عش اليمام
هاحكي لك حكاية .. مرة زمان من حوالي تلاتين سنة كده .. كانت فيه واحدة ست طيبة أوي متجوزة واحد طيب أوي وعندهم عيلين .. الست كانت بتشتغل موظفة بس ساعتها كانت واخده أجازة سنتين علشان تقعد بالولد الصغير .. وجوزها ساعتها كان برضه موظف صغير في شركة الحديد والصلب ويا دوب مرتبه على قده .. ورغم كده كان لازم كل أول شهر يدي شهرية لأبوه وأمه ويساعد أخواته الأصغر منه اللي بيدرسوا في الجامعة .. طبعاً مصروف البيت ما كانش بيكفي لنص الشهر .. بس الست كانت مدبرة وكانت بتعرف تمشي حال البيت على قد ما تقدر .. المهم جت فترة والراجل ده سافر يشتغل بره وكان سايب لمراته مبلغ صغير لحد ما يقبض أول مرتب من هناك ويبعت لها فلوس .
الفلوس اللي برة اتأخرت عن ميعادها .. والفلوس اللي جوه خلصت !! .. والست لوحدها في الشقة من غير ولا مليم ومعاها العيلين الصغيرين ، فيهم عيل لسه بيرضع !! .. فات يوم واتنين وتلاتة والأكل اللي في البيت خلص !! .. وما بقتش عارفه تعمل إيه أو تتصرف إزاي ؟؟ .. وهي كانت نفسها عزيزة أوي وعمرها ما مدت إيديها لحد رغم إنها كانت كريمة مع الكل وصاحبة واجب طول عمرها .. ولو هاتموت من الجوع إستحالة تمد إيديها تستلف من حد !! .. طب العيال الصغيرة دي ذنبها إيه بس يا رب !!
رابع يوم الست صحيت من النوم وبتبص من ورا إزاز الشباك الصبح وهي قاعدة على السرير لقت يمامة عاملة عش فيه بيضتين .. الست حست أن اليمامة زي ما تكون خايفة منها أحسن تاخد البيض بتاعها بعد ما تطير تسعى على رزقها وتسيب العش !! .. فقالت لها : "ما تخافيش يا عبيطة ، إتكلي على الله وأنا هاخدلك بالي منهم لحد ما ترجعي" .. ما تعرفش اليمامة فهمت إزاي كلام الست دي وراحت طايرة وعملت لفتين صغيرين كده في الجو ورجعت تاني تهز لها في راسها وبعد كده طارت بعيد أوي !! .. الست دعت ربنا "يا رب يا رزاق يا كريم ترزقني زي ما بترزق الطير من حيث لا يدري ولا يحتسب" .. وفتحت شباك الأوضة دخلت العش اللي فيه البيضتين وغطته ببطانية علشان البرد .. ما تعرفش إيه اللي خللاها بعد كده ترفع مخدة السرير بالصدفة وتبص تحتها ؟؟ .. أقول لك أنا علشان تلاقي جنيه ورق !!
يا أكرم من سئل وخير من أعطى يا الله !! .. الست ما صدقتش نفسها من الفرحة .. صحت ابنها الكبير من النوم : واد يا شريف واد يا شريف إصحى يا واد من النوم .. شريف وهو متغطي ونايم تحت البطانية : إيه بابا جه ؟؟ .. الأم وهي بتضحك وبتزغزغ في الواد : إصحى شوف يا واد كده الجنيه ده بجد ولا أنا بيتهيألي ؟؟ .. شريف يمسك الجنيه في إيده ويدعك عينه بالإيد التانية أحسن يكون بيحلم .. فيكتشف فعلاً أنه جنيه بحق وحقيق فيفوق !! .. الأم : البس وانزل بسرعة هات بربع جنيه عيش من الفرن – كانوا ساعتها الرغيفين بشلن - وبربع جنيه جبنة بيضا من عند مجدي بس قول له ما تكونش حادقة أحسن ماما ترجعها لك !! وبربع جنيه حلاوة من عمك صلاح .. شريف : وأجيب فولية !! .. الأم : وهات لك فولية بس امشي ع الرصيف واطلع بسرعة !! .. وفي الوقت اللي الواد شريف كان بيجيب فيه الطلبات كانت الست بتصلي ركعتين شكر لله.
مش مصدقني ؟؟ .. قسماً بالله العظيم تلاتة هذا ما حدث .. طب إيه رأيك بقى إن القصة دي اتكررت ستة أيام بلياليهم ؟؟ .. كل يوم الصبح الست تفتح الشباك / تدخل عش اليمامة جوه الأوضة من السقعة / تغطي البيض بالبطانية / ترفع المخدة تلاقي جنيه / تبعت شريف يجيب الأكل !!
عارف الأغرب إيه ؟؟ .. خامس يوم الست بترفع المخدة ما لقتش غير نص جنيه .. الست استغربت واحتارت أوي .. بصت ع البيض اللي في العش لقته سليم !! .. قالت : الحمد لله .. وقبل ما تخرج من باب الأوضة كانت لقت جنيه واقع على الأرض !! .. بتبص تحت ترابيزة السفرة لقت اتنين جنيه فكة !! .. وشريف لقى بريزة ورق فوق التليفزيون !! .. يعني تلاتة جنيه وستين قرش بحالهم !! .. الست قالت في نفسها الفلوس الزيادة دي جايين لسبب معين .. وقررت إنها اليوم ده ما تصرفش غير جنيه واحد بس زي كل يوم !! .. على العصر كده خبّط محصل الكهربا على الباب .. فتحت له شراعة الباب .. وهو لسه بيقول لها : عايزين اتنين جنيه وستين قرش يا مدام .. كانت بتقول له : اتفضل !
سابع يوم .. الست صحيت من النوم الصبح على تخبيط أم وليد (جارتها في الشقة اللي تحتها) على الباب .. واللي كانت طالعة تتطقس عن أبو شريف وسافر فين وبيشتغل إيه وهياخد كام وهايرجع إمتى وهايجيب إيه معاه من بره ؟؟ .. وعلشان الست الطيبة تتهرب من فضول الجارة واسئلتها اللزجة .. حكت لها بكل براءة عن موضوع عش اليمامة والجنيه اللي بتلاقيه كل يوم الصبح تحت المخدة !! .. الجارة طبعاً ما صدقتهاش !! .. أم شريف راحت واخداها من إيديها على أوضة النوم علشان تشوف عش اليمام بنفسها .. وهي داخله الأوضة افتكرت أنها نسيت تفتح الشباك النهاردة لما قامت من النوم !! .. بصت ع الشباك ما لقتش أي أثر للعش !!!!
الست زعلت أوي أوي من نفسها !! .. واتخنقت وعينيها دمعت وزعقت للجارة ومشتها !! .. حست إنها زي ما تكون فتشت السر اللي بينها وبين ربنا وما صانتهوش فعاقبها !! .. قفلت على نفسها الأوضة وقعدت تعيط علشان ابنها ما يشوفهاش (بس أنا كنت شايفها) !! .. وقعدت تقول : سامحني يا رب .. حقك عليا .. أنا آسفة .. طب مش عاوزة فلوس بس رجعلي اليمامة تاني عاوزه اتطمن عليها !!
ما فيش ساعة زمن .. سمعت البوسطجي بينده على اسمها من تحت البيت .. علشان جوزها بعت لها حوالة في البوسطة :))
القصة دي حصلت من تلاتين سنة بالظبط .. كان عندي خمس سنين وقتها .. ومن وقتها والقصة دي هي السر اللي بيني وبين أمي .. اللي دايماً تفكرني بيه أيام الضنك !! .. لما كانت الظروف تقسى عليا أوي والعملية تتقفل في وشي ألاقيها تيجي تقعد جنبي تنكشني وتقول لي : سيبها على الله يا شريف ما حدش عارف الخير فين يا ابني !! .. أنت مش فاكر عش اليمامة اللي ........ وتقعد تحكي لي القصة كلـــها .. وكل مرة باسمعها منها كأني باسمعها لأول مرة !! .. وبعد ما أسمعها ألاقيني اتنهدت وارتحت وابتسمت أوي من جوه .. لدرجة إني كنت مسمي القصة دي "عش السلام" .. وكنت بعدها أدخل أوضتي .. ألاقي أمي سايبه لي اللي فيه النصيب تحت المخدة :))
من يومين مراتي خدت بالها إن فيه يمامة بتحوم حوالين الشباك بقالها فترة .. لقيتها بتقول لي وهي فرحانة : الله دي شكلها ناوية تعمل عش هنا !! .. ومن غير ما أحس لقتني بارفع المخدة يمكن ألاقي تحتها جنيه زي زمان !! .. ولما سألتني : أنت بتدور على إيه ؟؟ .. ابتسمت وأنا بارجع المخدة مكانها تاني وقلت لها : أبداً ما فيش !! .. وقبل ما أخرج من الأوضة .. طلعت جنيه من جيبي وحطيته في حصالة الواد "ياسين" ابننا وأنا بابص ع الشباك وباتخيل مكان عش اليمام .
:))
صباح الغاردينيا
ردحذفيالله اجمل صباح وربنا بديته من هنا عارف ليه لان الكلام الطيب الي من القلب بيلمس القلب والقصة دي مستحيل أقول عنها خرافة لان امك أكيد كانت ست مصليه راضيه بنصيبها وواقفه جنب زوجها وعرفت تربيك على النفس العزيزة والطيبة وربنا يديك طولت العمر وتربي ياسين احسن تربية ويحفظ لك مراتك ويارب تشوف عشة في شباك الاوظه :)
بجد والله رغم ابتسامتي دمعت عيني وقصتك دي بتعلمنا درس انه مهما ضاقت بتفرج بس يكون ايماننا بالله حنية والدتك ورحمتها على اليمامة كانت سبب انها باب رزق من رب العالمين "
؛؛
؛
ربنا يرزقك من أوسع ابوابه
ويطرح الخير والبركة في ياسين
ولايحرمك آبتسامة ام ياسين :)"
؛؛
؛
لروحك عبق الغاردينيا
كانت هنا
Reemaas
سبحان الله الذي لا اله ألا هو
ردحذفعارف قد ايه القصة دي فتحت نور قدام ناس كتير ؛ عشان كلمة (خليها على الله ) تتقال بملو القلب صحيح و مش بس بالشفايف .
ربنا يرزقك الخير كله و يرزقك الرضا .
عش السلام .......... فعلا دا عش سلام وحب وخير
ردحذفربنا يرزقك الخير والبركة فالرزق والعمر ياااااااااااااارب ♥♥
طب اعمل فيك ايه يا شريف باشا بس
ردحذفبكتنى على الصبح سبحان الله الرزاق العليم
احكى القصة دى لياسين ياشريف هتأثر فيه جدا وتكبره على حاجات حلوة اوى
حماتي الحبيبة
ردحذف:-))
ياااااااه ياشريف ، تعرف ؟!
أنا لولا أعرف مامتك (حماتي العزيزة ) ومعاشراها ماكنتش صدقت إن القصة دي حقيقية بجد
حقيقي والله ست ليها الجنة بجد :-)
الستات بتاعة زمان دي - سواء كانت مامتي أو مامتك و زيهم كتير - بجد مش هيتعوضوا ولا البركة اللي كانت على أيامهم واللي بتحسها أما بتقعد مع حد فيهم لغاية دلوقت .. تحس أن الدنيا لسه فيها ناس طيبة وبخير
تصدق إن أنا حسه إنه هيكون على شباك الأوضة قريب عش يمام فعلا ؟!
بركاتك ياحماتي الغالية
هههههههههههههههه
:-))
ربنا يرزقنا رضاهم علينا ومايحرمنا منهم ولا من وجودهم معانا ، ويجعل البركة ف رزقنا و ف ياسين ابننا اللهم أمين
وبرده كالعادة أسلوبك ف سرد الموضوع والأحداث رائع رائع رائع
دمت لي مبدعا متألقا .. ربنا يحفظك من كل سوء ويزيدك من نعيمه
:-))
سبحان الله
ردحذفوالله انا اصدق الاغرب من كده
علشان ربنا كبير قوي قوي
حكايه تقربنا من الله
ربنا يبارك في حضرتك
تحياتي
" ويرزقكم من حيث لا تعلمون "
ردحذفصدق الله العظيم ، الكريم ، واسع الفضل
ربنا يبارك ويحفظ والدتك ويخليهالك يارب ومايحرمكش من بركات دعواتها.
علي فكرة مرة جدتي حكتلي حكاية شبه كده ، لما أروح هخليها تحكيهالي بالظبط عشان بردو لازم تتكتب .
تحياتي لليمام ):
سبحان الله يرزق من يشاء
ردحذفالقصة دي حصلت زيها كده بس مش بالظبط مع واحده قريبتنا بس كانت تلاقي في الدرج خمسة جنيه
ومحدش يعرف دي كانت بتيجي منين
سبحان الله
أنا تاني ...جدتي بتقولي إن زمان كان فيه راجل غلبان يكنس الشارع ، فواحد عدي عليه وإداله ورقة مطبقة وقاله حطها تحت المخدة من غير ما تفتحها ، فالراخل فعلاً حطها ونام ، ولما صحي الصبح لقي جنيه تحت المخدة ، والجنيه كان جنيه ساعتها وفضل كده لغاية ما في يوم بيفتح الورقة لقي مكتوب :"ع "، فراح كتب "ع ع " ، لاقي تحت المخدة 2 جنيه ، فبقي يزود كل يوم ، لحد ما بقي غني أوي وبني جامع ومستشفي ، وبقي بيه أد الدنيا
ردحذفالحكاية دي أسمها " لأجل ع يكرملها ألف ع " .
جدتي بتقول إن الجامع في باب الشعرية واسمه الشعراني .
زمن المعجزات ):
سبحان الله :)
ردحذفما هو ربنا اسمه الكريم :)
.....
ردحذفالله على الروعه
ربنا جميل اوى ويمنح بلاحساب ويرزق بلا حساب
استمتعت جدا تسلم ايدك
تحياتى
القصه رائعه والسرد مميز ومشوق كالعاده وانا حقيقه اومن جدا بان كل يوم ياتى يرسل الله رزقه معه واومن جدا بان كل الابواب تفتح بايماننا وقناعتناوالست الوالده اكيد كلها خير بركه ..تذكرت فعلا حكايه جدتى لامى حيث اهلنا فى الاول يخبئون المونه والسمن فى غرفه تحت الارض تسمى سرداب حيث كانت كلما اخذت السمن من الجره تعود للامتلاء ولكن ما ان اخبرت شقيقاتها حتى نضبت جره السمن ..يارب يا باشا يوفقك ويرزقك من حيث لا تدرى
ردحذفريـــمـــاس
ردحذف:))
مساء الفل يا أستاذتنا ربنا يكرمك ويفرحك ويبارك فيكي ويجازيكي كل خير إن شاء الله على كلامك الجميل ودعائك الطيب
:))
ربنا فعلاً ما فيش أرحم ولا أحن ولا أعظم منه بجد بس ساعات احنا ما بنشوفش ده للأسف !
:))
نورتينا
هدير
ردحذف:))
الله
جبتي الخلاصة في كلمتين :))
ربنا يكرمك يا رب ويبارك فيكي ويفرحك ويحفظك
:))
نورتينا
قلـ حائر ـم
ردحذف:))
شكراً جزيلاً على تعليقك الجميل :))
ربنا يبارك فيكي ويكرمك يا رب ويسعدك
ويرزق الخير كله إن شاء الله
نورتينا
reemaas
ردحذف:))
إن شاء الله لما يكبر ياسين هاحكيها له .. بس هاحذف الجزء اللي أمي كانت بتحطي لي فيه الفلوس تحت المخدة D:
أيوه أنا عايز ابني يطلع مؤمن :))
نورتينا
ردحذفβent Pasha
:))
أنا قلتلك يا بنتي تقنعيها بالمشروع بتاعي علشان هي بتسمع كلامك وانتي اللي ما رضتيش :(
كنا هانكسب دهب والله .. الست دي بركة ولازم نستثمرها D:
أنا عملت لها أرضية حلوة هنا في المدونة نبدأ نتوسع بقى ونلعب على كبير :))
يعني مثلاً : دعوة عادية بخمسين جنيه .. دعوة سوبر بـ ميت جنيه .. دعوة بالزواج ب خمسميت جنيه .. دعوة بالزواج من عريس متريش وحليوة بـ ألف جنيه .. دعوة بالنجاح (حسب المادة) الأسعار تبدا من 500 جنية .. تمليسة ع الراس بغرض الشفاء بـ ميتين جنيه D:
.. وننوة بإننا مش هاندعي على حد علشان ربنا يبارك لنا .. وطبعاً دعاء ليلة القدر له سعر خاص :))
انتي بس اقنعيها وأنا هاخلليها تحج في السنة الواحدة عشر مرات :))))
وبرضه اللي هايجيب زبون عرقه محفوظ وخصم خاص للي علقوا على البوست ده :))
منور بزيادة يا قمر
كارولين فاروق
ردحذف:))
ونعم بالله يا أستاذتنا .. ربنا فعلاً ما فيش أعظم منه بجد :))
ربنا يبارك في حضرتك ويسعدك ويكرمك ويبارك فيكي ويجازيكي كل خير إت شاء الله
نورتينا
تصدق دمعت
ردحذفمهو أحنا ديمن بننسي
ان في رازق وحارس ورب كريم لينا كلنا
الحمد لله :)
ديدي
ردحذف:)
ربنا يبارك فيكي يا رب ويفرحك ويحفظك ويجازيكي كل خير إن شاء الله
:))
عارفه ؟؟ .. كل واحد فينا لو سرح بس مع نفسه شوية أكيد هايلاقي مواقف كتيرة أوي ربنا سترها فيها معاه في أوقات صعبة أوي كان فاقد الأمل فيها :))
وحكاية جدتك ووالدتي وغيرها من الحكايات أنا باسميها حكايات الزمن الجميل اللي الناس فيه كانت حكايات لوحدها :))
ربنا يبارك لك في جدتك ونصيحة مني حاولي تخلليها تحكي لك كل الحكايات اللي عندها لأن أكيد كل حكاية فيهم حكاية لوحدها وثانياً لأن ما اعتقدش إن لسه فيه حد بيعرف حكايات دلوقت :))
نورتينا
وصف الاحساس
ردحذف:))
سبحان الله العلي العظيم القادر على كل شيء .. ربنا ما فيش أعظم منه بجد .. أكيد الست دي كانت ثقتها في كرم ربنا مالوش حدود وكانت فعلاً متوكلة عليه حق التوكل ربنا يرزقنا جميعاً إن شاء الله ويبارك في حضرتك ويكرمك ويفرحك ويجازيكي كل خير اللهم آمين
:))
نورتينا
موناليزا
ردحذف:))
ونعم بالله يا أستاذة
كانت فيه كلمة قريتها كذا مرة على ضهر عربيات نقل : "يقيني بالله يقيني"
ربنا يكرمك ويسعدك ويحفظك ويجازيكي كل خير إن شاء الله
:))
نورتينا
momken
ردحذف:))
ربنا يعزك يا أستاذنا ويبارك في حضرتك ويكرمك ويبارك لك وويسعدك ويجازيك كل خير إن شاء الله
:))
سعيد جداً بتشريف حضرتك وشكراً جزيلاً على مرورك الكريم وتعليقك الطيب وتشجيعك
:))
نورتنا
غاده عيسى
ردحذف:))
ربنا يكرمك ويبارك لك ويرزقك ويسعدك ويجازيكي كل خير إن شاء الله
لسه برضه ممن شوية صغننين سامع قصة أشبة بقصتك من أخويا الجميل الباشمهندس / سيد عبد المنعم ربنا يكرمه : إن كان فيه واحد عنده ورشة تصنيع مشغولات جلدية .. أحذية وشنط وأحزمة وخلافة .. وكان راجل عجوز ومسن ومش قادر يشتغل لوحده وقرب يفلس .. ولأن الراجل ده كانت فيه صلة بينه وبين ربنا سبحانه وتعالى .. فكان بيفتح المحل كل يوم الصبح يلاقي الشغل المطلوب أتعمل وخلصان .. وفي يوم حب يعرف إيه السر .. بص من خرم الباب لقى فيه ناس كتير شغالين والمكن بتاع الورشة كله شغال .. فسمع واحد من اللي شغالين بيسأل واحد زميله عن المقص الكبير .. فالراجل بمنتهى العفوية راح رد عليه من بره وقال له هاتلاقيه تحت المكتب .. ومن ساعتها ما جاش حد تاني :))
ونقتبس جملة من مدونتك : الأمل لا يأتي من فراغ ولا يولد من عدم هناك قيمة إيمانية عميقة هي التوكل على الله :))
نورتينا
:))
sony2000
ردحذف:))
منورانا يا سوني ربنا يكرمك يا رب ويفرحك ويكرمك ويبارك لك ويحفظك ويجازيكي كل خير إن شاء الله
:))
ربنا كبير وما بينساش حد حتى لو نسيناه بنلاقيه دايماً فاكرنا وواقف جنبنا وبيكرمنا وبيسترنا وبيغفر لنا
:))
نورتينا