الواد بتاع جوجل
أيام ما الواحد كان لسه مستجد في الحقل التدويني وكنت عايز أنتشر بقى والناس تعرفني وتيجي تزورني في المدونة .. كنت باتنطط في المدونات زي البرص .. وما كنتش لسه أعرف حكاية الإشراف على التعليقات دي!! .. وفي مرة دخلت مدونة مش فاكر اسمها حالياً .. لقيت صاحبها بيحتفل بعيد ميلاده .. وناس كتيييييييرة أوي معلقين عنده .. فقلت أهنيه بالمناسبة السعيدة دي .. كتبت التعليق ودوست نشر التعليق .. ما لقيتوش!! .. كأنه اتبخر!! .. رحت كاتبه تاني!! .. برضه ما اتنشرش!! .. ساعتها شكّيت أن الكمبيوتر بتاعي متفيرس .. فعملت عليه سكان واتأكدت أنه نضيف .. ورحت ع المدونة أياها كتبت التعليق لتالت مرة !! .. وبرضه ما اتنشرش!! .. فضلت كده بتاع خمس ست مرات .. والعند بقى ركب معايا وقلت يا أنا يا التعليق بتاعي النهارده!! .. بعد كده قلت أكيد فيه حاجة غلط!! .. اشمعنى يعني تعليقات الناس التانية دي كلها تتنشر وأنا لأ؟؟ .. أكيد الواد اللي قاعد ع الكمبيوتر نوبتجي الليلة في قسم نشر التعليقات في شركة جوجل قاعد فاضي وبيتسلى عليا وبيشتغلني!! .. ماشي يا عم!! .. قشطة!! .. بس ما تزعلش!! .. وطقت في دماغي أشتمه!! .. ورحت شاتمه في التعليق شتايم محترمة وبألفاظ يعاقب عليها القانون!! .. واستنى إن بسلامته يتحمق ويرد عليا؟؟ .. أبداً!! .. ده إيه البرود ده؟؟ .. طبعاً ما هو قاعد في التكييف وبيقبض بالدولار من دمنا!! .. المهم دخلت شتمته تاني وتالت ورابع!! .. ما أنا باخد حقي بقى وبافش غلي!! .. ولازم الأشكال دي تتربى علشان يبطلوا يتسلوا علينا ويستهتروا بينا!! .. وعلشان يعرفوا إننا صايعين أوي ومدقدقين برضه وصاحيين لهم!!
تخيل حضرتك كده إن واحد ما يعرفكش ولا عمرك حتى سمعت عنه داخل بيقول لك في كذا تعليق : "كل سنة وأنت طيب وبألف خير وصحة وسعادة وراحة بال إن شاء الله وبإذن الله يكون عام جديد سعيد عليك مليان فرحة وهنا وسرور وتحقق فيه كل ما تتمناه" .. فتقوم تفرح أوي وتنشكح وبعدين تلاقيه سحب منك كل الأمنيات الطيبة دي فجأة واتحول وبقى بيشتمك في كذا تعليق برضه : "أنت أصلاً حيوان يا (....) يا ابن الـ (....) يا (....) يلعن (....) يا (....) .. يلعن أبو اللي قعدكم على جهاز يا ولاد الـ (....) يا بهايم !! .. لو أنت راجل من ضهر راجل تنشر تعليقاتي في المدونة !! .. إنما أنت أصلاً مش راجل يا ابن الــ (....) طب أنا قاعد لك بقى يا واطي وفاضي لك !!
المهم بعد ما هديت كده واستريحت واستنفذت كل مخزون الشتايم اللي كان عندي لدرجة إني بقيت بآلف شتايم يا جدع!! .. دخلت على مدونة تانية وكتبت تعليق على موضوع فيها .. وأنا بادوس نشر التعليق لمحت بالصدفة جملة "تم حفظ تعليقك وسيتم نشره بعد الموافقة عليه"!! ..
-- مش أفهم أنا بقى ؟؟ .. لأ . أبداااااً !! --
قلت ده قاعد لي في المدونات كلها بقى وبيعند معايا!! .. وهو أنا إن شاء الله بقيت تحت رحمة مزاج سيادته علشان ينشر لي التعليق اللي يعجبه واللي ما يعجبوش ما ينشروش؟؟ .. وهو مين أصلاً علشان يقرا تعليقات الناس ويحكم عليها؟؟ .. شوية بشوية ألاقيه مقرصن ع الكمبيوتر بتاعي ويدمرهولي!! .. الواد ده لازم أوقفه عند حده علشان يبطل يعمل كده مع حد تاني!! .. ووالله العظيم ما أنا ساكت له المرة دي الواد ابن الـ (....) .. ولسه هاشتمه افتكرت إن المدونة اللي أنا فيها دي بتاعة زميلة وما يصحش برضه إنها تشوف الألفاظ دي عندها!! .. طب أعمل إيه؟؟ .. أعمل إيه؟؟ .. رحت راجع له تاني ميدان المعركة (المدونة الأولانية اللي صاحبها كان بيحتفل فيها بأسوأ أعياد ميلاده!!) .. وطبق الأصل العلقة الأولانية!! .. يعني أنا في المحضر الأولاني قلتلهم أنا رمضان السكري أغير أقوالي تاني إزاي؟؟ .. كتبت له: "على فكرة يا ابني أنت!! .. بطّل استعباط أحسن لك!! .. أنت عارف كويس أوي إني أقصدك أنت بالشتيمة اللي فاتت دي كلها مش حد تاني!! .. فما تعملش عبيط وتعمل كأن الكلام مش عليك!! .. وما تفتكرش إن بالسكوت بتاعك ده هاتوقع بيني وبين أي حد تاني محترم يكون بيقرا هنا وبيتابع المدونة!! .. أو تكون فاكر مثلاً إني بالقح على حد تاني!! .. لأاااا .. أنا أقصدك أنت يا (....) يا ابن الـ (....) يا (....) يلعن (....) يا (....) يا واطي!! .. أنا قاعد لك هنا ومش ماشي من هنا إلا أما ترد عليا!! .. وابقى وريني بقى هاتعمل إيه!!".
مش فاكر مين بصراحة ربنا يكرمه فهمني موضوع الإشراف على التعليقات ده بعد كده بفترة؟؟ .. ومش عارف ليه لما حاولت أدخل المدونة دي تاني لقيت صاحبها فاتحها للمدعويين فقط؟؟ .. يكونش زعل من حاجة؟؟ :D:D
مش كان واجب برضه عليه يعزمني علشان أقول له كل سنة وأنت طيب :))
طب ما حدش فيكوا عيد ميلاده قرب وعايزني أهنيه بما لا يخالف شرع الله ؟؟
هههههههههههه
ردحذفياساتر يارب ع الاحراج ده ياجدع ؟؟
ده أنا قاعدة حسه إني اتكسفتلك سلف ع الموقف الأوفر ده ( وش مكسوف )
هههههههههههه
مش عارفه أنا صح هو زعل ليه ؟؟
صحيح : خير تعمل شرا تلقى D:
لأ بس تسلم الأيادي ع الابداع اللامتناهي ده .. وربنا يزيدك كمان وكمان يارب ويباركلي فيك
:))
True story :D
ردحذفبس عجبني فيك أصرارك :D
ههههههههههههههههههههههههههههههههه ياربنا على الذكاااااء
ردحذفده الراجل زمانه اتعقد جدا يا اخى
بس سيبك عجبنى فيك اصرارك وطولة بالك يا باشا :D
βent Pasha
ردحذف:))
نياهاهاهاهاها
مش عارف أنا البلاوي دي بيجيبوها منين ؟؟ فيه أماكن بتعلم كمبيوتر يروحوا ياخدوا فيها كورسات بدل ما هما قارفينا كده D:
ربنا يبارك لي فيكي ولا يحرمني منك أبداً يا رب
:))
لأ والجلالة واخداك أوي..وتخيلت إن فيه بني آدم حاطّك في دماغه ومش عايز ينشر تعليقاتك..
ردحذفمش ممكن بجد..!
انت ازاي كده؟ D:
صاحب المخل
ردحذف:))
قال له بتفهم في البيجو ؟؟
قال له أه
قال له طب تعالى وقفها
هههههههههههههههه
والله يا عم كنت باهنيه بس الواد بتاع جوجل ده اللي دخل في الخط :))
reemaas
ردحذف:))
الأول على الدفعة D:
طب أنا راضي ذمتك يا دكتورة .. أسيب يعني واحد زي ده يتحكم فينا ؟؟
مش الموجود فينا بيسد عن الباقيين ؟؟
هههههههههههههههههه
بس أكيد زعل صح ؟؟
D:
يمامة شاردة
ردحذف:))
يا أستاذة الأشكال دي أنا عارفها كويس ومش معنى إن احنا موتنا المجتمع يبقى الحرامي هايفلت أبداً وراه وراه برضه :))
* مش ناوية سموك ترضي علينا بقى وتفتحي التعليقات ؟؟
أصل الواحد ما بيعرفش يعمل أكتر من لايك واحد بس :))
وما تخافيش لو عملتي إشراف أنا هاعرف من غير ما تقولي D:
:)
ردحذفكويس ان احنا عرفنا بعض بعد موضوع الاشراف على التعليقات دا :)))
عموما بتحصل ؛ بس الاجمل اصرارك عشت و جاملت يا فندم :)
هدير
ردحذف:))
هههههههههههههههههههههههههههههههههه
مش ممكن بجد ع الإفيه موتني من الضحك :))
على فكرة بجد والله العظيم انتي لو كتبتي ساخر هاتعدي :))
وبعدين يا جماعة انتوا ظالمنّي !!
أنا كنت باختبره وباشوفه هايعرف ينشر التعليقات لوحده ولا لأ ؟؟
D:
ولله انا عيد ميلادي قرب- بس الحقيقه انا قافل التعليقات خالص
ردحذفعارف ليه؟
لأني مش بحب الاشراف- يعني يا اما اترك الامور مفتوحه أو اني اقفلها تماما
لأن الاشراف ده بيوحي للي ادامي أن انا براجع عليه
بس فيه ناس عندهم الحق في الموضوع ده لأن الشتايم أصبحت شيء عادي
انا عن نفسي اغلقت التعليقات من بعد الثوره لإختلافي الكبير مع معظم اصدقائي- وفيه منهم كتير بطلوا يعرفوني أصلا- بس لعلمك انا ولا يهمني- انا مش منتظر حد
كفايه عليا الكام واحد اللي بييجوا عندي وخلاص- زمان في الاول كان نفسي يبقى عندي المئات- لكن دلوقت خلاص
الواحد يكتفي بالموجود
كانت عجبتني جمله حلوه للمهندس سيد (هسهس) لما واحد مرة قاله انت عاوز الناس تيجي تعلق عندك- راح رد عليه وقاله انا لا منتظرك ولا منتظر غيرك!
خليه يفتحها للمدعوين
ومبروك عليه المدعوين
لورنس العرب
ردحذف:))
كل سنة وأنت طيب يا كبير وبألف خير وصحة وسعادة وراحة بال إن شاء الله وبإذن الله يكون عام خير وبركة عليك تحقق فيه كل اللي تتمناه ربنا يطمننا عليك يا معتز ويبارك لك ويرزقك الزوجة الصالحة إن شاء الله
* يا أخي سبحان الله رغم إني ما باحبش السياسة ولا باطيقها بس باحب أتابعك جداً .. أسلوبك أصلاً بيموتني من الضحك بجد :))
وبعدين يا جدع ما الجملة شارحه نفسها آهي !! .. هي بس اتكتبت غلط .. كان مفروض تتكتب كده : "متجزراً (من الجزارة يعني هايدبحك بالساطور لو خالفته) في طـُربة (لزوم السـُطل) الوعي (وده لازم علشان تبقى مصحصح وأنت بتتسطل أحسن تتقفش) الجمعي (اللي هو مجموع اللي فات ده كله) !! .. مش عارف إيه الغريب فيها ؟؟
D:
الباشمهندس / سيد ده عايز له مدونة بحالها علشان أتكلم عنه وبرضه مش هاوفيه حقه ربنا يا رب ييسر له حاله ويصلح له شأنه كله اللهم آمين
افتح التعليقات .. الونس حلو برضه :))
ربنا يديم بيننا المعروف وأتمنى إن شاء الله أقابلك قريب ويا ريت الباشمهنس / سيد يكون موجود ياااااااه ع الجمال
:))
هههههههه
ردحذفمش عارفة أقولك حاجة غير أنى أشكرك لإنك ضحكتنى بجد
دائماً أسلوبك ممتع ومشوق
استمر :)
موناليزا
ردحذف:))
ربنا يكرمك يا أستاذة ويجازيكي كل خير إن شاء الله على كلامك الرقيق وتشجيعك لينا
:))
بنفرح من القلب والله لما اللي بنكتبه بيعجب حضراتكم
:))
آآآآآآآآآآآآآآآآآه
ردحذفانت شفت موضوع "متجزرا في تربة الوعي الجمعي" - طيب ده انت أحمد ربنا أني مقلتش باقي المقاله كان مكتوب فيها ايه
انا طالب من الله -ولا يكتر على الله- الرحمه مش أكتر
وصدقني مش عاوز حاجه تانيه من الدنيا خالص
اما بالنسبه للمقابله فأنا متأكد اننا سنتقابل في يوم
امتى الله أعلم- لكن هانتقابل غن شاء الله
وخد بالك من الوعي الجمعي
لورنس العرب
ردحذف:))
يا عم الحمد لله إني ما شفتهاش :))
أنا أصلاً ما باشتريش جرايد ولا باتفرج على تليفزيون .. ثم إن أنا ما عنديش تليفزيون أساساً والحمد لله :))
إن شاء الله نتقابل على خير يا غالي بجد أنا أتشرف والله
:))
وأكيد هاخد بالي م الوعي (الجمعي) بس يا خوفي يقلب ع (الضربي) بعد كده !!
نورت الدنيا كلها