من بقك وشكمانات مناخيرك الحمرااا وودانك مش حاسس بيها كأنها ودان واحد تاني وعينيك بتدمع وصوابعك مزرقة رغم إنك عمال تنفخ فيها وعمال تقول فيه إيه ؟؟ فيه إيه ؟؟ إشمعنى أنا ؟؟ .. تركب أي مواصلة وتتدفس وسط البشر ، تبدأ تدفا وتسترخي وتكتشف إن الزحمة دي حاجة حلوة وجميلة !! .. وإن التحرش ده ظاهرة اجتماعية وصحية المفروض يشرعوها !! .. وتبقى عاوز تخنق الحيوان اللي فاتح الشباك اللي جنبه أو تشيله وتحشره فيه علشان يمنع صواريخ الهو اللي داخله لك !! .. ويا سلام بقى لما تنزل وتكتشف إنها كانت أو لا زالت بتمطر !! .. بتبقى عامل زي اللي بيمشي ع العجين ما يلخبطوش !! .. وخايف تتزحلق وتقع أحسن الناس تضحك عليك !! .. وبعدين تستلم أول رصيف يقابلك وتفضل تحك فيه نعل الجزمة علشان تمسح أرتال الطينة اللي غرست فيها !! .. قال يعني مثلاً كنت ماشي فِ بلد تانية نضيفة !! .. وأول ما الشمس تطلع ، تجري عليها زي العيل الصغير اللي أمه جت تاخده من الحضانة !! .. (فاصل) أنت آخر حاجة أكلتها معايا إيه عزيزي القاريء ؟؟ يا رااااجل مش فاكر ؟؟ ما علينا !! المهم إني قمت أعمل قهوة فلقيت أبو فروة قلت للمدام تشوي لنا شوية لأن البوست ده فرشح مني !! منورنا والله عزيزي القاريء !! رغم إنك كلفتني كتير بس ياللا بالهنا والشفا !! .. الشتا حاجات كتيرة أوي .. الشتا يعني تقف تدفي إيديك ع البوتاجاز وأنت بتقمر العيش اللي فِ الغالب بتسيبه لحد ما يتحرق !! .. الشتا يعني الكرسي الدافي اللي كان فيه واحد قاعد قبلك عليه !! .. الشتا يعني تركز مع الناس اللي مولعين نار بالليل فِ الشارع وبيتدفوا حواليها !! .. الشتا يعني كوفية وجوانتي بتكسل تاخدهم دايماً وما بتعرفش قيمتهم إلا أما تحس بالبرد وأنت راجع بالليل !! .. الشتا يعني أكلة سخنة بسرعة وكوباية مولعة تمسكها بإيديك الاتنين علشان تتدفا وما تبقاش عارف البخار اللي طالع ده منك ولا من الكوباية ؟؟ .. الشتا يعني تسييح الزبدة وسندوتشات الزبدة بالسكر والمورتة علشان تحدق بيها !! .. الشتا يعني زكام فـ رشح فـ عاااااااطسي فـ دور برد محترم يكسر جسمك أسبوع وتفضل تقول : يا بحبد يا بحبد !! .. الشتا يعني تتكلفت بالبطانية وأنت قاعد بتتفرج ع التليفزيون ولابس طاقية وشراب وقدامك تلاتين طبق وكوباية مش فاكر دول بتوع إيه ؟؟ .. (فاصل) أنا باقول نجيب بطانيتين ولحاف بقى عزيزي القاريء ؟؟ يا راجل دي الشتا خلصت !! إلا لو هاتجيب لب وسوداني دي حاجة تانية :))


تعليقات

  1. موناليزا16‏/12‏/2012، 12:40:00 ص

    دائماً أجد هنا البسمة الطبيعية :)

    استمر فى الكتابة ولا تبخل علينا بها مهما حدث

    ----------------

    بحبد أنت تقصد محمد بس عندك برد مش كده ؟ :)

    على فكرة اشمعنى الزوج هو اللى بيحس بالبرد ده كله ومش حاسس بالغلبانة اللى فى المطبخ :)

    أظن الرجال لا يعلمون شيئا عن غسل الأطباق فى هذا الجو :)

    ردحذف
  2. βent Pasha16‏/12‏/2012، 1:24:00 ص

    هههههههههههههههههههههه
    جااااامدة .. أجيب فول سوداني كمان ؟؟
    أنا رأيي أن اللي بيعمل رجيم ينساه ف الشتا أحسن

    أضف إلى الشتا كمان الغسيل ولا غسل الأطباق على رأي موناليزا .. ياختييييييييي .. بتبقى واقف كده ف المطبخ ونفسك يطلعلك عفريت وأول حاجة تطلبها منه هو غسيل هذا التل من المواعين ف الثلج ده

    وبمناسبة الفواصل : كان في كوباية شاي بالليمون ف المطبخ .. بالهنا والشفا طبعا عزيزي الكاتب هههههههههههههههههههه

    البوست شتوي بجد .. إنت مبدع
    ربنا يحفظك يارب ويحميك من كل سوء يارب دايما

    ردحذف
  3. Israa' A. Youssuf16‏/12‏/2012، 4:20:00 ص

    شيء لا إرادي كده لما باجي هنا باظبط نفسي بأضحك حتى لو أنا مش عايزة :)

    الشتا يعني الدفا, يعني post حلو زي ده ينسيني فصل بايخ اتعمل فيا من واحدة كانت من أعز الناس عليا.. الشتا السنة دي يعني أحضر فرحين لاتنين من أعز أصحابي في أسبوع :) الشتا يعني الهوت شوكلت, و الاندومي برضه ميمنعش D:

    يسعد صباحك وأيامك كلها يا رب ^_^

    ردحذف
  4. Baskouta16‏/12‏/2012، 10:10:00 ص

    الشتا بالاضافة لكل اللي انت قولته
    هو الصراع اليومي الدائم مع المنبه اللي مصمم يصحيني الساعة 6 وانا اقوله فيها ايه لو تخليها 6 ونص
    وهو مش راضي
    هذا الصراع اللي بينتهي عادة بانتصار المنبه بعد تعذيب يدوم ساعة بحالها فالاقيني صاحية 7
    I hate winter

    اتمنالكم شتا دافي

    ردحذف
  5. سنكوح شنن لملوم سامي16‏/12‏/2012، 1:36:00 م

    أنت وزنك قد إيه معلش؟
    الشتا بالنسبة لي بالطو أو جاكت على الهدوم الصيفي و اتسحب انزل الاقي أمي جابتني من قفايا و تقولي تقلي!
    شويتين و افطس من البلوفر و الكوفية و البالطو مع شتاء مصر الحار

    الشتا يعني اقف مشمرة دراعاتي في عز البرد بغسل المواعين او اخلص شغلي اللي مينفعش اشتغله و أنا بكم طويل عشان اللغوصة.
    الشتا....يعني أبويا لما سألي أمي هو الجو شكله هيمطر النهاردة؟
    فتبص له من الشباك و تقوله هي السما مغيمة شوية بس "الأفق منكشف"
    فيخفف هدومه و تمطر سيول منزلش على القاهرة زيها غير بعدها بسنين طويلة في 2010 لما نزلت تلج.

    ردحذف
  6. وائل ابراهيم16‏/12‏/2012، 1:51:00 م

    رائعه جدا وانت تسبح بنا فى عالم مثلج وسقعه جدا ده انا قرفصت فى نفسى من السيرة بس ولا جرى الريق علىا 70 اكلة من بتوع الشتا جوعتنى يا راجل

    بس عموما ميرسى ع العزومة الجامده دى مستنينك تعزمنا تانى

    سلام

    ردحذف
  7. ديدي16‏/12‏/2012، 3:44:00 م

    والله العظيم تلاتة موهوب وتحط تحتها يجي خمسين خط أحمر ... إيه الإسترسال والروح المرحة إللي ملهاش حل دي ..ز الله أكبر نمسك الخسب وتبخريه يا بنت باشا من عيون الناس ):):
    أبقي روح إشتري بطاطين النمر من التوحيد والنور زي باسم يوسف يا شريف!!):
    كل إللي هقوله إني بحب آجي مدونتك عشان أغير المود وبوقي بيبقي من هنا لهنا قصدي يعني بيتبسم ***
    تحياتي ويارب دايماً كده مفرحنا يا أستاذشريف ****

    ردحذف
  8. نهر الحب17‏/12‏/2012، 2:37:00 م

    ضحكتني اوووي
    لصورة تحفةومعبرة اوووي
    :)

    ردحذف
  9. P A S H A18‏/12‏/2012، 4:02:00 م

    موناليزا
    :))
    ربنا يكرمك يا أستاذتنا ويجعلنا دايماً عند حسن ظنكم وتشرفونا دايماً وتنورونا بتعليقاتكم الجميلة :))

    ـــــــــــــــــ
    فعلاً المقصود "محمد" بس الزكام انتقل للكيبورد :))
    ـــــــــــــــــ

    أكيد طبعاً احنا "الرجالة" بنسمع صوت غسيل الأطباق في هذا الجو (واحنا نايمين ومتدفيين تحت البطانية) بس يا ريت لو سمحتوا تغسلوها بشويش من غير ما تعملوا دوشة علشان نعرف ننام D:

    نورتينا

    ردحذف
  10. P A S H A18‏/12‏/2012، 4:22:00 م

    βent Pasha
    :))
    ريجيم إيه ؟؟ "أعوذ بالله من الشيطان الريجيم" هههههههههههههههه

    ربنا يكرمك ويحفظك ويباركلي فيكي يا حرمنا المصون اللهم آمين

    أنا مش عارف بس الغسيل مضايقكوا أوي ليه للدرجة دي ؟؟

    طب بذمتكوا .. غسيل الأطباق وانتوا واقفين في المطبخ في الدفا ؟؟ ولا مسح السلم وغسيل السجاجيد في الحوش وغسيل العربيات في الشارع بعد الفجر في عز البرد زي مرات البواب ؟؟

    وبعدين بذمتكوا .. مش بتحسوا كده بمنتهى السعادة والارتياح لما الهم التقيل ده ينزاح من على قلبكم ؟؟

    شفتوا بقى إننا قصدنا نفرحكم إزاي ونريحكم ؟؟

    (فاصل) مش عارف ليه حاسس إني هانضرب بعد الكلمتين دول ؟؟

    عموماً نأجل الرد على باقي التعليقات لحد ما أشطب الحوض وأرجعلكم D:
    "طبعاً !! .. الراجل الشاطر ما يخلليش المواعين تتكوم عليه"

    ردحذف
  11. P A S H A18‏/12‏/2012، 4:36:00 م

    Israa' A. Youssuf
    :))
    ربنا يعزك يا دكتورة ويحفظك ويسعدك زي ما بتسعدينا بتشجيعك الكريم وتعليقاتك الجميلة :))

    بالنسبة للفصل البايخ اللي حصل لحضرتك من أعز الناس" .. علشان كده العندليب قال : ولا ننسى حبايبنا أعز الناس حبايبنـــا .. هي دايماً الفصول البايخة ما بتجيش إلا من أعز الناس مع الأسف !! .. وباعتذر لحضراتكم إذا كنت اتكلمت في البوست ده عن فصل الشتا D:

    ألف مبروك لصديقاتك وعقبالك وعقبال كل البنات والشباب يا رب :))
    نورتينا

    ردحذف
  12. P A S H A18‏/12‏/2012، 4:40:00 م

    Baskouta
    :))
    لأ والأسخف بقى لو تلاحظي حضرتك .. إن المنبه ما بيرنش إلا والواحد بيحلم حلم جميل !!
    مش عارف اشمعنى حضرتك اللي ما اتكلمتيش عن غسيل المواعين في تعليقك ؟؟ D:


    نورتينا

    ردحذف
  13. ستيتة21‏/12‏/2012، 11:39:00 ص

    تحفة تحفة
    بس برضه الشتا أحلى من الصيف

    ردحذف
  14. لماضة21‏/12‏/2012، 3:43:00 م

    هههههههههههههه موافقه تماما خصوصا فيما يتعلق بالدش والحمام في الشتا
    ناقص حته بس ريحه الشتا في الشارع

    ردحذف
  15. عاشقه الرومانسيه21‏/12‏/2012، 3:44:00 م

    ههههههههههه انا عطست فعلا وانا بنقرا البوست :)
    انا باعشق الشتا وبالذات لو فى بلد زى بلدى اسكندريه
    الشتا عندنا له طعم تانى خاااااااااالص
    الحاجه الوحيده اللى مش بحبها فى الشتا هى الطينه اللى فى الشوارع
    :) متفقه معاك فى موضوع البطاطين والدفاء
    بس موضوع الاكل ده لأ :))
    الا لو فيه حد تانى هيغسل الاطباق فى الحاله دى مستعده أكل :)
    ميرسى على البسمه الحلوه اللى بلاقيها هنا :)
    تسلم ايدك ياباشا

    ردحذف
  16. P A S H A22‏/12‏/2012، 12:17:00 ص

    سنكوح شنن لملوم سامي
    :))
    - جميلة جداً لمحاتك الشتوية خاصة مع أسلوبك الساخر المميز يا باشمهندسة :))
    - انتوا على فكرة خللتوني أفكر في تغيير اسم البوست واسميه "المواعين" !! .. بس هاقول إيه !! .. قدركوا !! "وش واحد بيطلع لسانه وبيجري بسرعة"
    :))
    بس والله ممكن يكون للموضوع بتاع غسيل الأطباق ده فوايد انتوا مش واخدين بالكم منها !! .. وبعدين المثل أو الحديث الشريف – مش عارف بالظبط في الحقيقة – بيقول : "سيد القوم خادمهم" .
    - التلج اللي نزل من سنتين ده أنا فاكره كويس لحد النهاردة ، ساعتها كان زي ما يكون فيه عيال صغيرين قاعدين فوق السحاب وبيحدفونا بطوب :))
    نورتينا

    ردحذف
  17. P A S H A22‏/12‏/2012، 12:18:00 ص


    وائل ابراهيم
    :))
    يا كبير أنت مش محتاج عزومة ده بيتك يا معلم يعني تدخل وتاكل على طول :))
    بس والنبي يا وائل يا أخويا بعد ما تاكل وتحلي وتحبس تقف معايا تساعدني في الكام طبق اللي في الحوض :))
    نورتنا يا غالي

    ردحذف
  18. P A S H A22‏/12‏/2012، 12:18:00 ص

    ديدي
    :))
    ربنا يكرمك ويعزك يا رب ويفرحك زي ما بتفرحينا بتشجيعك وزيارتك الكريمة :))
    باسم الله ما شاء الله ولا حول ولا قوة إلا بالله الله أكبر مين السكر اللي في صورة بروفايلك دي ؟؟
    - بالنسبة للبخور فالموضوع قيد التنفيذ بس كان واقف ع الصيغة اللي هاتقولها "بنت باشا" وهي بتبخرني .. فيه إقتراح إنها تكون : بخرتك بالسوندوء والحوندوء م العيون اللي قد البندق / بخرتك يا جوزي بالتقلية يحفظك ربنا ويخلليك ليا / بخرتك بالأستك الكـِشكاش من عين اللي شافك ولا سماش !!
    - بالنسبة للبطاطين فأعتقد أن ما فيش أجدع م البطاطين الصوف بتاعة الجيش :))
    ربنا يجعلنا دايماً سبب في إنبساطكم وتغيير مودكم ويقدرنا إننا نشرفكم لنستحق زيارتكم الكريمة :))
    نورتينا

    ردحذف
  19. P A S H A22‏/12‏/2012، 12:19:00 ص


    نهر الحب
    :))
    ربنا يحفظك ويعزك يا رب ويفرحك دايماً إن شاء الله :))
    بالنسبة للصورة هي فعلاً عجبتني وحسيت إنها ماشية مع جو البوست والتكتكة
    :))
    نورتينا

    ردحذف
  20. P A S H A22‏/12‏/2012، 12:19:00 ص


    د/ستيتة
    :))
    يااااااااااه يا دكتورة :))
    ما تتخيليش والله العظيم فرحت قد إيه لما شفت تعليقك ، ربنا يفرحك يا رب ويكرمك ويعزك ويطمننا عليكي وتكوني فِ أحسن حال إن شاء الله :))
    طبعاً الشتا حلو تحت البطانية :))
    مش هاغلس وأقول لحضرتك : افتحي المدونة .. بس صدقيني والله وحضرتك عارفة ده كويس إنك بتفرقي مع ناس كتير أوي بكتاباتك ووجودك في بلوجر :))
    تسلمي يا رب على زيارتك الكريمة وتشجيعك لينا :))
    نورتينا

    ردحذف
  21. P A S H A22‏/12‏/2012، 12:19:00 ص


    لماضة
    :))
    "ريحة الشتا في الشوارع"
    الله على الجمــال
    :))
    ما أخبيش عليكي هي جت فِ دماغي وأنا باكتب البوست وأوحت لي بحاجات كتيرة جداً وخللتني سرحت في حاجات تانية أكتر ولما جيت أكتب البوست نسيت أكتبها :))
    شكراً ليكي
    نورتينا

    ردحذف
  22. P A S H A22‏/12‏/2012، 12:20:00 ص


    عاشقه الرومانسيه
    :))
    انتي بتغيظينا يعني ؟؟ .. بصراحة حقكم يا إسكندرانية :))
    انتي أصلاً تعليقك نقلني لإسكندرية فِ ثانية وخللاني أحقد عليكم :))
    ربنا يكرمك يا دودو يا رب ويعزك ويفرحك ويحفظك انتي وكل أهل إسكندرية أجدع ناس :))
    وبالنسبة لغسيل الأطباق ولا يهم سموك ، نشوف حد يغسلهم ، المهم تشرفونا
    :))
    نورتينا

    ردحذف

لا يسمح بالتعليقات الجديدة.