ثانوية عامة
- اليومين دول عشان المراجعات بتاخد كل يوم ستين جنيه للدروس !! .. ده غير الملازم ومصروف إيدها !! .. والله نزلت من البيت النهارده من غير ولا مليم وجيت مشي !! .. عشان أديها عشرة جنيه تركب بيهم توك توك في الجو الحر ده ، وتشرب لها كوباية عصير ولا حاجة ساقعة !! .. من كام يوم برضه وأنا راجع اتصلت بيا ع المحمول وقالت لي : يا بابا أنا عاوزه آكل فراخ مشوية ع الفحم ، عشان كنت ماشيه مع صحابي ودخلوا ياكلوا فراخ في محل وأنا ما كانش معايا فلوس فـ روحت ع البيت !! .. يومها والله كانت آخر ميت جنية في جيبي ، قلت حرام برضة أكسر بخاطر البت وأحرمها من حاجة نفسها فيها .. رحت محل الفراخ ألاقيلك الفرخة المشوية بـأربعة وتلاتين جنيه !! .. وفراخ مستوردة كمان مش البلدي بتاعتنا !! .. جبت فرختين ، آدي كده سبعين جنيه .. وأنا ماشي لقيت لك راجل بتاع بطيخ واقف على جنب ، باسأله : بكام يا عم الواحدة ؟؟ .. قال لي : بعشرة جنيه !! .. رحت جايب بطيختين ، اللهم صلي ع النبي قد كدهوه ، طلعوا زي العسل .. وأنا على باب البيت ، راحت البت الصغيرة متصلة بيا عشان أحول لها رصيد من السنترال !! .. رحت محول تلاتة جنيه لكل بنت !! .. آدي يا عم الميت جنيه ، خلصت في طقة !! .. وأنت عارف ؟؟ بقيت أنا وأمهم نمصمص الأجنحة وناكل وراهم هههههههه ، ياللا الحمد لله .. لسه قبلها برضه بكام يوم ، البت الكبيرة خدت تلتمية وخمسين جنيه عشان تجيب لبس تِحضر بيه شبكة واحدة صاحبتها .. أمها تقول لك يمكن حد يشوفها في الفرح ويتقدملها !! .. مع إن جاني ابن واحد جارنا من مدة وكلمني عليها بس أنا ما وافقتش عشان معاه دبلوم .. رغم إنه مبسوط مادياً .. أبوه عنده معرض سيراميك كبير ومشغله معاه .. وباني بيت كبير خمس أدوار وعامل لكل عيل من عياله شقة ومشطبها له .. وأمها ساعتها اتخانقت معايا عشان ما وافقتش !! .. قلت لها : عشان البت ما تحسش في يوم إن إحنا ظلمناها وجوزناها لواحد أقل منها في الشهادة ، أو تبص لواحدة من أخواتها بعد كده لو واحدة فيهم اتجوزت واحد معاه شهادة عالية .. البنات أصلها بتبص لبعض وبتغير !! .. وقلت لها : ما تعرّفيش البت بالموضوع عشان ما تتعلقش !! .. بعدها بكام يوم .. لما رجعوا من فرح صاحبتها .. لقيتلك أمها بتقول لي : كان معاك حق إنك ما وافقتش على بتاع السيراميك !! .. أصل صاحبتها اتخطبت لواحد محاسب .. قلت لها : صدقتي بقى إن كان عندي حق ؟؟ .. هو أنا يعني هاكره لها الخير ؟؟ .. احم .. وأنت لو فيه قدامك جدع ابن حلال كده ومحترم وتعرفه عاوز يتجوز ابقى قول له على (....) ولا أنت ما بتحبش تتصدر في المواضيع دي ؟؟ .. والله الواحد ما هايرتاح إلا أما يسترهم ويتطمن عليهم في بيوتهم .. ربنا يعدلها إن شاء الله .. متهيألي ما شفتش أنت بقى آخر العنقود صح ؟؟ .. طالعة تانية إعدادي .. ما تعرفش تاخد معاها لا حق ولا باطل من كتر اللماضة !! .. هههههههه .. ياااااه الساعة بقت واحدة ونُص ؟؟ .. لما اتصل بالبت أشوفها خلصت الدرس ولا لأ ؟؟
ماشاء الله ربنا يعينك عليهم يا عن الحج
ردحذفاصل الثانويه العامه دي بقت مشكله كل يوم الصبح
اﻻ البت اخر العنقود دي عثثثل
ربنا يبارك فيهم
ربنا يخليك وتدفع كمان وكمان
ردحذفويعينك على الجميع
البلد العيشه فيها اصبحت غاليه ومرتفعه في كل شيء
فعلا كان الله في عون أصحاب البيوت
الف هنا وشفا ع البطيخ...انا اكني شبعت من وصفها....كلامك جميل وع السكين يعني يخش القلب دوغري...ربنا يعينك ويفرحك بيهم...بس حكاية الدبلوم مش مهمة ..المهم يكون واحد محترم ومؤدب وابن ناس وده اهم... في ناس كتيرة متخرجة م اجامعة واسلوبهم منفر...متنسناش في الدعوة لووافقت..
ردحذفانا مسمياها وحمة الثانوية العامة
ردحذف:)))
وخلاص اهو بدل ما كانت سنتين بقت سنة واحدة
تصور انى لما بقرا لك تدوينه بتخيل كل حاجه الحاره والشارع والناس والزحمه وهذا بحد ذاته ابداع انت شرحت عده صعوبات فى سطور قليله وجعلتنا ندرك معاناه الطلاب والناس اللى بيكدحوا من اجل لقمه العيش ...ربنا يكرمك وتشوف البنات متخرجين ومتزوجين وربنا يكمل لك فرحتك بيهم ويسعدهم ..
ردحذفمحبه وتوليب
كان الله في العون
ردحذفتحياتي ودعواتي بالنجاح ):
كل جملة بـمشهد في دماغي :)
ردحذفأحلى مافيها الواقعية من غير أي مبالغة :))
بجد رائعة :)
البوست على فكرة يوجع ويبكى ميضحكش
ردحذفده الحال اللى وصلناله بقت الاكله بتفكير وشغلانه
حسبنا الله ونعم الوكيل
لكن عشان كمان كتر الكبت يولد الانفجار لازم نضحك حتى وسيرة الثانوية العامية موجوده
جميل البوست بجد
دمت بخير
ربنا يطمنك عليهم ويرزقنا واياهم الزوج الصالح ان شاء الله
ردحذفويرزقك من حيث لا تحتسب الحلال الطيب
بارك الله فيك
الموضوع جميل جدا
ردحذفبس درس ايه اللي بيخلص واحدة ونص << انا توقعتها بعد منتصف الليل معرفش ليه
وصف الاحساس
ردحذف:))
ربنا يكرم حضرتك ويبارك لك في أسرتك الكريمة .. فعلاً الثانوية العامة دي بلاء .. ربنا ينجح الجميع :))
نورتينا
لورنس العرب
ردحذف:))
ربنا يكرمك يا معتز يا أخويا ويرزقك الزوجة الصالحة إن شاء الله ونفرح بأولادك يا رب :))
نورتنا يا كبير
Tarkieb
ردحذف:))
الله يهنيك يا معلمي .. ليك عليا عزومة بطيخ معتبرة لما تنزل مصر إن شاء الله :))
"حكاية الدبلوم مش مهمة ..المهم يكون واحد محترم ومؤدب وابن ناس وده الأهم." .. فعلاً متفق معاك في الرأي ده .. بس فيه بعض الناس للأسف ما بتعترفش بده !
وبالنسبة للعزومة يا كبير إن شاء الله أول ما اتعزم هاعزمك على طوووووووول
نورتنا
شمس النهار
ردحذف:))
معاكي حق والله يا أستاذتنا .. وحمة وأي وحمة دي وصمة عار :D
وبعدين يخللوها سنتين يخللوها سنة المناهج هي هي ، والطلبة بتتخرج بصمجية :))
نورتينا
ghada issa
ردحذف:))
والله يا فندم دي شهادة أعتز بيها جداً من زميلة فاضلة ومبدعة زي حضرتك :))
شكراً لدعوتك الكريمة ربنا يتقبل يا رب ويفرح صاحب البوست ببناته اللهم آمين
نورتينا
ديدي
ردحذف:))
ربنا يعينه يا رب على تربيتهم وينجحهم له .. شكراً لدعوتك الكريمة
نورتينا
Israa' A. Youssuf
ردحذف:))
ربنا يسعدك يا دكتورة وينجحك ويوفقك إن شاء الله .. أسعدتيني جداً بتشريفك وتشجيعك
نورتينا
رؤى عليوة
ردحذف:))
والله يا أستاذة آهو الكل بيسعى وربنا بيرزق والحمد لله على كل شيء :))
أسعدتينا جداً بتشجيعك وتعليقك الجميل .. ربنا يكرمك يا رب ويحفظك
نورتينا
zeze
ردحذف:))
ألف شكر على دعوتك الكريمة ربنا يتقبل يا رب ويعين أبوهم عليهم ويفرحه بيهم ويعدل حال الجميع بإذن الله
وإن شاء الله ربنا يرزق الصالحين بالصالحات ويفرح الجميع :))
نورتينا
E73
ردحذف:))
شكراً لذوقك ربنا يكرمك يا رب :))
لأ أنا كنت أقصد الساعة واحدة ونص الضهر .. إنما واحدة ونص بالليل دي كنا احنا بنخلص الدرس بتاعنا أيام الثانوية العامة :))
نورتينا
بسم الله ما شاء الله
ردحذفالله يعينك ويقدرك على الحمل ده
قلبي عندك
بس الأسلوب حقيقي ممتع وشيق، أُقر وأعترف بكده :-)
ايه يا عم التضحية دي؟
ردحذففي إيه لكل ده؟
امصمص الأجنحة ورا العيال؟
ده أنابقترح مصمصة عضمهم احسن، بعدين ليه اصرف كل ده على الثانوية العامة و انا عارفة انهم مش هيجيبوا المجموع العالي اصلاً. و الكلية مالهاش تلاتين اي لزمة و هيشتغلوا بأي حاجة تانية غير الدراسة.
يالا بس الحوار حسسني اني بسمع مواطن مصر اسمر و اصلع و قصير و تخين و شايل البطيخة و مبتسم ابتسامة مصرية اصيلة قوي
ربنا يعين الناس على البلد دي
يا مراكبي
ردحذف:))
ربنا يكرمك ويحفظك يا أستاذنا وحقيقي نورتنا وشرفتنا بتعليقك الجميل ومرورك الكريم
دمت في خير وسعادة
سنكوح شنن لملوم سامي
ردحذف:))
ربنا يرزق الجميع ويعينهم على تربية أولادهم ويفرحهم بيهم ويحفظهم لهم من كل سوء آمين
اسمحيلي أثني على فراستك بجد :)
لأن في الحقيقة مواصفات صاحب البوست زي ما حضرتك ذكرتي بالظبط :)
شرفتينا